ఋభుగీతా ౭ ॥ స్వాత్మ-నిరూపణమ్ ॥

ఋభుః -

• అత్యద్భుతం ప్రవక్ష్యామి సర్వలోకేషు దుర్లభమ్ ।
• వేదశాస్త్రమహాసారం దుర్లభం దుర్లభం సదా ॥ ౧॥
• అఖణ్డైకరసో మన్త్రమఖణ్డైకరసం ఫలమ్ ।
• అఖణ్డైకరసో జీవ అఖణ్డైకరసా క్రియా ॥ ౨॥
• అఖణ్డైకరసా భూమిరఖణ్డైకరసం జలమ్ ।
• అఖణ్డైకరసో గన్ధ అఖణ్డైకరసం వియత్ ॥ ౩॥
• అఖణ్డైకరసం శాస్త్రం అఖణ్డైకరసం శ్రుతిః ।
• అఖణ్డైకరసం బ్రహ్మ అఖణ్డైకరసం వ్రతమ్ ॥ ౪॥
• అఖణ్డైకరసో విష్ణురఖణ్డైకరసః శివః ।
• అఖణ్డైకరసో బ్రహ్మా అఖణ్డైకరసాః సురాః ॥ ౫॥
• అఖణ్డైకరసం సర్వమఖణ్డైకరసః స్వయమ్ ।
• అఖణ్డైకరసశ్చాత్మా అఖణ్డైకరసో గురుః ॥ ౬॥
• అఖణ్డైకరసం వాచ్యమఖణ్డైకరసం మహః ।
• అఖణ్డైకరసం దేహ అఖణ్డైకరసం మనః ॥ ౭॥
• అఖణ్డైకరసం చిత్తం అఖణ్డైకరసం సుఖమ్ ।
• అఖణ్డైకరసా విద్యా అఖణ్డైకరసోఽవ్యయః ॥ ౮॥
• అఖణ్డైకరసం నిత్యమఖణ్డైకరసః పరః ।
• అఖణ్డైకరసాత్ కిఞ్చిదఖణ్డైకరసాదహమ్ ॥ ౯॥
• అఖణ్డైకరసం వాస్తి అఖణ్డైకరసం న హి ।
• అఖణ్డైకరసాదన్యత్ అఖణ్డైకరసాత్ పరః ॥ ౧౦॥
• అఖణ్డైకరసాత్ స్థూలం అఖణ్డైకరసం జనః ।
• అఖణ్డైకరసం సూక్ష్మమఖణ్డైకరసం ద్వయమ్ ॥ ౧౧॥
• అఖణ్డైకరసం నాస్తి అఖణ్డైకరసం బలమ్ ।
• అఖణ్డైకరసాద్విష్ణురఖణ్డైకరసాదణుః ॥ ౧౨॥
• అఖణ్డైకరసం నాస్తి అఖణ్డైకరసాద్భవాన్ ।
• అఖణ్డైకరసో హ్యేవ అఖణ్డైకరసాదితమ్ ॥ ౧౩॥
• అఖణ్డితరసాద్ జ్ఞానం అఖణ్డితరసాద్ స్థితమ్ ।
• అఖణ్డైకరసా లీలా అఖణ్డైకరసః పితా ॥ ౧౪॥var was లీనా
• అఖణ్డైకరసా భక్తా అఖణ్డైకరసః పతిః ।
• అఖణ్డైకరసా మాతా అఖణ్డైకరసో విరాట్ ॥ ౧౫॥
• అఖణ్డైకరసం గాత్రం అఖణ్డైకరసం శిరః ।
• అఖణ్డైకరసం ఘ్రాణం అఖణ్డైకరసం బహిః ॥ ౧౬॥
• అఖణ్డైకరసం పూర్ణమఖణ్డైకరసామృతమ్ ।
• అఖణ్డైకరసం శ్రోత్రమఖణ్డైకరసం గృహమ్ ॥ ౧౭॥
• అఖణ్డైకరసం గోప్యమఖణ్డైకరసః శివః ।
• అఖణ్డైకరసం నామ అఖణ్డైకరసో రవిః ॥ ౧౮॥
• అఖణ్డైకరసః సోమః అఖణ్డైకరసో గురుః ।
• అఖణ్డైకరసః సాక్షీ అఖణ్డైకరసః సుహృత్ ॥ ౧౯॥
• అఖణ్డైకరసో బన్ధురఖణ్డైకరసోఽస్మ్యహమ్ ।
• అఖణ్డైకరసో రాజా అఖణ్డైకరసం పురమ్ ॥ ౨౦॥
• అఖణ్డైకరసైశ్వర్యం అఖణ్డైకరసం ప్రభుః ।
• అఖణ్డైకరసో మన్త్ర అఖణ్డైకరసో జపః ॥ ౨౧॥
