ഋഭുഗീതാ ൧ ॥ ഋഭു സ്തുതി ॥
- ഹേമാദ്രിം കില മാതുലുങ്ഗഫലമിത്യാദായ മോദാധികോ
- മൌഢ്യാന്നാകനിവാസിനാം ഭയപരൈര്വാക്യൈരിവ പ്രാര്ഥിതഃ ।
- നീലീശാമ്ബരനീലമമ്ബരതലം ജമ്ബൂഫലം ഭാവയന്
- തം മുഞ്ചന് ഗിരിമമ്ബരം പരിമൃശന് ലമ്ബോദരഃ പാതു മാമ് ॥ ൧॥
- വാമം യസ്യ വപുഃ സമസ്തജഗതാം മാതാ പിതാ ചേതരത്
- യത്പാദാമ്ബുജനൂപുരോദ്ഭവരവഃ ശബ്ദാര്ഥവാക്യാസ്പദമ് ।
- യന്നേത്രത്രിതയം സമസ്തജഗതാമാലോകഹേതുഃ സദാ
- പായാദ്ദൈവതസാര്വഭൌമഗിരിജാലങ്കാരമൂര്തിഃ ശിവഃ ॥ ൨॥
സൂതഃ -
- ജൈഗീഷവ്യഃ പുനര്നത്വാ ഷണ്മുഖം ശിവസംഭവമ് ।
- പപ്രച്ഛ ഹൃഷ്ടസ്തം തത്ര മുനിഭിര്ഗണപുങ്ഗവൈഃ ॥ ൩॥
ജൈഗീഷവ്യഃ -
- കരുണാകര സര്വജ്ഞ ശരണാഗതപാലക ।
- അരുണാധിപനേത്രാബ്ജ ചരണസ്മരണോന്മുഖ ॥ ൪॥
- കരുണാവരുണാമ്ഭോധേ തരണിദ്യുതിഭാസ്കര ।
- ദിവ്യദ്വാദശലിങ്ഗാനാം മഹിമാ സംശ്രുതോ മയാ ॥ ൫॥
- ത്വത്തോഽന്യത് ശ്രോതുമിച്ഛാമി ശിവാഖ്യാനമനുത്തമമ് ।
- ത്വദ്വാക്യകഞ്ജപീയൂഷധാരാഭിഃ പാവയാശു മാമ് ॥ ൬॥
സൂതഃ -
- ഇതി തസ്യ ഗിരാ തുഷ്ടഃ ഷണ്മുഖഃ പ്രാഹ തം മുനിമ് ॥ ൭॥
ശ്രീഷണ്മുഖഃ -
- ശൃണു ത്വമഗജാകാന്തേനോക്തം ജ്ഞാനമഹാര്ണവമ് ।
- ഋഭവേ യത്പുരാ പ്രാഹ കൈലാസേ ശങ്കരഃ സ്വയമ് ॥ ൮॥
- ബ്രഹ്മസൂനുഃ പുരാ വിപ്രോ ഗത്വാ നത്വാ മഹേശ്വരമ് ।
- ഋഭുര്വിഭും തദാ ശംഭും തുഷ്ടാവ പ്രണതോ മുദാ ॥ ൯॥
ഋഭുഃ -
- ദിവാമണിനിശാപതിസ്ഫുടകൃപീടയോനിസ്ഫുര-
- ല്ലലാടഭസിതോല്ലസദ്വരത്രിപുണ്ഡ്രഭാഗോജ്വലമ് ।var was ത്രിപുണ്ട്ര
- ഭജാമി ഭുജഗാങ്ഗദം വിധൃതസാമിസോമപ്രഭാ-
- വിരാജിതകപര്ദകം കരടികൃത്തിഭൂഷ്യത്കടിമ് ॥ ൧൦॥
- ഫാലാക്ഷാധ്വരദക്ഷശിക്ഷകവലക്ഷോക്ഷേശവാഹോത്തമ-
- ത്ര്യക്ഷാക്ഷയ്യ ഫലപ്രദാവഭസിതാലങ്കാരരുദ്രാക്ഷധൃക് ।
- ചക്ഷുഃശ്രോത്രവരാങ്ഗഹാരസുമഹാവക്ഷഃസ്ഥലാധ്യക്ഷ മാം
- ഭക്ഷ്യീഭൂതഗരപ്രഭക്ഷ ഭഗവന് ഭിക്ഷ്വര്ച്യപാദാമ്ബുജ ॥ ൧൧॥
- ഗങ്ഗാചന്ദ്രകലാലലാമ ഭഗവന് ഭൂഭൃത്കുമാരീസഖ
- സ്വാമിംസ്തേ പദപദ്മഭാവമതുലം കഷ്ടാപഹം ദേഹി മേ ।
- തുഷ്ടോഽഹം ശിപിവിഷ്ടഹൃഷ്ടമനസാ ഭ്രഷ്ടാന്ന മന്യേ ഹരി-
- ബ്രഹ്മേന്ദ്രാനമരാന് ത്രിവിഷ്ടപഗതാന് നിഷ്ഠാ ഹി മേ താദൃശീ ॥ ൧൨॥
- നൃത്താഡംബരസജ്ജടാപടലികാഭ്രാമ്യന്മഹോഡുച്ഛടാ
- ത്രുട്യത്സോമകലാലലാമകലികാ ശമ്യാകമൌലീനതമ് ।
- ഉഗ്രാനുഗ്രഭവോഗ്രദുര്ഗജഗദുദ്ധാരാഗ്രപാദാമ്ബുജം
- രക്ഷോവക്ഷകുഠാരഭൂതമുമയാ വീക്ഷേ സുകാമപ്രദമ് ॥ ൧൩॥
- ഫാലം മേ ഭസിതത്രിപുണ്ഡ്രരചിതം ത്വത്പാദപദ്മാനതം ??
