Ribhu Gita - Siva Rahasya Purana Amsha 6

ഋഭുഗീതാ ൧൫ ॥ ബ്രഹ്മൈവ സര്വം പ്രകരണ നിരൂപണമ് ॥

ഋഭുഃ -

മഹാരഹസ്യം വക്ഷ്യാമി ഗുഹ്യാത് ഗുഹ്യതരം പുനഃ ।
അത്യന്തദുര്ലഭം ലോകേ സര്വം ബ്രഹ്മൈവ കേവലമ് ॥ ൧॥
ബ്രഹ്മമാത്രമിദം സര്വം ബ്രഹ്മമാത്രമസന്ന ഹി ।
ബ്രഹ്മമാത്രം ശ്രുതം സര്വം സര്വം ബ്രഹ്മൈവ കേവലമ് ॥ ൨॥
ബ്രഹ്മമാത്രം മഹായന്ത്രം ബ്രഹ്മമാത്രം ക്രിയാഫലമ് ।
ബ്രഹ്മമാത്രം മഹാവാക്യം സര്വം ബ്രഹ്മൈവ കേവലമ് ॥ ൩॥
ബ്രഹ്മമാത്രം ജഗത്സര്വം ബ്രഹ്മമാത്രം ജഡാജഡമ് ।
ബ്രഹ്മമാത്രം പരം ദേഹം സര്വം ബ്രഹ്മൈവ കേവലമ് ॥ ൪॥
ബ്രഹ്മമാത്രം ഗുണം പ്രോക്തം ബ്രഹ്മമാത്രമഹം മഹത് ।
ബ്രഹ്മമാത്രം പരം ബ്രഹ്മ സര്വം ബ്രഹ്മൈവ കേവലമ് ॥ ൫॥
ബ്രഹ്മമാത്രമിദം വസ്തു ബ്രഹ്മമാത്രം സ ച പുമാന് ।
ബ്രഹ്മമാത്രം ച യത് കിഞ്ചിത് സര്വം ബ്രഹ്മൈവ കേവലമ് ॥ ൬॥
ബ്രഹ്മമാത്രമനന്താത്മാ ബ്രഹ്മമാത്രം പരം സുഖമ് ।
ബ്രഹ്മമാത്രം പരം ജ്ഞാനം സര്വം ബ്രഹ്മൈവ കേവലമ് ॥ ൭॥
ബ്രഹ്മമാത്രം പരം പാരം ബ്രഹ്മമാത്രം പുരത്രയമ് ।
ബ്രഹ്മമാത്രമനേകത്വം സര്വം ബ്രഹ്മൈവ കേവലമ് ॥ ൮॥
ബ്രഹ്മൈവ കേവലം ഗന്ധം ബ്രഹ്മൈവ പരമം പദമ് ।
ബ്രഹ്മൈവ കേവലം ഘ്രാണം സര്വം ബ്രഹ്മൈവ കേവലമ് ॥ ൯॥
ബ്രഹ്മൈവ കേവലം സ്പര്ശം ശബ്ദം ബ്രഹ്മൈവ കേവലമ് ।
ബ്രഹ്മൈവ കേവലം രൂപം സര്വം ബ്രഹ്മൈവ കേവലമ് ॥ ൧൦॥
ബ്രഹ്മൈവ കേവലം ലോകം രസോ ബ്രഹ്മൈവ കേവലമ് ।
ബ്രഹ്മൈവ കേവലം ചിത്തം സര്വം ബ്രഹ്മൈവ കേവലമ് ॥ ൧൧॥
തത്പദം ച സദാ ബ്രഹ്മ ത്വം പദം ബ്രഹ്മ ഏവ ഹി ।
അസീത്യേവ പദം ബ്രഹ്മ ബ്രഹ്മൈക്യം കേവലമ് സദാ ॥ ൧൨॥