• అఖణ్డైకరసం ధ్యానమఖణ్డైకరసం పదమ్ ।
• అఖణ్డైకరసం గ్రాహ్యమఖణ్డైకరసం మహాన్ ॥ ౨౨॥
• అఖణ్డైకరసం జ్యోతిరఖణ్డైకరసం పరమ్ ।
• అఖణ్డైకరసం భోజ్యమఖణ్డైకరసం హవిః ॥ ౨౩॥
• అఖణ్డైకరసో హోమః అఖణ్డైకరసో జయః ।
• అఖణ్డైకరసః స్వర్గః అఖణ్డైకరసః స్వయమ్ ॥ ౨౪॥
• అఖణ్డైకరసాకారాదన్యన్నాస్తి నహి క్వచిత్ ।
• శృణు భూయో మహాశ్చర్యం నిత్యానుభవసంపదమ్ ॥ ౨౫॥
• దుర్లభం దుర్లభం లోకే సర్వలోకేషు దుర్లభమ్ ।
• అహమస్మి పరం చాస్మి ప్రభాస్మి ప్రభవోఽస్మ్యహమ్ ॥ ౨౬॥
• సర్వరూపగురుశ్చాస్మి సర్వరూపోఽస్మి సోఽస్మ్యహమ్ ।
• అహమేవాస్మి శుద్ధోఽస్మి ఋద్ధోఽస్మి పరమోఽస్మ్యహమ్ ॥ ౨౭॥
• అహమస్మి సదా జ్ఞోఽస్మి సత్యోఽస్మి విమలోఽస్మ్యహమ్ ।
• విజ్ఞానోఽస్మి విశేషోఽస్మి సామ్యోఽస్మి సకలోఽస్మ్యహమ్ ॥ ౨౮॥
• శుద్ధోఽస్మి శోకహీనోఽస్మి చైతన్యోఽస్మి సమోఽస్మ్యహమ్ ।
• మానావమానహీనోఽస్మి నిర్గుణోఽస్మి శివోఽస్మ్యహమ్ ॥ ౨౯॥
• ద్వైతాద్వైతవిహీనోఽస్మి ద్వన్ద్వహీనోఽస్మి సోఽస్మ్యహమ్ ।
• భావాభావవిహీనోఽస్మి భాషాహీనోఽస్మి సోఽస్మ్యహమ్ ॥ ౩౦॥
• శూన్యాశూన్యప్రభావోఽస్మి శోభనోఽస్మి మనోఽస్మ్యహమ్ ।
• తుల్యాతుల్యవిహీనోఽస్మి తుచ్ఛభావోఽస్మి నాస్మ్యహమ్ ॥ ౩౧॥
• సదా సర్వవిహీనోఽస్మి సాత్వికోఽస్మి సదాస్మ్యహమ్ ।
• ఏకసంఖ్యావిహీనోఽస్మి ద్విసంఖ్యా నాస్తి నాస్మ్యహమ్ ॥ ౩౨॥
• సదసద్భేదహీనోఽస్మి సంకల్పరహితోఽస్మ్యహమ్ ।
• నానాత్మభేదహీనోఽస్మి యత్ కిఞ్చిన్నాస్తి సోఽస్మ్యహమ్ ॥ ౩౩॥
• నాహమస్మి న చాన్యోఽస్మి దేహాదిరహితోఽస్మ్యహమ్ ।
• ఆశ్రయాశ్రయహీనోఽస్మి ఆధారరహితోఽస్మ్యహమ్ ॥ ౩౪॥
• బన్ధమోక్షాదిహీనోఽస్మి శుద్ధబ్రహ్మాది సోఽస్మ్యహమ్ ।
• చిత్తాదిసర్వహీనోఽస్మి పరమోఽస్మి పరోఽస్మ్యహమ్ ॥ ౩౫॥
• సదా విచారరూపోఽస్మి నిర్విచారోఽస్మి సోఽస్మ్యహమ్ ।
• ఆకారాదిస్వరూపోఽస్మి ఉకారోఽస్మి ముదోఽస్మ్యహమ్ ॥ ౩౬॥
• ధ్యానాధ్యానవిహీనోఽస్మి ధ్యేయహీనోఽస్మి సోఽస్మ్యహమ్ ।
• పూర్ణాత్ పూర్ణోఽస్మి పూర్ణోఽస్మి సర్వపూర్ణోఽస్మి సోఽస్మ్యహమ్ ॥ ౩౭॥
• సర్వాతీతస్వరూపోఽస్మి పరం బ్రహ్మాస్మి సోఽస్మ్యహమ్ ।
• లక్ష్యలక్షణహీనోఽస్మి లయహీనోఽస్మి సోఽస్మ్యహమ్ ॥ ౩౮॥