- പാഹീശാന ദയാനിധാന ഭഗവന് ഫാലാനലാക്ഷ പ്രഭോ ।
- കണ്ഠോ മേ ശിതികണ്ഠനാമ ഭവതോ രുദ്രാക്ഷധൃക് പാഹി മാം
- കര്ണൌ മേ ഭുജഗാധിപോരുസുമഹാകര്ണ പ്രഭോ പാഹി മാമ് ॥ ൧൪॥
- നിത്യം ശങ്കരനാമബോധിതകഥാസാരാദരം ശങ്കരം
- വാചം രുദ്രജപാദരാം സുമഹതീം പഞ്ചാക്ഷരീമിന്ദുധൃക് ।
- ബാഹൂ മേ ശശിഭൂഷണോത്തമ മഹാലിങ്ഗാര്ചനായോദ്യതൌ
- പാഹി പ്രേമരസാര്ദ്രയാഽദ്യ സുദൃശാ ശമ്ഭോ ഹിരണ്യപ്രഭ ॥ ൧൫॥
- ഭാസ്വദ്ബാഹുചതുഷ്ടയോജ്ജ്വല സദാ നേത്രേ ത്രിനേത്രേ പ്രഭോ
- ത്വല്ലിങ്ഗോത്തമദര്ശനേന സുതരാം തൃപ്തൈഃ സദാ പാഹി മേ ।
- പാദൌ മേ ഹരിനേത്രപൂജിതപദദ്വന്ദ്വാവ നിത്യം പ്രഭോ
- ത്വല്ലിങ്ഗാലയപ്രക്രമപ്രണതിഭിര്മാന്യൌ ച ധന്യൌ വിഭോ ॥ ൧൬॥
- ധന്യസ്ത്വല്ലിങ്ഗസങ്ഗേപ്യനുദിനഗലിതാനങ്ഗസങ്ഗാന്തരങ്ഗഃ
- പുംസാമര്ഥൈകശക്ത്യാ യമനിയമവരൈര്വിശ്വവന്ദ്യ പ്രഭോ യഃ ।
- ദത്വാ ബില്വദലം സദമ്ബുജവരം കിഞ്ചിജ്ജലം വാ മുഹുഃ
- പ്രാപ്നോതീശ്വരപാദപങ്കജമുമാനാഥാദ്യ മുക്തിപ്രദമ് ॥ ൧൭॥
- ഉമാരമണ ശങ്കര ത്രിദശവന്ദ്യ വേദേഡ്യ ഹൃത്
- ത്വദീയപരഭാവതോ മമ സദൈവ നിര്വാണകൃത് ।
- ഭവാര്ണവനിവാസിനാം കിമു ഭവത്പദാമ്ഭോരുഹ-
- പ്രഭാവഭജനാദരം ഭവതി മാനസം മുക്തിദമ് ॥ ൧൮॥
- സംസാരാര്ഗലപാദബദ്ധജനതാസംമോചനം ഭര്ഗ തേ
- പാദദ്വന്ദ്വമുമാസനാഥ ഭജതാം സംസാരസംഭര്ജകമ് ।
- ത്വന്നാമോത്തമഗര്ജനാദഘകുലം സന്തര്ജിതം വൈ ഭവേദ്
- ദുഃഖാനാം പരിമാര്ജകം തവകൃപാവീക്ഷാവതാം ജായതേ ॥ ൧൯॥
- വിധിമുണ്ഡകരോത്തമോരുമേരുകോദണ്ഡഖണ്ഡിതപുരാണ്ഡജവാഹബാണ
- പാഹി ക്ഷമാരഥവികര്ഷസുവേദവാജിഹേഷാന്തഹര്ഷിതപദാമ്ബുജ വിശ്വനാഥ ॥ ൨൦॥
- വിഭൂതീനാമന്തോ ന ഹി ഖലു ഭവാനീരമണ തേ
- ഭവേ ഭാവം കശ്ചിത് ത്വയി ഭവഹ ഭാഗ്യേന ലഭതേ ।
- അഭാവം ചാജ്ഞാനം ഭവതി ജനനാദ്യൈശ്ച രഹിതഃ