ബ്രഹ്മൈവ കേവലം ഗുഹ്യം ബ്രഹ്മ ബാഹ്യം ച കേവലമ് ।
ബ്രഹ്മൈവ കേവലം നിത്യം സര്വം ബ്രഹ്മൈവ കേവലമ് ॥ ൧൩॥
ബ്രഹ്മൈവ തജ്ജലാനീതി ജഗദാദ്യന്തയോഃ സ്ഥിതിഃ ।
ബ്രഹ്മൈവ ജഗദാദ്യന്തം സര്വം ബ്രഹ്മൈവ കേവലമ് ॥ ൧൪॥
ബ്രഹ്മൈവ ചാസ്തി നാസ്തീതി ബ്രഹ്മൈവാഹം ന സംശയഃ ।
ബ്രഹ്മൈവ സര്വം യത് കിഞ്ചിത് സര്വം ബ്രഹ്മൈവ കേവലമ് ॥ ൧൫॥
ബ്രഹ്മൈവ ജാഗ്രത് സര്വം ഹി ബ്രഹ്മമാത്രമഹം പരമ് ।
ബ്രഹ്മൈവ സത്യമസ്തിത്വം ബ്രഹ്മൈവ തുര്യമുച്യതേ ॥ ൧൬॥
ബ്രഹ്മൈവ സത്താ ബ്രഹ്മൈവ ബ്രഹ്മൈവ ഗുരുഭാവനമ് ।
ബ്രഹ്മൈവ ശിഷ്യസദ്ഭാവം മോക്ഷം ബ്രഹ്മൈവ കേവലമ് ॥ ൧൭॥
പൂര്വാപരം ച ബ്രഹ്മൈവ പൂര്ണം ബ്രഹ്മ സനാതനമ് ।
ബ്രഹ്മൈവ കേവലം സാക്ഷാത് സര്വം ബ്രഹ്മൈവ കേവലമ് ॥ ൧൮॥
ബ്രഹ്മ സച്ചിത്സുഖം ബ്രഹ്മ പൂര്ണം ബ്രഹ്മ സനാതനമ് ।
ബ്രഹ്മൈവ കേവലം സാക്ഷാത് സര്വം ബ്രഹ്മൈവ കേവലമ് ॥ ൧൯॥
ബ്രഹ്മൈവ കേവലം സച്ചിത് സുഖം ബ്രഹ്മൈവ കേവലമ് ।
ആനന്ദം ബ്രഹ്മ സര്വത്ര പ്രിയരൂപമവസ്ഥിതമ് ॥ ൨൦॥
ശുഭവാസനയാ ജീവം ശിവവദ്ഭാതി സര്വദാ ।
പാപവാസനയാ ജീവോ നരകം ഭോജ്യവത് സ്ഥിതമ് ॥ ൨൧॥
ബ്രഹ്മൈവേന്ദ്രിയവദ്ഭാനം ബ്രഹ്മൈവ വിഷയാദിവത് ।
ബ്രഹ്മൈവ വ്യവഹാരശ്ച സര്വം ബ്രഹ്മൈവ കേവലമ് ॥ ൨൨॥
ബ്രഹ്മൈവ സര്വമാനന്ദം ബ്രഹ്മൈവ ജ്ഞാനവിഗ്രഹമ് ।
ബ്രഹ്മൈവ മായാകാര്യാഖ്യം സര്വം ബ്രഹ്മൈവ കേവലമ് ॥ ൨൩॥
ബ്രഹ്മൈവ യജ്ഞസന്ധാനം ബ്രഹ്മൈവ ഹൃദയാമ്ബരമ് ।
ബ്രഹ്മൈവ മോക്ഷസാരാഖ്യം സര്വം ബ്രഹ്മൈവ കേവലമ് ॥ ൨൪॥
ബ്രഹ്മൈവ ശുദ്ധാശുദ്ധം ച സര്വം ബ്രഹ്മൈവ കാരണമ് ।
ബ്രഹ്മൈവ കാര്യം ഭൂലോകം സര്വം ബ്രഹ്മൈവ കേവലമ് ॥ ൨൫॥
