Ribhu Gita - Siva Rahasya Purana Amsha 6

ഋഭുഗീതാ ൪൧ ॥ ഗ്രന്ഥ-പ്രശസ്തി നിരൂപണമ് ॥

ഋഭുഃ -

അഹം ബ്രഹ്മ ന സന്ദേഹഃ അഹം ബ്രഹ്മ ന സംശയഃ ।
അഹം ബ്രഹ്മൈവ നിത്യാത്മാ അഹമേവ പരാത്പരഃ ॥ ൧॥
ചിന്മാത്രോഽഹം ന സന്ദേഹ ഇതി നിശ്ചിത്യ തം ത്യജ ।
സത്യം സത്യം പുനഃ സത്യമാത്മനോഽന്യന്ന കിഞ്ചന ॥ ൨॥
ശിവപാദദ്വയം സ്പൃഷ്ട്വാ വദാമീദം ന കിഞ്ചന ।
ഗുരുപാദദ്വയം സ്പൃഷ്ട്വാ വദാമീദം ന കിഞ്ചന ॥ ൩॥
ജിഹ്വയാ പരശും തപ്തം ധാരയാമി ന സംശയഃ ।
വേദശാസ്ത്രാദികം സ്പൃഷ്ട്വാ വദാമീദം വിനിശ്ചിതമ് ॥ ൪॥
നിശ്ചയാത്മന് നിശ്ചയസ്ത്വം നിശ്ചയേന സുഖീ ഭവ ।
ചിന്മയസ്ത്വം ചിന്മയത്വം ചിന്മയാനന്ദ ഏവ ഹി ॥ ൫॥
ബ്രഹ്മൈവ ബ്രഹ്മഭൂതാത്മാ ബ്രഹ്മൈവ ത്വം ന സംശയഃ ।
സര്വമുക്തം ഭഗവതാ യോഗിനാമപി ദുര്ലഭമ് ॥ ൬॥
ദേവാനാം ച ഋഷീണാം ച അത്യന്തം ദുര്ലഭം സദാ ।
ഐശ്വരം പരമം ജ്ഞാനമുപദിഷ്ടം ശിവേന ഹി ॥ ൭॥
ഏതത് ജ്ഞാനം സമാനീതം കൈലാസാച്ഛങ്കരാന്തികാത് ।
ദേവാനാം ദക്ഷിണാമൂര്തിര്ദശസാഹസ്രവത്സരാന് ॥ ൮॥
വിഘ്നേശോ ബഹുസാഹസ്രം വത്സരം ചോപദിഷ്ടവാന് ।
സാക്ഷാച്ഛിവോഽപി പാര്വത്യൈ വത്സരം ചോപദിഷ്ടവാന് ॥ ൯॥
ക്ഷീരാബ്ധൌ ച മഹാവിഷ്ണുര്ബ്രഹ്മണേ ചോപദിഷ്ടവാന് ।
കദാചിത്ബ്രഹ്മലോകേ തു മത്പിതുശ്ചോക്തവാനഹമ് ॥ ൧൦॥
നാരദാദി ഋഷീണാം ച ഉപദിഷ്ടം മഹദ്ബഹു ।
അയാതയാമം വിസ്താരം ഗൃഹീത്വാഽഹമിഹാഗതഃ ॥ ൧൧॥
ന സമം പാദമേകം ച തീര്ഥകോടിഫലം ലഭേത് ।
ന സമം ഗ്രന്ഥമേതസ്യ ഭൂമിദാനഫലം ലഭേത് ॥ ൧൨॥
ഏകാനുഭവമാത്രസ്യ ന സര്വം സര്വദാനകമ് ।
ശ്ലോകാര്ധശ്രവണസ്യാപി ന സമം കിഞ്ചിദേവ ഹി ॥ ൧൩॥
താത്പര്യശ്രവണാഭാവേ പഠംസ്തൂഷ്ണീം സ മുച്യതേ ।
സര്വം സന്ത്യജ്യ സതതമേതദ്ഗ്രന്ഥം സമഭ്യസേത് ॥ ൧൪॥
സര്വമന്ത്രം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വദേവാംശ്ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൧൫॥
സര്വസ്നാനം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വഭാവം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൧൬॥
സര്വഹോമം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വദാനം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൧൭॥
സര്വപൂജാം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വഗുഹ്യം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൧൮॥
