ఋభుగీతా ౪౬ ॥ జ్ఞానోపాయ-భూత శివ-వ్రత నిరూపణమ్ ॥
నిదాఘః -
- ఏతద్గ్రన్థం సదా శ్రుత్వా చిత్తజాడ్యమకుర్వతః ।
- యావద్దేహం సదా విత్తైః శుశ్రూషేత్ పూజయేద్గురుమ్ ॥ ౧॥
- తత్పూజయైవ సతతం అహం బ్రహ్మేతి నిశ్చిను ।
- నిత్యం పూర్ణోఽస్మి నిత్యోఽస్మి సర్వదా శాన్తవిగ్రహః ॥ ౨॥
- ఏతదేవాత్మవిజ్ఞానం అహం బ్రహ్మేతి నిర్ణయః ।
- నిరఙ్కుశస్వరూపోఽస్మి అతివర్ణాశ్రమీ భవ ॥ ౩॥
- అగ్నిరిత్యాదిభిర్మన్{}త్రైః సర్వదా భస్మధారణమ్ ।
- త్రియాయుషైస్త్ర్యంబకైశ్చ కుర్వన్తి చ త్రిపుణ్డ్రకమ్ ॥ ౪॥
- త్రిపుణ్డ్రధారిణామేవ సర్వదా భస్మధారణమ్ ।
- శివప్రసాదసంపత్తిర్భవిష్యతి న సంశయః ॥ ౫॥
- శివప్రసాదాదేతద్వై జ్ఞానం సంప్రాప్యతే ధ్రువమ్ ।
- శిరోవ్రతమిదం ప్రోక్తం కేవలం భస్మధారణమ్ ॥ ౬॥
- భస్మధారణమాత్రేణ జ్ఞానమేతద్భవిష్యతి ।
- అహం వత్సరపర్యన్తం కృత్వా వై భస్మధారణమ్ ॥ ౭॥
- త్వత్పాదాబ్జం ప్రపన్నోఽస్మి త్వత్తో లబ్ధాత్మ నిర్వృతిః ।
- సర్వాధారస్వరూపోఽహం సచ్చిదానన్దమాత్రకమ్ ॥ ౮॥
- బ్రహ్మాత్మాహం సులక్షణ్యో బ్రహ్మలక్షణపూర్వకమ్ ।
- ఆనన్దానుభవం ప్రాప్తః సచ్చిదానన్దవిగ్రహః ॥ ౯॥
- గుణరూపాదిముక్తోఽస్మి జీవన్ముక్తో న సంశయః ।
- మైత్ర్యాదిగుణసంపన్నో బ్రహ్మైవాహం పరో మహాన్ ॥ ౧౦॥
- సమాధిమానహం నిత్యం జీవన్ముక్తేషు సత్తమః ।
- అహం బ్రహ్మాస్మి నిత్యోఽస్మి సమాధిరితి కథ్యతే ॥ ౧౧॥
- ప్రారబ్ధప్రతిబన్ధశ్చ జీవన్ముక్తేషు విద్యతే ।
- ప్రారబ్ధవశతో యద్యత్ ప్రాప్యం భుఞ్జే సుఖం వస ॥ ౧౨॥
- దూషణం భూషణం చైవ సదా సర్వత్ర సంభవేత్ ।
- స్వస్వనిశ్చయతో బుద్ధ్యా ముక్తోఽహమితి మన్యతే ॥ ౧౩॥
- అహమేవ పరం బ్రహ్మ అహమేవ పరా గతిః ।
- ఏవం నిశ్చయవాన్ నిత్యం జీవన్ముక్తేతి కథ్యతే ॥ ౧౪॥
- ఏతద్భేదం చ సన్త్యజ్య స్వరూపే తిష్ఠతి ప్రభుః ।
- ఇన్ద్రియార్థవిహీనోఽహమిన్ద్రియార్థవివర్జితః ॥ ౧౫॥
- సర్వేన్ద్రియగుణాతీతః సర్వేన్ద్రియవివర్జితః ।
- సర్వస్య ప్రభురేవాహం సర్వం మయ్యేవ తిష్ఠతి ॥ ౧౬॥
- అహం చిన్మాత్ర ఏవాస్మి సచ్చిదాన్దవిగ్రహః ।
- సర్వం భేదం సదా త్యక్త్వా బ్రహ్మభేదమపి త్యజేత్ ॥ ౧౭॥
- అజస్రం భావయన్ నిత్యం విదేహో ముక్త ఏవ సః ।
- అహం బ్రహ్మ పరం బ్రహ్మ అహం బ్రహ్మ జగత్ప్రభుః ॥ ౧౮॥
- అహమేవ గుణాతీతః అహమేవ మనోమయః ।
- అహం మయ్యో మనోమేయః ప్రాణమేయః సదామయః ॥ ౧౯॥
- సదృఙ్మయో బ్రహ్మమయోఽమృతమయః సభూతోమృతమేవ హి ।
- అహం సదానన్దధనోఽవ్యయః సదా ।
- స వేదమయ్యో ప్రణవోఽహమీశః ॥ ౨౦॥
- అపాణిపాదో జవనో గృహీతా
- అపశ్యః పశ్యామ్యాత్మవత్ సర్వమేవ ।
- యత్తద్భూతం యచ్చ భవ్యోఽహమాత్మా
- సర్వాతీతో వర్తమానోఽహమేవ ॥ ౨౨॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే జ్ఞానోపాయభూతశివవ్రతనిరూపణం నామ షట్చత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com