Ribhu Gita - Siva Rahasya Purana Amsha 6

ഋഭുഗീതാ ൧൩ ॥ സര്വമ്-ആത്മ-പ്രകരണമ് ॥

ഋഭുഃ -

ശൃണുഷ്വ ദുര്ലഭം ലോകേ സാരാത് സാരതരം പരമ് ।
ആത്മരൂപമിദം സര്വമാത്മനോഽന്യന്ന കിഞ്ചന ॥ ൧॥
സര്വമാത്മാസ്തി പരമാ പരമാത്മാ പരാത്മകഃ ।
നിത്യാനന്ദസ്വരൂപാത്മാ ഹ്യാത്മനോഽന്യന്ന കിഞ്ചന ॥ ൨॥
പൂര്ണരൂപോ മഹാനാത്മാ പൂതാത്മാ ശാശ്വതാത്മകഃ ।
നിര്വികാരസ്വരൂപാത്മാ നിര്മലാത്മാ നിരാത്മകഃ ॥ ൩॥
ശാന്താശാന്തസ്വരൂപാത്മാ ഹ്യാത്മനോഽന്യന്ന കിഞ്ചന ।
ജീവാത്മാ പരമാത്മാ ഹി ചിത്താചിത്താത്മചിന്മയഃ ।
ഏകാത്മാ ഏകരൂപാത്മാ നൈകാത്മാത്മവിവര്ജിതഃ ॥ ൪॥
മുക്താമുക്തസ്വരൂപാത്മാ മുക്താമുക്തവിവര്ജിതഃ ।
മോക്ഷരൂപസ്വരൂപാത്മാ ഹ്യാത്മനോഽന്യന്ന കിഞ്ചന ॥ ൫॥
ദ്വൈതാദ്വൈതസ്വരൂപാത്മാ ദ്വൈതാദ്വൈതവിവര്ജിതഃ ।
സര്വവര്ജിതസര്വാത്മാ ഹ്യാത്മനോഽന്യന്ന കിഞ്ചന ॥ ൬॥
മുദാമുദസ്വരൂപാത്മാ മോക്ഷാത്മാ ദേവതാത്മകഃ ।
സങ്കല്പഹീനസാരാത്മാ ഹ്യാത്മനോഽന്യന്ന കിഞ്ചന ॥ ൭॥
നിഷ്കലാത്മാ നിര്മലാത്മാ ബുദ്ധ്യാത്മാ പുരുഷാത്മകഃ ।
ആനന്ദാത്മാ ഹ്യജാത്മാ ച ഹ്യാത്മനോഽന്യന്ന കിഞ്ചന ॥ ൮॥
അഗണ്യാത്മാ ഗണാത്മാ ച അമൃതാത്മാമൃതാന്തരഃ ।
ഭൂതഭവ്യഭവിഷ്യാത്മാ ഹ്യാത്മനോഽന്യന്ന കിഞ്ചന ॥ ൯॥
അഖിലാത്മാഽനുമന്യാത്മാ മാനാത്മാ ഭാവഭാവനഃ ।
തുര്യരൂപപ്രസന്നാത്മാ ആത്മനോഽന്യന്ന കിഞ്ചന ॥ ൧൦॥
നിത്യം പ്രത്യക്ഷരൂപാത്മാ നിത്യപ്രത്യക്ഷനിര്ണയഃ ।
അന്യഹീനസ്വഭാവാത്മാ ആത്മനോഽന്യന്ന കിഞ്ചന ॥ ൧൧॥
അസദ്ധീനസ്വഭാവാത്മാ അന്യഹീനഃ സ്വയം പ്രഭുഃ ।
വിദ്യാവിദ്യാന്യശുദ്ധാത്മാ മാനാമാനവിഹീനകഃ ॥ ൧൨॥
നിത്യാനിത്യവിഹീനാത്മാ ഇഹാമുത്രഫലാന്തരഃ ।
ശമാദിഷട്കശൂന്യാത്മാ ഹ്യാത്മനോഽന്യന്ന കിഞ്ചന ॥ ൧൩॥
മുമുക്ഷുത്വം ച ഹീനാത്മാ ശബ്ദാത്മാ ദമനാത്മകഃ ।
നിത്യോപരതരൂപാത്മാ ഹ്യാത്മനോഽന്യന്ന കിഞ്ചന ॥ ൧൪॥
സര്വകാലതിതിക്ഷാത്മാ സമാധാനാത്മനി സ്ഥിതഃ ।
