ఋభుగీతా ౨౪ ॥ అహంబ్రహ్మ ప్రకరణ నిరూపణమ్ ॥

ఋభుః -

• పునః పునః పరం వక్ష్యే ఆత్మనోఽన్యదసత్ స్వతః ।
• అసతో వచనం నాస్తి సతో నాస్తి సదా స్థితే ॥ ౧॥
• బ్రహ్మాభ్యాస పరస్యాహం వక్ష్యే నిర్ణయమాత్మనః ।
• తస్యాపి సకృదేవాహం వక్ష్యే మఙ్గలపూర్వకమ్ ॥ ౨॥
• సర్వం బ్రహ్మాహమేవాస్మి చిన్మాత్రో నాస్తి కిఞ్చన ।
• అహమేవ పరం బ్రహ్మ అహమేవ చిదాత్మకమ్ ॥ ౩॥
• అహం మమేతి నాస్త్యేవ అహం జ్ఞానీతి నాస్తి చ ।
• శుద్ధోఽహం బ్రహ్మరూపోఽహమానన్దోఽహమజో నరః ॥ ౪॥var was నజః
• దేవోఽహం దివ్యభానోఽహం తుర్యోఽహం భవభావ్యహమ్ ।
• అణ్డజోఽహమశేషోఽహమన్తరాదన్తరోఽస్మ్యహమ్ ॥ ౫॥
• అమరోఽహమజస్రోఽహమత్యన్తపరమోఽస్మ్యహమ్ ।
• పరాపరస్వరూపోఽహం నిత్యానిత్యరసోఽస్మ్యహమ్ ॥ ౬॥
• గుణాగుణవిహీనోఽహం తుర్యాతుర్యరసోఽస్మ్యహమ్ ।
• శాన్తాశాన్తవిహీనోఽహం జ్ఞానాజ్ఞానరసోఽస్మ్యహమ్ ॥ ౭॥
• కాలాకాలవిహీనోఽహమాత్మానాత్మవివర్జితః ।
• లబ్ధాలబ్ధాదిహీనోఽహం సర్వశూన్యోఽహమవ్యయః ॥ ౮॥
• అహమేవాహమేవాహమనన్తరనిరన్తరమ్ ।
• శాశ్వతోఽహమలక్ష్యోఽహమాత్మా న పరిపూర్ణతః ॥ ౯॥
• ఇత్యాదిశబ్దముక్తోఽహం ఇత్యాద్యం చ న చాస్మ్యహమ్ ।
• ఇత్యాదివాక్యముక్తోఽహం సర్వవర్జితదుర్జయః ॥ ౧౦॥
• నిరన్తరోఽహం భూతోఽహం భవ్యోఽహం భవవర్జితః ।
• లక్ష్యలక్షణహీనోఽహం కార్యహీనోఽహమాశుగః ॥ ౧౧॥
• వ్యోమాదిరూపహీనోఽహం వ్యోమరూపోఽహమచ్యుతః ।
• అన్తరాన్తరభావోఽహమన్తరాన్తరవర్జితః ॥ ౧౨॥
• సర్వసిద్ధాన్తరూపోఽహం సర్వదోషవివర్జితః ।
• న కదాచన ముక్తోఽహం న బద్ధోఽహం కదాచన ॥ ౧౩॥
• ఏవమేవ సదా కృత్వా బ్రహ్మైవాహమితి స్మర ।
• ఏతావదేవ మాత్రం తు ముక్తో భవతు నిశ్చయః ॥ ౧౪॥
• చిన్మాత్రోఽహం శివోఽహం వై శుభమాత్రమహం సదా ।
• సదాకారోఽహం ముక్తోఽహం సదా వాచామగోచరః ॥ ౧౫॥
• సర్వదా పరిపూర్ణోఽహం వేదోపాధివివర్జితః ।
• చిత్తకార్యవిహీనోఽహం చిత్తమస్తీతి మే న హి ॥ ౧౬॥
• యత్ కిఞ్చిదపి నాస్త్యేవ నాస్త్యేవ ప్రియభాషణమ్ ।
• ఆత్మప్రియమనాత్మా హి ఇదం మే వస్తుతో న హి ॥ ౧౭॥
• ఇదం దుఃఖమిదం సౌఖ్యమిదం భాతి అహం న హి ।
• సర్వవర్జితరూపోఽహం సర్వవర్జితచేతనః ॥ ౧౮॥
• అనిర్వాచ్యమనిర్వాచ్యం పరం బ్రహ్మ రసోఽస్మ్యహమ్ ।
