ഋഭുഗീതാ ൩൦ ॥ ബ്രഹ്മൈക-രൂപത്വ നിരൂപണ പ്രകരണമ് ॥

ഋഭുഃ -

• വക്ഷ്യേ പരം ബ്രഹ്മമാത്രം ജഗത്സന്ത്യാഗപൂര്വകമ് ।
• സകൃച്ഛ്രവണമാത്രേണ ബ്രഹ്മഭാവം പരം ലഭേത് ॥ ൧॥
• ബ്രഹ്മ ബ്രഹ്മപരം മാത്രം നിര്ഗുണം നിത്യനിര്മലമ് ।
• ശാശ്വതം സമമത്യന്തം ബ്രഹ്മണോഽന്യന്ന വിദ്യതേ ॥ ൨॥
• അഹം സത്യഃ പരാനന്ദഃ ശുദ്ധോ നിത്യോ നിരഞ്ജനഃ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൩॥
• അഖണ്ഡൈകരസൈവാസ്മി പരിപൂര്ണോഽസ്മി സര്വദാ ।
• ബ്രഹ്മൈവ സര്വം നാന്യോഽസ്തി സര്വം ബ്രഹ്മ ന സംശയഃ ॥ ൪॥
• സര്വദാ കേവലാത്മാഹം സര്വം ബ്രഹ്മേതി നിത്യശഃ ।
• ആനന്ദരൂപമേവാഹം നാന്യത് കിഞ്ചിന്ന ശാശ്വതമ് ॥ ൫॥
• ശുദ്ധാനന്ദസ്വരൂപോഽഹം ശുദ്ധവിജ്ഞാനമാത്മനഃ ।
• ഏകാകാരസ്വരൂപോഽഹം നൈകസത്താവിവര്ജിതഃ ॥ ൬॥
• അന്തരജ്ഞാനശുദ്ധോഽഹമഹമേവ പരായണമ് ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൭॥
• അനേകതത്ത്വഹീനോഽഹം ഏകത്വം ച ന വിദ്യതേ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൮॥
• സര്വപ്രകാരരൂപോഽസ്മി സര്വം ഇത്യപി വര്ജിതഃ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൯॥
• നിര്മലജ്ഞാനരൂപോഽഹമഹമേവ ന വിദ്യതേ ।
• ശുദ്ധബ്രഹ്മസ്വരൂപോഽഹം വിശുദ്ധപദവര്ജിതഃ ॥ ൧൦॥
• നിത്യാനന്ദസ്വരൂപോഽഹം ജ്ഞാനാനന്ദമഹം സദാ ।
• സൂക്ഷ്മാത് സൂക്ഷ്മതരോഽഹം വൈ സൂക്ഷ്മ ഇത്യാദിവര്ജിതഃ ॥ ൧൧॥
• അഖണ്ഡാനന്ദമാത്രോഽഹം അഖണ്ഡാനന്ദവിഗ്രഹഃ ।
• സദാഽമൃതസ്വരൂപോഽഹം സദാ കൈവല്യവിഗ്രഹഃ ॥ ൧൨॥
• ബ്രഹ്മാനന്ദമിദം സര്വം നാസ്തി നാസ്തി കദാചന ।
• ജീവത്വധര്മഹീനോഽഹമീശ്വരത്വവിവര്ജിതഃ ॥ ൧൩॥
• വേദശാസ്ത്രസ്വരൂപോഽഹം ശാസ്ത്രസ്മരണകാരണമ് ।
• ജഗത്കാരണകാര്യം ച ബ്രഹ്മവിഷ്ണുമഹേശ്വരാഃ ॥ ൧൪॥
• വാച്യവാചകഭേദം ച സ്ഥൂലസൂക്ഷ്മശരീരകമ് ।
• ജാഗ്രത്സ്വപ്നസുഷുപ്താദ്യപ്രാജ്ഞതൈജസവിശ്വകാഃ ॥ ൧൫॥
• സര്വശാസ്ത്രസ്വരൂപോഽഹം സര്വാനന്ദമഹം സദാ ।
• അതീതനാമരൂപാര്ഥ അതീതഃ സര്വകല്പനാത് ॥ ൧൬॥
• ദ്വൈതാദ്വൈതം സുഖം ദുഃഖം ലാഭാലാഭൌ ജയാജയൌ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൧൭॥
• സാത്ത്വികം രാജസം ഭേദം സംശയം ഹൃദയം ഫലമ് ।
• ദൃക് ദൃഷ്ടം സര്വദ്രഷ്ടാ ച ഭൂതഭൌതികദൈവതമ് ॥ ൧൮॥
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ।
• തുര്യരൂപമഹം സാക്ഷാത് ജ്ഞാനരൂപമഹം സദാ ॥ ൧൯॥