- ഉമാകാന്ത സ്വാന്തേ ഭവദഭയപാദം കലയതഃ ॥ ൨൧॥
- വരം ശംഭോ ഭാവൈര്ഭവഭജനഭാവേന നിതരാം
- ഭവാമ്ഭോധിര്നിത്യം ഭവതി വിതതഃ പാംസുബഹുലഃ ।
- വിമുക്തിം ഭുക്തിം ച ശ്രുതികഥിതഭസ്മാക്ഷവരധൃക്
- ഭവേ ഭര്തുഃ സര്വോ ഭവതി ച സദാനന്ദമധുരഃ ॥ ൨൨॥
- സോമസാമജസുകൃത്തിമൌലിധൃക് സാമസീമശിരസി സ്തുതപാദ ।
- സാമികായഗിരിജേശ്വര ശമ്ഭോ പാഹി മാമഖിലദുഃഖസമൂഹാത് ॥ ൨൩॥
- ഭസ്മാങ്ഗരാഗ ഭുജഗാങ്ഗ മഹോക്ഷസങ്ഗ
- ഗങ്ഗാമ്ബുസങ്ഗ സുജടാ നിടില സ്ഫുലിങ്ഗ ।
- ലിങ്ഗാങ്ഗ ഭങ്ഗിതമനങ്ഗ വിഹങ്ഗവാഹ-
- സമ്പൂജ്യപാദ സദസങ്ഗ ജനാന്തരങ്ഗ ॥ ൨൪॥
- വാത്സല്യം മയി താദൃശം തവനചേച്ചന്ദ്രാര്ധ ചൂഡാമണേ
- ധിക്കൃത്യാപി വിമുച്യ വാ ത്വയി യതോ ധന്യോ ധരണ്യാമഹമ് ।
- സക്ഷാരം ലവണാര്ണവസ്യ സലിലം ധാരാ ധരേണ ക്ഷണാത്
- ആദായോജ്ഝിതമാക്ഷിതൌ ഹി ജഗതാം ആസ്വാദനീയാം ദൃശാമ് ॥ ൨൫॥
- ത്വത് കൈലാസവരേ വിശോകഹൃദയാഃ ക്രോധോജ്ഝിതാച്ചാണ്ഡജാഃ
- തസ്മാന്മാമപി ഭേദബുദ്ധിരഹിതം കുര്വീശ തേഽനുഗ്രഹാത് ।
- ത്വദ്വക്ത്രാമല നിര്ജരോജ്ഝിത മഹാസംസാര സംതാപഹം
- വിജ്ഞാനം കരുണാഽദിശാദ്യ ഭഗവന് ലോകാവനായ പ്രഭോ ॥ ൨൬॥
- സാരങ്ഗീ സിംഹശാബം സ്പൃശതി സുതധിയാ നന്ദിനീ വ്യാഘ്രപോതം
- മാര്ജാരീ ഹംസബാലം പ്രണയപരവശാ കേകികാന്താ ഭുജങ്ഗമ് ।
- വൈരാണ്യാജന്മജാതാന്യപി ഗലിതമദാ ജന്തവോഽന്യേ ത്യജന്തി
- ഭക്താസ്ത്വത്പാദപദ്മേ കിമു ഭജനവതഃ സര്വസിദ്ധിം ലഭന്തേ ॥ ൨൭॥
സ്കന്ദഃ -
- ഇത്ഥം ഋഭുസ്തുതിമുമാവരജാനിരീശഃ
- ശ്രുത്വാ തമാഹ ഗണനാഥവരോ മഹേശഃ ।
- ജ്ഞാനം ഭവാമയവിനാശകരം തദേവ
- തസ്മൈ തദേവ കഥയേ ശൃണു പാശമുക്ത്യൈ ॥ ൨൮॥
- ॥ ഇതി ശ്രീശിവരഹസ്യേ ശംകരാഖ്യേ ഷഷ്ഠാംശേ ഋഭുസ്തുതിര്നാമ പ്രഥമോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com