ഋഭുഗീതാ ൨൫ ॥ ബ്രഹ്മണഃ സര്വ-രൂപത്വ നിരൂപണ പ്രകരണമ് ॥

ഋഭുഃ -

• വക്ഷ്യേ പ്രസിദ്ധമാത്മാനം സര്വലോകപ്രകാശകമ് ।
• സര്വാകാരം സദാ സിദ്ധം സര്വത്ര നിബിഡം മഹത് ॥ ൧॥
• തദ്ബ്രഹ്മാഹം ന സന്ദേഹ ഇതി നിശ്ചിത്യ തിഷ്ഠ ഭോഃ ।
• ചിദേവാഹം ചിദേവാഹം ചിത്രം ചേദഹമേവ ഹി ॥ ൨॥
• വാചാവധിശ്ച ദേവോഽഹം ചിദേവ മനസഃ പരഃ ।
• ചിദേവാഹം പരം ബ്രഹ്മ ചിദേവ സകലം പദമ് ॥ ൩॥
• സ്ഥൂലദേഹം ചിദേവേദം സൂക്ഷ്മദേഹം ചിദേവ ഹി ।
• ചിദേവ കരണം സോഽഹം കായമേവ ചിദേവ ഹി ॥ ൪॥
• അഖണ്ഡാകാരവൃത്തിശ്ച ഉത്തമാധമമധ്യമാഃ ।
• ദേഹഹീനശ്ചിദേവാഹം സൂക്ഷ്മദേഹശ്ചിദേവ ഹി ॥ ൫॥
• ചിദേവ കാരണം സോഽഹം ബുദ്ധിഹീനശ്ചിദേവ ഹി ।
• ഭാവഹീനശ്ചിദേവാഹം ദോഷഹീനശ്ചിദേവ ഹി ॥ ൬॥
• അസ്തിത്വം ബ്രഹ്മ നാസ്ത്യേവ നാസ്തി ബ്രഹ്മേതി നാസ്തി ഹി ।
• അസ്തി നാസ്തീതി നാസ്ത്യേവ അഹമേവ ചിദേവ ഹി ॥ ൭॥
• സര്വം നാസ്ത്യേവ നാസ്ത്യേവ സാകാരം നാസ്തി നാസ്തി ഹി ।
• യത്കിഞ്ചിദപി നാസ്ത്യേവ അഹമേവ ചിദേവ ഹി ॥ ൮॥
• അന്വയവ്യതിരേകം ച ആദിമധ്യാന്തദൂഷണമ് ।
• സര്വം ചിന്മാത്രരൂപത്വാദഹമേവ ചിദേവ ഹി ॥ ൯॥
• സര്വാപരം ച സദസത് കാര്യകാരണകര്തൃകമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൦॥
• അശുദ്ധം ശുദ്ധമദ്വൈതം ദ്വൈതമേകമനേകകമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൧॥
• അസത്യസത്യമദ്വന്ദ്വം ദ്വന്ദ്വം ച പരതഃ പരമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൨॥
• ഭൂതം ഭവിഷ്യം വര്തം ച മോഹാമോഹൌ സമാസമൌ ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൩॥
• ക്ഷണം ലവം ത്രുടിര്ബ്രഹ്മ ത്വംപദം തത്പദം തഥാ ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൪॥
• ത്വംപദം തത്പദം വാപി ഐക്യം ച ഹ്യഹമേവ ഹി ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൫॥
• ആനന്ദം പരമാനന്ദം സര്വാനന്ദം നിജം മഹത് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൬॥
• അഹം ബ്രഹ്മ ഇദം ബ്രഹ്മ കം ബ്രഹ്മ ഹ്യക്ഷരം പരമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൭॥
• വിഷ്ണുരേവ പരം ബ്രഹ്മ ശിവോ ബ്രഹ്മാഹമേവ ഹി ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൮॥
• ശ്രോത്രം ബ്രഹ്മ പരം ബ്രഹ്മ ശബ്ദം ബ്രഹ്മ പദം ശുഭമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൧൯॥
