ഋഭുഗീതാ ൨൪ ॥ അഹംബ്രഹ്മ പ്രകരണ നിരൂപണമ് ॥

ഋഭുഃ -

• പുനഃ പുനഃ പരം വക്ഷ്യേ ആത്മനോഽന്യദസത് സ്വതഃ ।
• അസതോ വചനം നാസ്തി സതോ നാസ്തി സദാ സ്ഥിതേ ॥ ൧॥
• ബ്രഹ്മാഭ്യാസ പരസ്യാഹം വക്ഷ്യേ നിര്ണയമാത്മനഃ ।
• തസ്യാപി സകൃദേവാഹം വക്ഷ്യേ മങ്ഗലപൂര്വകമ് ॥ ൨॥
• സര്വം ബ്രഹ്മാഹമേവാസ്മി ചിന്മാത്രോ നാസ്തി കിഞ്ചന ।
• അഹമേവ പരം ബ്രഹ്മ അഹമേവ ചിദാത്മകമ് ॥ ൩॥
• അഹം മമേതി നാസ്ത്യേവ അഹം ജ്ഞാനീതി നാസ്തി ച ।
• ശുദ്ധോഽഹം ബ്രഹ്മരൂപോഽഹമാനന്ദോഽഹമജോ നരഃ ॥ ൪॥var was നജഃ
• ദേവോഽഹം ദിവ്യഭാനോഽഹം തുര്യോഽഹം ഭവഭാവ്യഹമ് ।
• അണ്ഡജോഽഹമശേഷോഽഹമന്തരാദന്തരോഽസ്മ്യഹമ് ॥ ൫॥
• അമരോഽഹമജസ്രോഽഹമത്യന്തപരമോഽസ്മ്യഹമ് ।
• പരാപരസ്വരൂപോഽഹം നിത്യാനിത്യരസോഽസ്മ്യഹമ് ॥ ൬॥
• ഗുണാഗുണവിഹീനോഽഹം തുര്യാതുര്യരസോഽസ്മ്യഹമ് ।
• ശാന്താശാന്തവിഹീനോഽഹം ജ്ഞാനാജ്ഞാനരസോഽസ്മ്യഹമ് ॥ ൭॥
• കാലാകാലവിഹീനോഽഹമാത്മാനാത്മവിവര്ജിതഃ ।
• ലബ്ധാലബ്ധാദിഹീനോഽഹം സര്വശൂന്യോഽഹമവ്യയഃ ॥ ൮॥
• അഹമേവാഹമേവാഹമനന്തരനിരന്തരമ് ।
• ശാശ്വതോഽഹമലക്ഷ്യോഽഹമാത്മാ ന പരിപൂര്ണതഃ ॥ ൯॥
• ഇത്യാദിശബ്ദമുക്തോഽഹം ഇത്യാദ്യം ച ന ചാസ്മ്യഹമ് ।
• ഇത്യാദിവാക്യമുക്തോഽഹം സര്വവര്ജിതദുര്ജയഃ ॥ ൧൦॥
• നിരന്തരോഽഹം ഭൂതോഽഹം ഭവ്യോഽഹം ഭവവര്ജിതഃ ।
• ലക്ഷ്യലക്ഷണഹീനോഽഹം കാര്യഹീനോഽഹമാശുഗഃ ॥ ൧൧॥
• വ്യോമാദിരൂപഹീനോഽഹം വ്യോമരൂപോഽഹമച്യുതഃ ।
• അന്തരാന്തരഭാവോഽഹമന്തരാന്തരവര്ജിതഃ ॥ ൧൨॥
• സര്വസിദ്ധാന്തരൂപോഽഹം സര്വദോഷവിവര്ജിതഃ ।
• ന കദാചന മുക്തോഽഹം ന ബദ്ധോഽഹം കദാചന ॥ ൧൩॥
• ഏവമേവ സദാ കൃത്വാ ബ്രഹ്മൈവാഹമിതി സ്മര ।
• ഏതാവദേവ മാത്രം തു മുക്തോ ഭവതു നിശ്ചയഃ ॥ ൧൪॥