ശുദ്ധാത്മാ സ്വാത്മനി സ്വാത്മാ ഹ്യാത്മനോഽന്യന്ന കിഞ്ചന ॥ ൧൫॥
അന്നകോശവിഹീനാത്മാ പ്രാണകോശവിവര്ജിതഃ ।
മനഃകോശവിഹീനാത്മാ ഹ്യാത്മനോഽന്യന്ന കിഞ്ചന ॥ ൧൬॥
വിജ്ഞാനകോശഹീനാത്മാ ആനന്ദാദിവിവര്ജിതഃ ।
പഞ്ചകോശവിഹീനാത്മാ ഹ്യാത്മനോഽന്യന്ന കിഞ്ചന ॥ ൧൭॥
നിര്വികല്പസ്വരൂപാത്മാ സവികല്പവിവര്ജിതഃ ।
ശബ്ദാനുവിദ്ധഹീനാത്മാ ഹ്യാത്മനോഽന്യന്ന കിഞ്ചന ॥ ൧൮॥var was ശബ്ദാനുവിധ്യഹീനാത്മാ
സ്ഥൂലദേഹവിഹീനാത്മാ സൂക്ഷ്മദേഹവിവര്ജിതഃ ।
കാരണാദിവിഹീനാത്മാ ഹ്യാത്മനോഽന്യന്ന കിഞ്ചന ॥ ൧൯॥
ദൃശ്യാനുവിദ്ധശൂന്യാത്മാ ഹ്യാദിമധ്യാന്തവര്ജിതഃ ।
ശാന്താ സമാധിശൂന്യാത്മാ ഹ്യാത്മനോഽന്യന്ന കിഞ്ചന ॥ ൨൦॥
പ്രജ്ഞാനവാക്യഹീനാത്മാ അഹം ബ്രഹ്മാസ്മിവര്ജിതഃ ।
തത്ത്വമസ്യാദിവാക്യാത്മാ ഹ്യാത്മനോഽന്യന്ന കിഞ്ചന ॥ ൨൧॥
അയമാത്മേത്യഭാവാത്മാ സര്വാത്മാ വാക്യവര്ജിതഃ ।
ഓംകാരാത്മാ ഗുണാത്മാ ച ഹ്യാത്മനോഽന്യന്ന കിഞ്ചന ॥ ൨൨॥
ജാഗ്രദ്ധീനസ്വരൂപാത്മാ സ്വപ്നാവസ്ഥാവിവര്ജിതഃ ।
ആനന്ദരൂപപൂര്ണാത്മാ ഹ്യാത്മനോഽന്യന്ന കിഞ്ചന ॥ ൨൩॥
ഭൂതാത്മാ ച ഭവിഷ്യാത്മാ ഹ്യക്ഷരാത്മാ ചിദാത്മകഃ ।
അനാദിമധ്യരൂപാത്മാ ഹ്യാത്മനോഽന്യന്ന കിഞ്ചന ॥ ൨൪॥
സര്വസങ്കല്പഹീനാത്മാ സ്വച്ഛചിന്മാത്രമക്ഷയഃ ।
ജ്ഞാതൃജ്ഞേയാദിഹീനാത്മാ ഹ്യാത്മനോഽന്യന്ന കിഞ്ചന ॥ ൨൫॥
ഏകാത്മാ ഏകഹീനാത്മാ ദ്വൈതാദ്വൈതവിവര്ജിതഃ ।
സ്വയമാത്മാ സ്വഭാവാത്മാ ഹ്യാത്മനോഽന്യന്ന കിഞ്ചന ॥ ൨൬॥
തുര്യാത്മാ നിത്യമാത്മാ ച യത്കിഞ്ചിദിദമാത്മകഃ ।
ഭാനാത്മാ മാനഹീനാത്മാ ഹ്യാത്മനോഽന്യന്ന കിഞ്ചന ॥ ൨൭॥var was മാനാത്മാ
വാചാവധിരനേകാത്മാ വാച്യാനന്ദാത്മനന്ദകഃ ।
സര്വഹീനാത്മസര്വാത്മാ ഹ്യാത്മനോഽന്യന്ന കിഞ്ചന ॥ ൨൮॥
ആത്മാനമേവ വീക്ഷസ്വ ആത്മാനം ഭാവയ സ്വകമ് ।
സ്വസ്വാത്മാനം സ്വയം ഭുംക്ഷ്വ ഹ്യാത്മനോഽന്യന്ന കിഞ്ചന ॥ ൨൯॥
സ്വാത്മാനമേവ സന്തുഷ്യ ആത്മാനം സ്വയമേവ ഹി ।
