Ribhu Gita - Siva Rahasya Purana Amsha 6

ഋഭുഗീതാ ൩൩ ॥ സച്ചിദാനന്ദ രൂപതാ പ്രകരണമ് ॥

ഋഭുഃ -

വക്ഷ്യേ പരം ബ്രഹ്മമാത്രമനുത്പന്നമിദം ജഗത് ।
സത്പദാനന്ദമാത്രോഽഹമനുത്പന്നമിദം ജഗത് ॥ ൧॥
ആത്മൈവാഹം പരം ബ്രഹ്മ നാന്യത് സംസാരദൃഷ്ടയഃ ।
സത്പദാനന്ദമാത്രോഽഹമനുത്പന്നമിദം ജഗത് ॥ ൨॥
സത്പദാനന്ദമാത്രോഽഹം ചിത്പദാനന്ദവിഗ്രഹമ് ।
അഹമേവാഹമേവൈകമഹമേവ പരാത് പരഃ ॥ ൩॥
സച്ചിദാനദമേവൈകമഹം ബ്രഹ്മൈവ കേവലമ് ।
അഹമസ്മി സദാ ഭാമി ഏവം രൂപം കുതോഽപ്യസത് ॥ ൪॥
ത്വമിത്യേവം പരം ബ്രഹ്മ ചിന്മയാനന്ദരൂപവാന് ।
ചിദാകാരം ചിദാകാശം ചിദേവ പരമം സുഖമ് ॥ ൫॥
ആത്മൈവാഹമസന്നാഹം കൂടസ്ഥോഽഹം ഗുരുഃ പരഃ ।
കാലം നാസ്തി ജഗന്നാസ്തി കല്മഷത്വാനുഭാവനമ് ॥ ൬॥
അഹമേവ പരം ബ്രഹ്മ അഹമേവ സദാ ശിവഃ ।
ശുദ്ധചൈതന്യ ഏവാഹം ശുദ്ധസത്വാനുഭാവനഃ ॥ ൭॥
അദ്വയാനന്ദമാത്രോഽഹമവ്യയോഽഹം മഹാനഹമ് ।
സര്വം ബ്രഹ്മൈവ സതതം സര്വം ബ്രഹ്മൈവ നിര്മലഃ ॥ ൮॥
സര്വം ബ്രഹ്മൈവ നാന്യോഽസ്തി സര്വം ബ്രഹ്മൈവ ചേതനഃ ।
സര്വപ്രകാശരൂപോഽഹം സര്വപ്രിയമനോ ഹ്യഹമ് ॥ ൯॥
ഏകാന്തൈകപ്രകാശോഽഹം സിദ്ധാസിദ്ധവിവര്ജിതഃ ।
സര്വാന്തര്യാമിരൂപോഽഹം സര്വസാക്ഷിത്വലക്ഷണമ് ॥ ൧൦॥
ശമോ വിചാരസന്തോഷരൂപോഽഹമിതി നിശ്ചയഃ ।
പരമാത്മാ പരം ജ്യോതിഃ പരം പരവിവര്ജിതഃ ॥ ൧൧॥
പരിപൂര്ണസ്വരൂപോഽഹം പരമാത്മാഽഹമച്യുതഃ ।
സര്വവേദസ്വരൂപോഽഹം സര്വശാസ്ത്രസ്യ നിര്ണയഃ ॥ ൧൨॥
ലോകാനന്ദസ്വരൂപോഽഹം മുഖ്യാനന്ദസ്യ നിര്ണയഃ ।
സര്വം ബ്രഹ്മൈവ ഭൂര്നാസ്തി സര്വം ബ്രഹ്മൈവ കാരണമ് ॥ ൧൩॥
സര്വം ബ്രഹ്മൈവ നാകാര്യം സര്വം ബ്രഹ്മ സ്വയം വരഃ ।
നിത്യാക്ഷരോഽഹം നിത്യോഽഹം സര്വകല്യാണകാരകമ് ॥ ൧൪॥
സത്യജ്ഞാനപ്രകാശോഽഹം മുഖ്യവിജ്ഞാനവിഗ്രഹഃ ।
തുര്യാതുര്യപ്രകാശോഽഹം സിദ്ധാസിദ്ധാദിവര്ജിതഃ ॥ ൧൫॥
സര്വം ബ്രഹ്മൈവ സതതം സര്വം ബ്രഹ്മ നിരന്തരമ് ।
സര്വം ബ്രഹ്മ ചിദാകാശം നിത്യബ്രഹ്മ നിരഞ്ജനമ് ॥ ൧൬॥
സര്വം ബ്രഹ്മ ഗുണാതീതം സര്വം ബ്രഹ്മൈവ കേവലമ് ।
സര്വം ബ്രഹ്മൈവ ഇത്യേവം നിശ്ചയം കുരു സര്വദാ ॥ ൧൭॥
