ഋഭുഗീതാ ൨൮ ॥ ആത്മ-വൈലക്ഷണ്യ പ്രകരണമ് ॥
ഋഭുഃ -
- ബ്രഹ്മൈവാഹം ചിദേവാഹം നിര്മലോഽഹം നിരന്തരഃ ।
- ശുദ്ധസ്വരൂപ ഏവാഹം നിത്യരൂപഃ പരോഽസ്മ്യഹമ് ॥ ൧॥
- നിത്യനിര്മലരൂപോഽഹം നിത്യചൈതന്യവിഗ്രഹഃ ।
- ആദ്യന്തരൂപഹീനോഽഹമാദ്യന്തദ്വൈതഹീനകഃ ॥ ൨॥
- അജസ്രസുഖരൂപോഽഹം അജസ്രാനന്ദരൂപവാന് ।
- അഹമേവാദിനിര്മുക്തഃ അഹം കാരണവര്ജിതഃ ॥ ൩॥
- അഹമേവ പരം ബ്രഹ്മ അഹമേവാഹമേവ ഹി ।
- ഇത്യേവം ഭാവയന്നിത്യം സുഖമാത്മനി നിര്മലഃ ॥ ൪॥
- സുഖം തിഷ്ഠ സുഖം തിഷ്ഠ സുചിരം സുഖമാവഹ ।
- സര്വവേദമനന്യസ്ത്വം സര്വദാ നാസ്തി കല്പനമ് ॥ ൫॥
- സര്വദാ നാസ്തി ചിത്താഖ്യം സര്വദാ നാസ്തി സംസൃതിഃ ।
- സര്വദാ നാസ്തി നാസ്ത്യേവ സര്വദാ ജഗദേവ ന ॥ ൬॥
- ജഗത്പ്രസങ്ഗോ നാസ്ത്യേവ ദേഹവാര്താ കുതസ്തതഃ ।
- ബ്രഹ്മൈവ സര്വചിന്മാത്രമഹമേവ ഹി കേവലമ് ॥ ൭॥
- ചിത്തമിത്യപി നാസ്ത്യേവ ചിത്തമസ്തി ഹി നാസ്തി ഹി ।
- അസ്തിത്വഭാവനാ നിഷ്ഠാ ജഗദസ്തിത്വവാങ്മൃഷാ ॥ ൮॥
- അസ്തിത്വവക്താ വാര്താ ഹി ജഗദസ്തീതി ഭാവനാ ।
- സ്വാത്മനോഽന്യജ്ജഗദ്രക്ഷാ ദേഹോഽഹമിതി നിശ്ചിതഃ ॥ ൯॥
- മഹാചണ്ഡാല ഏവാസൌ മഹാവിപ്രോഽപി നിശ്ചയഃ ।
- തസ്മാദിതി ജഗന്നേതി ചിത്തം വാ ബുദ്ധിരേവ ച ॥ ൧൦॥
- നാസ്തി നാസ്തീതി സഹസാ നിശ്ചയം കുരു നിര്മലഃ ।
- ദൃശ്യം നാസ്ത്യേവ നാസ്ത്യേവ നാസ്തി നാസ്തീതി ഭാവയ ॥ ൧൧॥
- അഹമേവ പരം ബ്രഹ്മ അഹമേവ ഹി നിഷ്കലഃ ।
- അഹമേവ ന സന്ദേഹഃ അഹമേവ സുഖാത് സുഖമ് ॥ ൧൨॥
- അഹമേവ ഹി ദിവ്യാത്മാ അഹമേവ ഹി കേവലഃ ।
- വാചാമഗോചരോഽഹം വൈ അഹമേവ ന ചാപരഃ ॥ ൧൩॥
- അഹമേവ ഹി സര്വാത്മാ അഹമേവ സദാ പ്രിയഃ ।
- അഹമേവ ഹി ഭാവാത്മാ അഹം വൃത്തിവിവര്ജിതഃ ॥ ൧൪॥
- അഹമേവാപരിച്ഛിന്ന അഹമേവ നിരന്തരഃ ।
