ఋభుగీతా ౩౦ ॥ బ్రహ్మైక-రూపత్వ నిరూపణ ప్రకరణమ్ ॥

ఋభుః -

• వక్ష్యే పరం బ్రహ్మమాత్రం జగత్సన్త్యాగపూర్వకమ్ ।
• సకృచ్ఛ్రవణమాత్రేణ బ్రహ్మభావం పరం లభేత్ ॥ ౧॥
• బ్రహ్మ బ్రహ్మపరం మాత్రం నిర్గుణం నిత్యనిర్మలమ్ ।
• శాశ్వతం సమమత్యన్తం బ్రహ్మణోఽన్యన్న విద్యతే ॥ ౨॥
• అహం సత్యః పరానన్దః శుద్ధో నిత్యో నిరఞ్జనః ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౩॥
• అఖణ్డైకరసైవాస్మి పరిపూర్ణోఽస్మి సర్వదా ।
• బ్రహ్మైవ సర్వం నాన్యోఽస్తి సర్వం బ్రహ్మ న సంశయః ॥ ౪॥
• సర్వదా కేవలాత్మాహం సర్వం బ్రహ్మేతి నిత్యశః ।
• ఆనన్దరూపమేవాహం నాన్యత్ కిఞ్చిన్న శాశ్వతమ్ ॥ ౫॥
• శుద్ధానన్దస్వరూపోఽహం శుద్ధవిజ్ఞానమాత్మనః ।
• ఏకాకారస్వరూపోఽహం నైకసత్తావివర్జితః ॥ ౬॥
• అన్తరజ్ఞానశుద్ధోఽహమహమేవ పరాయణమ్ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౭॥
• అనేకతత్త్వహీనోఽహం ఏకత్వం చ న విద్యతే ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౮॥
• సర్వప్రకారరూపోఽస్మి సర్వం ఇత్యపి వర్జితః ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౯॥
• నిర్మలజ్ఞానరూపోఽహమహమేవ న విద్యతే ।
• శుద్ధబ్రహ్మస్వరూపోఽహం విశుద్ధపదవర్జితః ॥ ౧౦॥
• నిత్యానన్దస్వరూపోఽహం జ్ఞానానన్దమహం సదా ।
• సూక్ష్మాత్ సూక్ష్మతరోఽహం వై సూక్ష్మ ఇత్యాదివర్జితః ॥ ౧౧॥
• అఖణ్డానన్దమాత్రోఽహం అఖణ్డానన్దవిగ్రహః ।
• సదాఽమృతస్వరూపోఽహం సదా కైవల్యవిగ్రహః ॥ ౧౨॥
• బ్రహ్మానన్దమిదం సర్వం నాస్తి నాస్తి కదాచన ।
• జీవత్వధర్మహీనోఽహమీశ్వరత్వవివర్జితః ॥ ౧౩॥
• వేదశాస్త్రస్వరూపోఽహం శాస్త్రస్మరణకారణమ్ ।
• జగత్కారణకార్యం చ బ్రహ్మవిష్ణుమహేశ్వరాః ॥ ౧౪॥
• వాచ్యవాచకభేదం చ స్థూలసూక్ష్మశరీరకమ్ ।
• జాగ్రత్స్వప్నసుషుప్తాద్యప్రాజ్ఞతైజసవిశ్వకాః ॥ ౧౫॥
• సర్వశాస్త్రస్వరూపోఽహం సర్వానన్దమహం సదా ।
• అతీతనామరూపార్థ అతీతః సర్వకల్పనాత్ ॥ ౧౬॥
• ద్వైతాద్వైతం సుఖం దుఃఖం లాభాలాభౌ జయాజయౌ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౧౭॥
• సాత్త్వికం రాజసం భేదం సంశయం హృదయం ఫలమ్ ।
• దృక్ దృష్టం సర్వద్రష్టా చ భూతభౌతికదైవతమ్ ॥ ౧౮॥
• సర్వం బ్రహ్మ న సన్దేహస్తద్బ్రహ్మాహం న సంశయః ।
• తుర్యరూపమహం సాక్షాత్ జ్ఞానరూపమహం సదా ॥ ౧౯॥