സ്വസ്വാത്മാനം സ്വയം പശ്യേത് സ്വമാത്മാനം സ്വയം ശ്രുതമ് ॥ ൩൦॥
സ്വമാത്മനി സ്വയം തൃപ്തഃ സ്വമാത്മാനം സ്വയംഭരഃ ।
സ്വമാത്മാനം സ്വയം ഭസ്മ ഹ്യാത്മനോഽന്യന്ന കിഞ്ചന ॥ ൩൧॥
സ്വമാത്മാനം സ്വയം മോദം സ്വമാത്മാനം സ്വയം പ്രിയമ് ।
സ്വമാത്മാനമേവ മന്തവ്യം ഹ്യാത്മനോഽന്യന്ന കിഞ്ചന ॥ ൩൨॥
ആത്മാനമേവ ശ്രോതവ്യം ആത്മാനം ശ്രവണം ഭവ ।
ആത്മാനം കാമയേന്നിത്യമ് ആത്മാനം നിത്യമര്ചയ ॥ ൩൩॥
ആത്മാനം ശ്ലാഘയേന്നിത്യമാത്മാനം പരിപാലയ ।
ആത്മാനം കാമയേന്നിത്യമ് ആത്മനോഽന്യന്ന കിഞ്ചന ॥ ൩൪॥
ആത്മൈവേയമിയം ഭൂമിഃ ആത്മൈവേദമിദം ജലമ് ।
ആത്മൈവേദമിദം ജ്യോതിരാത്മനോഽന്യന്ന കിഞ്ചന ॥ ൩൫॥
ആത്മൈവായമയം വായുരാത്മൈവേദമിദമ് വിയത് ।
ആത്മൈവായമഹങ്കാരഃ ആത്മനോഽന്യന്ന കിഞ്ചന ॥ ൩൬॥
ആത്മൈവേദമിദം ചിത്തം ആത്മൈവേദമിദം മനഃ ।
ആത്മൈവേയമിയം ബുദ്ധിരാത്മനോഽന്യന്ന കിഞ്ചന ॥ ൩൭॥
ആത്മൈവായമയം ദേഹഃ ആത്മൈവായമയം ഗുണഃ ।
ആത്മൈവേദമിദം തത്ത്വമ് ആത്മനോഽന്യന്ന കിഞ്ചന ॥ ൩൮॥
ആത്മൈവായമയം മന്ത്രഃ ആത്മൈവായമയം ജപഃ ।
ആത്മൈവായമയം ലോകഃ ആത്മനോഽന്യന്ന കിഞ്ചന ॥ ൩൯॥
ആത്മൈവായമയം ശബ്ദഃ ആത്മൈവായമയം രസഃ ।
ആത്മൈവായമയം സ്പര്ശഃ ആത്മനോഽന്യന്ന കിഞ്ചന ॥ ൪൦॥
ആത്മൈവായമയം ഗന്ധഃ ആത്മൈവായമയം ശമഃ ।
ആത്മൈവേദമിദം ദുഃഖം ആത്മൈവേദമിദം സുഖമ് ॥ ൪൧॥
ആത്മീയമേവേദം ജഗത് ആത്മീയഃ സ്വപ്ന ഏവ ഹി ।
സുഷുപ്തം ചാപ്യഥാത്മീയം ആത്മനോഽന്യന്ന കിഞ്ചന ॥ ൪൨॥
ആത്മൈവ കാര്യമാത്മൈവ പ്രായോ ഹ്യാത്മൈവമദ്വയമ് ।
ആത്മീയമേവമദ്വൈതം ആത്മനോഽന്യന്ന കിഞ്ചന ॥ ൪൩॥
ആത്മീയമേവായം കോഽപി ആത്മൈവേദമിദം ക്വചിത് ।
ആത്മൈവായമയം ലോകഃ ആത്മനോഽന്യന്ന കിഞ്ചന ॥ ൪൪॥
ആത്മൈവേദമിദം ദൃശ്യം ആത്മൈവായമയം ജനഃ ।
ആത്മൈവേദമിദം സര്വം ആത്മനോഽന്യന്ന കിഞ്ചന ॥ ൪൫॥
ആത്മൈവായമയം ശംഭുഃ ആത്മൈവേദമിദം ജഗത് ।
ആത്മൈവായമയം ബ്രഹ്മാ ആത്മനോഽന്യന്ന കിഞ്ചന ॥ ൪൬॥