സര്വസേവാം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വാസ്തിത്വം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൧൯॥
സര്വപാഠം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വാഭ്യാസം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൨൦॥
ദേശികം ച പരിത്യജ്യ ഏതദ്ഗ്രന്ഥം സമഭ്യസേത് ।
ഗുരും വാപി പരിത്യജ്യ ഏതദ്ഗ്രന്ഥം സമഭ്യസേത് ॥ ൨൧॥
സര്വലോകം ച സന്ത്യജ്യ ഏതദ്ഗ്രന്ഥം സമഭ്യസേത് ।
സര്വൈശ്വര്യം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൨൨॥
സര്വസങ്കല്പകം ത്യജ്യ ഏതദ്ഗ്രന്ഥം സമഭ്യസേത് ।
സര്വപുണ്യം ച സന്ത്യജ്യ ഏതദ്ഗ്രന്ഥം സമഭ്യസേത് ॥ ൨൩॥
ഏതദ്ഗ്രന്ഥം പരം ബ്രഹ്മ ഏതദ്ഗ്രന്ഥം സമഭ്യസേത് ।
അത്രൈവ സര്വവിജ്ഞാനം അത്രൈവ പരമം പദമ് ॥ ൨൪॥
അത്രൈവ പരമോ മോക്ഷ അത്രൈവ പരമം സുഖമ് ।
അത്രൈവ ചിത്തവിശ്രാന്തിരത്രൈവ ഗ്രന്ഥിഭേദനമ് ॥ ൨൫॥
അത്രൈവ ജീവന്മുക്തിശ്ച അത്രൈവ സകലോ ജപഃ ।
ഏതദ്ഗ്രന്ഥം പഠംസ്തൂഷ്ണീം സദ്യോ മുക്തിമവാപ്നുയാത് ॥ ൨൬॥
സര്വശാസ്ത്രം ച സന്ത്യജ്യ ഏതന്മാത്രം സദാഭ്യസേത് ।
ദിനേ ദിനേ ചൈകവാരം പഠേച്ചേന്മുക്ത ഏവ സഃ ॥ ൨൭॥
ജന്മമധ്യേ സകൃദ്വാപി ശ്രുതം ചേത് സോഽപി മുച്യതേ ।
സര്വശാസ്ത്രസ്യ സിദ്ധാന്തം സര്വവേദസ്യ സംഗ്രഹമ് ॥ ൨൮॥
സാരാത് സാരതരം സാരം സാരാത് സാരതരം മഹത് ।
ഏതദ്ഗ്രന്ഥസ്യ ന സമം ത്രൈലോക്യേഽപി ഭവിഷ്യതി ॥ ൨൯ ॥
ന പ്രസിദ്ധിം ഗതേ ലോകേ ന സ്വര്ഗേഽപി ച ദുര്ലഭമ് ।
ബ്രഹ്മലോകേഷു സര്വേഷു ശാസ്ത്രേഷ്വപി ച ദുര്ലഭമ് ॥ ൩൦॥
ഏതദ്ഗ്രന്ഥം കദാചിത്തു ചൌര്യം കൃത്വാ പിതാമഹഃ ।
ക്ഷീരാബ്ധൌ ച പരിത്യജ്യ സര്വേ മുഞ്ചന്തു നോ ഇതി ॥ ൩൧॥
ജ്ഞാത്വാ ക്ഷീരസമുദ്രസ്യ തീരേ പ്രാപ്തം ഗൃഹീതവാന് ।
ഗൃഹീതം ചാപ്യസൌ ദൃഷ്ട്വാ ശപഥം ച പ്രദത്തവാന് ॥ ൩൨॥
തത് ആരഭ്യ തല്ലോകം ത്യക്ത്വാഹമിമമാഗതഃ ।
അത്യദ്ഭുതമിദം ജ്ഞാനം ഗ്രന്ഥം ചൈവ മഹാദ്ഭുതമ് ॥ ൩൩॥
തദ് ജ്ഞോ വക്താ ച നാസ്ത്യേവ ഗ്രന്ഥശ്രോതാ ച ദുര്ലഭഃ ।
ആത്മനിഷ്ഠൈകലഭ്യോഽസൌ സദ്ഗുരുര്നൈഷ ലഭ്യതേ ॥ ൩൪॥
ഗ്രന്ഥവന്തോ ന ലഭ്യന്തേ തേന ന ഖ്യാതിരാഗതാ ।
ഭവതേ ദര്ശിതം ഹ്യേതദ്ഗമിഷ്യാമി യഥാഗതമ് ॥ ൩൫॥
ഏതാവദുക്തമാത്രേണ നിദാഘ ഋഷിസത്തമഃ ।
പതിത്വാ പാദയോസ്തസ്യ ആനന്ദാശ്രുപരിപ്ലുതഃ ॥ ൩൬॥
ഉവാച വാക്യം സാനന്ദം സാഷ്ടാങ്ഗം പ്രണിപത്യ ച ।

