ഋഭുഗീതാ ൪൬ ॥ ജ്ഞാനോപായ-ഭൂത ശിവ-വ്രത നിരൂപണമ് ॥
നിദാഘഃ -
- ഏതദ്ഗ്രന്ഥം സദാ ശ്രുത്വാ ചിത്തജാഡ്യമകുര്വതഃ ।
- യാവദ്ദേഹം സദാ വിത്തൈഃ ശുശ്രൂഷേത് പൂജയേദ്ഗുരുമ് ॥ ൧॥
- തത്പൂജയൈവ സതതം അഹം ബ്രഹ്മേതി നിശ്ചിനു ।
- നിത്യം പൂര്ണോഽസ്മി നിത്യോഽസ്മി സര്വദാ ശാന്തവിഗ്രഹഃ ॥ ൨॥
- ഏതദേവാത്മവിജ്ഞാനം അഹം ബ്രഹ്മേതി നിര്ണയഃ ।
- നിരങ്കുശസ്വരൂപോഽസ്മി അതിവര്ണാശ്രമീ ഭവ ॥ ൩॥
- അഗ്നിരിത്യാദിഭിര്മന്{}ത്രൈഃ സര്വദാ ഭസ്മധാരണമ് ।
- ത്രിയായുഷൈസ്ത്ര്യംബകൈശ്ച കുര്വന്തി ച ത്രിപുണ്ഡ്രകമ് ॥ ൪॥
- ത്രിപുണ്ഡ്രധാരിണാമേവ സര്വദാ ഭസ്മധാരണമ് ।
- ശിവപ്രസാദസംപത്തിര്ഭവിഷ്യതി ന സംശയഃ ॥ ൫॥
- ശിവപ്രസാദാദേതദ്വൈ ജ്ഞാനം സംപ്രാപ്യതേ ധ്രുവമ് ।
- ശിരോവ്രതമിദം പ്രോക്തം കേവലം ഭസ്മധാരണമ് ॥ ൬॥
- ഭസ്മധാരണമാത്രേണ ജ്ഞാനമേതദ്ഭവിഷ്യതി ।
- അഹം വത്സരപര്യന്തം കൃത്വാ വൈ ഭസ്മധാരണമ് ॥ ൭॥
- ത്വത്പാദാബ്ജം പ്രപന്നോഽസ്മി ത്വത്തോ ലബ്ധാത്മ നിര്വൃതിഃ ।
- സര്വാധാരസ്വരൂപോഽഹം സച്ചിദാനന്ദമാത്രകമ് ॥ ൮॥
- ബ്രഹ്മാത്മാഹം സുലക്ഷണ്യോ ബ്രഹ്മലക്ഷണപൂര്വകമ് ।
- ആനന്ദാനുഭവം പ്രാപ്തഃ സച്ചിദാനന്ദവിഗ്രഹഃ ॥ ൯॥
- ഗുണരൂപാദിമുക്തോഽസ്മി ജീവന്മുക്തോ ന സംശയഃ ।
- മൈത്ര്യാദിഗുണസംപന്നോ ബ്രഹ്മൈവാഹം പരോ മഹാന് ॥ ൧൦॥
- സമാധിമാനഹം നിത്യം ജീവന്മുക്തേഷു സത്തമഃ ।
- അഹം ബ്രഹ്മാസ്മി നിത്യോഽസ്മി സമാധിരിതി കഥ്യതേ ॥ ൧൧॥
- പ്രാരബ്ധപ്രതിബന്ധശ്ച ജീവന്മുക്തേഷു വിദ്യതേ ।
- പ്രാരബ്ധവശതോ യദ്യത് പ്രാപ്യം ഭുഞ്ജേ സുഖം വസ ॥ ൧൨॥
- ദൂഷണം ഭൂഷണം ചൈവ സദാ സര്വത്ര സംഭവേത് ।
- സ്വസ്വനിശ്ചയതോ ബുദ്ധ്യാ മുക്തോഽഹമിതി മന്യതേ ॥ ൧൩॥
- അഹമേവ പരം ബ്രഹ്മ അഹമേവ പരാ ഗതിഃ ।
- ഏവം നിശ്ചയവാന് നിത്യം ജീവന്മുക്തേതി കഥ്യതേ ॥ ൧൪॥
- ഏതദ്ഭേദം ച സന്ത്യജ്യ സ്വരൂപേ തിഷ്ഠതി പ്രഭുഃ ।
- ഇന്ദ്രിയാര്ഥവിഹീനോഽഹമിന്ദ്രിയാര്ഥവിവര്ജിതഃ ॥ ൧൫॥
- സര്വേന്ദ്രിയഗുണാതീതഃ സര്വേന്ദ്രിയവിവര്ജിതഃ ।
- സര്വസ്യ പ്രഭുരേവാഹം സര്വം മയ്യേവ തിഷ്ഠതി ॥ ൧൬॥
- അഹം ചിന്മാത്ര ഏവാസ്മി സച്ചിദാന്ദവിഗ്രഹഃ ।
- സര്വം ഭേദം സദാ ത്യക്ത്വാ ബ്രഹ്മഭേദമപി ത്യജേത് ॥ ൧൭॥
- അജസ്രം ഭാവയന് നിത്യം വിദേഹോ മുക്ത ഏവ സഃ ।
- അഹം ബ്രഹ്മ പരം ബ്രഹ്മ അഹം ബ്രഹ്മ ജഗത്പ്രഭുഃ ॥ ൧൮॥
- അഹമേവ ഗുണാതീതഃ അഹമേവ മനോമയഃ ।
- അഹം മയ്യോ മനോമേയഃ പ്രാണമേയഃ സദാമയഃ ॥ ൧൯॥
- സദൃങ്മയോ ബ്രഹ്മമയോഽമൃതമയഃ സഭൂതോമൃതമേവ ഹി ।
- അഹം സദാനന്ദധനോഽവ്യയഃ സദാ ।
- സ വേദമയ്യോ പ്രണവോഽഹമീശഃ ॥ ൨൦॥
- അപാണിപാദോ ജവനോ ഗൃഹീതാ
- അപശ്യഃ പശ്യാമ്യാത്മവത് സര്വമേവ ।
- യത്തദ്ഭൂതം യച്ച ഭവ്യോഽഹമാത്മാ
- സര്വാതീതോ വര്തമാനോഽഹമേവ ॥ ൨൨॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ജ്ഞാനോപായഭൂതശിവവ്രതനിരൂപണം നാമ ഷട്ചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com