Ribhu Gita - Siva Rahasya Purana Amsha 6

ഋഭുഗീതാ ൨൦ ॥ ആത്മ-വൈഭവ പ്രകരണമ് ॥

ഋഭുഃ -

ശൃണു കേവലമത്യന്തം രഹസ്യം പരമാദ്ഭുതമ് ।
ഇതി ഗുഹ്യതരം സദ്യോ മോക്ഷപ്രദമിദം സദാ ॥ ൧॥
സുലഭം ബ്രഹ്മവിജ്ഞാനം സുലഭം ശുഭമുത്തമമ് ।
സുലഭം ബ്രഹ്മനിഷ്ഠാനാം സുലഭം സര്വബോധകമ് ॥ ൨॥
സുലഭം കൃതകൃത്യാനാം സുലഭം സ്വയമാത്മനഃ ।
സുലഭം കാരണാഭാവം സുലഭം ബ്രഹ്മണി സ്ഥിതമ് ॥ ൩॥
സുലഭം ചിത്തഹീനാനാം സ്വയം തച്ച സ്വയം സ്വയമ് ।
സ്വയം സംസാരഹീനാനാം ചിത്തം സംസാരമുച്യതേ ॥ ൪॥
സൃഷ്ട്വൈദം ന സംസാരഃ ബ്രഹ്മൈവേദം മനോ ന ച ।
ബ്രഹ്മൈവേദം ഭയം നാസ്തി ബ്രഹ്മൈവേദം ന കിഞ്ചന ॥ ൫॥
ബ്രഹ്മൈവേദമസത് സര്വം ബ്രഹ്മൈവേദം പരായണമ് ।
ബ്രഹ്മൈവേദം ശരീരാണാം ബ്രഹ്മൈവേദം തൃണം ന ച ॥ ൬॥
ബ്രഹ്മൈവാസ്മി ന ചാന്യോഽസ്മി ബ്രഹ്മൈവേദം ജഗന്ന ച ।
ബ്രഹ്മൈവേദം വിയന്നാസ്തി ബ്രഹ്മൈവേദം ക്രിയാ ന ച ॥ ൭॥
ബ്രഹ്മൈവേദം മഹാത്മാനം ബ്രഹ്മൈവേദം പ്രിയം സദാ ।
ബ്രഹ്മൈവേദം ജഗന്നാന്തോ ബ്രഹ്മൈവാഹം ഭയം ന ഹി ॥ ൮॥
ബ്രഹ്മൈവാഹം സദാചിത്തം ബ്രഹ്മൈവാഹമിദം ന ഹി ।
ബ്രഹ്മൈവാഹം തു യന്മിഥ്യാ ബ്രഹ്മൈവാഹമിയം ഭ്രമാ ॥ ൯॥
ബ്രഹ്മൈവ സര്വസിദ്ധാന്തോ ബ്രഹ്മൈവ മനസാസ്പദമ് ।
ബ്രഹ്മൈവ സര്വഭവനം ബ്രഹ്മൈവ മുനിമണ്ഡലമ് ॥ ൧൦॥
ബ്രഹ്മൈവാഹം തു നാസ്ത്യന്യദ് ബ്രഹ്മൈവ ഗുരുപൂജനമ് ।
ബ്രഹ്മൈവ നാന്യത് കിഞ്ചിത്തു ബ്രഹ്മൈവ സകലം സദാ ॥ ൧൧॥
ബ്രഹ്മൈവ ത്രിഗുണാകാരം ബ്രഹ്മൈവ ഹരിരൂപകമ് ।
ബ്രഹ്മണോഽന്യത് പദം നാസ്തി ബ്രഹ്മണോഽന്യത് ക്ഷണം ന മേ ॥ ൧൨॥
ബ്രഹ്മൈവാഹം നാന്യവാര്താ ബ്രഹ്മൈവാഹം ന ച ശ്രുതമ് ।
ബ്രഹ്മൈവാഹം സമം നാസ്തി സര്വം ബ്രഹ്മൈവ കേവലമ് ॥ ൧൩॥
ബ്രഹ്മൈവാഹം ന മേ ഭോഗോ ബ്രഹ്മൈവാഹം ന മേ പൃഥക് ।
ബ്രഹ്മൈവാഹം സതം നാസ്തി ബ്രഹ്മൈവ ബ്രഹ്മരൂപകഃ ॥ ൧൪॥