• మాతృమానవిహీనోఽస్మి మేయహీనోఽస్మి సోఽస్మ్యహమ్ ।
• అగత్ సర్వం చ ద్రష్టాస్మి నేత్రాదిరహితోఽస్మ్యహమ్ ॥ ౩౯॥
• ప్రవృద్ధోఽస్మి ప్రబుద్ధోఽస్మి ప్రసన్నోఽస్మి పరోఽస్మ్యహమ్ ।
• సర్వేన్ద్రియవిహీనోఽస్మి సర్వకర్మహితోఽస్మ్యహమ్ ॥ ౪౦॥
• సర్వవేదాన్తతృప్తోఽస్మి సర్వదా సులభోఽస్మ్యహమ్ ।
• ముదా ముదితశూన్యోఽస్మి సర్వమౌనఫలోఽస్మ్యహమ్ ॥ ౪౧॥
• నిత్యచిన్మాత్రరూపోఽస్మి సదసచ్చిన్మయోఽస్మ్యహమ్ ।
• యత్ కిఞ్చిదపి హీనోఽస్మి స్వల్పమప్యతి నాహితమ్ ॥ ౪౨॥
• హృదయగ్రన్థిహీనోఽస్మి హృదయాద్వ్యాపకోఽస్మ్యహమ్ ।
• షడ్వికారవిహీనోఽస్మి షట్కోశరహితోఽస్మ్యహమ్ ॥ ౪౩॥
• అరిషడ్వర్గముక్తోఽస్మి అన్తరాదన్తరోఽస్మ్యహమ్ ।
• దేశకాలవిహీనోఽస్మి దిగమ్బరముఖోఽస్మ్యహమ్ ॥ ౪౪॥
• నాస్తి హాస్తి విముక్తోఽస్మి నకారరహితోఽస్మ్యహమ్ ।
• సర్వచిన్మాత్రరూపోఽస్మి సచ్చిదానన్దమస్మ్యహమ్ ॥ ౪౫॥
• అఖణ్డాకారరూపోఽస్మి అఖణ్డాకారమస్మ్యహమ్ ।
• ప్రపఞ్చచిత్తరూపోఽస్మి ప్రపఞ్చరహితోఽస్మ్యహమ్ ॥ ౪౬॥
• సర్వప్రకారరూపోఽస్మి సద్భావావర్జితోఽస్మ్యహమ్ ।
• కాలత్రయవిహీనోఽస్మి కామాదిరహితోఽస్మ్యహమ్ ॥ ౪౭॥
• కాయకాయివిముక్తోఽస్మి నిర్గుణప్రభవోఽస్మ్యహమ్ ।
• ముక్తిహీనోఽస్మి ముక్తోఽస్మి మోక్షహీనోఽస్మ్యహం సదా ॥ ౪౮॥
• సత్యాసత్యవిహీనోఽస్మి సదా సన్మాత్రమస్మ్యహమ్ ।
• గన్తవ్యదేశహీనోఽస్మి గమనారహితోఽస్మ్యహమ్ ॥ ౪౯॥
• సర్వదా స్మరరూపోఽస్మి శాన్తోఽస్మి సుహితోఽస్మ్యహమ్ ।
• ఏవం స్వానుభవం ప్రోక్తం ఏతత్ ప్రకరణం మహత్ ॥ ౫౦॥
• యః శృణోతి సకృద్వాపి బ్రహ్మైవ భవతి స్వయమ్ ।
• పిణ్డాణ్డసంభవజగద్గతఖణ్డనోద్య-
• ద్వేతణ్డశుణ్డనిభపీవరబాహుదణ్డ ।
• బ్రహ్మోరుముణ్డకలితాణ్డజవాహబాణ
• కోదణ్డభూధరధరం భజతామఖణ్డమ్ ॥ ౫౧॥
• విశ్వాత్మన్యద్వితీయే భగవతి గిరిజానాయకే కాశరూపే
• నీరూపే విశ్వరూపే గతదురితధియః ప్రాప్నువన్త్యాత్మభావమ్ ।
• అన్యే భేదధియః శ్రుతిప్రకథితైర్వర్ణాశ్రమోత్థశ్రమైః
• తాన్తాః శాన్తివివర్జితా విషయిణో దుఃఖం భజన్త్యన్వహమ్ ॥ ౫౨॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే స్వాత్మనిరూపణం నామ సప్తమోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com