• అహం బ్రహ్మ న సన్దేహ అహమేవ పరాత్ పరః ॥ ౧౯॥
• అహం చైతన్యభూతాత్మా దేహో నాస్తి కదాచన ।
• లిఙ్గదేహం చ నాస్త్యేవ కారణం దేహమేవ న ॥ ౨౦॥
• అహం త్యక్త్వా పరం చాహం అహం బ్రహ్మస్వరూపతః ।
• కామాదివర్జితోఽతీతః కాలభేదపరాత్పరః ॥ ౨౧॥
• బ్రహ్మైవేదం న సంవేద్యం నాహం భావం న వా నహి ।
• సర్వసంశయసంశాన్తో బ్రహ్మైవాహమితి స్థితిః ॥ ౨౨॥
• నిశ్చయం చ న మే కిఞ్చిత్ చిన్తాభావాత్ సదాఽక్షరః ।
• చిదహం చిదహం బ్రహ్మ చిదహం చిదహం సదా ॥ ౨౩॥
• ఏవం భావనయా యుక్తస్త్యక్తశఙ్కః సుఖీభవ ।
• సర్వసఙ్గం పరిత్యజ్య ఆత్మైక్యైవం భవాన్వహమ్ ॥ ౨౪॥
• సఙ్గం నామ ప్రవక్ష్యేఽహం బ్రహ్మాహమితి నిశ్చయః ।
• సత్యోఽహం పరమాత్మాఽహం స్వయమేవ స్వయం స్వయమ్ ॥ ౨౫॥
• నాహం దేహో న చ ప్రాణో న ద్వన్ద్వో న చ నిర్మలః ।
• ఏష ఏవ హి సత్సఙ్గః ఏష ఏవ హి నిర్మలః ॥ ౨౬॥
• మహత్సఙ్గే మహద్బ్రహ్మభావనం పరమం పదమ్ ।
• అహం శాన్తప్రభావోఽహం అహం బ్రహ్మ న సంశయః ॥ ౨౭॥
• అహం త్యక్తస్వరూపోఽహం అహం చిన్తాదివర్జితః ।
• ఏష ఏవ హి సత్సఙ్గః ఏష నిత్యం భవానహమ్ ॥ ౨౮॥
• సర్వసఙ్కల్పహీనోఽహం సర్వవృత్తివివర్జితః ।
• అమృతోఽహమజో నిత్యం మృతిభీతిరతీతికః ॥ ౨౯॥
• సర్వకల్యాణరూపోఽహం సర్వదా ప్రియరూపవాన్ ।
• సమలాఙ్గో మలాతీతః సర్వదాహం సదానుగః ॥ ౩౦॥
• అపరిచ్ఛిన్నసన్మాత్రం సత్యజ్ఞానస్వరూపవాన్ ।
• నాదాన్తరోఽహం నాదోఽహం నామరూపవివర్జితః ॥ ౩౧॥
• అత్యన్తాభిన్నహీనోఽహమాదిమధ్యాన్తవర్జితః ।
• ఏవం నిత్యం దృఢాభ్యాస ఏవం స్వానుభవేన చ ॥ ౩౨॥
• ఏవమేవ హి నిత్యాత్మభావనేన సుఖీ భవ ।
• ఏవమాత్మా సుఖం ప్రాప్తః పునర్జన్మ న సంభవేత్ ॥ ౩౩॥
• సద్యో ముక్తో భవేద్బ్రహ్మాకారేణ పరితిష్ఠతి ।
• ఆత్మాకారమిదం విశ్వమాత్మాకారమహం మహత్ ॥ ౩౪॥
• ఆత్మైవ నాన్యద్భూతం వా ఆత్మైవ మన ఏవ హి ।
• ఆత్మైవ చిత్తవద్భాతి ఆత్మైవ స్మృతివత్ క్వచిత్ ॥ ౩౫॥
• ఆత్మైవ వృత్తివద్భాతి ఆత్మైవ క్రోధవత్ సదా ।var was వృత్తిమద్భాతి
• ఆత్మైవ శ్రవణం తద్వదాత్మైవ మననం చ తత్ ॥ ౩౬॥
• ఆత్మైవోపక్రమం నిత్యముపసంహారమాత్మవత్ ।
• ఆత్మైవాభ్యాం సమం నిత్యమాత్మైవాపూర్వతాఫలమ్ ॥ ౩౭॥
• అర్థవాదవదాత్మా హి పరమాత్మోపపత్తి హి ।
