ఋభుగీతా ౨౭ ॥ ఆనన్ద-రూపత్వ నిరూపణ ప్రకరణమ్ ॥
ఋభుః -
- వక్ష్యే ప్రకరణం సత్యం బ్రహ్మానన్దమనోమయమ్ ।
- కార్యకారణనిర్ముక్తం నిత్యానన్దమయం త్విదమ్ ॥ ౧॥
- అక్షయానన్ద ఏవాహమాత్మానన్దప్రకాశకమ్ ।
- జ్ఞానానన్దస్వరూపోఽహం లక్ష్యానన్దమయం సదా ॥ ౨॥
- విషయానన్దశూన్యోఽహం మిథ్యానన్దప్రకాశకః ।
- వృత్తిశూన్యసుఖాత్మాహం వృత్తిశూన్యసుఖాత్పరమ్ ॥ ౩॥
- జడానన్దప్రకాశాత్మా ఆత్మానన్దరసోఽస్మ్యహమ్ ।
- ఆత్మానన్దవిహీనోఽహం నాస్త్యానన్దాత్మవిగ్రహః ॥ ౪॥
- కార్యానన్దవిహీనోఽహం కార్యానన్దకలాత్మకః ।
- గుణానన్దవిహీనోఽహం గుహ్యానన్దస్వరూపవాన్ ॥ ౫॥
- గుప్తానన్దస్వరూపోఽహం కృత్యానన్దమహానహమ్ ।
- జ్ఞేయానన్దవిహీనోఽహం గోప్యానన్దవివర్జితః ॥ ౬॥
- సదానన్దస్వరూపోఽహం ముదానన్దనిజాత్మకః ।
- లోకానన్దో మహానన్దో లోకాతీతమహానయమ్ ॥ ౭॥
- భేదానన్దశ్చిదానన్దః సుఖానన్దోఽహమద్వయః ।
- క్రియానన్దోఽక్షయానన్దో వృత్త్యానన్దవివర్జితః ॥ ౮॥
- సర్వానన్దోఽక్షయానన్దశ్చిదానన్దోఽహమవ్యయః ।
- సత్యానన్దః పరానన్దః సద్యోనన్దః పరాత్పరః ॥ ౯॥
- వాక్యానన్దమహానన్దః శివానన్దోఽహమద్వయః ।
- శివానన్దోత్తరానన్ద ఆద్యానన్దవివర్జితః ॥ ౧౦॥
- అమలాత్మా పరానన్దశ్చిదానన్దోఽహమద్వయః ।
- వృత్త్యానన్దపరానన్దో విద్యాతీతో హి నిర్మలః ॥ ౧౧॥
- కారణాతీత ఆనన్దశ్చిదానన్దోఽహమద్వయః ।
- సర్వానన్దః పరానన్దో బ్రహ్మానన్దాత్మభావనః ॥ ౧౨॥
- జీవానన్దో లయానన్దశ్చిదానన్దస్వరూపవాన్ ।
- శుద్ధానన్దస్వరూపాత్మా బుద్ధ్యానన్దో మనోమయః ॥ ౧౩॥
- శబ్దానన్దో మహానన్దశ్చిదానన్దోఽహమద్వయః ।
- ఆనన్దానన్దశూన్యాత్మా భేదానన్దవిశూన్యకః ॥ ౧౪॥
- ద్వైతానన్దప్రభావాత్మా చిదానన్దోఽహమద్వయః ।
- ఏవమాదిమహానన్ద అహమేవేతి భావయ ॥ ౧౫॥
- శాన్తానన్దోఽహమేవేతి చిదానన్దప్రభాస్వరః ।
- ఏకానన్దపరానన్ద ఏక ఏవ చిదవ్యయః ॥ ౧౬॥
- ఏక ఏవ మహానాత్మా ఏకసంఖ్యావివర్జితః ।
- ఏకతత్త్వమహానన్దస్తత్త్వభేదవివర్జితః ॥ ౧౭॥
- విజితానన్దహీనోఽహం నిర్జితానన్దహీనకః ।
- హీనానన్దప్రశాన్తోఽహం శాన్తోఽహమితి శాన్తకః ॥ ౧౮॥
- మమతానన్దశాన్తోఽహమహమాదిప్రకాశకమ్ ।
- సర్వదా దేహశాన్తోఽహం శాన్తోఽహమితి వర్జితః ॥ ౧౯॥
- బ్రహ్మైవాహం న సంసారీ ఇత్యేవమితి శాన్తకః ।
- అన్తరాదన్తరోఽహం వై అన్తరాదన్తరాన్తరః ॥ ౨౦॥
- ఏక ఏవ మహానన్ద ఏక ఏవాహమక్షరః ।
- ఏక ఏవాక్షరం బ్రహ్మ ఏక ఏవాక్షరోఽక్షరః ॥ ౨౧॥
- ఏక ఏవ మహానాత్మా ఏక ఏవ మనోహరః ।
- ఏక ఏవాద్వయోఽహం వై ఏక ఏవ న చాపరః ॥ ౨౨॥
- ఏక ఏవ న భూరాది ఏక ఏవ న బుద్ధయః ।
- ఏక ఏవ ప్రశాన్తోఽహం ఏక ఏవ సుఖాత్మకః ॥ ౨౩॥
- ఏక ఏవ న కామాత్మా ఏక ఏవ న కోపకమ్ ।
- ఏక ఏవ న లోభాత్మా ఏక ఏవ న మోహకః ॥ ౨౪॥
- ఏక ఏవ మదో నాహం ఏక ఏవ న మే రసః ।
- ఏక ఏవ న చిత్తాత్మా ఏక ఏవ న చాన్యకః ॥ ౨౫॥
- ఏక ఏవ న సత్తాత్మా ఏక ఏవ జరామరః ।
- ఏక ఏవ హి పూర్ణాత్మా ఏక ఏవ హి నిశ్చలః ॥ ౨౬॥
- ఏక ఏవ మహానన్ద ఏక ఏవాహమేకవాన్ ।
- దేహోఽహమితి హీనోఽహం శాన్తోఽహమితి శాశ్వతః ॥ ౨౭॥
- శివోఽహమితి శాన్తోఽహం ఆత్మైవాహమితి క్రమః ।
- జీవోఽహమితి శాన్తోఽహం నిత్యశుద్ధహృదన్తరః ॥ ౨౮॥
- ఏవం భావయ నిఃశఙ్కం సద్యో ముక్తస్త్వమద్వయే ।
- ఏవమాది సుశబ్దం వా నిత్యం పఠతు నిశ్చలః ॥ ౨౯॥
- కాలస్వభావో నియతైశ్చ భూతైః
- జగద్విజాయేత ఇతి శ్రుతీరితమ్ ।
- తద్వై మృషా స్యాజ్జగతో జడత్వతః
- ఇచ్ఛాభవం చైతదథేస్వరస్య ॥ ౩౦॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే ఆనన్దరూపత్వనిరూపణప్రకరణం నామ సప్తవింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com