ഋഭുഗീതാ ൧൭ ॥ സര്വ സിദ്ധാന്ത സംഗ്രഹ പ്രകരണമ് ॥
ഋഭുഃ -
- നിദാഘ ശൃണു ഗുഹ്യം മേ സര്വസിദ്ധാന്തസങ്ഗ്രഹമ് ।
- ദ്വൈതാദ്വൈതമിദം ശൂന്യം ശാന്തം ബ്രഹ്മൈവ സര്വദാ ॥ ൧॥
- അഹമേവ പരം ബ്രഹ്മ അഹമേവ പരാത് പരമ് ।
- ദ്വൈതാദ്വൈതമിദം ശൂന്യം ശാന്തം ബ്രഹ്മൈവ കേവലമ് ॥ ൨॥
- അഹമേവ ഹി ശാന്താത്മാ അഹമേവ ഹി സര്വഗഃ ।
- അഹമേവ ഹി ശുദ്ധാത്മാ അഹമേവ ഹി നിത്യശഃ ॥ ൩॥
- അഹമേവ ഹി നാനാത്മാ അഹമേവ ഹി നിര്ഗുണഃ ।
- അഹമേവ ഹി നിത്യാത്മാ അഹമേവ ഹി കാരണമ് ॥ ൪॥
- അഹമേവ ഹി ജഗത് സര്വം ഇദം ചൈവാഹമേവ ഹി ।
- അഹമേവ ഹി മോദാത്മാ അഹമേവ ഹി മുക്തിദഃ ॥ ൫॥
- അഹമേവ ഹി ചൈതന്യം അഹമേവ ഹി ചിന്മയഃ ।
- അഹമേവ ഹി ചൈതന്യമഹം സര്വാന്തരഃ സദാ ॥ ൬॥
- അഹമേവ ഹി ഭൂതാത്മാ ഭൌതികം ത്വഹമേവ ഹി ।
- അഹമേവ ത്വമേവാഹമഹമേവാഹമേവ ഹി ॥ ൭॥
- ജീവാത്മാ ത്വഹമേവാഹമഹമേവ പരേശ്വരഃ ।
- അഹമേവ വിഭുര്നിത്യമഹമേവ സ്വയം സദാ ॥ ൮॥
- അഹമേവാക്ഷരം സാക്ഷാത് അഹമേവ ഹി മേ പ്രിയമ് ।
- അഹമേവ സദാ ബ്രഹ്മ അഹമേവ സദാഽവ്യയഃ ॥ ൯॥
- അഹമേവാഹമേവാഗ്രേ അഹമേവാന്തരാന്തരഃ ।
- അഹമേവ ചിദാകാശമഹമേവാവഭാസകഃ ॥ ൧൦॥
- അഹമേവ സദാ സ്രഷ്ടാ അഹമേവ ഹി രക്ഷകഃ ।
- അഹമേവ ഹി ലീലാത്മാ അഹമേവ ഹി നിശ്ചയഃ ॥ ൧൧॥
- അഹമേവ സദാ സാക്ഷീ ത്വമേവ ത്വം പുരാതനഃ ।
- ത്വമേവ ഹി പരം ബ്രഹ്മ ത്വമേവ ഹി നിരന്തരമ് ॥ ൧൨॥
- അഹമേവാഹമേവാഹമഹമേവ ത്വമേവ ഹി ।
- അഹമേവാദ്വയാകാരഃ അഹമേവ വിദേഹകഃ ॥ ൧൩॥
- അഹമേവ മമാധാരഃ അഹമേവ സദാത്മകഃ ।
- അഹമേവോപശാന്താത്മാ അഹമേവ തിതിക്ഷകഃ ॥ ൧൪॥
- അഹമേവ സമാധാനം ശ്രദ്ധാ ചാപ്യഹമേവ ഹി ।
- അഹമേവ മഹാവ്യോമ അഹമേവ കലാത്മകഃ ॥ ൧൫॥
- അഹമേവ ഹി കാമാന്തഃ അഹമേവ സദാന്തരഃ ।
- അഹമേവ പുരസ്താച്ച അഹം പശ്ചാദഹം സദാ ॥ ൧൬॥
- അഹമേവ ഹി വിശ്വാത്മാ അഹമേവ ഹി കേവലമ് ।
- അഹമേവ പരം ബ്രഹ്മ അഹമേവ പരാത്പരഃ ॥ ൧൭॥
