ഋഭുഗീതാ ൩൫ ॥ ബ്രഹ്മ-ഭാവനോപദേശ പ്രകരണമ് ॥
ഋഭുഃ -
- നിദാഘ ശൃണു ഗുഹ്യം മേ സദ്യോ മുക്തിപ്രദം നൃണാമ് ।
- ആത്മൈവ നാന്യദേവേദം പരമാത്മാഹമക്ഷതഃ ॥ ൧॥
- അഹമേവ പരം ബ്രഹ്മ സച്ചിദാനന്ദവിഗ്രഹഃ ।
- അഹമസ്മി മഹാനസ്മി ശിവോഽസ്മി പരമോഽസ്മ്യഹമ് ॥ ൨॥
- അദൃശ്യം പരമം ബ്രഹ്മ നാന്യദസ്തി സ്വഭാവതഃ ।
- സര്വം നാസ്ത്യേവ നാസ്ത്യേവ അഹം ബ്രഹ്മൈവ കേവലമ് ॥ ൩॥
- ശാന്തം ബ്രഹ്മ പരം ചാസ്മി സര്വദാ നിത്യനിര്മലഃ ।
- സര്വം നാസ്ത്യേവ നാസ്ത്യേവ അഹം ബ്രഹ്മൈവ കേവലമ് ॥ ൪॥
- സര്വസങ്കല്പമുക്തോഽസ്മി സര്വസന്തോഷവര്ജിതഃ ।
- കാലകര്മജഗദ്ദ്വൈതദ്രഷ്ടൃദര്ശനവിഗ്രഹഃ ॥ ൫॥
- ആനന്ദോഽസ്മി സദാനന്ദകേവലോ ജഗതാം പ്രിയമ് ।
- സമരൂപോഽസ്മി നിത്യോഽസ്മി ഭൂതഭവ്യമജോ ജയഃ ॥ ൬॥
- ചിന്മാത്രോഽസ്മി സദാ ഭുക്തോ ജീവോ ബന്ധോ ന വിദ്യതേ ।var was മുക്തഃ
- ശ്രവണം ഷഡ്വിധം ലിങ്ഗം നൈവാസ്തി ജഗദീദൃശമ് ॥ ൭॥
- ചിത്തസംസാരഹീനോഽസ്മി ചിന്മാത്രത്വം ജഗത് സദാ ।
- ചിത്തമേവ ഹിതം ദേഹ അവിചാരഃ പരോ രിപുഃ ॥ ൮॥
- അവിചാരോ ജഗദ്ദുഃഖമവിചാരോ മഹദ്ഭയമ് ।
- സദ്യോഽസ്മി സര്വദാ തൃപ്തഃ പരിപൂര്ണഃ പരോ മഹാന് ॥ ൯॥
- നിത്യശുദ്ധോഽസ്മി ബുദ്ധോഽസ്മി ചിദാകാശോഽസ്മി ചേതനഃ ।
- ആത്മൈവ നാന്യദേവേദം പരമാത്മാഽഹമക്ഷതഃ ॥ ൧൦॥
- സര്വദോഷവിഹീനോഽസ്മി സര്വത്ര വിതതോഽസ്മ്യഹമ് ।
- വാചാതീതസ്വരൂപോഽസ്മി പരമാത്മാഽഹമക്ഷതഃ ॥ ൧൧॥
- ചിത്രാതീതം പരം ദ്വന്ദ്വം സന്തോഷഃ സമഭാവനമ് ।
- അന്തര്ബഹിരനാദ്യന്തം സര്വഭേദവിനിര്ണയമ് ॥ ൧൨॥
- അഹംകാരം ബലം സര്വം കാമം ക്രോധം പരിഗ്രഹമ് ।
- ബ്രഹ്മേന്ദ്രോവിഷ്ണുര്വരുണോ ഭാവാഭാവവിനിശ്ചയഃ ॥ ൧൩॥
- ജീവസത്താ ജഗത്സത്താ മായാസത്താ ന കിഞ്ചന ।
- ഗുരുശിഷ്യാദിഭേദം ച കാര്യാകാര്യവിനിശ്ചയഃ ॥ ൧൪॥
- ത്വം ബ്രഹ്മാസീതി വക്താ ച അഹം ബ്രഹ്മാസ്മി സംഭവഃ ।
- സര്വവേദാന്തവിജ്ഞാനം സര്വാമ്നായവിചാരണമ് ॥ ൧൫॥
- ഇദം പദാര്ഥസദ്ഭാവമഹം രൂപേണ സംഭവമ് ।
- വേദവേദാന്തസിദ്ധാന്തജഗദ്ഭേദം ന വിദ്യതേ ॥ ൧൬॥
- സര്വം ബ്രഹ്മ ന സന്ദേഹഃ സര്വമിത്യേവ നാസ്തി ഹി ।
- കേവലം ബ്രഹ്മശാന്താത്മാ അഹമേവ നിരന്തരമ് ॥ ൧൭॥
- ശുഭാശുഭവിഭേദം ച ദോഷാദോഷം ച മേ ന ഹി ।
- ചിത്തസത്താ ജഗത്സത്താ ബുദ്ധിവൃത്തിവിജൃമ്ഭണമ് ॥ ൧൮॥
- ബ്രഹ്മൈവ സര്വദാ നാന്യത് സത്യം സത്യം നിജം പദമ് ।
- ആത്മാകാരമിദം ദ്വൈതം മിഥ്യൈവ ന പരഃ പുമാന് ॥ ൧൯॥
- സച്ചിദാനന്ദമാത്രോഽഹം സര്വം കേവലമവ്യയമ് ।
- ബ്രഹ്മാ വിഷ്ണുശ്ച രുദ്രശ്ച ഈശ്വരശ്ച സദാശിവഃ ॥ ൨൦॥
