ఋభుగీతా ౧౮ ॥ ఋభి-నిదాధ సంవాదః ॥

ఋభుః -

• శృణు భూయః పరం తత్త్వం సద్యో మోక్షప్రదాయకమ్ ।
• సర్వం బ్రహ్మైవ సతతం సర్వం శాన్తం న సంశయః ॥ ౧॥
• బ్రహ్మాక్షరమిదం సర్వం పరాకారమిదం నహి ।
• ఇదమిత్యపి యద్దోషం వయమిత్యపి భాషణమ్ ॥ ౨॥
• యత్కిఞ్చిత్స్మరణం నాస్తి యత్కిఞ్చిద్ ధ్యానమేవ హి ।
• యత్కిఞ్చిద్ జ్ఞానరూపం వా తత్సర్వం బ్రహ్మ ఏవ హి ॥ ౩॥
• యత్కిఞ్చిద్ బ్రహ్మవాక్యం వా యత్కిఞ్చిద్వేదవాక్యకమ్ ।
• యత్కిఞ్చిద్గురువాక్యం వా తత్సర్వం బ్రహ్మ ఏవ హి ॥ ౪॥
• యత్కిఞ్చిత్కల్మషం సత్యం యత్కిఞ్చిత్ ప్రియభాషణమ్ ।
• యత్కిఞ్చిన్మననం సత్తా తత్సర్వం బ్రహ్మ ఏవ హి ॥ ౫॥
• యత్కిఞ్చిత్ శ్రవణం నిత్యం యత్ కిఞ్చిద్ధ్యానమశ్నుతే ।
• యత్కిఞ్చిన్నిశ్చయం శ్రద్ధా తత్సర్వం బ్రహ్మ ఏవ హి ॥ ౬॥
• యత్కిఞ్చిద్ గురూపదేశం యత్కిఞ్చిద్గురుచిన్తనమ్ ।
• యత్కిఞ్చిద్యోగభేదం వా తత్సర్వం బ్రహ్మ ఏవ హి ॥ ౭॥
• సర్వం త్యజ్య గురుం త్యజ్య సర్వం సన్త్యజ్య నిత్యశః ।
• తూష్ణీమేవాసనం బ్రహ్మ సుఖమేవ హి కేవలమ్ ॥ ౮॥
• సర్వం త్యక్త్వా సుఖం నిత్యం సర్వత్యాగం సుఖం మహత్ ।
• సర్వత్యాగం పరానన్దం సర్వత్యాగం పరం సుఖమ్ ॥ ౯॥
• సర్వత్యాగం మనస్త్యాగః సర్వత్యాగమహంకృతేః ।
• సర్వత్యాగం మహాయాగః సర్వత్యాగం సుఖం పరమ్ ॥ ౧౦॥
• సర్వత్యాగం మహామోక్షం చిత్తత్యాగం తదేవ హి ।
• చిత్తమేవ జగన్నిత్యం చిత్తమేవ హి సంసృతిః ॥ ౧౧॥
• చిత్తమేవ మహామాయా చిత్తమేవ శరీరకమ్ ।
• చిత్తమేవ భయం దేహః చిత్తమేవ మనోమయమ్ ॥ ౧౨॥
• చిత్తమేవ ప్రపఞ్చాఖ్యం చిత్తమేవ హి కల్మషమ్ ।
• చిత్తమేవ జడం సర్వం చిత్తమేవేన్ద్రియాదికమ్ ॥ ౧౩॥
• చిత్తమేవ సదా సత్యం చిత్తమేవ నహి క్వచిత్ ।
• చిత్తమేవ మహాశాస్త్రం చిత్తమేవ మనఃప్రదమ్ ॥ ౧౪॥
• చిత్తమేవ సదా పాపం చిత్తమేవ సదా మతమ్ ।
• చిత్తమేవ హి సర్వాఖ్యం చిత్తమేవ సదా జహి ॥ ౧౫॥
• చిత్తం నాస్తీతి చిన్తా స్యాత్ ఆత్మమాత్రం ప్రకాశతే ।
• చిత్తమస్తీతి చిన్తా చేత్ చిత్తత్వం స్వయమేవ హి ॥ ౧౬॥
• స్వయమేవ హి చిత్తాఖ్యం స్వయం బ్రహ్మ న సంశయః ।
• చిత్తమేవ హి సర్వాఖ్యం చిత్తం సర్వమితి స్మృతమ్ ॥ ౧౭॥
• బ్రహ్మైవాహం స్వయంజ్యోతిర్బ్రహ్మైవాహం న సంశయః ।
• సర్వం బ్రహ్మ న సన్దేహః సర్వం చిజ్జ్యోతిరేవ హి ॥ ౧౮॥
• అహం బ్రహ్మైవ నిత్యాత్మా పూర్ణాత్ పూర్ణతరం సదా ।
• అహం పృథ్వ్యాదిసహితం అహమేవ విలక్షణమ్ ॥ ౧౯॥