• ചിന്മാത്രോഽഹം ശിവോഽഹം വൈ ശുഭമാത്രമഹം സദാ ।
• സദാകാരോഽഹം മുക്തോഽഹം സദാ വാചാമഗോചരഃ ॥ ൧൫॥
• സര്വദാ പരിപൂര്ണോഽഹം വേദോപാധിവിവര്ജിതഃ ।
• ചിത്തകാര്യവിഹീനോഽഹം ചിത്തമസ്തീതി മേ ന ഹി ॥ ൧൬॥
• യത് കിഞ്ചിദപി നാസ്ത്യേവ നാസ്ത്യേവ പ്രിയഭാഷണമ് ।
• ആത്മപ്രിയമനാത്മാ ഹി ഇദം മേ വസ്തുതോ ന ഹി ॥ ൧൭॥
• ഇദം ദുഃഖമിദം സൌഖ്യമിദം ഭാതി അഹം ന ഹി ।
• സര്വവര്ജിതരൂപോഽഹം സര്വവര്ജിതചേതനഃ ॥ ൧൮॥
• അനിര്വാച്യമനിര്വാച്യം പരം ബ്രഹ്മ രസോഽസ്മ്യഹമ് ।
• അഹം ബ്രഹ്മ ന സന്ദേഹ അഹമേവ പരാത് പരഃ ॥ ൧൯॥
• അഹം ചൈതന്യഭൂതാത്മാ ദേഹോ നാസ്തി കദാചന ।
• ലിങ്ഗദേഹം ച നാസ്ത്യേവ കാരണം ദേഹമേവ ന ॥ ൨൦॥
• അഹം ത്യക്ത്വാ പരം ചാഹം അഹം ബ്രഹ്മസ്വരൂപതഃ ।
• കാമാദിവര്ജിതോഽതീതഃ കാലഭേദപരാത്പരഃ ॥ ൨൧॥
• ബ്രഹ്മൈവേദം ന സംവേദ്യം നാഹം ഭാവം ന വാ നഹി ।
• സര്വസംശയസംശാന്തോ ബ്രഹ്മൈവാഹമിതി സ്ഥിതിഃ ॥ ൨൨॥
• നിശ്ചയം ച ന മേ കിഞ്ചിത് ചിന്താഭാവാത് സദാഽക്ഷരഃ ।
• ചിദഹം ചിദഹം ബ്രഹ്മ ചിദഹം ചിദഹം സദാ ॥ ൨൩॥
• ഏവം ഭാവനയാ യുക്തസ്ത്യക്തശങ്കഃ സുഖീഭവ ।
• സര്വസങ്ഗം പരിത്യജ്യ ആത്മൈക്യൈവം ഭവാന്വഹമ് ॥ ൨൪॥
• സങ്ഗം നാമ പ്രവക്ഷ്യേഽഹം ബ്രഹ്മാഹമിതി നിശ്ചയഃ ।
• സത്യോഽഹം പരമാത്മാഽഹം സ്വയമേവ സ്വയം സ്വയമ് ॥ ൨൫॥
• നാഹം ദേഹോ ന ച പ്രാണോ ന ദ്വന്ദ്വോ ന ച നിര്മലഃ ।
• ഏഷ ഏവ ഹി സത്സങ്ഗഃ ഏഷ ഏവ ഹി നിര്മലഃ ॥ ൨൬॥
• മഹത്സങ്ഗേ മഹദ്ബ്രഹ്മഭാവനം പരമം പദമ് ।
• അഹം ശാന്തപ്രഭാവോഽഹം അഹം ബ്രഹ്മ ന സംശയഃ ॥ ൨൭॥
• അഹം ത്യക്തസ്വരൂപോഽഹം അഹം ചിന്താദിവര്ജിതഃ ।
• ഏഷ ഏവ ഹി സത്സങ്ഗഃ ഏഷ നിത്യം ഭവാനഹമ് ॥ ൨൮॥