നിദാഘഃ -

അഹോ ബ്രഹ്മന് കൃതാര്ഥോഽസ്മി കൃതാര്ഥോഽസ്മി ന സംശയഃ ।
ഭവതാം ദര്ശനേനൈവ മജ്ജന്മ സഫലം കൃതമ് ॥ ൩൭॥
ഏകവാക്യസ്യ മനനേ മുക്തോഽഹം നാത്ര സംശയഃ ।
നമസ്കരോമി തേ പാദൌ സോപചാരം ന വാസ്തവൌ ॥ ൩൮॥
തസ്യാപി നാവകാശോഽസ്തി അഹമേവ ന വാസ്തവമ് ।
ത്വമേവ നാസ്തി മേ നാസ്തി ബ്രഹ്മേതി വചനം ന ച ॥ ൩൯॥
ബ്രഹ്മേതി വചനം നാസ്തി ബ്രഹ്മഭാവം ന കിഞ്ചന ।
ഏതദ്ഗ്രന്ഥം ന മേ നാസ്തി സര്വം ബ്രഹ്മേതി വിദ്യതേ ॥ ൪൦॥
സര്വം ബ്രഹ്മേതി വാക്യം ന സര്വം ബ്രഹ്മേതി തം ന ഹി ।
തദിതി ദ്വൈതഭിന്നം തു ത്വമിതി ദ്വൈതമപ്യലമ് ॥ ൪൧॥
ഏവം കിഞ്ചിത് ക്വചിന്നാസ്തി സര്വം ശാന്തം നിരാമയമ് ।
ഏകമേവ ദ്വയം നാസ്തി ഏകത്വമപി നാസ്തി ഹി ॥ ൪൨॥
ഭിന്നദ്വന്ദ്വം ജഗദ്ദോഷം സംസാരദ്വൈതവൃത്തികമ് ।
സാക്ഷിവൃത്തിപ്രപഞ്ചം വാ അഖണ്ഡാകാരവൃത്തികമ് ॥ ൪൩॥
അഖണ്ഡൈകരസോ നാസ്തി ഗുരുര്വാ ശിഷ്യ ഏവ വാ ।
ഭവദ്ദര്ശനമാത്രേണ സര്വമേവം ന സംശയഃ ॥ ൪൪॥
ബ്രഹ്മജ്യോതിരഹം പ്രാപ്തോ ജ്യോതിഷാം ജ്യോതിരസ്മ്യഹമ് ।
നമസ്തേ സുഗുരോ ബ്രഹ്മന് നമസ്തേ ഗുരുനന്ദന ।
ഏവം കൃത്യ നമസ്കാരം തൂഷ്ണീമാസ്തേ സുഖീ സ്വയമ് ॥ ൪൫॥
കിം ചണ്ഡഭാനുകരമണ്ഡലദണ്ഡിതാനി
കാഷ്ഠാമുഖേഷു ഗലിതാനി നമസ്തതീതി ।
യാദൃക്ച താദൃഗഥ ശങ്കരലിങ്ഗസങ്ഗ-
ഭങ്ഗീനി പാപകലശൈലകുലാനി സദ്യഃ ।
ശ്രീമൃത്യുഞ്ജയ രഞ്ജയ ത്രിഭുവനാധ്യക്ഷ പ്രഭോ പാഹി നഃ ॥ ൪൬॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ഗ്രന്ഥപ്രശസ്തിനിരൂപണം നാമ ഏകചത്വാരിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com