ఋభుగీతా ౨౮ ॥ ఆత్మ-వైలక్షణ్య ప్రకరణమ్ ॥
ఋభుః -
- బ్రహ్మైవాహం చిదేవాహం నిర్మలోఽహం నిరన్తరః ।
- శుద్ధస్వరూప ఏవాహం నిత్యరూపః పరోఽస్మ్యహమ్ ॥ ౧॥
- నిత్యనిర్మలరూపోఽహం నిత్యచైతన్యవిగ్రహః ।
- ఆద్యన్తరూపహీనోఽహమాద్యన్తద్వైతహీనకః ॥ ౨॥
- అజస్రసుఖరూపోఽహం అజస్రానన్దరూపవాన్ ।
- అహమేవాదినిర్ముక్తః అహం కారణవర్జితః ॥ ౩॥
- అహమేవ పరం బ్రహ్మ అహమేవాహమేవ హి ।
- ఇత్యేవం భావయన్నిత్యం సుఖమాత్మని నిర్మలః ॥ ౪॥
- సుఖం తిష్ఠ సుఖం తిష్ఠ సుచిరం సుఖమావహ ।
- సర్వవేదమనన్యస్త్వం సర్వదా నాస్తి కల్పనమ్ ॥ ౫॥
- సర్వదా నాస్తి చిత్తాఖ్యం సర్వదా నాస్తి సంసృతిః ।
- సర్వదా నాస్తి నాస్త్యేవ సర్వదా జగదేవ న ॥ ౬॥
- జగత్ప్రసఙ్గో నాస్త్యేవ దేహవార్తా కుతస్తతః ।
- బ్రహ్మైవ సర్వచిన్మాత్రమహమేవ హి కేవలమ్ ॥ ౭॥
- చిత్తమిత్యపి నాస్త్యేవ చిత్తమస్తి హి నాస్తి హి ।
- అస్తిత్వభావనా నిష్ఠా జగదస్తిత్వవాఙ్మృషా ॥ ౮॥
- అస్తిత్వవక్తా వార్తా హి జగదస్తీతి భావనా ।
- స్వాత్మనోఽన్యజ్జగద్రక్షా దేహోఽహమితి నిశ్చితః ॥ ౯॥
- మహాచణ్డాల ఏవాసౌ మహావిప్రోఽపి నిశ్చయః ।
- తస్మాదితి జగన్నేతి చిత్తం వా బుద్ధిరేవ చ ॥ ౧౦॥
- నాస్తి నాస్తీతి సహసా నిశ్చయం కురు నిర్మలః ।
- దృశ్యం నాస్త్యేవ నాస్త్యేవ నాస్తి నాస్తీతి భావయ ॥ ౧౧॥
- అహమేవ పరం బ్రహ్మ అహమేవ హి నిష్కలః ।
- అహమేవ న సన్దేహః అహమేవ సుఖాత్ సుఖమ్ ॥ ౧౨॥
- అహమేవ హి దివ్యాత్మా అహమేవ హి కేవలః ।
- వాచామగోచరోఽహం వై అహమేవ న చాపరః ॥ ౧౩॥
- అహమేవ హి సర్వాత్మా అహమేవ సదా ప్రియః ।
- అహమేవ హి భావాత్మా అహం వృత్తివివర్జితః ॥ ౧౪॥
- అహమేవాపరిచ్ఛిన్న అహమేవ నిరన్తరః ।
- అహమేవ హి నిశ్చిన్త అహమేవ హి సద్గురుః ॥ ౧౫॥
- అహమేవ సదా సాక్షీ అహమేవాహమేవ హి ।
- నాహం గుప్తో న వాఽగుప్తో న ప్రకాశాత్మకః సదా ॥ ౧౬॥
- నాహం జడో న చిన్మాత్రః క్వచిత్ కిఞ్చిత్ తదస్తి హి ।
- నాహం ప్రాణో జడత్వం తదత్యన్తం సర్వదా భ్రమః ॥ ౧౭॥
- అహమత్యన్తమానన్ద అహమత్యన్తనిర్మలః ।
- అహమత్యన్తవేదాత్మా అహమత్యన్తశాఙ్కరః ॥ ౧౮॥
- అహమిత్యపి మే కిఞ్చిదహమిత్యపి న స్మృతిః ।
- సర్వహీనోఽహమేవాగ్రే సర్వహీనః సుఖాచ్ఛుభాత్ ॥ ౧౯॥
- పరాత్ పరతరం బ్రహ్మ పరాత్ పరతరః పుమాన్ ।
- పరాత్ పరతరోఽహం వై సర్వస్యాత్ పరతః పరః ॥ ౨౦॥
- సర్వదేహవిహీనోఽహం సర్వకర్మవివర్జితః ।
- సర్వమన్త్రః ప్రశాన్తాత్మా సర్వాన్తఃకరణాత్ పరః ॥ ౨౧॥
- సర్వస్తోత్రవిహీనోఽహం సర్వదేవప్రకాశకః ।
- సర్వస్నానవిహీనాత్మా ఏకమగ్నోఽహమద్వయః ॥ ౨౨॥
- ఆత్మతీర్థే హ్యాత్మజలే ఆత్మానన్దమనోహరే ।
- ఆత్మైవాహమితి జ్ఞాత్వా ఆత్మారామోవసామ్యహమ్ ॥ ౨౩॥
- ఆత్మైవ భోజనం హ్యాత్మా తృప్తిరాత్మసుఖాత్మకః ।
- ఆత్మైవ హ్యాత్మనో హ్యాత్మా ఆత్మైవ పరమో హ్యహమ్ ॥ ౨౪॥
- అహమాత్మాఽహమాత్మాహమహమాత్మా న లౌకికః ।
- సర్వాత్మాహం సదాత్మాహం నిత్యాత్మాహం గుణాన్తరః ॥ ౨౫॥
- ఏవం నిత్యం భావయిత్వా సదా భావయ సిద్ధయే ।
- సిద్ధం తిష్ఠతి చిన్మాత్రో నిశ్చయం మాత్రమేవ సా ।
- నిశ్చయం చ లయం యాతి స్వయమేవ సుఖీ భవ ॥ ౨౬॥
- శాఖాదిభిశ్చ శ్రుతయో హ్యనన్తా-
- స్త్వామేకమేవ భగవన్ బహుధా వదన్తి ।
- విష్ణ్విన్ద్రధాతృరవిసూన్వనలానిలాది
- భూతాత్మనాథ గణనాథలలామ శమ్భో ॥ ౨౭॥
- ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే ఆత్మవైలక్షణ్యప్రకరణం నామ అష్టావింశోఽధ్యాయః ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com