• സര്വസങ്കല്പഹീനോഽഹം സര്വവൃത്തിവിവര്ജിതഃ ।
• അമൃതോഽഹമജോ നിത്യം മൃതിഭീതിരതീതികഃ ॥ ൨൯॥
• സര്വകല്യാണരൂപോഽഹം സര്വദാ പ്രിയരൂപവാന് ।
• സമലാങ്ഗോ മലാതീതഃ സര്വദാഹം സദാനുഗഃ ॥ ൩൦॥
• അപരിച്ഛിന്നസന്മാത്രം സത്യജ്ഞാനസ്വരൂപവാന് ।
• നാദാന്തരോഽഹം നാദോഽഹം നാമരൂപവിവര്ജിതഃ ॥ ൩൧॥
• അത്യന്താഭിന്നഹീനോഽഹമാദിമധ്യാന്തവര്ജിതഃ ।
• ഏവം നിത്യം ദൃഢാഭ്യാസ ഏവം സ്വാനുഭവേന ച ॥ ൩൨॥
• ഏവമേവ ഹി നിത്യാത്മഭാവനേന സുഖീ ഭവ ।
• ഏവമാത്മാ സുഖം പ്രാപ്തഃ പുനര്ജന്മ ന സംഭവേത് ॥ ൩൩॥
• സദ്യോ മുക്തോ ഭവേദ്ബ്രഹ്മാകാരേണ പരിതിഷ്ഠതി ।
• ആത്മാകാരമിദം വിശ്വമാത്മാകാരമഹം മഹത് ॥ ൩൪॥
• ആത്മൈവ നാന്യദ്ഭൂതം വാ ആത്മൈവ മന ഏവ ഹി ।
• ആത്മൈവ ചിത്തവദ്ഭാതി ആത്മൈവ സ്മൃതിവത് ക്വചിത് ॥ ൩൫॥
• ആത്മൈവ വൃത്തിവദ്ഭാതി ആത്മൈവ ക്രോധവത് സദാ ।var was വൃത്തിമദ്ഭാതി
• ആത്മൈവ ശ്രവണം തദ്വദാത്മൈവ മനനം ച തത് ॥ ൩൬॥
• ആത്മൈവോപക്രമം നിത്യമുപസംഹാരമാത്മവത് ।
• ആത്മൈവാഭ്യാം സമം നിത്യമാത്മൈവാപൂര്വതാഫലമ് ॥ ൩൭॥
• അര്ഥവാദവദാത്മാ ഹി പരമാത്മോപപത്തി ഹി ।
• ഇച്ഛാ പ്രാരഭ്യവദ്ബ്രഹ്മ ഇച്ഛാമാരഭ്യവത് പരഃ ॥ ൩൮॥var was പ്രാരബ്ധവദ്
• പരേച്ഛാരബ്ധവദ്ബ്രഹ്മാ ഇച്ഛാശക്തിശ്ചിദേവ ഹി ।
• അനിച്ഛാശക്തിരാത്മൈവ പരേച്ഛാശക്തിരവ്യയഃ ॥ ൩൯॥
• പരമാത്മൈവാധികാരോ വിഷയം പരമാത്മനഃ ।
• സംബന്ധം പരമാത്മൈവ പ്രയോജനം പരാത്മകമ് ॥ ൪൦॥
• ബ്രഹ്മൈവ പരമം സങ്ഗം കര്മജം ബ്രഹ്മ സങ്ഗമമ് ।
• ബ്രഹ്മൈവ ഭ്രാന്തിജം ഭാതി ദ്വന്ദ്വം ബ്രഹ്മൈവ നാന്യതഃ ॥ ൪൧॥
• സര്വം ബ്രഹ്മേതി നിശ്ചിത്യ സദ്യ ഏവ വിമോക്ഷദമ് ।
• സവികല്പസമാധിസ്ഥം നിര്വികല്പസമാധി ഹി ॥ ൪൨॥
