ఋభుగీతా ౩౪ ॥ దృష్టాన్తైర్-బ్రహ్మ-సాధన ప్రకరణమ్ ॥
ఋభుః -
- శృణుష్వ బ్రహ్మ విజ్ఞానమద్భుతం త్వతిదుర్లభమ్ ।
- ఏకైకశ్రవణేనైవ కైవల్యం పరమశ్నుతే ॥ ౧॥
- సత్యం సత్యం జగన్నాస్తి సంకల్పకలనాదికమ్ ।
- నిత్యానన్దమయం బ్రహ్మవిజ్ఞానం సర్వదా స్వయమ్ ॥ ౨॥
- ఆనన్దమవ్యయం శాన్తమేకరూపమనామయమ్ ।
- చిత్తప్రపఞ్చం నైవాస్తి నాస్తి కార్యం చ తత్త్వతః ॥ ౩॥
- ప్రపఞ్చభావనా నాస్తి దృశ్యరూపం న కిఞ్చన ।
- అసత్యరూపం సఙ్కల్పం తత్కార్యం చ జగన్న హి ॥ ౪॥
- సర్వమిత్యేవ నాస్త్యేవ కాలమిత్యేవమీశ్వరః ।
- వన్ధ్యాకుమారే భీతిశ్చ తదధీనమిదం జగత్ ॥ ౫॥
- గన్ధర్వనగరే శృఙ్గే మదగ్రే దృశ్యతే జగత్ ।
- మృగతృష్ణాజలం పీత్వా తృప్తిశ్చేదస్త్విదం జగత్ ॥ ౬॥
- నగే శృఙ్గే న బాణేన నష్టం పురుషమస్త్విదమ్ ।
- గన్ధర్వనగరే సత్యే జగద్భవతు సర్వదా ॥ ౭॥
- గగనే నీలమాసిన్ధౌ జగత్ సత్యం భవిష్యతి ।
- శుక్తికారజతం సత్యం భూషణం చిజ్జగద్భవేత్ ॥ ౮॥
- రజ్జుసర్పేణ నష్టశ్చేత్ నరో భవతి సంసృతిః ।
- జాతిరూపేణ బాణేన జ్వాలాగ్నౌ నాశితే సతి ॥ ౯॥
- రంభాస్తమ్భేన కాష్ఠేన పాకసిద్ధిర్జగద్భవేత్ ।
- నిత్యానన్దమయం బ్రహ్మ కేవలం సర్వదా స్వయమ్ ॥ ౧౦॥
- సద్యః కుమారికారూపైః పాకే సిద్ధే జగద్భవేత్ ।
- నిత్యానన్దమయం బ్రహ్మ కేవలం సర్వదా స్వయమ్ ॥ ౧౧॥
- మిత్యాటవ్యాం వాయసాన్నం అస్తి చేజ్జగదుద్భవమ్ ।
- మూలారోపణమన్త్రస్య ప్రీతిశ్చేద్భాషణం జగత్ ॥ ౧౨॥
- మాసాత్ పూర్వం మృతో మర్త్య ఆగతశ్చేజ్జగద్ భవేత్ ।
- తక్రం క్షీరస్వరూపం చేత్ కిఞ్చిత్ కిఞ్చిజ్జగద్భవేత్ ॥ ౧౩॥
- గోస్తనాదుద్భవం క్షీరం పునరారోహణం జగత్ ।
- భూరజస్యాఅబ్దముత్పన్నం జగద్భవతు సర్వదా ॥ ౧౪॥
- కూర్మరోమ్ణా గజే బద్ధే జగదస్తు మదోత్కటే ।
- మృణాలతన్తునా మేరుశ్చలితశ్చేజ్జగద్ భవేత్ ॥ ౧౫॥
- తరఙ్గమాలయా సిన్ధుః బద్ధశ్చేదస్త్విదం జగత్ ।
- జ్వాలాగ్నిమణ్డలే పద్మం వృద్ధం చేత్ తజ్జగద్భవేత్ ॥ ౧౬॥
- మహచ్ఛైలేన్ద్రనిలయం సంభవశ్చేదిదం భవేత్ ।
- నిత్యానన్దమయం బ్రహ్మ కేవలం సర్వదా స్వయమ్ ॥ ౧౭॥
- మీన ఆగత్య పద్మాక్షే స్థితశ్చేదస్త్విదం జగత్ ।