ബ്രഹ്മൈവ നിത്യതൃപ്താത്മാ ബ്രഹ്മൈവ സകലം ദിനമ് ।
ബ്രഹ്മൈവ തൂഷ്ണീം ഭൂതാത്മാ സര്വം ബ്രഹ്മൈവ കേവലമ് ॥ ൨൬॥
ബ്രഹ്മൈവ വേദസാരാര്ഥഃ ബ്രഹ്മൈവ ധ്യാനഗോചരമ് ।
ബ്രഹ്മൈവ യോഗയോഗാഖ്യം സര്വം ബ്രഹ്മൈവ കേവലമ് ॥ ൨൭॥
നാനാരൂപത്വാദ് ബ്രഹ്മ ഉപാധിത്വേന ദൃശ്യതേ ।
മായാമാത്രമിതി ജ്ഞാത്വാ വസ്തുതോ നാസ്തി തത്ത്വതഃ ॥ ൨൮॥
ബ്രഹ്മൈവ ലോകവദ്ഭാതി ബ്രഹ്മൈവ ജനവത്തഥാ ।
ബ്രഹ്മൈവ രൂപവദ്ഭാതി വസ്തുതോ നാസ്തി കിഞ്ചന ॥ ൨൯॥
ബ്രഹ്മൈവ ദേവതാകാരം ബ്രഹ്മൈവ മുനിമണ്ഡലമ് ।
ബ്രഹ്മൈവ ധ്യാനരൂപം ച സര്വം ബ്രഹ്മൈവ കേവലമ് ॥ ൩൦॥
ബ്രഹ്മൈവ ജ്ഞാനവിജ്ഞാനം ബ്രഹ്മൈവ പരമേശ്വരഃ ।
ബ്രഹ്മൈവ ശുദ്ധബുദ്ധാത്മാ സര്വം ബ്രഹ്മൈവ കേവലമ് ॥ ൩൧॥
ബ്രഹ്മൈവ പരമാനദം ബ്രഹ്മൈവ വ്യാപകം മഹത് ।
ബ്രഹ്മൈവ പരമാര്ഥം ച സര്വം ബ്രഹ്മൈവ കേവലമ് ॥ ൩൨॥
ബ്രഹ്മൈവ യജ്ഞരൂപം ച ബ്രഹ്മ ഹവ്യം ച കേവലമ് ।
ബ്രഹ്മൈവ ജീവഭൂതാത്മാ സര്വം ബ്രഹ്മൈവ കേവലമ് ॥ ൩൩॥
ബ്രഹ്മൈവ സകലം ലോകം ബ്രഹ്മൈവ ഗുരുശിഷ്യകമ് ।
ബ്രഹ്മൈവ സര്വസിദ്ധിം ച സര്വം ബ്രഹ്മൈവ കേവലമ് ॥ ൩൪॥
ബ്രഹ്മൈവ സര്വമന്ത്രം ച ബ്രഹ്മൈവ സകലം ജപമ് ।
ബ്രഹ്മൈവ സര്വകാര്യം ച സര്വം ബ്രഹ്മൈവ കേവലമ് ॥ ൩൫॥
ബ്രഹ്മൈവ സര്വശാന്തത്വം ബ്രഹ്മൈവ ഹൃദയാന്തരമ് ।
ബ്രഹ്മൈവ സര്വകൈവല്യം സര്വം ബ്രഹ്മൈവ കേവലമ് ॥ ൩൬॥
ബ്രഹ്മൈവാക്ഷരഭാവഞ്ച ബ്രഹ്മൈവാക്ഷരലക്ഷണമ് ।
ബ്രഹ്മൈവ ബ്രഹ്മരൂപഞ്ച സര്വം ബ്രഹ്മൈവ കേവലമ് ॥ ൩൭॥
ബ്രഹ്മൈവ സത്യഭവനം ബ്രഹ്മൈവാഹം ന സംശയഃ ।
ബ്രഹ്മൈവ തത്പദാര്ഥഞ്ച സര്വം ബ്രഹ്മൈവ കേവലമ് ॥ ൩൮॥
