ఋభుగీతా ౩౨ ॥ సర్వ-మిథ్యాత్వ నిరూపణ ప్రకరణమ్ ॥

ఋభుః -

• వక్ష్యే పునరసత్త్యాగం బ్రహ్మనిశ్చయమేవ చ ।
• యస్య శ్రవణమాత్రేణ సద్యో ముక్తో భవేన్నరః ॥ ౧॥
• చిత్తసత్తా మనఃసత్తా బ్రహ్మసత్తాఽన్యథా స్థితా ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨॥
• దేహసత్తా లిఙ్గసత్తా భావసత్తాఽక్షరా స్థితా ।
• సర్వం మిథ్యా న సన్దేహో బ్రహ్మైవాహం న సంశయః ॥ ౩॥
• దృశ్యం చ దర్శనం దృష్టా కర్తా కారయితా క్రియా ।var was ద్రష్టా
• సర్వం మిథ్యా న సన్దేహో బ్రహ్మైవాహం న సంశయః ॥ ౪॥
• ఏకం ద్విత్వం పృథగ్భావం అస్తి నాస్తీతి నిర్ణయః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౫॥
• శాస్త్రభేదం వేదభేదం ముక్తీనాం భేదభావనమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౬॥
• జాతిభేదం వర్ణభేదం శుద్ధాశుద్ధవినిర్ణయః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౭॥
• అఖణ్డాకారవృత్తిశ్చ అఖణ్డైకరసం పరమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౮॥
• పరాపరవికల్పశ్చ పుణ్యపాపవికల్పనమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౯॥
• కల్పనాకల్పనాద్వైతం మనోకల్పనభావనమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౦॥
• సిద్ధం సాధ్యం సాధనం చ నాశనం బ్రహ్మభావనమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౧॥
• ఆత్మజ్ఞానం మనోధర్మం మనోఽభావే కుతో భవేత్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౨॥
• అజ్ఞానం చ మనోధర్మస్తదభావే చ తత్కుతః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౩॥
• శమో దమో మనోధర్మస్తదభావే చ తత్కుతః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౪॥
• బన్ధమోక్షౌ మనోధర్మౌ తదభావే కుతో భవేత్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౫॥
• సర్వం మిథ్యా జగన్మిథ్యా దేహో మిథ్యా జడత్వతః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౬॥
• బ్రహ్మలోకః సదా మిథ్యా బుద్ధిరూపం తదేవ హి ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౭॥
• విష్ణులోకః సదా మిథ్యా శివమేవ హి సర్వదా ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౮॥
• రుద్రలోకః సదా మిథ్యా అహంకారస్వరూపతః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౧౯॥
• చన్ద్రలోకః సదా మిథ్యా మనోరూపవికల్పనమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౦॥
• దిశో లోకః సదా మిథ్యా శ్రోత్రశబ్దసమన్వితః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౧॥
• సూర్యలోకః సదా మిథ్యా నేత్రరూపసమన్వితః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౨॥
• వరుణస్య సదా లోకో జిహ్వారససమన్వితః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౩॥
• త్వచో లోకః సదా మిథ్యా వాయోః స్పర్శసమన్వితః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౪॥
• అశ్వినోర్ఘ్రాణలోకశ్చ గన్ధద్వైతసమన్వితః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౫॥
• అగ్నేర్లోకః సదా మిథ్యా వాగేవ వచనేన తత్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౬॥
• ఇన్ద్రలోకః సదా మిథ్యా పాణిపాదేన సంయుతః ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౭॥