ബ്രഹ്മൈവ സര്വദാ ഭാതി ബ്രഹ്മൈവ സുഖമുത്തമമ് ।
ബ്രഹ്മൈവ നാനാകാരത്വാത് ബ്രഹ്മൈവാഹം പ്രിയം മഹത് ॥ ൧൫॥
ബ്രഹ്മൈവ ബ്രഹ്മണഃ പൂജ്യം ബ്രഹ്മൈവ ബ്രഹ്മണോ ഗുരുഃ ।
ബ്രഹ്മൈവ ബ്രഹ്മമാതാ തു ബ്രഹ്മൈവാഹം പിതാ സുതഃ ॥ ൧൬॥
ബ്രഹ്മൈവ ബ്രഹ്മ ദേവം ച ബ്രഹ്മൈവ ബ്രഹ്മ തജ്ജയഃ ।
ബ്രഹ്മൈവ ധ്യാനരൂപാത്മാ ബ്രഹ്മൈവ ബ്രഹ്മണോ ഗുണഃ ॥ ൧൭॥
ആത്മൈവ സര്വനിത്യാത്മാ ആത്മനോഽന്യന്ന കിഞ്ചന ।
ആത്മൈവ സതതം ഹ്യാത്മാ ആത്മൈവ ഗുരുരാത്മനഃ ॥ ൧൮॥
ആത്മജ്യോതിരഹംഭൂതമാത്മൈവാസ്തി സദാ സ്വയമ് ।
സ്വയം തത്ത്വമസി ബ്രഹ്മ സ്വയം ഭാമി പ്രകാശകഃ ॥ ൧൯॥
സ്വയം ജീവത്വസംശാന്തിഃ സ്വയമീശ്വരരൂപവാന് ।
സ്വയം ബ്രഹ്മ പരം ബ്രഹ്മ സ്വയം കേവലമവ്യയമ് ॥ ൨൦॥
സ്വയം നാശം ച സിദ്ധാന്തം സ്വയമാത്മാ പ്രകാശകഃ ।
സ്വയം പ്രകാശരൂപാത്മാ സ്വയമത്യന്തനിര്മലഃ ॥ ൨൧॥
സ്വയമേവ ഹി നിത്യാത്മാ സ്വയം ശുദ്ധഃ പ്രിയാപ്രിയഃ ।
സ്വയമേവ സ്വയം ഛന്ദഃ സ്വയം ദേഹാദിവര്ജിതഃ ॥ ൨൨॥
സ്വയം ദോഷവിഹീനാത്മാ സ്വയമാകാശവത് സ്ഥിതഃ ।
അയം ചേദം ച നാസ്ത്യേവ അയം ഭേദവിവര്ജിതഃ ॥ ൨൩॥
ബ്രഹ്മൈവ ചിത്തവദ്ഭാതി ബ്രഹ്മൈവ ശിവവത് സദാ ।
ബ്രഹ്മൈവ ബുദ്ധിവദ്ഭാതി ബ്രഹ്മൈവ ശിവവത് സദാ ॥ ൨൪॥
ബ്രഹ്മൈവ ശശവദ്ഭാതി ബ്രഹ്മൈവ സ്ഥൂലവത് സ്വയമ് ।
ബ്രഹ്മൈവ സതതം നാന്യത് ബ്രഹ്മൈവ ഗുരുരാത്മനഃ ॥ ൨൫॥
ആത്മജ്യോതിരഹം ഭൂതമഹം നാസ്തി സദാ സ്വയമ് ।
സ്വയമേവ പരം ബ്രഹ്മ സ്വയമേവ ചിദവ്യയഃ ॥ ൨൬॥
സ്വയമേവ സ്വയം ജ്യോതിഃ സ്വയം സര്വത്ര ഭാസതേ ।
സ്വയം ബ്രഹ്മ സ്വയം ദേഹഃ സ്വയം പൂര്ണഃ പരഃ പുമാന് ॥ ൨൭॥
സ്വയം തത്ത്വമസി ബ്രഹ്മ സ്വയം ഭാതി പ്രകാശകഃ ।
സ്വയം ജീവത്വസംശാന്തഃ സ്വയമീശ്വരരൂപവാന് ॥ ൨൮॥
സ്വയമേവ പരം ബ്രഹ്മ സ്വയം കേവലമവ്യയഃ ।
സ്വയം രാദ്ധാന്തസിദ്ധാന്തഃ സ്വയമാത്മാ പ്രകാശകഃ ॥ ൨൯॥