ബ്രഹ്മൈവാഹംപദാര്ഥഞ്ച ബ്രഹ്മൈവ പരമേശ്വരഃ ।
ബ്രഹ്മൈവ ത്വംപദാര്ഥഞ്ച സര്വം ബ്രഹ്മൈവ കേവലമ് ॥ ൩൯॥
ബ്രഹ്മൈവ യദ്യത് പരമം ബ്രഹ്മൈവേതി പരായണമ് ।
ബ്രഹ്മൈവ കലനാഭാവം സര്വം ബ്രഹ്മൈവ കേവലമ് ॥ ൪൦॥
ബ്രഹ്മ സര്വം ന സന്ദേഹോ ബ്രഹ്മൈവ ത്വം സദാശിവഃ ।
ബ്രഹ്മൈവേദം ജഗത് സര്വം സര്വം ബ്രഹ്മൈവ കേവലമ് ॥ ൪൧॥
ബ്രഹ്മൈവ സര്വസുലഭം ബ്രഹ്മൈവാത്മാ സ്വയം സ്വയമ് ।
ബ്രഹ്മൈവ സുഖമാത്രത്വാത് സര്വം ബ്രഹ്മൈവ കേവലമ് ॥ ൪൨॥
ബ്രഹ്മൈവ സര്വം ബ്രഹ്മൈവ ബ്രഹ്മണോഽന്യദസത് സദാ ।
ബ്രഹ്മൈവ ബ്രഹ്മമാത്രാത്മാ സര്വം ബ്രഹ്മൈവ കേവലമ് ॥ ൪൩॥
ബ്രഹ്മൈവ സര്വവാക്യാര്ഥഃ ബ്രഹ്മൈവ പരമം പദമ് ।
ബ്രഹ്മൈവ സത്യാസത്യം ച സര്വം ബ്രഹ്മൈവ കേവലമ് ॥ ൪൪॥
ബ്രഹ്മൈവൈകമനാദ്യന്തം ബ്രഹ്മൈവൈകം ന സംശയഃ ।
ബ്രഹ്മൈവൈകം ചിദാനന്ദഃ സര്വം ബ്രഹ്മൈവ കേവലമ് ॥ ൪൫॥
ബ്രഹ്മൈവൈകം സുഖം നിത്യം ബ്രഹ്മൈവൈകം പരായണമ് ।
ബ്രഹ്മൈവൈകം പരം ബ്രഹ്മ സര്വം ബ്രഹ്മൈവ കേവലമ് ॥ ൪൬॥
ബ്രഹ്മൈവ ചിത് സ്വയം സ്വസ്ഥം ബ്രഹ്മൈവ ഗുണവര്ജിതമ് ।
ബ്രഹ്മൈവാത്യന്തികം സര്വം സര്വം ബ്രഹ്മൈവ കേവലമ് ॥ ൪൭॥
ബ്രഹ്മൈവ നിര്മലം സര്വം ബ്രഹ്മൈവ സുലഭം സദാ ।
ബ്രഹ്മൈവ സത്യം സത്യാനാം സര്വം ബ്രഹ്മൈവ കേവലമ് ॥ ൪൮॥
ബ്രഹ്മൈവ സൌഖ്യം സൌഖ്യം ച ബ്രഹ്മൈവാഹം സുഖാത്മകമ് ।
ബ്രഹ്മൈവ സര്വദാ പ്രോക്തം സര്വം ബ്രഹ്മൈവ കേവലമ് ॥ ൪൯॥
ബ്രഹ്മൈവമഖിലം ബ്രഹ്മ ബ്രഹ്മൈകം സര്വസാക്ഷികമ് ।
ബ്രഹ്മൈവ ഭൂരിഭവനം സര്വം ബ്രഹ്മൈവ കേവലമ് ॥ ൫൦॥
ബ്രഹ്മൈവ പരിപൂര്ണാത്മാ ബ്രഹ്മൈവം സാരമവ്യയമ് ।
ബ്രഹ്മൈവ കാരണം മൂലം ബ്രഹ്മൈവൈകം പരായണമ് ॥ ൫൧॥