• అహం సూక్ష్మశరీరాన్తమహమేవ పురాతనమ్ ।
• అహమేవ హి మానాత్మా సర్వం బ్రహ్మైవ కేవలమ్ ॥ ౨౦॥
• చిదాకారో హ్యహం పూర్ణశ్చిదాకారమిదం జగత్ ।
• చిదాకారం చిదాకాశం చిదాకాశమహం సదా ॥ ౨౧॥
• చిదాకాశం త్వమేవాసి చిదాకాశమహం సదా ।
• చిదాకాశం చిదేవేదం చిదాకాశాన్న కిఞ్చన ॥ ౨౨॥
• చిదాకాశతతం సర్వం చిదాకాశం ప్రకాశకమ్ ।
• చిదాకారం మనో రూపం చిదాకాశం హి చిద్ఘనమ్ ॥ ౨౩॥
• చిదాకాశం పరం బ్రహ్మ చిదాకాశం చ చిన్మయః ।
• చిదాకాశం శివం సాక్షాచ్చిదాకాశమహం సదా ॥ ౨౪॥
• సచ్చిదానన్దరూపోఽహం సచ్చిదానన్దశాశ్వతః ।
• సచ్చిదానన్ద సన్మాత్రం సచ్చిదానన్దభావనః ॥ ౨౫॥
• సచ్చిదానన్దపూర్ణోఽహం సచ్చిదానన్దకారణమ్ ।
• సచ్చిదానన్దసన్దోహః సచ్చిదానన్ద ఈశ్వరః ॥ ౨౬॥var was హీనకః
• సచ్చిదానన్దనిత్యోఽహం సచ్చిదానన్దలక్షణమ్ ।
• సచ్చిదానన్దమాత్రోఽహం సచ్చిదానన్దరూపకః ॥ ౨౭॥
• ఆత్మైవేదమిదం సర్వమాత్మైవాహం న సంశయః ।
• ఆత్మైవాస్మి పరం సత్యమాత్మైవ పరమం పదమ్ ॥ ౨౮॥
• ఆత్మైవ జగదాకారం ఆత్మైవ భువనత్రయమ్ ।
• ఆత్మైవ జగతాం శ్రేష్ఠః ఆత్మైవ హి మనోమయః ॥ ౨౯॥
• ఆత్మైవ జగతాం త్రాతా ఆత్మైవ గురురాత్మనః ।
• ఆత్మైవ బహుధా భాతి ఆత్మైవైకం పరాత్మనః ॥ ౩౦॥
• ఆత్మైవ పరమం బ్రహ్మ ఆత్మైవాహం న సంశయః ।
• ఆత్మైవ పరమం లోకం ఆత్మైవ పరమాత్మనః ॥ ౩౧॥
• ఆత్మైవ జీవరూపాత్మా ఆత్మైవేశ్వరవిగ్రహః ।
• ఆత్మైవ హరిరానన్దః ఆత్మైవ స్వయమాత్మనః ॥ ౩౨॥
• ఆత్మైవానన్దసన్దోహ ఆత్మైవేదం సదా సుఖమ్ ।
• ఆత్మైవ నిత్యశుద్ధాత్మా ఆత్మైవ జగతః పరః ॥ ౩౩॥
• ఆత్మైవ పఞ్చభూతాత్మా ఆత్మైవ జ్యోతిరాత్మనః ।
• ఆత్మైవ సర్వదా నాన్యదాత్మైవ పరమోఽవ్యయః ॥ ౩౪॥
• ఆత్మైవ హ్యాత్మభాసాత్మా ఆత్మైవ విభురవ్యయః ।
• ఆత్మైవ బ్రహ్మవిజ్ఞానం ఆత్మైవాహం త్వమేవ హి ॥ ౩౫॥
• ఆత్మైవ పరమానన్ద ఆత్మైవాహం జగన్మయః ।
• ఆత్మైవాహం జగద్భానం ఆత్మైవాహం న కిఞ్చన ॥ ౩౬॥
• ఆత్మైవ హ్యాత్మనః స్నానమాత్మైవ హ్యాత్మనో జపః ।
• ఆత్మైవ హ్యాత్మనో మోదమాత్మైవాత్మప్రియః సదా ॥ ౩౭॥
• ఆత్మైవ హ్యాత్మనో నిత్యో హ్యాత్మైవ గుణభాసకః ।
• ఆత్మైవ తుర్యరూపాత్మా ఆత్మాతీతస్తతః పరః ॥ ౩౮॥
• ఆత్మైవ నిత్యపూర్ణాత్మా ఆత్మైవాహం న సంశయః ।
• ఆత్మైవ త్వమహం చాత్మా సర్వమాత్మైవ కేవలమ్ ॥ ౩౯॥
• నిత్యోఽహం నిత్యపూర్ణోఽహం నిత్యోఽహం సర్వదా సదా ।
• ఆత్మైవాహం జగన్నాన్యద్ అమృతాత్మా పురాతనః ॥ ౪౦॥
• పురాతనోఽహం పురుషోఽహమీశః పరాత్ పరోఽహం పరమేశ్వరోఽహమ్ ।
