ഋഭുഗീതാ ൩൬ ॥ ബ്രഹ്മ-ഭാവനോപദേശ പ്രകരണമ് ॥
ഋഭുഃ -
- ശൃണു വക്ഷ്യാമി വിപ്രേന്ദ്ര സര്വം ബ്രഹ്മൈവ നിര്ണയമ് ।
- യസ്യ ശ്രവണമാത്രേണ സദ്യോ മുക്തിമവാപ്നുയാത് ॥ ൧॥
- ഇദമേവ സദാ നാസ്തി ഹ്യഹമേവ ഹി കേവലമ് ।
- ആത്മൈവ സര്വദാ നാസ്തി ആത്മൈവ സുഖലക്ഷണമ് ॥ ൨॥
- ആത്മൈവ പരമം തത്ത്വമാത്മൈവ ജഗതാം ഗണഃ ।
- ആത്മൈവ ഗഗനാകാരമാത്മൈവ ച നിരന്തരമ് ॥ ൩॥
- ആത്മൈവ സത്യം ബ്രഹ്മൈവ ആത്മൈവ ഗുരുലക്ഷണമ് ।
- ആത്മൈവ ചിന്മയം നിത്യമാത്മൈവാക്ഷരമവ്യയമ് ॥ ൪॥
- ആത്മൈവ സിദ്ധരൂപം വാ ആത്മൈവാത്മാ ന സംശയഃ ।
- ആത്മൈവജഗദാകാരം ആത്മൈവാത്മാ സ്വയം സ്വയമ് ॥ ൫॥
- ആത്മൈവ ശാന്തികലനമാത്മൈവ മനസാ വിയത് ।
- ആത്മൈവ സര്വം യത് കിഞ്ചിദാത്മൈവ പരമം പദമ് ॥ ൬॥
- ആത്മൈവ ഭുവനാകാരമാത്മൈവ പ്രിയമവ്യയമ് ।
- ആത്മൈവാന്യന്ന ച ക്വാപി ആത്മൈവാന്യം മനോമയമ് ॥ ൭॥
- ആത്മൈവ സര്വവിജ്ഞാനമാത്മൈവ പരമം ധനമ് ।
- ആത്മൈവ ഭൂതരൂപം വാ ആത്മൈവ ഭ്രമണം മഹത് ॥ ൮॥
- ആത്മൈവ നിത്യശുദ്ധം വാ ആത്മൈവ ഗുരുരാത്മനഃ ।
- ആത്മൈവ ഹ്യാത്മനഃ ശിഷ്യ ആത്മൈവ ലയമാത്മനി ॥ ൯॥
- ആത്മൈവ ഹ്യാത്മനോ ധ്യാനമാത്മൈവ ഗതിരാത്മനഃ ।
- ആത്മൈവ ഹ്യാത്മനോ ഹോമ ആത്മൈവ ഹ്യാത്മനോ ജപഃ ॥ ൧൦॥
- ആത്മൈവ തൃപ്തിരാത്മൈവ ആത്മനോഽന്യന്ന കിഞ്ചന ।
- ആത്മൈവ ഹ്യാത്മനോ മൂലമാത്മൈവ ഹ്യാത്മനോ വ്രതമ് ॥ ൧൧॥
- ആത്മജ്ഞാനം വ്രതം നിത്യമാത്മജ്ഞാനം പരം സുഖമ് ।
- ആത്മജ്ഞാനം പരാനന്ദമാത്മജ്ഞാനം പരായണമ് ॥ ൧൨॥
- ആത്മജ്ഞാനം പരം ബ്രഹ്മ ആത്മജ്ഞാനം മഹാവ്രതമ് ।
- ആത്മജ്ഞാനം സ്വയം വേദ്യമാത്മജ്ഞാനം മഹാധനമ് ॥ ൧൩॥
- ആത്മജ്ഞാനം പരം ബ്രഹ്മ ആത്മജ്ഞാനം മഹത് സുഖമ് ।