• అజ్ఞానం చైవ నాస్త్యేవ తత్కార్యం కుత్ర విద్యతే ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౨౦॥
• చిత్తవృత్తివిలాసం చ బుద్ధీనామపి నాస్తి హి ।
• దేహసఙ్కల్పహీనోఽహం బుద్ధిసఙ్కల్పకల్పనా ॥ ౨౧॥
• సర్వం బ్రహ్మ న సన్దేహస్తద్బ్రహ్మాహం న సంశయః ।
• బుద్ధినిశ్చయరూపోఽహం నిశ్చయం చ గలత్యహో ॥ ౨౨॥
• అహంకారం బహువిధం దేహోఽహమితి భావనమ్ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౨౩॥
• బ్రహ్మాహమపి కాణోఽహం బధిరోఽహం పరోఽస్మ్యహమ్ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౨౪॥
• దేహోఽహమితి తాదాత్మ్యం దేహస్య పరమాత్మనః ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౨౫॥
• సర్వోఽహమితి తాదాత్మ్యం సర్వస్య పరమాత్మనః ।
• ఇతి భావయ యత్నేన బ్రహ్మైవాహమితి ప్రభో ॥ ౨౬॥
• దృఢనిశ్చయమేవేదం సత్యం సత్యమహం పరమ్ ।
• దృఢనిశ్చయమేవాత్ర సద్గురోర్వాక్యనిశ్చయమ్ ॥ ౨౭॥
• దృఢనిశ్చయసామ్రాజ్యే తిష్ఠ తిష్ఠ సదా పరః ।
• అహమేవ పరం బ్రహ్మ ఆత్మానన్దప్రకాశకః ॥ ౨౮॥
• శివపూజా శివశ్చాహం విష్ణుర్విష్ణుప్రపూజనమ్ ।
• యద్యత్ సంవేద్యతే కిఞ్చిత్ యద్యన్నిశ్చీయతే క్వచిత్ ॥ ౨౯॥
• తదేవ త్వం త్వమేవాహం ఇత్యేవం నాస్తి కిఞ్చన ।
• ఇదం చిత్తమిదం దృశ్యం ఇత్యేవమితి నాస్తి హి ॥ ౩౦॥
• సదసద్భావశేషోఽపి తత్తద్భేదం న విద్యతే ।
• సుఖరూపమిదం సర్వం సుఖరూపమిదం న చ ॥ ౩౧॥
• లక్షభేదం సకృద్భేదం సర్వభేదం న విద్యతే ।
• బ్రహ్మానన్దో న సన్దేహస్తద్బ్రహ్మాహం న సంశయః ॥ ౩౨॥
• బ్రహ్మభేదం తుర్యభేదం జీవభేదమభేదకమ్ ।
• ఇదమేవ హి నోత్పన్నం సర్వదా నాస్తి కిఞ్చన ॥ ౩౩॥
• స దేవమితి నిర్దేశో నాస్తి నాస్త్యేవ సర్వదా ।
• అస్తి చేత్ కిల వక్తవ్యం నాస్తి చేత్ కథముచ్యతే ॥ ౩౪॥
• పరం విశేషమేవేతి నాస్తి కిఞ్చిత్ సదా మయి ।
• చఞ్చలం మనశ్చైవ నాస్తి నాస్తి న సంశయః ॥ ౩౫॥
• ఏవమేవ సదా పూర్ణో నిరీహస్తిష్ఠ శాన్తధీః ।
• సర్వం బ్రహ్మాస్మి పూర్ణోఽస్మి ఏవం చ న కదాచన ॥ ౩౬॥
• ఆనన్దోఽహం వరిష్ఠోఽహం బ్రహ్మాస్మీత్యపి నాస్తి హి ।
• బ్రహ్మానన్దమహానన్దమాత్మానన్దమఖణ్డితమ్ ॥ ౩౭॥
• ఇదం పరమహన్తా చ సర్వదా నాస్తి కిఞ్చన ।
• ఇదం సర్వమితి ఖ్యాతి ఆనన్దం నేతి నో భ్రమః ॥ ౩౮॥
• సర్వం బ్రహ్మ న సన్దేహస్తద్బ్రహ్మాహం న సంశయః ।
• లక్ష్యలక్షణభావం చ దృశ్యదర్శనదృశ్యతా ॥ ౩౯॥