- నిగీర్ణశ్చేద్భఙ్గసూనుః మేరుపుచ్ఛవదస్త్విదమ్ ॥ ౧౮॥
- మశకేనాశితే సింహే హతే భవతు కల్పనమ్ ।
- అణుకోటరవిస్తీర్ణే త్రైలోక్యే చేజ్జగద్భవేత్ ॥ ౧౯॥
- స్వప్నే తిష్ఠతి యద్వస్తు జాగరే చేజ్జగద్భవేత్ ।
- నదీవేగో నిశ్చలశ్చేత్ జగద్భవతు సర్వదా ॥ ౨౦॥
- జాత్యన్ధై రత్నవిషయః సుజ్ఞాతశ్చేజ్జగద్భవేత్ ।
- చన్ద్రసూర్యాదికం త్యక్త్వా రాహుశ్చేత్ దృశ్యతే జగత్ ॥ ౨౧॥
- భ్రష్టబీజేన ఉత్పన్నే వృద్ధిశ్చేచ్చిత్తసంభవః ।
- మహాదరిద్రైరాఢ్యానాం సుఖే జ్ఞాతే జగద్భవేత్ ॥ ౨౨॥
- దుగ్ధం దుగ్ధగతక్షీరం పునరారోహణం పునః ।
- కేవలం దర్పణే నాస్తి ప్రతిబిమ్బం తదా జగత్ ॥ ౨౩॥
- యథా శూన్యగతం వ్యోమ ప్రతిబిమ్బేన వై జగత్ ।
- అజకుక్షౌ గజో నాస్తి ఆత్మకుక్షౌ జగన్న హి ॥ ౨౪॥
- యథా తాన్త్రే సముత్పన్నే తథా బ్రహ్మమయం జగత్ ।
- కార్పాసకేఽగ్నిదగ్ధేన భస్మ నాస్తి తథా జగత్ ॥ ౨౫॥
- పరం బ్రహ్మ పరం జ్యోతిః పరస్తాత్ పరతః పరః ।
- సర్వదా భేదకలనం ద్వైతాద్వైతం న విద్యతే ॥ ౨౬॥
- చిత్తవృత్తిర్జగద్దుఃఖం అస్తి చేత్ కిల నాశనమ్ ।
- మనఃసంకల్పకం బన్ధ అస్తి చేద్బ్రహ్మభావనా ॥ ౨౭॥
- అవిద్యా కార్యదేహాది అస్తి చేద్ద్వైతభావనమ్ ।
- చిత్తమేవ మహారోగో వ్యాప్తశ్చేద్బ్రహ్మభేషజమ్ ॥ ౨౮॥
- అహం శత్రుర్యది భవేదహం బ్రహ్మైవ భావనమ్ ।
- దేహోఽహమితి దుఖం చేద్బ్రహ్మాహమితి నిశ్చిను ॥ ౨౯॥
- సంశయశ్చ పిశాచశ్చేద్బ్రహ్మమాత్రేణ నాశయ ।
- ద్వైతభూతావిష్టరేణ అద్వైతం భస్మ ఆశ్రయ ॥ ౩౦॥
- అనాత్మత్వపిశాచశ్చేదాత్మమన్త్రేణ బన్ధయ ।
- నిత్యానన్దమయం బ్రహ్మ కేవలం సర్వదా స్వయమ్ ॥ ౩౧॥
- చతుఃషష్టికదృష్టాన్తైరేవం బ్రహ్మైవ సాధితమ్ ।
- యః శృణోతి నరో నిత్యం స ముక్తో నాత్ర సంశయః ॥ ౩౨॥
- కృతార్థ ఏవ సతతం నాత్ర కార్యా విచారణా ॥ ౩౩॥
- మనోవచోవిదూరగం త్వరూపగన్ధవర్జితం
- హృదర్భకోకసన్తతం విజానతాం ముదే సదా ।
- సదాప్రకాశదుజ్వలప్రభావికాససద్యుతి
- ప్రకాశదం మహేశ్వర త్వదీయపాదపఙ్కజమ్ ॥ ౩౪॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే దృష్టాన్తైర్బ్రహ్మసాధనప్రకరణం నామ చతుస్త్రింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com