ബ്രഹ്മൈവ സര്വമിത്യേവം സര്വദാ ദൃഢനിശ്ചയഃ ।
സര്വം ബ്രഹ്മൈവ ഇത്യേവം നിശ്ചയിത്വാ സുഖീ ഭവ ॥ ൧൮॥
സര്വം ബ്രഹ്മൈവ സതതം ഭാവാഭാവൌ ചിദേവ ഹി ।
ദ്വൈതാദ്വൈതവിവാദോഽയം നാസ്തി നാസ്തി ന സംശയഃ ॥ ൧൯॥
സര്വവിജ്ഞാനമാത്രോഽഹം സര്വം ബ്രഹ്മേതി നിശ്ചയഃ ।
ഗുഹ്യാദ്ഗുഹ്യതരം സോഽഹം ഗുണാതീതോഽഹമദ്വയഃ ॥ ൨൦॥
അന്വയവ്യതിരേകം ച കാര്യാകാര്യം വിശോധയ ।
സച്ചിദാനന്ദരൂപോഽഹമനുത്പന്നമിദം ജഗത് ॥ ൨൧॥
ബ്രഹ്മൈവ സര്വമേവേദം ചിദാകാശമിദം ജഗത് ।
ബ്രഹ്മൈവ പരമാനന്ദം ആകാശസദൃശം വിഭു ॥ ൨൨॥
ബ്രഹ്മൈവ സച്ചിദാനന്ദം സദാ വാചാമഗോചരമ് ।
ബ്രഹ്മൈവ സര്വമേവേദമസ്തി നാസ്തീതി കേചന ॥ ൨൩॥
ആനന്ദഭാവനാ കിഞ്ചിത് സദസന്മാത്ര ഏവ ഹി ।
ബ്രഹ്മൈവ സര്വമേവേദം സദാ സന്മാത്രമേവ ഹി ॥ ൨൪॥
ബ്രഹ്മൈവ സര്വമേവദം ചിദ്ഘനാനന്ദവിഗ്രഹമ് ।
ബ്രഹ്മൈവ സച്ച സത്യം ച സനാതനമഹം മഹത് ॥ ൨൫॥
ബ്രഹ്മൈവ സച്ചിദാനന്ദം ഓതപ്രോതേവ തിഷ്ഠതി ।
ബ്രഹ്മൈവ സച്ചിദാനന്ദം സര്വാകാരം സനാതനമ് ॥ ൨൬॥
ബ്രഹ്മൈവ സച്ചിദാനന്ദം പരമാനദമവ്യയമ് ।
ബ്രഹ്മൈവ സച്ചിദാനന്ദം മായാതീതം നിരഞ്ജനമ് ॥ ൨൭॥
ബ്രഹ്മൈവ സച്ചിദാനന്ദം സത്താമാത്രം സുഖാത് സുഖമ് ।
ബ്രഹ്മൈവ സച്ചിദാനന്ദം ചിന്മാത്രൈകസ്വരൂപകമ് ॥ ൨൮॥
ബ്രഹ്മൈവ സച്ചിദാനന്ദം സര്വഭേദവിവര്ജിതമ് ।
സച്ചിദാനന്ദം ബ്രഹ്മൈവ നാനാകാരമിവ സ്ഥിതമ് ॥ ൨൯॥
ബ്രഹ്മൈവ സച്ചിദാനന്ദം കര്താ ചാവസരോഽസ്തി ഹി ।
സച്ചിദാനദം ബ്രഹ്മൈവ പരം ജ്യോതിഃ സ്വരൂപകമ് ॥ ൩൦॥
ബ്രഹ്മൈവ സച്ചിദാനന്ദം നിത്യനിശ്ചലമവ്യയമ് ।
ബ്രഹ്മൈവ സച്ചിദാനന്ദം വാചാവധിരസാവയമ് ॥ ൩൧॥
ബ്രഹ്മൈവ സച്ചിദാനന്ദം സ്വയമേവ സ്വയം സദാ ।
ബ്രഹ്മൈവ സച്ചിദാനന്ദം ന കരോതി ന തിഷ്ഠതി ॥ ൩൨॥
ബ്രഹ്മൈവ സച്ചിദാനന്ദം ന ഗച്ഛതി ന തിഷ്ഠതി ।
ബ്രഹ്മൈവ സച്ചിദാനന്ദം ബ്രഹ്മണോഽന്യന്ന കിഞ്ചന ॥ ൩൩॥
ബ്രഹ്മൈവ സച്ചിദാനന്ദം ന ശുക്ലം ന ച കൃഷ്ണകമ് ।
ബ്രഹ്മൈവ സച്ചിദാനന്ദം സര്വാധിഷ്ഠാനമവ്യയമ് ॥ ൩൪॥
ബ്രഹ്മൈവ സച്ചിദാനന്ദം ന തൂഷ്ണീം ന വിഭാഷണമ് ।
ബ്രഹ്മൈവ സച്ചിദാനന്ദം സത്ത്വം നാഹം ന കിഞ്ചന ॥ ൩൫॥