- അഹമേവ ചിദാനന്ദഃ അഹമേവ സുഖാസുഖമ് ।
- അഹമേവ ഗുരുത്വം ച അഹമേവാച്യുതഃ സദാ ॥ ൧൮॥
- അഹമേവ ഹി വേദാന്തഃ അഹമേവ ഹി ചിന്തനഃ ।
- ദേഹോഽഹം ശുദ്ധചൈതന്യഃ അഹം സംശയവര്ജിതഃ ॥ ൧൯॥
- അഹമേവ പരം ജ്യോതിരഹമേവ പരം പദമ് ।
- അഹമേവാവിനാശ്യാത്മാ അഹമേവ പുരാതനഃ ॥ ൨൦॥
- അഹം ബ്രഹ്മ ന സന്ദേഹഃ അഹമേവ ഹി നിഷ്കലഃ ।
- അഹം തുര്യോ ന സന്ദേഹഃ അഹമാത്മാ ന സംശയഃ ॥ ൨൧॥
- അഹമിത്യപി ഹീനോഽഹമഹം ഭാവനവര്ജിതഃ ।
- അഹമേവ ഹി ഭാവാന്താ അഹമേവ ഹി ശോഭനമ് ॥ ൨൨॥
- അഹമേവ ക്ഷണാതീതഃ അഹമേവ ഹി മങ്ഗലമ് ।
- അഹമേവാച്യുതാനന്ദഃ അഹമേവ നിരന്തരമ് ॥ ൨൩॥
- അഹമേവാപ്രമേയാത്മാ അഹം സംകല്പവര്ജിതഃ ।
- അഹം ബുദ്ധഃ പരംധാമ അഹം ബുദ്ധിവിവര്ജിതഃ ॥ ൨൪॥
- അഹമേവ സദാ സത്യം അഹമേവ സദാസുഖമ് ।
- അഹമേവ സദാ ലഭ്യം അഹം സുലഭകാരണമ് ॥ ൨൫॥
- അഹം സുലഭവിജ്ഞാനം ദുര്ലഭോ ജ്ഞാനിനാം സദാ ।
- അഹം ചിന്മാത്ര ഏവാത്മാ അഹമേവ ഹി ചിദ്ഘനഃ ॥ ൨൬॥
- അഹമേവ ത്വമേവാഹം ബ്രഹ്മൈവാഹം ന സംശയഃ ।
- അഹമാത്മാ ന സന്ദേഹഃ സര്വവ്യാപീ ന സംശയഃ ॥ ൨൭॥
- അഹമാത്മാ പ്രിയം സത്യം സത്യം സത്യം പുനഃ പുനഃ ।
- അഹമാത്മാഽജരോ വ്യാപീ അഹമേവാത്മനോ ഗുരുഃ ॥ ൨൮॥
- അഹമേവാമൃതോ മോക്ഷോ അഹമേവ ഹി നിശ്ചലഃ ।
- അഹമേവ ഹി നിത്യാത്മാ അഹം മുക്തോ ന സംശയഃ ॥ ൨൯॥
- അഹമേവ സദാ ശുദ്ധഃ അഹമേവ ഹി നിര്ഗുണഃ ।
- അഹം പ്രപഞ്ചഹീനോഽഹം അഹം ദേഹവിവര്ജിതഃ ॥ ൩൦॥
- അഹം കാമവിഹീനാത്മാ അഹം മായാവിവര്ജിതഃ ।
- അഹം ദോഷപ്രവൃത്താത്മാ അഹം സംസാരവര്ജിതഃ ॥ ൩൧॥
- അഹം സങ്കല്പരഹിതോ വികല്പരഹിതഃ ശിവഃ ।
- അഹമേവ ഹി തുര്യാത്മാ അഹമേവ ഹി നിര്മലഃ ॥ ൩൨॥
- അഹമേവ സദാ ജ്യോതിരഹമേവ സദാ പ്രഭുഃ ।
- അഹമേവ സദാ ബ്രഹ്മ അഹമേവ സദാ പരഃ ॥ ൩൩॥
- അഹമേവ സദാ ജ്ഞാനമഹമേവ സദാ മൃദുഃ ।
- അഹമേവ ഹി ചിത്തം ച അഹം മാനവിവര്ജിതഃ ॥ ൩൪॥