• അജ്ഞാനം ചൈവ നാസ്ത്യേവ തത്കാര്യം കുത്ര വിദ്യതേ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൨൦॥
• ചിത്തവൃത്തിവിലാസം ച ബുദ്ധീനാമപി നാസ്തി ഹി ।
• ദേഹസങ്കല്പഹീനോഽഹം ബുദ്ധിസങ്കല്പകല്പനാ ॥ ൨൧॥
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ।
• ബുദ്ധിനിശ്ചയരൂപോഽഹം നിശ്ചയം ച ഗലത്യഹോ ॥ ൨൨॥
• അഹംകാരം ബഹുവിധം ദേഹോഽഹമിതി ഭാവനമ് ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൨൩॥
• ബ്രഹ്മാഹമപി കാണോഽഹം ബധിരോഽഹം പരോഽസ്മ്യഹമ് ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൨൪॥
• ദേഹോഽഹമിതി താദാത്മ്യം ദേഹസ്യ പരമാത്മനഃ ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൨൫॥
• സര്വോഽഹമിതി താദാത്മ്യം സര്വസ്യ പരമാത്മനഃ ।
• ഇതി ഭാവയ യത്നേന ബ്രഹ്മൈവാഹമിതി പ്രഭോ ॥ ൨൬॥
• ദൃഢനിശ്ചയമേവേദം സത്യം സത്യമഹം പരമ് ।
• ദൃഢനിശ്ചയമേവാത്ര സദ്ഗുരോര്വാക്യനിശ്ചയമ് ॥ ൨൭॥
• ദൃഢനിശ്ചയസാമ്രാജ്യേ തിഷ്ഠ തിഷ്ഠ സദാ പരഃ ।
• അഹമേവ പരം ബ്രഹ്മ ആത്മാനന്ദപ്രകാശകഃ ॥ ൨൮॥
• ശിവപൂജാ ശിവശ്ചാഹം വിഷ്ണുര്വിഷ്ണുപ്രപൂജനമ് ।
• യദ്യത് സംവേദ്യതേ കിഞ്ചിത് യദ്യന്നിശ്ചീയതേ ക്വചിത് ॥ ൨൯॥
• തദേവ ത്വം ത്വമേവാഹം ഇത്യേവം നാസ്തി കിഞ്ചന ।
• ഇദം ചിത്തമിദം ദൃശ്യം ഇത്യേവമിതി നാസ്തി ഹി ॥ ൩൦॥
• സദസദ്ഭാവശേഷോഽപി തത്തദ്ഭേദം ന വിദ്യതേ ।
• സുഖരൂപമിദം സര്വം സുഖരൂപമിദം ന ച ॥ ൩൧॥
• ലക്ഷഭേദം സകൃദ്ഭേദം സര്വഭേദം ന വിദ്യതേ ।
• ബ്രഹ്മാനന്ദോ ന സന്ദേഹസ്തദ്ബ്രഹ്മാഹം ന സംശയഃ ॥ ൩൨॥
• ബ്രഹ്മഭേദം തുര്യഭേദം ജീവഭേദമഭേദകമ് ।
• ഇദമേവ ഹി നോത്പന്നം സര്വദാ നാസ്തി കിഞ്ചന ॥ ൩൩॥
• സ ദേവമിതി നിര്ദേശോ നാസ്തി നാസ്ത്യേവ സര്വദാ ।
• അസ്തി ചേത് കില വക്തവ്യം നാസ്തി ചേത് കഥമുച്യതേ ॥ ൩൪॥
• പരം വിശേഷമേവേതി നാസ്തി കിഞ്ചിത് സദാ മയി ।
• ചഞ്ചലം മനശ്ചൈവ നാസ്തി നാസ്തി ന സംശയഃ ॥ ൩൫॥
• ഏവമേവ സദാ പൂര്ണോ നിരീഹസ്തിഷ്ഠ ശാന്തധീഃ ।
• സര്വം ബ്രഹ്മാസ്മി പൂര്ണോഽസ്മി ഏവം ച ന കദാചന ॥ ൩൬॥
• ആനന്ദോഽഹം വരിഷ്ഠോഽഹം ബ്രഹ്മാസ്മീത്യപി നാസ്തി ഹി ।
• ബ്രഹ്മാനന്ദമഹാനന്ദമാത്മാനന്ദമഖണ്ഡിതമ് ॥ ൩൭॥
• ഇദം പരമഹന്താ ച സര്വദാ നാസ്തി കിഞ്ചന ।
• ഇദം സര്വമിതി ഖ്യാതി ആനന്ദം നേതി നോ ഭ്രമഃ ॥ ൩൮॥
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ।
• ലക്ഷ്യലക്ഷണഭാവം ച ദൃശ്യദര്ശനദൃശ്യതാ ॥ ൩൯॥