• സ്പര്ശോ ബ്രഹ്മ പദം ത്വക്ച ത്വക്ച ബ്രഹ്മ പരസ്പരമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൦॥
• പരം രൂപം ചക്ഷുഭിഃ ഏവ തത്രൈവ യോജ്യതാമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൧॥
• ബ്രഹ്മൈവ സര്വം സതതം സച്ചിദാനന്ദമാത്രകമ് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൨॥
• ചിന്മയാനന്ദമാത്രോഽഹം ഇദം വിശ്വമിദം സദാ ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൩॥
• ബ്രഹ്മൈവ സര്വം യത്കിഞ്ചിത് തദ്ബ്രഹ്മാഹം ന സംശയഃ ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൪॥
• വാചാ യത് പ്രോച്യതേ നാമ മനസാ മനുതേ തു യത് ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൫॥
• കാരണേ കല്പിതേ യദ്യത് തൂഷ്ണീം വാ സ്ഥീയതേ സദാ ।
• ശരീരേണ തു യദ് ഭുങ്ക്തേ ഇന്ദ്രിയൈര്യത്തു ഭാവ്യതേ ।
• സര്വം നാസ്ത്യേവ നാസ്ത്യേവ അഹമേവ ഹി കേവലമ് ॥ ൨൬॥
• വേദേ യത് കര്മ വേദോക്തം ശാസ്ത്രം ശാസ്ത്രോക്തനിര്ണയമ് ।
• ഗുരൂപദേശസിദ്ധാന്തം ശുദ്ധാശുദ്ധവിഭാസകമ് ॥ ൨൭॥
• കാമാദികലനം ബ്രഹ്മ ദേവാദി കലനം പൃഥക് ।
• ജീവയുക്തേതി കലനം വിദേഹോ മുക്തികല്പനമ് ॥ ൨൮॥
• ബ്രഹ്മ ഇത്യപി സങ്കല്പം ബ്രഹ്മവിദ്വരകല്പനമ് ।
• വരീയാനിതി സങ്കല്പം വരിഷ്ഠ ഇതി കല്പനമ് ॥ ൨൯॥
• ബ്രഹ്മാഹമിതി സങ്കല്പം ചിദഹം ചേതി കല്പനമ് ।
• മഹാവിദ്യേതി സങ്കല്പം മഹാമായേതി കല്പനമ് ॥ ൩൦॥
• മഹാശൂന്യേതി സങ്കല്പം മഹാചിന്തേതി കല്പനമ് ।
• മഹാലോകേതി സങ്കല്പം മഹാസത്യേതി കല്പനമ് ॥ ൩൧॥
• മഹാരൂപേതി സങ്കല്പം മഹാരൂപം ച കല്പനമ് ।
• സര്വസങ്കല്പകം ചിത്തം സര്വസങ്കല്പകം മനഃ ॥ ൩൨॥
• സര്വം നാസ്ത്യേവ നാസ്ത്യേവ സര്വം ബ്രഹ്മൈവ കേവലമ് ।
• സര്വം ദ്വൈതം മനോരൂപം സര്വം ദുഃഖം മനോമയമ് ॥ ൩൩॥
• ചിദേവാഹം ന സന്ദേഹഃ ചിദേവേദം ജഗത്ത്രയമ് ।
• യത്കിഞ്ചിദ്ഭാഷണം വാപി യത്കിഞ്ചിന്മനസോ ജപമ് ।
• യത്കിഞ്ചിന്മാനസം കര്മ സര്വം ബ്രഹ്മൈവ കേവലമ് ॥ ൩൪॥
• സര്വം നാസ്തീതി സന്മന്ത്രം ജീവബ്രഹ്മസ്വരൂപകമ് ।
• ബ്രഹ്മൈവ സര്വമിത്യേവം മന്ത്രഞ്ചൈവോത്തമോത്തമമ് ॥ ൩൫॥
• അനുക്തമന്ത്രം സന്മന്ത്രം വൃത്തിശൂന്യം പരം മഹത് ।
• സര്വം ബ്രഹ്മേതി സങ്കല്പം തദേവ പരമം പദമ് ॥ ൩൬॥