സ്വയം പ്രകാശരൂപാത്മാ സ്വയമത്യന്തനിര്മലഃ ।
സ്വയമേവ ഹി നിത്യാത്മാ സ്വയം ശുദ്ധഃ പ്രിയാപ്രിയഃ ॥ ൩൦॥
സ്വയമേവ സ്വയം സ്വസ്ഥഃ സ്വയം ദേഹവിവര്ജിതഃ ।
സ്വയം ദോഷവിഹീനാത്മാ സ്വയമാകാശവത് സ്ഥിതഃ ॥ ൩൧॥
അഖണ്ഡഃ പരിപൂര്ണോഽഹമഖണ്ഡരസപൂരണഃ ।
അഖണ്ഡാനന്ദ ഏവാഹമപരിച്ഛിന്നവിഗ്രഹഃ ॥ ൩൨॥
ഇതി നിശ്ചിത്യ പൂര്ണാത്മാ ബ്രഹ്മൈവ ന പൃഥക് സ്വയമ് ।
അഹമേവ ഹി നിത്യാത്മാ അഹമേവ ഹി ശാശ്വതഃ ॥ ൩൩॥
അഹമേവ ഹി തദ്ബ്രഹ്മ ബ്രഹ്മൈവാഹം ജഗത്പ്രഭുഃ ।
ബ്രഹ്മൈവാഹം നിരാഭാസോ ബ്രഹ്മൈവാഹം നിരാമയഃ ॥ ൩൪॥
ബ്രഹ്മൈവാഹം ചിദാകാശോ ബ്രഹ്മൈവാഹം നിരന്തരഃ ।
ബ്രഹ്മൈവാഹം മഹാനന്ദോ ബ്രഹ്മൈവാഹം സദാത്മവാന് ॥ ൩൫॥
ബ്രഹ്മൈവാഹമനന്താത്മാ ബ്രഹ്മൈവാഹം സുഖം പരമ് ।
ബ്രഹ്മൈവാഹം മഹാമൌനീ സര്വവൃത്താന്തവര്ജിതഃ ॥ ൩൬॥
ബ്രഹ്മൈവാഹമിദം മിഥ്യാ ബ്രഹ്മൈവാഹം ജഗന്ന ഹി ।
ബ്രഹ്മൈവാഹം ന ദേഹോഽസ്മി ബ്രഹ്മൈവാഹം മഹാദ്വയഃ ॥ ൩൭॥
ബ്രഹ്മൈവ ചിത്തവദ്ഭാതി ബ്രഹ്മൈവ ശിവവത് സദാ ।
ബ്രഹ്മൈവ ബുദ്ധിവദ്ഭാതി ബ്രഹ്മൈവ ഫലവത് സ്വയമ് ॥ ൩൮॥
ബ്രഹ്മൈവ മൂര്തിവദ്ഭാതി തദ്ബ്രഹ്മാസി ന സംശയഃ ।
ബ്രഹ്മൈവ കാലവദ്ഭാതി ബ്രഹ്മൈവ സകലാദിവത് ॥ ൩൯॥
ബ്രഹ്മൈവ ഭൂതിവദ്ഭാതി ബ്രഹ്മൈവ ജഡവത് സ്വയമ് ।
ബ്രഹ്മൈവൌംകാരവത് സര്വം ബ്രഹ്മൈവൌംകാരരൂപവത് ॥ ൪൦॥
ബ്രഹ്മൈവ നാദവദ്ബ്രഹ്മ നാസ്തി ഭേദോ ന ചാദ്വയമ് ।
സത്യം സത്യം പുനഃ സത്യം ബ്രഹ്മണോഽന്യന്ന കിഞ്ചന ॥ ൪൧॥
ബ്രഹ്മൈവ സര്വമാത്മൈവ ബ്രഹ്മണോഽന്യന്ന കിഞ്ചന ।
സര്വം മിഥ്യാ ജഗന്മിഥ്യാ ദൃശ്യത്വാദ്ഘടവത് സദാ ॥ ൪൨॥
ബ്രഹ്മൈവാഹം ന സന്ദേഹശ്ചിന്മാത്രത്വാദഹം സദാ ।
ബ്രഹ്മൈവ ശുദ്ധരൂപത്വാത് ദൃഗ്രൂപത്വാത് സ്വയം മഹത് ॥ ൪൩॥
അഹമേവ പരം ബ്രഹ്മ അഹമേവ പരാത് പരഃ ।
അഹമേവ മനോതീത അഹമേവ ജഗത്പരഃ ॥ ൪൪॥