- അഹമേവ ഹി നിശ്ചിന്ത അഹമേവ ഹി സദ്ഗുരുഃ ॥ ൧൫॥
- അഹമേവ സദാ സാക്ഷീ അഹമേവാഹമേവ ഹി ।
- നാഹം ഗുപ്തോ ന വാഽഗുപ്തോ ന പ്രകാശാത്മകഃ സദാ ॥ ൧൬॥
- നാഹം ജഡോ ന ചിന്മാത്രഃ ക്വചിത് കിഞ്ചിത് തദസ്തി ഹി ।
- നാഹം പ്രാണോ ജഡത്വം തദത്യന്തം സര്വദാ ഭ്രമഃ ॥ ൧൭॥
- അഹമത്യന്തമാനന്ദ അഹമത്യന്തനിര്മലഃ ।
- അഹമത്യന്തവേദാത്മാ അഹമത്യന്തശാങ്കരഃ ॥ ൧൮॥
- അഹമിത്യപി മേ കിഞ്ചിദഹമിത്യപി ന സ്മൃതിഃ ।
- സര്വഹീനോഽഹമേവാഗ്രേ സര്വഹീനഃ സുഖാച്ഛുഭാത് ॥ ൧൯॥
- പരാത് പരതരം ബ്രഹ്മ പരാത് പരതരഃ പുമാന് ।
- പരാത് പരതരോഽഹം വൈ സര്വസ്യാത് പരതഃ പരഃ ॥ ൨൦॥
- സര്വദേഹവിഹീനോഽഹം സര്വകര്മവിവര്ജിതഃ ।
- സര്വമന്ത്രഃ പ്രശാന്താത്മാ സര്വാന്തഃകരണാത് പരഃ ॥ ൨൧॥
- സര്വസ്തോത്രവിഹീനോഽഹം സര്വദേവപ്രകാശകഃ ।
- സര്വസ്നാനവിഹീനാത്മാ ഏകമഗ്നോഽഹമദ്വയഃ ॥ ൨൨॥
- ആത്മതീര്ഥേ ഹ്യാത്മജലേ ആത്മാനന്ദമനോഹരേ ।
- ആത്മൈവാഹമിതി ജ്ഞാത്വാ ആത്മാരാമോവസാമ്യഹമ് ॥ ൨൩॥
- ആത്മൈവ ഭോജനം ഹ്യാത്മാ തൃപ്തിരാത്മസുഖാത്മകഃ ।
- ആത്മൈവ ഹ്യാത്മനോ ഹ്യാത്മാ ആത്മൈവ പരമോ ഹ്യഹമ് ॥ ൨൪॥
- അഹമാത്മാഽഹമാത്മാഹമഹമാത്മാ ന ലൌകികഃ ।
- സര്വാത്മാഹം സദാത്മാഹം നിത്യാത്മാഹം ഗുണാന്തരഃ ॥ ൨൫॥
- ഏവം നിത്യം ഭാവയിത്വാ സദാ ഭാവയ സിദ്ധയേ ।
- സിദ്ധം തിഷ്ഠതി ചിന്മാത്രോ നിശ്ചയം മാത്രമേവ സാ ।
- നിശ്ചയം ച ലയം യാതി സ്വയമേവ സുഖീ ഭവ ॥ ൨൬॥
- ശാഖാദിഭിശ്ച ശ്രുതയോ ഹ്യനന്താ-
- സ്ത്വാമേകമേവ ഭഗവന് ബഹുധാ വദന്തി ।
- വിഷ്ണ്വിന്ദ്രധാതൃരവിസൂന്വനലാനിലാദി
- ഭൂതാത്മനാഥ ഗണനാഥലലാമ ശമ്ഭോ ॥ ൨൭॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ആത്മവൈലക്ഷണ്യപ്രകരണം നാമ അഷ്ടാവിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com