- ആത്മജ്ഞാനം മഹാനാത്മാ ആത്മജ്ഞാനം ജനാസ്പദമ് ॥ ൧൪॥
- ആത്മജ്ഞാനം മഹാതീര്ഥമാത്മജ്ഞാനം ജയപ്രദമ് ।
- ആത്മജ്ഞാനം പരം ബ്രഹ്മ ആത്മജ്ഞാനം ചരാചരമ് ॥ ൧൫॥
- ആത്മജ്ഞാനം പരം ശാസ്ത്രമാത്മജ്ഞാനമനൂപമമ് ।
- ആത്മജ്ഞാനം പരോ യോഗ ആത്മജ്ഞാനം പരാ ഗതിഃ ॥ ൧൬॥
- ആത്മജ്ഞാനം പരം ബ്രഹ്മ ഇത്യേവം ദൃഢനിശ്ചയഃ ।
- ആത്മജ്ഞാനം മനോനാശഃ ആത്മജ്ഞാനം പരോ ഗുരുഃ ॥ ൧൭॥
- ആത്മജ്ഞാനം ചിത്തനാശഃ ആത്മജ്ഞാനം വിമുക്തിദമ് ।
- ആത്മജ്ഞാനം ഭയനാശമാത്മജ്ഞാനം സുഖാവഹമ് ॥ ൧൮॥
- ആത്മജ്ഞാനം മഹാതേജ ആത്മജ്ഞാനം മഹാശുഭമ് ।
- ആത്മജ്ഞാനം സതാം രൂപമാത്മജ്ഞാനം സതാം പ്രിയമ് ॥ ൧൯॥
- ആത്മജ്ഞാനം സതാം മോക്ഷമാത്മജ്ഞാനം വിവേകജമ് ।
- ആത്മജ്ഞാനം പരോ ധര്മ ആത്മജ്ഞാനം സദാ ജപഃ ॥ ൨൦॥
- ആത്മജ്ഞാനസ്യ സദൃശമാത്മവിജ്ഞാനമേവ ഹി ।
- ആത്മജ്ഞാനേന സദൃശം ന ഭൂതം ന ഭവിഷ്യതി ॥ ൨൧॥
- ആത്മജ്ഞാനം പരോ മന്ത്ര ആത്മജ്ഞാനം പരം തപഃ ।
- ആത്മജ്ഞാനം ഹരിഃ സാക്ഷാദാത്മജ്ഞാനം ശിവഃ പരഃ ॥ ൨൨॥
- ആത്മജ്ഞാനം പരോ ധാതാ ആത്മജ്ഞാനം സ്വസംമതമ് ।
- ആത്മജ്ഞാനം സ്വയം പുണ്യമാത്മജ്ഞാനം വിശോധനമ് ॥ ൨൩॥
- ആത്മജ്ഞാനം മഹാതീര്ഥമാത്മജ്ഞാനം ശമാദികമ് ।
- ആത്മജ്ഞാനം പ്രിയം മന്ത്രമാത്മജ്ഞാനം സ്വപാവനമ് ॥ ൨൪॥
- ആത്മജ്ഞാനം ച കിന്നാമ അഹം ബ്രഹ്മേതി നിശ്ചയഃ ।
- അഹം ബ്രഹ്മേതി വിശ്വാസമാത്മജ്ഞാനം മഹോദയമ് ॥ ൨൫॥
- അഹം ബ്രഹ്മാസ്മി നിത്യോഽസ്മി സിദ്ധോഽസ്മീതി വിഭാവനമ് ।
- ആനന്ദോഽഹം പരാനന്ദം ശുദ്ധോഽഹം നിത്യമവ്യയഃ ॥ ൨൬॥
- ചിദാകാശസ്വരൂപോഽസ്മി സച്ചിദാനന്ദശാശ്വതമ് ।
- നിര്വികാരോഽസ്മി ശാന്തോഽഹം സര്വതോഽഹം നിരന്തരഃ ॥ ൨൭॥
- സര്വദാ സുഖരൂപോഽസ്മി സര്വദോഷവിവര്ജിതഃ ।
