ഋഭുഗീതാ ൪൨ ॥ നിദാധാനുഭവ വര്ണന പ്രകരണമ് ॥
ഋഭുഃ -
- ശ്രുതം കിഞ്ചിന്മയാ പ്രോക്തം ബ്രഹ്മജ്ഞാനം സുദുര്ലഭമ് ।
- മനസാ ധാരിതം ബ്രഹ്മ ചിത്തം കീദൃക് സ്ഥിതം വദ ॥ ൧॥
നിദാഘഃ -
- ശൃണു ത്വം സുഗുരോ ബ്രഹ്മംസ്ത്വത്പ്രസാദാദ്വദാമ്യഹമ് ।
- മമാജ്ഞാനം മഹാദോഷം മഹാജ്ഞാനനിരോധകമ് ॥ ൨॥
- സദാ കര്മണി വിശ്വാസം പ്രപഞ്ചേ സത്യഭാവനമ് ।
- നഷ്ടം സര്വം ക്ഷണാദേവ ത്വത്പ്രസാദാന്മഹദ്ഭയമ് ॥ ൩॥
- ഏതാവന്തമിമം കാലമജ്ഞാനരിപുണാ ഹൃതമ് ।
- മഹദ്ഭയം ച നഷ്ടം മേ കര്മതത്ത്വം ച നാശിതമ് ॥ ൪॥
- അജ്ഞാനം മനസാ പൂര്വമിദാനീം ബ്രഹ്മതാം ഗതമ് ।
- പുരാഹം ചിത്തവദ്ഭൂതഃ ഇദാനീം സന്മയോഽഭവമ് ॥ ൫॥
- പൂര്വമജ്ഞാനവദ്ഭാവം ഇദാനീം സന്മയം ഗതമ് ।
- അജ്ഞാനവത് സ്ഥിതോഽഹം വൈ ബ്രഹ്മൈവാഹം പരം ഗതഃ ॥ ൬॥
- പുരാഽഹം ചിത്തവദ്ഭ്രാന്തോ ബ്രഹ്മൈവാഹം പരം ഗതഃ ।
- സര്വോ വിഗലിതോ ദോഷഃ സര്വോ ഭേദോ ലയം ഗതഃ ॥ ൭॥
- സര്വഃ പ്രപഞ്ചോ ഗലിതശ്ചിത്തമേവ ഹി സര്വഗമ് ।
- സര്വാന്തഃകരണം ലീനം ബ്രഹ്മസദ്ഭാവഭാവനാത് ॥ ൮॥
- അഹമേവ ചിദാകാശ അഹമേവ ഹി ചിന്മയഃ ।
- അഹമേവ ഹി പൂര്ണാത്മാ അഹമേവ ഹി നിര്മലഃ ॥ ൯॥
- അഹമേവാഹമേവേതി ഭാവനാപി വിനിര്ഗതാ ।
- അഹമേവ ചിദാകാശോ ബ്രാഹ്മണത്വം ന കിഞ്ചന ॥ ൧൦॥
- ശൂദ്രോഽഹം ശ്വപചോഽഹം വൈ വര്ണീ ചാപി ഗൃഹസ്ഥകഃ ।
- വാനപ്രസ്ഥോ യതിരഹമിത്യയം ചിത്തവിഭ്രമഃ ॥ ൧൧॥
- തത്തദാശ്രമകര്മാണി ചിത്തേന പരികല്പിതമ് ।
- അഹമേവ ഹി ലക്ഷ്യാത്മാ അഹമേവ ഹി പൂര്ണകഃ ॥ ൧൨॥
- അഹമേവാന്തരാത്മാ ഹി അഹമേവ പരായണമ് ।
- അഹമേവ സദാധാര അഹമേവ സുഖാത്മകഃ ॥ ൧൩॥
- ത്വത്പ്രസാദാദഹം ബ്രഹ്മാ ത്വത്പ്രസാദാജ്ജനാര്ദനഃ ।
- ത്വത്പ്രസാദാച്ചിദാകാശഃ ശിവോഽഹം നാത്ര സംശയഃ ॥ ൧൪॥
- ത്വത്പ്രസാദാദഹം ചിദ്വൈ ത്വത്പ്രസാദാന്ന മേ ജഗത് ।
- ത്വത്പ്രസാദാദ്വിമുക്തോഽസ്മി ത്വത്പ്രസാദാത് പരം ഗതഃ ॥ ൧൫॥
- ത്വത്പ്രസാദാദ്വ്യാപകോഽഹം ത്വത്പ്രസാദാന്നിരങ്കുശഃ ।
- ത്വത്പ്രസാദേന തീര്ണോഽഹം ത്വത്പ്രസാദാന്മഹത്സുഖമ് ॥ ൧൬॥
- ത്വത്പ്രസാദാദഹം ബ്രഹ്മ ത്വത്പ്രസാദാത് ത്വമേവ ന ।
- ത്വത്പ്രസാദാദിദം നാസ്തി ത്വത്പ്രസാദാന്ന കിഞ്ചന ॥ ൧൭॥
- ത്വത്പ്രസാദാന്ന മേ കിഞ്ചിത് ത്വത്പ്രസാദാന്ന മേ വിപത് ।
- ത്വത്പ്രസാദാന്ന മേ ഭേദസ്ത്വത്പ്രസാദാന്ന മേ ഭയമ് ॥ ൧൮॥
- ത്വത്പ്രസാദാന്നമേ രോഗസ്ത്വത്പ്രസാദാന്ന മേ ക്ഷതിഃ ।
- യത്പാദാമ്ബുജപൂജയാ ഹരിരഭൂദര്ച്യോ യദംഘ്ര്യര്ചനാ-
- ദര്ച്യാഽഭൂത് കമലാ വിധിപ്രഭൃതയോ ഹ്യര്ച്യാ യദാജ്ഞാവശാത് ।
- തം കാലാന്തകമന്തകാന്തകമുമാകാന്തം മുഹുഃ സന്തതം
- സന്തഃ സ്വാന്തസരോജരാജചരണാമ്ഭോജം ഭജന്ത്യാദരാത് ॥ ൧൯॥
- കിം വാ ധര്മശതായുതാര്ജിതമഹാസൌഖ്യൈകസീമായുതം
- നാകം പാതമഹോഗ്രദുഃഖനികരം ദേവേഷു തുഷ്ടിപ്രദമ് ।
- തസ്മാച്ഛങ്കരലിങ്ഗപൂജനമുമാകാന്തപ്രിയം മുക്തിദം
- ഭൂമാനന്ദഘനൈകമുക്തിപരമാനന്ദൈകമോദം മഹഃ ॥ ൨൦॥
- യേ ശാംഭവാഃ ശിവരതാഃ ശിവനാമമാത്ര-
- ശബ്ദാക്ഷരജ്ഞഹൃദയാ ഭസിതത്രിപുണ്ഡ്രാഃ ।
- യാം പ്രാപ്നുവന്തി ഗതിമീശപദാംബുജോദ്യദ്-
- ധ്യാനാനുരക്തഹൃദയാ ന ഹി യോഗസാംഖ്യൈഃ ॥ ൨൧॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ നിദാഘാനുഭവവര്ണനപ്രകരണം നാമ ദ്വിചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com