ఋభుగీతా ౩౯ ॥ సర్వ-లయ ప్రకరణమ్ ॥
ఋభుః -
- పరం బ్రహ్మ ప్రవక్ష్యామి నిర్వికల్పం నిరామయమ్ ।
- తదేవాహం న సన్దేహః సర్వం బ్రహ్మైవ కేవలమ్ ॥ ౧॥
- చిన్మాత్రమమలం శాన్తం సచ్చిదానన్దవిగ్రహమ్ ।
- ఆనన్దం పరమానన్దం నిర్వికల్పం నిరఞ్జనమ్ ॥ ౨॥
- గుణాతీతం జనాతీతమవస్థాతీతమవ్యయమ్ ।
- ఏవం భావయ చైతన్యమహం బ్రహ్మాస్మి సోఽస్మ్యహమ్ ॥ ౩॥
- సర్వాతీతస్వరూపోఽస్మి సర్వశబ్దార్థవర్జితః ।
- సత్యోఽహం సర్వహన్తాహం శుద్ధోఽహం పరమోఽస్మ్యహమ్ ॥ ౪॥
- అజోఽహం శాన్తరూపోఽహం అశరీరోఽహమాన్తరః ।
- సర్వహీనోఽహమేవాహం స్వయమేవ స్వయం మహః ॥ ౫॥
- ఆత్మైవాహం పరాత్మాహం బ్రహ్మైవాహం శివోఽస్మ్యహమ్ ।
- చిత్తహీనస్వరూపోఽహం బుద్ధిహీనోఽహమస్మ్యహమ్ ॥ ౬॥
- వ్యాపకోఽహమహం సాక్షీ బ్రహ్మాహమితి నిశ్చయః ।
- నిష్ప్రపఞ్చగజారూఢో నిష్ప్రపఞ్చాశ్వవాహనః ॥ ౭॥
- నిష్ప్రపఞ్చమహారాజ్యో నిష్ప్రపఞ్చాయుధాదిమాన్ ।
- నిష్ప్రపఞ్చమహావేదో నిష్ప్రపఞ్చాత్మభావనః ॥ ౮॥
- నిష్ప్రపఞ్చమహానిద్రో నిష్ప్రపఞ్చస్వభావకః ।
- నిష్ప్రపఞ్చస్తు జీవాత్మా నిష్ప్రపఞ్చకలేవరః ॥ ౯॥
- నిష్ప్రపఞ్చపరీవారో నిష్ప్రపఞ్చోత్సవో భవః ।
- నిష్ప్రపఞ్చస్తు కల్యాణో నిష్ప్రపఞ్చస్తు దర్పణః ॥ ౧౦॥
- నిష్ప్రపఞ్చరథారూఢో నిష్ప్రపఞ్చవిచారణమ్ ।
- నిష్ప్రపఞ్చగుహాన్తస్థో నిష్ప్రపఞ్చప్రదీపకమ్ ॥ ౧౧॥
- నిష్ప్రపఞ్చప్రపూర్ణాత్మా నిష్ప్రపఞ్చోఽరిమర్దనః ।
- చిత్తమేవ ప్రపఞ్చో హి చిత్తమేవ జగత్త్రయమ్ ॥ ౧౨॥
- చిత్తమేవ మహామోహశ్చిత్తమేవ హి సంసృతిః ।
- చిత్తమేవ మహాపాపం చిత్తమేవ హి పుణ్యకమ్ ॥ ౧౩॥
- చిత్తమేవ మహాబన్ధశ్చిత్తమేవ విమోక్షదమ్ ।
- బ్రహ్మభావనయా చిత్తం నాశమేతి న సంశయః ॥ ౧౪॥
- బ్రహ్మభావనయా దుఃఖం నాశమేతి న సంశయః ।
- బ్రహ్మభావనయా ద్వైతం నాశమేతి న సంశయః ॥ ౧౫॥
- బ్రహ్మభావనయా కామః నాశమేతి న సంశయః ।
- బ్రహ్మభావనయా క్రోధః నాశమేతి న సంశయః ॥ ౧౬॥
- బ్రహ్మభావనయా లోభః నాశమేతి న సంశయః ।
- బ్రహ్మభావనయా గ్రన్థిః నాశమేతి న సంశయః ॥ ౧౭॥
- బ్రహ్మభావనయా సర్వం బ్రహ్మభావనయా మదః ।
- బ్రహ్మభావనయా పూజా నాశమేతి న సంశయః ॥ ౧౮॥
- బ్రహ్మభావనయా ధ్యానం నాశమేతి న సంశయః ।
- బ్రహ్మభావనయా స్నానం నాశమేతి న సంశయః ॥ ౧౯॥
- బ్రహ్మభావనయా మన్త్రో నాశమేతి న సంశయః ।
- బ్రహ్మభావనయా పాపం నాశమేతి న సంశయః ॥ ౨౦॥
- బ్రహ్మభావనయా పుణ్యం నాశమేతి న సంశయః ।
- బ్రహ్మభావనయా దోషో నాశమేతి న సంశయః ॥ ౨౧॥
- బ్రహ్మభావనయా భ్రాన్తిః నాశమేతి న సంశయః ।
- బ్రహ్మభావనయా దృశ్యం నాశమేతి న సంశయః ॥ ౨౨॥
- బ్రహ్మభావనయా సఙ్గో నాశమేతి న సంశయః ।