- മനോ ജഗദഹം ഭേദം ചിത്തവൃത്തിജഗദ്ഭയമ് ।
- സര്വാനന്ദമഹാനന്ദമാത്മാനന്ദമനന്തകമ് ॥ ൨൧॥
- അത്യന്തസ്വല്പമല്പം വാ പ്രപഞ്ചം നാസ്തി കിഞ്ചന ।
- പ്രപഞ്ചമിതി ശബ്ദോ വാ സ്മരണം വാ ന വിദ്യതേ ॥ ൨൨॥
- അന്തരസ്ഥപ്രപഞ്ചം വാ ക്വചിന്നാസ്തി ക്വചിദ്ബഹിഃ ।
- യത് കിഞ്ചിദേവം തൂഷ്ണീം വാ യച്ച കിഞ്ചിത് സദാ ക്വ വാ ॥ ൨൩॥
- യേന കേന യദാ കിഞ്ചിദ്യസ്യ കസ്യ ന കിഞ്ചന ।
- ശുദ്ധം മലിനരൂപം വാ ബ്രഹ്മവാക്യമബോധകമ് ॥ ൨൪॥
- ഈദൃഷം താദൃഷം വേതി ന കിഞ്ചിത് വക്തുമര്ഹതി ।
- ബ്രഹ്മൈവ സര്വം സതതം ബ്രഹ്മൈവ സകലം മനഃ ॥ ൨൫॥
- ആനന്ദം പരമാനദം നിത്യാനന്ദം സദാഽദ്വയമ് ।
- ചിന്മാത്രമേവ സതതം നാസ്തി നാസ്തി പരോഽസ്മ്യഹമ് ॥ ൨൬॥
- പ്രപഞ്ചം സര്വദാ നാസ്തി പ്രപഞ്ചം ചിത്രമേവ ച ।
- ചിത്തമേവ ഹി സംസാരം നാന്യത് സംസാരമേവ ഹി ॥ ൨൭॥
- മന ഏവ ഹി സംസാരോ ദേഹോഽഹമിതി രൂപകമ് ।
- സങ്കല്പമേവ സംസാരം തന്നാശേഽസൌ വിനശ്യതി ॥ ൨൮॥
- സങ്കല്പമേവ ജനനം തന്നാശേഽസൌ വിനശ്യതി ।
- സങ്കല്പമേവ ദാരിദ്ര്യം തന്നാശേഽസൌ വിനശ്യതി ॥ ൨൯॥
- സങ്കല്പമേവ മനനം തന്നാശേഽസൌ വിനശ്യതി ।
- ആത്മൈവ നാന്യദേവേദം പരമാത്മാഽഹമക്ഷതഃ ॥ ൩൦॥
- നിത്യമാത്മമയം ബോധമഹമേവ സദാ മഹാന് ।
- ആത്മൈവ നാന്യദേവേദം പരമാത്മാഽഹമക്ഷതഃ ॥ ൩൧॥
- ഇത്യേവം ഭാവയേന്നിത്യം ക്ഷിപ്രം മുക്തോ ഭവിഷ്യതി ।
- ത്വമേവ ബ്രഹ്മരൂപോഽസി ത്വമേവ ബ്രഹ്മവിഗ്രഹഃ ॥ ൩൨॥
- ഏവം ച പരമാനന്ദം ധ്യാത്വാ ധ്യാത്വാ സുഖീഭവ ।
- സുഖമാത്രം ജഗത് സര്വം പ്രിയമാത്രം പ്രപഞ്ചകമ് ॥ ൩൩॥
- ജഡമാത്രമയം ലോകം ബ്രഹ്മമാത്രമയം സദാ ।
- ബ്രഹ്മൈവ നാന്യദേവേദം പരമാത്മാഽഹമവ്യയഃ ॥ ൩൪॥
- ഏക ഏവ സദാ ഏഷ ഏക ഏവ നിരന്തരമ് ।
- ഏക ഏവ പരം ബ്രഹ്മ ഏക ഏവ ചിദവ്യയഃ ॥ ൩൫॥
- ഏക ഏവ ഗുണാതീത ഏക ഏവ സുഖാവഹഃ ।
- ഏക ഏവ മഹാനാത്മാ ഏക ഏവ നിരന്തരമ് ॥ ൩൬॥
- ഏക ഏവ ചിദാകാര ഏക ഏവാത്മനിര്ണയഃ ।
- ബ്രഹ്മൈവ നാന്യദേവേദം പരമാത്മാഽഹമക്ഷതഃ ॥ ൩൭॥
- പരമാത്മാഹമന്യന്ന പരമാനന്ദമന്ദിരമ് ।
- ഇത്യേവം ഭാവയന്നിത്യം സദാ ചിന്മയ ഏവ ഹി ॥ ൩൮॥
സൂതഃ -
- വിരിഞ്ചിവഞ്ചനാതതപ്രപഞ്ചപഞ്ചബാണഭിത്
- സുകാഞ്ചനാദ്രിധാരിണം കുലുഞ്ചനാം പതിം ഭജേ ।
- അകിഞ്ചനേഽപി സിഞ്ചകേ ജലേന ലിങ്ഗമസ്തകേ
- വിമുഞ്ചതി ക്ഷണാദഘം ന കിഞ്ചിദത്ര ശിഷ്യതേ ॥ ൩൯॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മഭാവനോപദേശപ്രകരണം നാമ പഞ്ചത്രിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com