• ശബ്ദാനുവിദ്ധം ബ്രഹ്മൈവ ബ്രഹ്മ ദൃശ്യാനുവിദ്ധകമ് ।
• ബ്രഹ്മൈവാദിസമാധിശ്ച തന്മധ്യമസമാധികമ് ॥ ൪൩॥
• ബ്രഹ്മൈവ നിശ്ചയം ശൂന്യം തദുക്തമസമാധികമ് ।
• ദേഹാഭിമാനരഹിതം തദ്വൈരാഗ്യസമാധികമ് ॥ ൪൪॥
• ഏതദ്ഭാവനയാ ശാന്തം ജീവന്മുക്തസമാധികഃ ।
• അത്യന്തം സര്വശാന്തത്വം ദേഹോ മുക്തസമാധികമ് ॥ ൪൫॥
• ഏതദഭ്യാസിനാം പ്രോക്തം സര്വം ചൈതത്സമന്വിതമ് ।
• സര്വം വിസ്മൃത്യ വിസ്മൃത്യ ത്യക്ത്വാ ത്യക്ത്വാ പുനഃ പുനഃ ॥ ൪൬॥
• സര്വവൃത്തിം ച ശൂന്യേന സ്ഥാസ്യാമീതി വിമുച്യ ഹി ।
• ന സ്ഥാസ്യാമീതി വിസ്മൃത്യ ഭാസ്യാമീതി ച വിസ്മര ॥ ൪൭॥
• ചൈതന്യോഽഹമിതി ത്യക്ത്വാ സന്മാത്രോഽഹമിതി ത്യജ ।
• ത്യജനം ച പരിത്യജ്യ ഭാവനം ച പരിത്യജ ॥ ൪൮॥
• സര്വം ത്യക്ത്വാ മനഃ ക്ഷിപ്രം സ്മരണം ച പരിത്യജ ।
• സ്മരണം കിഞ്ചിദേവാത്ര മഹാസംസാരസാഗരമ് ॥ ൪൯॥
• സ്മരണം കിഞ്ചിദേവാത്ര മഹാദുഃഖം ഭവേത് തദാ ।
• മഹാദോഷം ഭവം ബന്ധം ചിത്തജന്മ ശതം മനഃ ॥ ൫൦॥
• പ്രാരബ്ധം ഹൃദയഗ്രന്ഥി ബ്രഹ്മഹത്യാദി പാതകമ് ।
• സ്മരണം ചൈവമേവേഹ ബന്ധമോക്ഷസ്യ കാരണമ് ॥ ൫൧॥
• അഹം ബ്രഹ്മപ്രകരണം സര്വദുഃഖവിനാശകമ് ।
• സര്വപ്രപഞ്ചശമനം സദ്യോ മോക്ഷപ്രദം സദാ ।
• ഏതച്ഛ്രവണമാത്രേണ ബ്രഹ്മൈവ ഭവതി സ്വയമ് ॥ ൫൨॥
• ഭക്ത്യാ പദ്മദലാക്ഷപൂജിതപദധ്യാനാനുവൃത്ത്യാ മനഃ
• സ്വാന്താനന്തപഥപ്രചാരവിധുരം മുക്ത്യൈ ഭവേന്മാനസമ് ।
• സങ്കല്പോജ്ഝിതമേതദല്പസുമഹാശീലോ ദയാമ്ഭോനിധൌ
• കശ്ചിത് സ്യാച്ഛിവഭക്തധുര്യസുമഹാശാന്തഃ ശിവപ്രേമതഃ ॥ ൫൩॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ അഹം ബ്രഹ്മപ്രകരണനിരൂപണം നാമ ചതുര്വിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com