ഋഭുഗീതാ ൪൭ ॥ ഋഭു-കൃത സംഗ്രഹോപദേശ വര്ണനമ് ॥
ഋഭുഃ -
- നിദാഘ ശൃണു വക്ഷ്യാമി ദൃഢീകരണമസ്തു തേ ।
- ശിവപ്രസാദപര്യന്തമേവം ഭാവയ നിത്യശഃ ॥ ൧॥
- അഹമേവ പരം ബ്രഹ്മ അഹമേവ സദാശിവഃ ।
- അഹമേവ ഹി ചിന്മാത്രമഹമേവ ഹി നിര്ഗുണഃ ॥ ൨॥
- അഹമേവ ഹി ചൈതന്യമഹമേവ ഹി നിഷ്കലഃ ।
- അഹമേവ ഹി ശൂന്യാത്മാ അഹമേവ ഹി ശാശ്വതഃ ॥ ൩॥
- അഹമേവ ഹി സര്വാത്മാ അഹമേവ ഹി ചിന്മയഃ ।
- അഹമേവ പരം ബ്രഹ്മ അഹമേവ മഹേശ്വരഃ ॥ ൪॥
- അഹമേവ ജഗത്സാക്ഷീ അഹമേവ ഹി സദ്ഗുരുഃ ।
- അഹമേവ ഹി മുക്താത്മാ അഹമേവ ഹി നിര്മലഃ ॥ ൫॥
- അഹമേവാഹമേവോക്തഃ അഹമേവ ഹി ശങ്കരഃ ।
- അഹമേവ ഹി മഹാവിഷ്ണുരഹമേവ ചതുര്മുഖഃ ॥ ൬॥
- അഹമേവ ഹി ശുദ്ധാത്മാ ഹ്യഹമേവ ഹ്യഹം സദാ ।
- അഹമേവ ഹി നിത്യാത്മാ അഹമേവ ഹി മത്പരഃ ॥ ൭॥
- അഹമേവ മനോരൂപം അഹമേവ ഹി ശീതലഃ ।
- അഹമേവാന്തര്യാമീ ച അഹമേവ പരേശ്വരഃ ॥ ൮॥
- ഏവമുക്തപ്രകാരേണ ഭാവയിത്വാ സദാ സ്വയമ് ।
- ദ്രവ്യോഽസ്തി ചേന്ന കുര്യാത്തു വംചകേന ഗുരും പരമ് ॥ ൯॥
- കുമ്ഭീപാകേ സുഘോരേ തു തിഷ്ഠത്യേവ ഹി കല്പകാന് ।
- ശ്രുത്വാ നിദാഘശ്ചോഥായ പുത്രദാരാന് പ്രദത്തവാന് ॥ ൧൦॥
- സ്വശരീരം ച പുത്രത്വേ ദത്വാ സാദരപൂര്വകമ് ।
- ധനധാന്യം ച വസ്ത്രാദീന് ദത്വാഽതിഷ്ഠത് സമീപതഃ ॥ ൧൧॥
- ഗുരോസ്തു ദക്ഷിണാം ദത്വാ നിദാഘസ്തുഷ്ടവാനൃഭുമ് ।
- സന്തുഷ്ടോഽസ്മി മഹാഭാഗ തവ ശുശ്രൂഷയാ സദാ ॥ ൧൨॥
- ബ്രഹ്മവിജ്ഞാനമാപ്തോഽസി സുകൃതാര്ഥോ ന സംശയഃ ।
- ബ്രഹ്മരൂപമിദം ചേതി നിശ്ചയം കുരു സര്വദാ ॥ ൧൩॥
- നിശ്ചയാദപരോ മോക്ഷോ നാസ്തി നാസ്തീതി നിശ്ചിനു ।
- നിശ്ചയം കാരണം മോക്ഷോ നാന്യത് കാരണമസ്തി വൈ ॥ ൧൪॥
- സകലഭുവനസാരം സര്വവേദാന്തസാരം
- സമരസഗുരുസാരം സര്വവേദാര്ഥസാരമ് ।
- സകലഭുവനസാരം സച്ചിദാനന്ദസാരം
- സമരസജയസാരം സര്വദാ മോക്ഷസാരമ് ॥ ൧൫॥
- സകലജനനമോക്ഷം സര്വദാ തുര്യമോക്ഷം
- സകലസുലഭമോക്ഷം സര്വസാമ്രാജ്യമോക്ഷമ് ।
- വിഷയരഹിതമോക്ഷം വിത്തസംശോഷമോക്ഷം
- ശ്രവണമനനമാത്രാദേതദത്യന്തമോക്ഷമ് ॥ ൧൬॥
- തച്ഛുശ്രൂഷാ ച ഭവതഃ തച്ഛ്രുത്വാ ച പ്രപേദിരേ ।
- ഏവം സര്വവചഃ ശ്രുത്വാ നിദാഘഋഷിദര്ശിതമ് ।
- ശുകാദയോ മഹാന്തസ്തേ പരം ബ്രഹ്മമവാപ്നുവന് ॥ ൧൭॥
- ശ്രുത്വാ ശിവജ്ഞാനമിദം ഋഭുസ്തദാ
- നിദാഘമാഹേത്ഥം മുനീന്ദ്രമധ്യേ ।
- മുദാ ഹി തേഽപി ശ്രുതിശബ്ദസാരം
- ശ്രുത്വാ പ്രണമ്യാഹുരതീവ ഹര്ഷാത് ॥ ൧൮॥
മുനയഃ -
- പിതാ മാതാ ഭ്രാതാ ഗുരുരസി വയസ്യോഽഥ ഹിതകൃത്
- അവിദ്യാബ്ധേഃ പാരം ഗമയസി ഭവാനേവ ശരണമ് ।
- ബലേനാസ്മാന് നീത്വാ മമ വചനബലേനൈവ സുഗമം
- പഥം പ്രാപ്ത്യൈവാര്ഥൈഃ ശിവവചനതോഽസ്മാന് സുഖയസി ॥ ൧൯॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ഋഭുകൃതസംഗ്രഹോപദേശവര്ണനം നാമ സപ്തചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com