• അത്യന്താഭാവമേവേതി സര്വദാനുഭവം മഹത് ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൪൦॥
• ഗുഹ്യം മന്ത്രം ഗുണം ശാസ്ത്രം സത്യം ശ്രോത്രം കലേവരമ് ।
• മരണം ജനനം കാര്യം കാരണം പാവനം ശുഭമ് ॥ ൪൧॥
• കാമക്രോധൌ ലോഭമോഹൌ മദോ മാത്സര്യമേവ ഹി ।
• ദ്വൈതദോഷം ഭയം ശോകം സര്വം നാസ്ത്യേവ സര്വദാ ॥ ൪൨॥
• ഇദം നാസ്ത്യേവ നാസ്ത്യേവ നാസ്ത്യേവ സകലം സുഖമ് ।
• ഇദം ബ്രഹ്മേതി മനനമഹം ബ്രഹ്മേതി ചിന്തനമ് ॥ ൪൩॥
• അഹം ബ്രഹ്മേതി മനനം ത്വം ബ്രഹ്മത്വവിനാശനമ് ।
• സത്യത്വം ബ്രഹ്മവിജ്ഞാനം അസത്യത്വം ന ബാധ്യതേ ॥ ൪൪॥
• ഏക ഏവ പരോ ഹ്യാത്മാ ഏകത്വശ്രാന്തിവര്ജിതഃ ।
• സര്വം ബ്രഹ്മ സദാ ബ്രഹ്മ തദ്ബ്രഹ്മാഹം ന സംശയഃ ॥ ൪൫॥
• ജീവരൂപാ ജീവഭാവാ ജീവശബ്ദത്രയം ന ഹി ।
• ഈശരൂപം ചേശഭാവം ഈശശബ്ദം ച കല്പിതമ് ॥ ൪൬॥
• നാക്ഷരം ന ച സര്വം വാ ന പദം വാച്യവാചകമ് ।
• ഹൃദയം മന്ത്രതന്ത്രം ച ചിത്തം ബുദ്ധിര്ന കിഞ്ചന ॥ ൪൭॥
• മൂഢോ ജ്ഞാനീ വിവേകീ വാ ശുദ്ധ ഇത്യപി നാസ്തി ഹി ।
• നിശ്ചയം പ്രണവം താരം ആത്മായം ഗുരുശിഷ്യകമ് ॥ ൪൮॥
• തൂഷ്ണീം തൂഷ്ണീം മഹാതൂഷ്ണീം മൌനം വാ മൌനഭാവനമ് ।
• പ്രകാശനം പ്രകാശം ച ആത്മാനാത്മവിവേചനമ് ॥ ൪൯॥
• ധ്യാനയോഗം രാജയോഗം ഭോഗമഷ്ടാങ്ഗലക്ഷണമ് ।
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ॥ ൫൦॥
• അസ്തിത്വഭാഷണം ചാപി നാസ്തിത്വസ്യ ച ഭാഷണമ് ।
• പഞ്ചാശദ്വര്ണരൂപോഽഹം ചതുഃഷഷ്ടികലാത്മകഃ ॥ ൫൧॥
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ।
• ബ്രഹ്മൈവാഹം പ്രസന്നാത്മാ ബ്രഹ്മൈവാഹം ചിദവ്യയഃ ॥ ൫൨॥
• ശാസ്ത്രജ്ഞാനവിദൂരോഽഹം വേദജ്ഞാനവിദൂരകഃ ।
• ഉക്തം സര്വം പരം ബ്രഹ്മ നാസ്തി സന്ദേഹലേശതഃ ॥ ൫൩॥
• സര്വം ബ്രഹ്മ ന സന്ദേഹസ്തദ്ബ്രഹ്മാഹം ന സംശയഃ ।
• ബ്രഹ്മൈവാഹം പ്രസന്നാത്മാ ബ്രഹ്മൈവാഹം ചിദവ്യയഃ ॥ ൫൪॥
• ഇത്യേവം ബ്രഹ്മതന്മാത്രം തത്ര തുഭ്യം പ്രിയം തതഃ ।
• യസ്തു ബുദ്ധ്യേത സതതം സര്വം ബ്രഹ്മ ന സംശയഃ ।
• നിത്യം ശൃണ്വന്തി യേ മര്ത്യാസ്തേ ചിന്മാത്രമയാമലാഃ ॥ ൫൫॥
• സന്ദേഹസന്ദേഹകരോഽര്യകാസ്വകൈഃ
• കരാദിസന്ദോഹജഗദ്വികാരിഭിഃ ।
• യോ വീതമോഹം ന കരോതി ദുര്ഹൃദം
• വിദേഹമുക്തിം ശിവദൃക്പ്രഭാവതഃ ॥ ൫൬॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മൈകരൂപത്വനിരൂപണപ്രകരണം നാമ ത്രിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com