- സര്വസങ്കല്പഹീനോഽസ്മി സര്വദാ സ്വയമസ്മ്യഹമ് ॥ ൨൮॥
- സര്വം ബ്രഹ്മേത്യനുഭവം വിനാ ശബ്ദം പഠ സ്വയമ് ।
- കോട്യശ്വമേധേ യത് പുണ്യം ക്ഷണാത് തത്പുണ്യമാപ്നുയാത് ॥ ൨൯॥
- അഹം ബ്രഹ്മേതി നിശ്ചിത്യ മേരുദാനഫലം ലഭേത് ।
- ബ്രഹ്മൈവാഹമിതി സ്ഥിത്വാ സര്വഭൂദാനമപ്യണു ॥ ൩൦॥
- ബ്രഹ്മൈവാഹമിതി സ്ഥിത്വാ കോടിശോ ദാനമപ്യണു ।
- ബ്രഹ്മൈവാഹമിതി സ്ഥിത്വാ സര്വാനന്ദം തൃണായതേ ॥ ൩൧॥
- ബ്രഹ്മൈവ സര്വമിത്യേവ ഭാവിതസ്യ ഫലം സ്വയമ് ।
- ബ്രഹ്മൈവാഹമിതി സ്ഥിത്വാ സമാനം ബ്രഹ്മ ഏവ ഹി ॥ ൩൨॥
- തസ്മാത് സ്വപ്നേഽപി നിത്യം ച സര്വം സന്ത്യജ്യ യത്നതഃ ।
- അഹം ബ്രഹ്മ ന സന്ദേഹഃ അഹമേവ ഗതിര്മമ ॥ ൩൩॥
- അഹമേവ സദാ നാന്യദഹമേവ സദാ ഗുരുഃ ।
- അഹമേവ പരോ ഹ്യാത്മാ അഹമേവ ന ചാപരഃ ॥ ൩൪॥
- അഹമേവ ഗുരുഃ ശിഷ്യഃ അഹമേവേതി നിശ്ചിനു ।
- ഇദമിത്യേവ നിര്ദേശഃ പരിച്ഛിന്നോ ജഗന്ന ഹി ॥ ൩൫॥
- ന ഭൂമിര്ന ജലം നാഗ്നിര്ന വായുര്ന ച ഖം തഥാ ।
- സര്വം ചൈതന്യമാത്രത്വാത് നാന്യത് കിഞ്ചന വിദ്യതേ ॥ ൩൬॥
- ഇത്യേവം ഭാവനപരോ ദേഹമുക്തഃ സുഖീഭവ ।
- അഹമാത്മാ ഇദം നാസ്തി സര്വം ചൈതന്യമാത്രതഃ ॥ ൩൭॥
- അഹമേവ ഹി പൂര്ണാത്മാ ആനന്ദാബ്ധിരനാമയഃ ।
- ഇദമേവ സദാ നാസ്തി ജഡത്വാദസദേവ ഹി ।
- ഇദം ബ്രഹ്മ സദാ ബ്രഹ്മ ഇദം നേതി സുഖീ ഭവ ॥ ൩൮॥
- തുരങ്ഗശൃങ്ഗസന്നിഭാ ശ്രുതിപരോചനാ ...
- വിശേഷകാമവാസനാ വിനിശ്ചിതാത്മവൃത്തിതഃ ।
- നരാഃ സുരാ മുനീശ്വരാ അസങ്ഗസങ്ഗമപ്യുമാ-
- പതിം ... ന തേ ഭജന്തി കേചന ... ॥ ൩൯॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മഭാവനോപദേശപ്രകരണം നാമ ഷട്{}ത്രിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com