അഹമേവ ഹി നിത്യാത്മാ അഹം മിഥ്യാ സ്വഭാവതഃ ।
ആനന്ദോഽഹം നിരാധാരോ ബ്രഹ്മൈവ ന ച കിഞ്ചന ॥ ൪൫॥
നാന്യത് കിഞ്ചിദഹം ബ്രഹ്മ നാന്യത് കിഞ്ചിച്ചിദവ്യയഃ ।
ആത്മനോഽന്യത് പരം തുച്ഛമാത്മനോഽന്യദഹം നഹി ॥ ൪൬॥
ആത്മനോഽന്യന്ന മേ ദേഹഃ ആത്മൈവാഹം ന മേ മലമ് ।
ആത്മന്യേവാത്മനാ ചിത്തമാത്മൈവാഹം ന തത് പൃഥക് ॥ ൪൭॥
ആത്മൈവാഹമഹം ശൂന്യമാത്മൈവാഹം സദാ ന മേ ।
ആത്മൈവാഹം ഗുണോ നാസ്തി ആത്മൈവ ന പൃഥക് ക്വചിത് ॥ ൪൮॥
അത്യന്താഭാവ ഏവ ത്വം അത്യന്താഭാവമീദൃശമ് ।
അത്യന്താഭാവ ഏവേദമത്യന്താഭാവമണ്വപി ॥ ൪൯॥
ആത്മൈവാഹം പരം ബ്രഹ്മ സര്വം മിഥ്യാ ജഗത്ത്രയമ് ।
അഹമേവ പരം ബ്രഹ്മ അഹമേവ പരോ ഗുരുഃ ॥ ൫൦॥
ജീവഭാവം സദാസത്യം ശിവസദ്ഭാവമീദൃശമ് ।
വിഷ്ണുവദ്ഭാവനാഭ്രാന്തിഃ സര്വം ശശവിഷാണവത് ॥ ൫൧॥
അഹമേവ സദാ പൂര്ണം അഹമേവ നിരന്തരമ് ।
നിത്യതൃപ്തോ നിരാകാരോ ബ്രഹ്മൈവാഹം ന സംശയഃ ॥ ൫൨॥
അഹമേവ പരാനന്ദ അഹമേവ ക്ഷണാന്തികഃ ।
അഹമേവ ത്വമേവാഹം ത്വം ചാഹം നാസ്തി നാസ്തി ഹി ॥ ൫൩॥
വാചാമഗോചരോഽഹം വൈ വാങ്മനോ നാസ്തി കല്പിതമ് ।
അഹം ബ്രഹ്മൈവ സര്വാത്മാ അഹം ബ്രഹ്മൈവ നിര്മലഃ ॥ ൫൪॥
അഹം ബ്രഹ്മൈവ ചിന്മാത്രം അഹം ബ്രഹ്മൈവ നിത്യശഃ ।
ഇദം ച സര്വദാ നാസ്തി അഹമേവ സദാ സ്ഥിരഃ ॥ ൫൫॥
ഇദം സുഖമഹം ബ്രഹ്മ ഇദം സുഖമഹം ജഡമ് ।
ഇദം ബ്രഹ്മ ന സന്ദേഹഃ സത്യം സത്യം പുനഃ പുനഃ ॥ ൫൬॥
ഇത്യാത്മവൈഭവം പ്രോക്തം സര്വലോകേഷു ദുര്ലഭമ് ।
സകൃച്ഛ്രവണമാത്രേണ ബ്രഹ്മൈവ ഭവതി സ്വയമ് ॥ ൫൭॥
ശാന്തിദാന്തിപരമാ ഭവതാന്താഃ
സ്വാന്തഭാന്തമനിശം ശശികാന്തമ് ।
അന്തകാന്തകമഹോ കലയന്തഃ
വേദമൌലിവചനൈഃ കില ശാന്താഃ ॥ ൫൮॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ആത്മവൈഭവപ്രകരണം നാമ വിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com