• ఇచ్ఛా ప్రారభ్యవద్బ్రహ్మ ఇచ్ఛామారభ్యవత్ పరః ॥ ౩౮॥var was ప్రారబ్ధవద్
• పరేచ్ఛారబ్ధవద్బ్రహ్మా ఇచ్ఛాశక్తిశ్చిదేవ హి ।
• అనిచ్ఛాశక్తిరాత్మైవ పరేచ్ఛాశక్తిరవ్యయః ॥ ౩౯॥
• పరమాత్మైవాధికారో విషయం పరమాత్మనః ।
• సంబన్ధం పరమాత్మైవ ప్రయోజనం పరాత్మకమ్ ॥ ౪౦॥
• బ్రహ్మైవ పరమం సఙ్గం కర్మజం బ్రహ్మ సఙ్గమమ్ ।
• బ్రహ్మైవ భ్రాన్తిజం భాతి ద్వన్ద్వం బ్రహ్మైవ నాన్యతః ॥ ౪౧॥
• సర్వం బ్రహ్మేతి నిశ్చిత్య సద్య ఏవ విమోక్షదమ్ ।
• సవికల్పసమాధిస్థం నిర్వికల్పసమాధి హి ॥ ౪౨॥
• శబ్దానువిద్ధం బ్రహ్మైవ బ్రహ్మ దృశ్యానువిద్ధకమ్ ।
• బ్రహ్మైవాదిసమాధిశ్చ తన్మధ్యమసమాధికమ్ ॥ ౪౩॥
• బ్రహ్మైవ నిశ్చయం శూన్యం తదుక్తమసమాధికమ్ ।
• దేహాభిమానరహితం తద్వైరాగ్యసమాధికమ్ ॥ ౪౪॥
• ఏతద్భావనయా శాన్తం జీవన్ముక్తసమాధికః ।
• అత్యన్తం సర్వశాన్తత్వం దేహో ముక్తసమాధికమ్ ॥ ౪౫॥
• ఏతదభ్యాసినాం ప్రోక్తం సర్వం చైతత్సమన్వితమ్ ।
• సర్వం విస్మృత్య విస్మృత్య త్యక్త్వా త్యక్త్వా పునః పునః ॥ ౪౬॥
• సర్వవృత్తిం చ శూన్యేన స్థాస్యామీతి విముచ్య హి ।
• న స్థాస్యామీతి విస్మృత్య భాస్యామీతి చ విస్మర ॥ ౪౭॥
• చైతన్యోఽహమితి త్యక్త్వా సన్మాత్రోఽహమితి త్యజ ।
• త్యజనం చ పరిత్యజ్య భావనం చ పరిత్యజ ॥ ౪౮॥
• సర్వం త్యక్త్వా మనః క్షిప్రం స్మరణం చ పరిత్యజ ।
• స్మరణం కిఞ్చిదేవాత్ర మహాసంసారసాగరమ్ ॥ ౪౯॥
• స్మరణం కిఞ్చిదేవాత్ర మహాదుఃఖం భవేత్ తదా ।
• మహాదోషం భవం బన్ధం చిత్తజన్మ శతం మనః ॥ ౫౦॥
• ప్రారబ్ధం హృదయగ్రన్థి బ్రహ్మహత్యాది పాతకమ్ ।
• స్మరణం చైవమేవేహ బన్ధమోక్షస్య కారణమ్ ॥ ౫౧॥
• అహం బ్రహ్మప్రకరణం సర్వదుఃఖవినాశకమ్ ।
• సర్వప్రపఞ్చశమనం సద్యో మోక్షప్రదం సదా ।
• ఏతచ్ఛ్రవణమాత్రేణ బ్రహ్మైవ భవతి స్వయమ్ ॥ ౫౨॥
• భక్త్యా పద్మదలాక్షపూజితపదధ్యానానువృత్త్యా మనః
• స్వాన్తానన్తపథప్రచారవిధురం ముక్త్యై భవేన్మానసమ్ ।
• సఙ్కల్పోజ్ఝితమేతదల్పసుమహాశీలో దయామ్భోనిధౌ
• కశ్చిత్ స్యాచ్ఛివభక్తధుర్యసుమహాశాన్తః శివప్రేమతః ॥ ౫౩॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే అహం బ్రహ్మప్రకరణనిరూపణం నామ చతుర్వింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com