ബ്രഹ്മൈവ സര്വഭൂതാത്മാ ബ്രഹ്മൈവ സുഖവിഗ്രഹമ് ।
ബ്രഹ്മൈവ നിത്യതൃപ്താത്മാ സര്വം ബ്രഹ്മൈവ കേവലമ് ॥ ൫൨॥
ബ്രഹ്മൈവാദ്വൈതമാത്രാത്മാ ബ്രഹ്മൈവാകാശവത് പ്രഭുഃ ।
ബ്രഹ്മൈവ ഹൃദയാനന്ദഃ സര്വം ബ്രഹ്മൈവ കേവലമ് ॥ ൫൩॥
ബ്രഹ്മണോഽന്യത് പരം നാസ്തി ബ്രഹ്മണോഽന്യജ്ജഗന്ന ച ।
ബ്രഹ്മണോഽന്യദഹം നാഹം സര്വം ബ്രഹ്മൈവ കേവലമ് ॥ ൫൪॥
ബ്രഹ്മൈവാന്യസുഖം നാസ്തി ബ്രഹ്മണോഽന്യത് ഫലം ന ഹി ।
ബ്രഹ്മണോഽന്യത് തൃണം നാസ്തി സര്വം ബ്രഹ്മൈവ കേവലമ് ॥ ൫൫॥
ബ്രഹ്മണോഽന്യത് പദം മിഥ്യാ ബ്രഹ്മണോഽന്യന്ന കിഞ്ചന ।
ബ്രഹ്മണോഽന്യജ്ജഗന്മിഥ്യാ സര്വം ബ്രഹ്മൈവ കേവലമ് ॥ ൫൬॥
ബ്രഹ്മണോഽന്യദഹം മിഥ്യാ ബ്രഹ്മമാത്രോഹമേവ ഹി ।
ബ്രഹ്മണോഽന്യോ ഗുരുര്നാസ്തി സര്വം ബ്രഹ്മൈവ കേവലമ് ॥ ൫൭॥
ബ്രഹ്മണോഽന്യദസത് കാര്യം ബ്രഹ്മണോഽന്യദസദ്വപുഃ ।
ബ്രഹ്മണോഽന്യന്മനോ നാസ്തി സര്വം ബ്രഹ്മൈവ കേവലമ് ॥ ൫൮॥
ബ്രഹ്മണോഽന്യജ്ജഗന്മിഥ്യാ ബ്രഹ്മണോഽന്യന്ന കിഞ്ചന ।
ബ്രഹ്മണോഽന്യന്ന ചാഹന്താ സര്വം ബ്രഹ്മൈവ കേവലമ് ॥ ൫൯॥
ബ്രഹ്മൈവ സര്വമിത്യേവം പ്രോക്തം പ്രകരണം മയാ ।
യഃ പഠേത് ശ്രാവയേത് സദ്യോ ബ്രഹ്മൈവ ഭവതി സ്വയമ് ॥ ൬൦॥
അസ്തി ബ്രഹ്മേതി വേദേ ഇദമിദമഖിലം വേദ സോ സദ്ഭവേത് ।
സച്ചാസച്ച ജഗത്തഥാ ശ്രുതിവചോ ബ്രഹ്മൈവ തജ്ജാദികമ് ॥
യതോ വിദ്യൈവേദം പരിലുഠതി മോഹേന ജഗതി ।
അതോ വിദ്യാപാദോ പരിഭവതി ബ്രഹ്മൈവ ഹി സദാ ॥ ൬൧॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മൈവ സര്വം പ്രകരണനിരൂപണം നാമ പഞ്ചദശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com