• అత్యన్తాభావమేవేతి సర్వదానుభవం మహత్ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౪౦॥
• గుహ్యం మన్త్రం గుణం శాస్త్రం సత్యం శ్రోత్రం కలేవరమ్ ।
• మరణం జననం కార్యం కారణం పావనం శుభమ్ ॥ ౪౧॥
• కామక్రోధౌ లోభమోహౌ మదో మాత్సర్యమేవ హి ।
• ద్వైతదోషం భయం శోకం సర్వం నాస్త్యేవ సర్వదా ॥ ౪౨॥
• ఇదం నాస్త్యేవ నాస్త్యేవ నాస్త్యేవ సకలం సుఖమ్ ।
• ఇదం బ్రహ్మేతి మననమహం బ్రహ్మేతి చిన్తనమ్ ॥ ౪౩॥
• అహం బ్రహ్మేతి మననం త్వం బ్రహ్మత్వవినాశనమ్ ।
• సత్యత్వం బ్రహ్మవిజ్ఞానం అసత్యత్వం న బాధ్యతే ॥ ౪౪॥
• ఏక ఏవ పరో హ్యాత్మా ఏకత్వశ్రాన్తివర్జితః ।
• సర్వం బ్రహ్మ సదా బ్రహ్మ తద్బ్రహ్మాహం న సంశయః ॥ ౪౫॥
• జీవరూపా జీవభావా జీవశబ్దత్రయం న హి ।
• ఈశరూపం చేశభావం ఈశశబ్దం చ కల్పితమ్ ॥ ౪౬॥
• నాక్షరం న చ సర్వం వా న పదం వాచ్యవాచకమ్ ।
• హృదయం మన్త్రతన్త్రం చ చిత్తం బుద్ధిర్న కిఞ్చన ॥ ౪౭॥
• మూఢో జ్ఞానీ వివేకీ వా శుద్ధ ఇత్యపి నాస్తి హి ।
• నిశ్చయం ప్రణవం తారం ఆత్మాయం గురుశిష్యకమ్ ॥ ౪౮॥
• తూష్ణీం తూష్ణీం మహాతూష్ణీం మౌనం వా మౌనభావనమ్ ।
• ప్రకాశనం ప్రకాశం చ ఆత్మానాత్మవివేచనమ్ ॥ ౪౯॥
• ధ్యానయోగం రాజయోగం భోగమష్టాఙ్గలక్షణమ్ ।
• సర్వం బ్రహ్మ న సన్దేహస్తద్బ్రహ్మాహం న సంశయః ॥ ౫౦॥
• అస్తిత్వభాషణం చాపి నాస్తిత్వస్య చ భాషణమ్ ।
• పఞ్చాశద్వర్ణరూపోఽహం చతుఃషష్టికలాత్మకః ॥ ౫౧॥
• సర్వం బ్రహ్మ న సన్దేహస్తద్బ్రహ్మాహం న సంశయః ।
• బ్రహ్మైవాహం ప్రసన్నాత్మా బ్రహ్మైవాహం చిదవ్యయః ॥ ౫౨॥
• శాస్త్రజ్ఞానవిదూరోఽహం వేదజ్ఞానవిదూరకః ।
• ఉక్తం సర్వం పరం బ్రహ్మ నాస్తి సన్దేహలేశతః ॥ ౫౩॥
• సర్వం బ్రహ్మ న సన్దేహస్తద్బ్రహ్మాహం న సంశయః ।
• బ్రహ్మైవాహం ప్రసన్నాత్మా బ్రహ్మైవాహం చిదవ్యయః ॥ ౫౪॥
• ఇత్యేవం బ్రహ్మతన్మాత్రం తత్ర తుభ్యం ప్రియం తతః ।
• యస్తు బుద్ధ్యేత సతతం సర్వం బ్రహ్మ న సంశయః ।
• నిత్యం శృణ్వన్తి యే మర్త్యాస్తే చిన్మాత్రమయామలాః ॥ ౫౫॥
• సన్దేహసన్దేహకరోఽర్యకాస్వకైః
• కరాదిసన్దోహజగద్వికారిభిః ।
• యో వీతమోహం న కరోతి దుర్హృదం
• విదేహముక్తిం శివదృక్ప్రభావతః ॥ ౫౬॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే బ్రహ్మైకరూపత్వనిరూపణప్రకరణం నామ త్రింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com