• భవప్రదోఽహం భవనాశనోఽహం సుఖప్రదోఽహం సుఖరూపమద్వయమ్ ॥ ౪౧॥
• ఆనన్దోఽహమశేషోఽహమమృతోహం న సంశయః ।
• అజోఽహమాత్మరూపోఽహమన్యన్నాస్తి సదా ప్రియః ॥ ౪౨॥
• బ్రహ్మైవాహమిదం బ్రహ్మ సర్వం బ్రహ్మ సదాఽవ్యయః ।
• సదా సర్వపదం నాస్తి సర్వమేవ సదా న హి ॥ ౪౩॥
• నిర్గుణోఽహం నిరాధార అహం నాస్తీతి సర్వదా ।
• అనర్థమూలం నాస్త్యేవ మాయాకార్యం న కిఞ్చన ॥ ౪౪॥
• అవిద్యావిభవో నాస్తి అహం బ్రహ్మ న సంశయః ।
• సర్వం బ్రహ్మ చిదాకాశం తదేవాహం న సంశయః ॥ ౪౫॥
• తదేవాహం స్వయం చాహం పరం చాహం పరేశ్వరః ।
• విద్యాధరోఽహమేవాత్ర విద్యావిద్యే న కిఞ్చన ॥ ౪౬॥
• చిదహం చిదహం నిత్యం తుర్యోఽహం తుర్యకః పరః ।
• బ్రహ్మైవ సర్వం బ్రహ్మైవ సర్వం బ్రహ్మ సదాఽస్మ్యహమ్ ॥ ౪౭॥
• మత్తోఽన్యన్నాపరం కిఞ్చిన్మత్తోఽన్యద్బ్రహ్మ చ క్వచిత్ ।
• మత్తోఽన్యత్ పరమం నాస్తి మత్తోఽన్యచ్చిత్పదం నహి ॥ ౪౮॥
• మత్తోఽన్యత్ సత్పదం నాస్తి మత్తోఽన్యచ్చిత్పదం న మే ।
• మత్తోఽన్యత్ భవనం నాస్తి మత్తోఽన్యద్ బ్రహ్మ ఏవ న ॥ ౪౯॥
• మత్తోఽన్యత్ కారణం నాస్తి మత్తోఽన్యత్ కిఞ్చిదప్యణు ।
• మత్తోఽన్యత్ సత్త్వరూపం చ మత్తోఽన్యత్ శుద్ధమేవ న ॥ ౫౦॥
• మత్తోఽన్యత్ పావనం నాస్తి మత్తోఽన్యత్ తత్పదం న హి ।
• మత్తోఽన్యత్ ధర్మరూపం వా మత్తోఽన్యదఖిలం న చ ॥ ౫౧॥
• మత్తోఽన్యదసదేవాత్ర మత్తోఽన్యన్మిథ్యా ఏవ హి ।
• మత్తోఽన్యద్భాతి సర్వస్వం మత్తోఽన్యచ్ఛశశృఙ్గవత్ ॥ ౫౨॥
• మత్తోఽన్యద్భాతి చేన్మిథ్యా మత్తోఽన్యచ్చేన్ద్రజాలకమ్ ।
• మత్తోఽన్యత్ సంశయో నాస్తి మత్తోఽన్యత్ కార్య కారణమ్ ॥ ౫౩॥
• బ్రహ్మమాత్రమిదం సర్వం సోఽహమస్మీతి భావనమ్ ।
• సర్వముక్తం భగవతా ఏవమేవేతి నిశ్చిను ॥ ౫౪॥
• బహునోక్తేన కిం యోగిన్ నిశ్చయం కురు సర్వదా ।
• సకృన్నిశ్చయమాత్రేణ బ్రహ్మైవ భవతి స్వయమ్ ॥ ౫౫॥
• వననగభువనం యచ్ఛఙ్కరాన్నాన్యదస్తి
• జగదిదమసురాద్యం దేవదేవః స ఏవ ।
• తనుమనగమనాద్యైః కోశకాశావకాశే
• స ఖలు పరశివాత్మా దృశ్యతే సూక్ష్మబుద్ధ్యా ॥ ౫౬॥
• చక్షుఃశ్రోత్రమనోఽసవశ్చ హృది ఖాదుద్భాసితధ్యాన్తరాత్
• తస్మిన్నేవ విలీయతే గతిపరం యద్వాసనా వాసినీ ।
• చిత్తం చేతయతే హృదిన్ద్రియగణం వాచాం మనోదూరగం
• తం బ్రహ్మామృతమేతదేవ గిరిజాకాన్తాత్మనా సంజ్ఞితమ్ ॥ ౫౭॥

• ॥ ఇతి శ్రీశివరహస్యే శఙ్కరాఖ్యే షష్ఠాంశే ఋభునిదాఘసంవాదే అష్టాదశోఽధ్యాయః ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com