ബ്രഹ്മൈവ സച്ചിദാനന്ദം പരാത്പരമനുദ്ഭവമ് ।
ബ്രഹ്മൈവ സച്ചിദാനന്ദം തത്ത്വാതീതം മഹോത്സവമ് ॥ ൩൬॥
ബ്രഹ്മൈവ സച്ചിദാനന്ദം പരമാകാശമാതതമ് ।
ബ്രഹ്മൈവ സച്ചിദാനന്ദം സര്വദാ ഗുരുരൂപകമ് ॥ ൩൭॥
ബ്രഹ്മൈവ സച്ചിദാനന്ദം സദാ നിര്മലവിഗ്രഹമ് ।
ബ്രഹ്മൈവ സച്ചിദാനന്ദം ശുദ്ധചൈതന്യമാതതമ് ॥ ൩൮॥
ബ്രഹ്മൈവ സച്ചിദാനന്ദം സ്വപ്രകാശാത്മരൂപകമ് ।
ബ്രഹ്മൈവ സച്ചിദാനന്ദം നിശ്ചയം ചാത്മകാരണമ് ॥ ൩൯॥
ബ്രഹ്മൈവ സച്ചിദാനന്ദം സ്വയമേവ പ്രകാശതേ ।
ബ്രഹ്മൈവ സച്ചിദാനന്ദം നാനാകാര ഇതി സ്ഥിതമ് ॥ ൪൦॥
ബ്രഹ്മൈവ സച്ചിദാകാരം ഭ്രാന്താധിഷ്ഠാനരൂപകമ് ।
ബ്രഹ്മൈവ സച്ചിദാനന്ദം സര്വം നാസ്തി ന മേ സ്ഥിതമ് ॥ ൪൧॥
വാചാമഗോചരം ബ്രഹ്മ സച്ചിദാനദവിഗ്രഹമ് ।
സച്ചിദാനന്ദരൂപോഽഹമനുത്പന്നമിദമ് ജഗത് ॥ ൪൨॥
ബ്രഹ്മൈവേദം സദാ സത്യം നിത്യമുക്തം നിരഞ്ജനമ് ।
സച്ചിദാനന്ദം ബ്രഹ്മൈവ ഏകമേവ സദാ സുഖമ് ॥ ൪൩॥
സച്ചിദാനന്ദം ബ്രഹ്മൈവ പൂര്ണാത് പൂര്ണതരം മഹത് ।
സച്ചിദാനന്ദം ബ്രഹ്മൈവ സര്വവ്യാപകമീശ്വരമ് ॥ ൪൪॥
സച്ചിദാനന്ദം ബ്രഹ്മൈവ നാമരൂപപ്രഭാസ്വരമ് ।
സച്ചിദാനന്ദം ബ്രഹ്മൈവ അനന്താനന്ദനിര്മലമ് ॥ ൪൫॥
സച്ചിദാനന്ദം ബ്രഹ്മൈവ പരമാനന്ദദായകമ് ।
സച്ചിദാനന്ദം ബ്രഹ്മൈവ സന്മാത്രം സദസത്പരമ് ॥ ൪൬॥
സച്ചിദാനന്ദം ബ്രഹ്മൈവ സര്വേഷാം പരമവ്യയമ് ।
സച്ചിദാനന്ദം ബ്രഹ്മൈവ മോക്ഷരൂപം ശുഭാശുഭമ് ॥ ൪൭॥
സച്ചിദാനന്ദം ബ്രഹ്മൈവ പരിച്ഛിന്നം ന ഹി ക്വചിത് ।
ബ്രഹ്മൈവ സര്വമേവേദം ശുദ്ധബുദ്ധമലേപകമ് ॥ ൪൮॥
സച്ചിദാനന്ദരൂപോഽഹമനുത്പന്നമിദം ജഗത് ।
ഏതത് പ്രകരണം സത്യം സദ്യോമുക്തിപ്രദായകമ് ॥ ൪൯॥
സര്വദുഃഖക്ഷയകരം സര്വവിജ്ഞാനദായകമ് ।
നിത്യാനന്ദകരം സത്യം ശാന്തിദാന്തിപ്രദായകമ് ॥ ൫൦॥
യസ്ത്വന്തകാന്തകമഹേശ്വരപാദപദ്മ-
ലോലമ്ബസപ്രഭഹൃദാ പരിശീലകശ്ച ।
വൃന്ദാരവൃന്ദവിനതാമലദിവ്യപാദോ
ഭാവോ ഭവോദ്ഭവകൃപാവശതോ ഭവേച്ച ॥ ൫൧॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സച്ചിദാനന്ദരൂപതാപ്രകരണം നാമ ത്രയസ്ത്രിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com