ആത്മൈവായമയം സൂര്യ ആത്മൈവേദമിദം ജഡമ് ।
ആത്മൈവേദമിദം ധ്യാനമ് ആത്മൈവേദമിദമ് ഫലമ് ॥ ൪൭॥
ആത്മൈവായമയം യോഗഃ സര്വമാത്മമയം ജഗത് ।
സര്വമാത്മമയം ഭൂതം ആത്മനോഽന്യന്ന കിഞ്ചന ॥ ൪൮॥
സര്വമാത്മമയം ഭാവി സര്വമാത്മമയം ഗുരുഃ ।
സര്വമാത്മമയം ശിഷ്യ ആത്മനോഽന്യന്ന കിഞ്ചന ॥ ൪൯॥
സര്വമാത്മമയം ദേവഃ സര്വമാത്മമയം ഫലമ് ।
സര്വമാത്മമയം ലക്ഷ്യം ആത്മനോഽന്യന്ന കിഞ്ചന ॥ ൫൦॥
സര്വമാത്മമയം തീര്ഥം സര്വമാത്മമയം സ്വയമ് ।
സര്വമാത്മമയം മോക്ഷം ആത്മനോഽന്യന്ന കിഞ്ചന ॥ ൫൧॥
സര്വമാത്മമയം കാമം സര്വമാത്മമയം ക്രിയാ ।
സര്വമാത്മമയം ക്രോധഃ ആത്മനോഽന്യന്ന കിഞ്ചന ॥ ൫൨॥
സര്വമാത്മമയം വിദ്യാ സര്വമാത്മമയം ദിശഃ ।
സര്വമാത്മമയം ലോഭഃ ആത്മനോഽന്യന്ന കിഞ്ചന ॥ ൫൩॥
സര്വമാത്മമയം മോഹഃ സര്വമാത്മമയം ഭയമ് ।
സര്വമാത്മമയം ചിന്താ ആത്മനോഽന്യന്ന കിഞ്ചന ॥ ൫൪॥
സര്വമാത്മമയം ധൈര്യം സര്വമാത്മമയം ധ്രുവമ് ।
സര്വമാത്മമയം സത്യം ആത്മനോഽന്യന്ന കിഞ്ചന ॥ ൫൫॥
സര്വമാത്മമയം ബോധം സര്വമാത്മമയം ദൃഢമ് ।
സര്വമാത്മമയം മേയം ആത്മനോഽന്യന്ന കിഞ്ചന ॥ ൫൬॥
സര്വമാത്മമയം ഗുഹ്യം സര്വമാത്മമയം ശുഭമ് ।
സര്വമാത്മമയം ശുദ്ധം ആത്മനോഽന്യന്ന കിഞ്ചന ॥ ൫൭॥
സര്വമാത്മമയം സര്വം സത്യമാത്മാ സദാത്മകഃ ।
പൂര്ണമാത്മാ ക്ഷയം ചാത്മാ പരമാത്മാ പരാത്പരഃ ॥ ൫൮॥
ഇതോഽപ്യാത്മാ തതോഽപ്യാത്മാ ഹ്യാത്മൈവാത്മാ തതസ്തതഃ ।
സര്വമാത്മമയം സത്യം ആത്മനോഽന്യന്ന കിഞ്ചന ॥ ൫൯॥
സര്വമാത്മസ്വരൂപം ഹി ദൃശ്യാദൃശ്യം ചരാചരമ് ।
സര്വമാത്മമയം ശ്രുത്വാ മുക്തിമാപ്നോതി മാനവഃ ॥ ൬൦॥
സ്വതന്ത്രശക്തിര്ഭഗവാനുമാധവോ
വിചിത്രകായാത്മകജാഗ്രതസ്യ ।
സുകാരണം കാര്യപരംപരാഭിഃ
സ ഏവ മായാവിതതോഽവ്യയാത്മാ ॥ ൬൧॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സര്വമാത്മപ്രകരണം നാമ ത്രയോദശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com