• സര്വം ബ്രഹ്മേതി സങ്കല്പം മഹാദേവേതി കീര്തനമ് ।
• സര്വം ബ്രഹ്മേതി സങ്കല്പം ശിവപൂജാസമം മഹത് ॥ ൩൭॥
• സര്വം ബ്രഹ്മേത്യനുഭവഃ സര്വാകാരോ ന സംശയഃ ।
• സര്വം ബ്രഹ്മേതി സങ്കല്പം സര്വത്യാഗമിതീരിതമ് ॥ ൩൮॥
• സര്വം ബ്രഹ്മേതി സങ്കല്പം ഭാവാഭാവവിനാശനമ് ।
• സര്വം ബ്രഹ്മേതി സങ്കല്പം മഹാദേവേതി നിശ്ചയഃ ॥ ൩൯॥
• സര്വം ബ്രഹ്മേതി സങ്കല്പം കാലസത്താവിനിര്മുക്തഃ ।
• സര്വം ബ്രഹ്മേതി സങ്കല്പഃ ദേഹസത്താ വിമുക്തികഃ ॥ ൪൦॥
• സര്വം ബ്രഹ്മേതി സങ്കല്പഃ സച്ചിദാനന്ദരൂപകഃ ।
• സര്വോഽഹം ബ്രഹ്മമാത്രൈവ സര്വം ബ്രഹ്മൈവ കേവലമ് ॥ ൪൧॥
• ഇദമിത്യേവ യത്കിഞ്ചിത് തദ്ബ്രഹ്മൈവ ന സംശയഃ ।
• ഭ്രാന്തിശ്ച നരകം ദുഃഖം സ്വര്ഗഭ്രാന്തിരിതീരിതാ ॥ ൪൨॥
• ബ്രഹ്മാ വിഷ്ണുരിതി ഭ്രാന്തിര്ഭ്രാന്തിശ്ച ശിവരൂപകമ് ।
• വിരാട് സ്വരാട് തഥാ സമ്രാട് സൂത്രാത്മാ ഭ്രാന്തിരേവ ച ॥ ൪൩॥
• ദേവാശ്ച ദേവകാര്യാണി സൂര്യാചന്ദ്രമസോര്ഗതിഃ ।
• മുനയോ മനവഃ സിദ്ധാ ഭ്രാന്തിരേവ ന സംശയഃ ॥ ൪൪॥
• സര്വദേവാസുരാ ഭ്രാന്തിസ്തേഷാം യുദ്ധാദി ജന്മ ച ।
• വിഷ്ണോര്ജന്മാവതാരാണി ചരിതം ശാന്തിരേവ ഹി ॥ ൪൫॥
• ബ്രഹ്മണഃ സൃഷ്ടികൃത്യാനി രുദ്രസ്യ ചരിതാനി ച ।
• സര്വഭ്രാന്തിസമായുക്തം ഭ്രാന്ത്യാ ലോകാശ്ചതുര്ദശ ॥ ൪൬॥
• വര്ണാശ്രമവിഭാഗശ്ച ഭ്രാന്തിരേവ ന സംശയഃ ।
• ബ്രഹ്മവിഷ്ണ്വീശരുദ്രാണാമുപാസാ ഭ്രാന്തിരേവ ച ॥ ൪൭॥
• തത്രാപി യന്ത്രമന്ത്രാഭ്യാം ഭ്രാന്തിരേവ ന സംശയഃ ।
• വാചാമഗോചരം ബ്രഹ്മ സര്വം ബ്രഹ്മമയം ച ഹി ॥ ൪൮॥
• സര്വം നാസ്ത്യേവ നാസ്ത്യേവ അഹമേവ ചിദേവ ഹി ।
• ഏവം വദ ത്വം തിഷ്ഠ ത്വം സദ്യോ മുക്തോ ഭവിഷ്യസി ॥ ൪൯॥
• ഏതാവദുക്തം യത്കിഞ്ചിത് തന്നാസ്ത്യേവ ന സംശയഃ ।
• ഏവം യദാന്തരം ക്ഷിപ്രം ബ്രഹ്മൈവ ദൃഢനിശ്ചയമ് ॥ ൫൦॥
• ദൃഢനിശ്ചയമേവാത്ര പ്രഥമം കാരണം ഭവേത് ।
• നിശ്ചയഃ ഖല്വയം പശ്ചാത് സ്വയമേവ ഭവിഷ്യതി ॥ ൫൧॥
• ആര്തം യച്ഛിവപാദതോഽന്യദിതരം തജ്ജാദിശബ്ദാത്മകം
• ചേതോവൃത്തിപരം പരാപ്രമുദിതം ഷഡ്ഭാവസിദ്ധം ജഗത് ।
• ഭൂതാക്ഷാദിമനോവചോഭിരനഘേ സാന്ദ്രേ മഹേശേ ഘനേ
• സിന്ധൌ സൈന്ധവഖണ്ഡവജ്ജഗദിദം ലീയേത വൃത്ത്യുജ്ഝിതമ് ॥ ൫൨॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മണസ്സര്വരൂപത്വനിരൂപണപ്രകരണം നാമ പഞ്ചവിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com