• ఉపేన్ద్రస్య మహర్లోకో గమనేన పదం యుతమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౮॥
• మృత్యురేవ సదా నాస్తి పాయురేవ విసర్గకమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౨౯॥
• ప్రజాపతేర్మహర్లోకో గుహ్యమానన్దసంయుతమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౩౦॥
• సర్వం మిథ్యా న సన్దేహః సర్వమాత్మేతి నిశ్చితమ్ ।
• తితిక్షోశ్చ సమాధానం శ్రద్ధా చాచార్యభాషణే ॥ ౩౧॥
• ముముక్షుత్వం చ మోక్షశ్చ మోక్షార్థే మమ జీవనే ।
• చతుఃసాధనసంపన్నః సోఽధికారీతి నిశ్చయః ॥ ౩౨॥
• జీవబ్రహ్మైక్యసద్భావం వియద్బ్రహ్మేతి నిశ్చయః ।
• వేదాన్తబ్రహ్మణో బోధ్యం బోధకం బన్ధముచ్యతే ॥ ౩౩॥
• సర్వజ్ఞాననిర్వృత్తిశ్చేదానన్దావాప్తికం ఫలమ్ ।var was నివృత్తి
• ఇత్యేవమాదిభిః శబ్దైః ప్రోక్తం సర్వమసత్ సదా ॥ ౩౪॥
• సర్వశబ్దార్థరూపం చ నిశ్చయం భావనం తథా ।
• బ్రహ్మమాత్రం పరం సత్యమన్యత్ సర్వమసత్ సదా ॥ ౩౫॥
• అనేకశబ్దశ్రవణమనేకార్థవిచారణమ్ ।
• సర్వం మిథ్యా న సన్దేహో బ్రహ్మైవాహం న సంశయః ॥ ౩౬॥
• నానుధ్యాయాద్బ్రహ్మశబ్దాన్ ఇత్యుక్త్వా హ మహానసి ।
• బ్రహ్మోపదేశకాలే తు సర్వం చోక్తం న సంశయః ॥ ౩౭॥
• బ్రహ్మైవాహమిదం ద్వైతం చిత్తసత్తావిభావనమ్ ।
• చిన్మాత్రోఽహమిదం ద్వైతం జీవబ్రహ్మేతి భావనమ్ ॥ ౩౮॥
• అహం చిన్మాత్రమన్త్రం వా కార్యకారణచిన్తనమ్ ।
• అక్షయానన్దవిజ్ఞానమఖణ్డైకరసాద్వయమ్ ॥ ౩౯॥
• పరం బ్రహ్మ ఇదం బ్రహ్మ శాన్తం బ్రహ్మ స్వయం జగత్ ।
• అన్తరిన్ద్రియవిజ్ఞానం బాహ్యేన్ద్రియనిరోధనమ్ ॥ ౪౦॥
• సర్వోపదేశకాలం చ సామ్యం శేషం మహోదయమ్ ।
• భూమిరాపోఽనలో వాయుః ఖం మనో బుద్ధిరేవ చ ॥ ౪౧॥
• కారణం కార్యభేదం చ శాస్త్రమార్గైకకల్పనమ్ ।
• అహం బ్రహ్మ ఇదం బ్రహ్మ సర్వం బ్రహ్మేతి శబ్దతః ॥ ౪౨॥
• సత్యరూపం క్వచిన్నాస్తి సత్యం నామ కదా నహి ।
• సంశయం చ విపర్యాసం సఙ్కల్పః కారణం భ్రమః ॥ ౪౩॥
• ఆత్మనోఽన్యత్ క్వచిన్నాస్తి సర్వం మిథ్యా న సంశయః ।
• మహతాం హ్యద్యతే మన్త్రీ మేధాశుద్ధిశుభాశుభమ్ ॥ ౪౪॥
• దేశభేదం వస్తుభేదం న చ చైతన్యభేదకమ్ ।
• ఆత్మనోఽన్యత్ పృథగ్భావమాత్మనోఽన్యన్నిరూపణమ్ ॥ ౪౫॥
• ఆత్మనోఽన్యన్నామరూపమాత్మనోఽన్యచ్ఛుభాశుభమ్ ।
• ఆత్మనోఽన్యద్వస్తుసత్తా ఆత్మనోఽన్యజ్జగత్త్రయమ్ ॥ ౪౬॥
• ఆత్మనోఽన్యత్ సుఃఖం దుఃఖమాత్మనోఽన్యద్విచిన్తనమ్ ।
• ఆత్మనోఽన్యత్ప్రపఞ్చం వా ఆత్మనోఽన్యజ్జయాజయౌ ॥ ౪౭॥
• ఆత్మనోఽన్యద్దేవపూజా ఆత్మనోఽన్యచ్ఛివార్చనమ్ ।
• ఆత్మనోఽన్యన్మహాధ్యానమాత్మనోఽన్యత్ కలాక్రమమ్ ॥ ౪౮॥
• సర్వం మిథ్యా న సన్దేహో బ్రహ్మ సర్వం న సంశయః ।
• సర్వముక్తం భగవతా నిదిధ్యాసస్తు సర్వదా ॥ ౪౯॥
• సకృచ్ఛ్రవణమాత్రేణ హృదయగ్రన్థిరన్తిమమ్ ।
• కర్మనాశం చ మూఢానాం మహతాం ముక్తిరేవ హి ॥ ౫౦॥
• అనేకకోటిజననపాతకం భస్మసాద్భవేత్ ।
• సత్యం సత్యం పునః సత్యం సత్యం సర్వం వినశ్యతి ।
• సద్యో ముక్తిర్న సన్దేహో నాస్తి మఙ్గలమఙ్గలమ్ ॥ ౫౧॥
• క్వ భేదభావదర్శనం న చైవ శోకమోహహృత్
• ప్రపశ్యతాం శ్రుతే శిఖావిశేషమైక్యభావనాత్ ।
• యతో భవేజ్జగాద తం మహేశ యేన జీవితం
• యదన్తరాఽవిశత్ సదా యథోర్ణనాభతన్తువత్ ॥ ౫౨॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే సర్వమిథ్యాత్వనిరూపణప్రకరణం నామ ద్వాత్రింశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com