- അഹംകാരശ്ച സംസാരമഹങ്കാരമസത്സദാ ।
- അഹമേവ ഹി ചിന്മാത്രം മത്തോഽന്യന്നാസ്തി നാസ്തി ഹി ॥ ൩൫॥
- അഹമേവ ഹി മേ സത്യം മത്തോഽന്യന്നാസ്തി കിഞ്ചന ।
- മത്തോഽന്യത്തത്പദം നാസ്തി മത്തോഽന്യത് ത്വത്പദം നഹി ॥ ൩൬॥
- പുണ്യമിത്യപി ന ക്വാപി പാപമിത്യപി നാസ്തി ഹി ।
- ഇദം ഭേദമയം ഭേദം സദസദ്ഭേദമിത്യപി ॥ ൩൭॥
- നാസ്തി നാസ്തി ത്വയാ സത്യം സത്യം സത്യം പുനഃ പുനഃ ।
- നാസ്തി നാസ്തി സദാ നാസ്തി സര്വം നാസ്തീതി നിശ്ചയഃ ॥ ൩൮॥
- ഇദമേവ പരം ബ്രഹ്മ അഹം ബ്രഹ്മ ത്വമേവ ഹി ।
- കാലോ ബ്രഹ്മ കലാ ബ്രഹ്മ കാര്യം ബ്രഹ്മ ക്ഷണം തദാ ॥ ൩൯॥
- സര്വം ബ്രഹ്മാപ്യഹം ബ്രഹ്മ ബ്രഹ്മാസ്മീതി ന സംശയഃ ।
- ചിത്തം ബ്രഹ്മ മനോ ബ്രഹ്മ സത്യം ബ്രഹ്മ സദാഽസ്മ്യഹമ് ॥ ൪൦॥
- നിര്ഗുണം ബ്രഹ്മ നിത്യം ച നിരന്തരമഹം പരഃ ।
- ആദ്യന്തം ബ്രഹ്മ ഏവാഹം ആദ്യന്തം ച നഹി ക്വചിത് ॥ ൪൧॥
- അഹമിത്യപി വാര്താഽപി സ്മരണം ഭാഷണം ന ച ।
- സര്വം ബ്രഹ്മൈവ സന്ദേഹസ്ത്വമിത്യപി ന ഹി ക്വചിത് ॥ ൪൨॥
- വക്താ നാസ്തി ന സന്ദേഹഃ ഏഷാ ഗീതാ സുദുര്ലഭഃ ।
- സദ്യോ മോക്ഷപ്രദം ഹ്യേതത് സദ്യോ മുക്തിം പ്രയച്ഛതി ॥ ൪൩॥
- സദ്യ ഏവ പരം ബ്രഹ്മ പദം പ്രാപ്നോതി നിശ്ചയഃ ।
- സകൃച്ഛ്രവണമാത്രേണ സദ്യോ മുക്തിം പ്രയച്ഛതി ॥ ൪൪॥
- ഏതത്തു ദുര്ലഭം ലോകേ ത്രൈലോക്യേഽപി ച ദുര്ലഭമ് ।
- അഹം ബ്രഹ്മ ന സന്ദേഹ ഇത്യേവം ഭാവയേത് ദൃഢമ് ।
- തതഃ സര്വം പരിത്യജ്യ തൂഷ്ണീം തിഷ്ഠ യഥാ സുഖമ് ॥ ൪൫॥
സൂതഃ -
- ഭുവനഗഗനമധ്യധ്യാനയോഗാങ്ഗസങ്ഗേ
- യമനിയമവിശേഷൈര്ഭസ്മരാഗാങ്ഗസങ്ഗൈഃ ।
- സുഖമുഖഭരിതാശാഃ കോശപാശാദ്വിഹീനാ
- ഹൃദി മുദിതപരാശാഃ ശാംഭവാഃ ശംഭുവച്ച ॥ ൪൬॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സര്വസിദ്ധാന്തസംഗ്രഹപ്രകരണം നാമ സപ്തദശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com