- బ్రహ్మభావనయా తేజో నాశమేతి న సంశయః ॥ ౨౩॥
- బ్రహ్మభావనయా ప్రజ్ఞా నాశమేతి న సంశయః ।
- బ్రహ్మభావనయా సత్తా నాశమేతి న సంశయః ॥ ౨౪॥
- బ్రహ్మభావనయా భీతిః నాశమేతి న సంశయః ।
- బ్రహ్మభావనయా వేదః నాశమేతి న సంశయః ॥ ౨౫॥
- బ్రహ్మభావనయా శాస్త్రం నాశమేతి న సంశయః ।
- బ్రహ్మభావనయా నిద్రా నాశమేతి న సంశయః ॥ ౨౬॥
- బ్రహ్మభావనయా కర్మ నాశమేతి న సంశయః ।
- బ్రహ్మభావనయా తుర్యం నాశమేతి న సంశయః ॥ ౨౭॥
- బ్రహ్మభావనయా ద్వన్ద్వం నాశమేతి న సంశయః ।
- బ్రహ్మభావనయా పృచ్ఛేదహం బ్రహ్మేతి నిశ్చయమ్ ॥ ౨౮॥
- నిశ్చయం చాపి సన్త్యజ్య స్వస్వరూపాన్తరాసనమ్ ।
- అహం బ్రహ్మ పరం బ్రహ్మ చిద్బ్రహ్మ బ్రహ్మమాత్రకమ్ ॥ ౨౯॥
- జ్ఞానమేవ పరం బ్రహ్మ జ్ఞానమేవ పరం పదమ్ ।
- దివి బ్రహ్మ దిశో బ్రహ్మ మనో బ్రహ్మ అహం స్వయమ్ ॥ ౩౦॥
- కిఞ్చిద్బ్రహ్మ బ్రహ్మ తత్త్వం తత్త్వం బ్రహ్మ తదేవ హి ।
- అజో బ్రహ్మ శుభం బ్రహ్మ ఆదిబ్రహ్మ బ్రవీమి తమ్ ॥ ౩౧॥
- అహం బ్రహ్మ హవిర్బ్రహ్మ కార్యబ్రహ్మ త్వహం సదా ।
- నాదో బ్రహ్మ నదం బ్రహ్మ తత్త్వం బ్రహ్మ చ నిత్యశః ॥ ౩౨॥
- ఏతద్బ్రహ్మ శిఖా బ్రహ్మ తద్బ్రహ్మ బ్రహ్మ శాశ్వతమ్ ।
- నిజం బ్రహ్మ స్వతో బ్రహ్మ నిత్యం బ్రహ్మ త్వమేవ హి ॥ ౩౩॥
- సుఖం బ్రహ్మ ప్రియం బ్రహ్మ మిత్రం బ్రహ్మ సదామృతమ్ ।
- గుహ్యం బ్రహ్మ గురుర్బ్రహ్మ ఋతం బ్రహ్మ ప్రకాశకమ్ ॥ ౩౪॥
- సత్యం బ్రహ్మ సమం బ్రహ్మ సారం బ్రహ్మ నిరఞ్జనమ్ ।
- ఏకం బ్రహ్మ హరిర్బ్రహ్మ శివో బ్రహ్మ న సంశయః ॥ ౩౫॥
- ఇదం బ్రహ్మ స్వయం బ్రహ్మ లోకం బ్రహ్మ సదా పరః ।
- ఆత్మబ్రహ్మ పరం బ్రహ్మ ఆత్మబ్రహ్మ నిరన్తరః ॥ ౩౬॥
- ఏకం బ్రహ్మ చిరం బ్రహ్మ సర్వం బ్రహ్మాత్మకం జగత్ ।
- బ్రహ్మైవ బ్రహ్మ సద్బ్రహ్మ తత్పరం బ్రహ్మ ఏవ హి ॥ ౩౭॥
- చిద్బ్రహ్మ శాశ్వతం బ్రహ్మ జ్ఞేయం బ్రహ్మ న చాపరః ।
- అహమేవ హి సద్బ్రహ్మ అహమేవ హి నిర్గుణమ్ ॥ ౩౮॥
- అహమేవ హి నిత్యాత్మా ఏవం భావయ సువ్రత ।
- అహమేవ హి శాస్త్రార్థ ఇతి నిశ్చిత్య సర్వదా ॥ ౩౯॥
- ఆత్మైవ నాన్యద్భేదోఽస్తి సర్వం మిథ్యేతి నిశ్చిను ।
- ఆత్మైవాహమహం చాత్మా అనాత్మా నాస్తి నాస్తి హి ॥ ౪౦॥
- విశ్వం వస్తుతయా విభాతి హృదయే మూఢాత్మనాం బోధతో-
- ఽప్యజ్ఞానం న నివర్తతే శ్రుతిశిరోవార్తానువృత్త్యాఽపి చ ।
- విశ్వేశస్య సమర్చనేన సుమహాలిఙ్గార్చనాద్భస్మధృక్
- రుద్రాక్షామలధారణేన భగవద్ధ్యానేన భాత్యాత్మవత్ ॥ ౪౧॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే సర్వలయప్రకరణం నామ ఏకోనచత్వారింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com