ഋഭുഗീതാ ൩൨ ॥ സര്വ-മിഥ്യാത്വ നിരൂപണ പ്രകരണമ് ॥

ഋഭുഃ -

• വക്ഷ്യേ പുനരസത്ത്യാഗം ബ്രഹ്മനിശ്ചയമേവ ച ।
• യസ്യ ശ്രവണമാത്രേണ സദ്യോ മുക്തോ ഭവേന്നരഃ ॥ ൧॥
• ചിത്തസത്താ മനഃസത്താ ബ്രഹ്മസത്താഽന്യഥാ സ്ഥിതാ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨॥
• ദേഹസത്താ ലിങ്ഗസത്താ ഭാവസത്താഽക്ഷരാ സ്ഥിതാ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൩॥
• ദൃശ്യം ച ദര്ശനം ദൃഷ്ടാ കര്താ കാരയിതാ ക്രിയാ ।var was ദ്രഷ്ടാ
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൪॥
• ഏകം ദ്വിത്വം പൃഥഗ്ഭാവം അസ്തി നാസ്തീതി നിര്ണയഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൫॥
• ശാസ്ത്രഭേദം വേദഭേദം മുക്തീനാം ഭേദഭാവനമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൬॥
• ജാതിഭേദം വര്ണഭേദം ശുദ്ധാശുദ്ധവിനിര്ണയഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൭॥
• അഖണ്ഡാകാരവൃത്തിശ്ച അഖണ്ഡൈകരസം പരമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൮॥
• പരാപരവികല്പശ്ച പുണ്യപാപവികല്പനമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൯॥
• കല്പനാകല്പനാദ്വൈതം മനോകല്പനഭാവനമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൦॥
• സിദ്ധം സാധ്യം സാധനം ച നാശനം ബ്രഹ്മഭാവനമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൧॥
• ആത്മജ്ഞാനം മനോധര്മം മനോഽഭാവേ കുതോ ഭവേത് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൨॥
• അജ്ഞാനം ച മനോധര്മസ്തദഭാവേ ച തത്കുതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൩॥
• ശമോ ദമോ മനോധര്മസ്തദഭാവേ ച തത്കുതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൪॥
• ബന്ധമോക്ഷൌ മനോധര്മൌ തദഭാവേ കുതോ ഭവേത് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൫॥
• സര്വം മിഥ്യാ ജഗന്മിഥ്യാ ദേഹോ മിഥ്യാ ജഡത്വതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൬॥
• ബ്രഹ്മലോകഃ സദാ മിഥ്യാ ബുദ്ധിരൂപം തദേവ ഹി ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൭॥
• വിഷ്ണുലോകഃ സദാ മിഥ്യാ ശിവമേവ ഹി സര്വദാ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൮॥
• രുദ്രലോകഃ സദാ മിഥ്യാ അഹംകാരസ്വരൂപതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൧൯॥
• ചന്ദ്രലോകഃ സദാ മിഥ്യാ മനോരൂപവികല്പനമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൦॥
• ദിശോ ലോകഃ സദാ മിഥ്യാ ശ്രോത്രശബ്ദസമന്വിതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൧॥
• സൂര്യലോകഃ സദാ മിഥ്യാ നേത്രരൂപസമന്വിതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൨॥
• വരുണസ്യ സദാ ലോകോ ജിഹ്വാരസസമന്വിതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൩॥
• ത്വചോ ലോകഃ സദാ മിഥ്യാ വായോഃ സ്പര്ശസമന്വിതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൪॥
• അശ്വിനോര്ഘ്രാണലോകശ്ച ഗന്ധദ്വൈതസമന്വിതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൫॥
• അഗ്നേര്ലോകഃ സദാ മിഥ്യാ വാഗേവ വചനേന തത് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൬॥
• ഇന്ദ്രലോകഃ സദാ മിഥ്യാ പാണിപാദേന സംയുതഃ ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൭॥
• ഉപേന്ദ്രസ്യ മഹര്ലോകോ ഗമനേന പദം യുതമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൮॥
• മൃത്യുരേവ സദാ നാസ്തി പായുരേവ വിസര്ഗകമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൨൯॥
• പ്രജാപതേര്മഹര്ലോകോ ഗുഹ്യമാനന്ദസംയുതമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൩൦॥
• സര്വം മിഥ്യാ ന സന്ദേഹഃ സര്വമാത്മേതി നിശ്ചിതമ് ।
• തിതിക്ഷോശ്ച സമാധാനം ശ്രദ്ധാ ചാചാര്യഭാഷണേ ॥ ൩൧॥
• മുമുക്ഷുത്വം ച മോക്ഷശ്ച മോക്ഷാര്ഥേ മമ ജീവനേ ।
• ചതുഃസാധനസംപന്നഃ സോഽധികാരീതി നിശ്ചയഃ ॥ ൩൨॥
• ജീവബ്രഹ്മൈക്യസദ്ഭാവം വിയദ്ബ്രഹ്മേതി നിശ്ചയഃ ।
• വേദാന്തബ്രഹ്മണോ ബോധ്യം ബോധകം ബന്ധമുച്യതേ ॥ ൩൩॥
• സര്വജ്ഞാനനിര്വൃത്തിശ്ചേദാനന്ദാവാപ്തികം ഫലമ് ।var was നിവൃത്തി
• ഇത്യേവമാദിഭിഃ ശബ്ദൈഃ പ്രോക്തം സര്വമസത് സദാ ॥ ൩൪॥
• സര്വശബ്ദാര്ഥരൂപം ച നിശ്ചയം ഭാവനം തഥാ ।
• ബ്രഹ്മമാത്രം പരം സത്യമന്യത് സര്വമസത് സദാ ॥ ൩൫॥
• അനേകശബ്ദശ്രവണമനേകാര്ഥവിചാരണമ് ।
• സര്വം മിഥ്യാ ന സന്ദേഹോ ബ്രഹ്മൈവാഹം ന സംശയഃ ॥ ൩൬॥
• നാനുധ്യായാദ്ബ്രഹ്മശബ്ദാന് ഇത്യുക്ത്വാ ഹ മഹാനസി ।
• ബ്രഹ്മോപദേശകാലേ തു സര്വം ചോക്തം ന സംശയഃ ॥ ൩൭॥
• ബ്രഹ്മൈവാഹമിദം ദ്വൈതം ചിത്തസത്താവിഭാവനമ് ।
• ചിന്മാത്രോഽഹമിദം ദ്വൈതം ജീവബ്രഹ്മേതി ഭാവനമ് ॥ ൩൮॥
• അഹം ചിന്മാത്രമന്ത്രം വാ കാര്യകാരണചിന്തനമ് ।
• അക്ഷയാനന്ദവിജ്ഞാനമഖണ്ഡൈകരസാദ്വയമ് ॥ ൩൯॥
• പരം ബ്രഹ്മ ഇദം ബ്രഹ്മ ശാന്തം ബ്രഹ്മ സ്വയം ജഗത് ।
• അന്തരിന്ദ്രിയവിജ്ഞാനം ബാഹ്യേന്ദ്രിയനിരോധനമ് ॥ ൪൦॥
• സര്വോപദേശകാലം ച സാമ്യം ശേഷം മഹോദയമ് ।
• ഭൂമിരാപോഽനലോ വായുഃ ഖം മനോ ബുദ്ധിരേവ ച ॥ ൪൧॥
• കാരണം കാര്യഭേദം ച ശാസ്ത്രമാര്ഗൈകകല്പനമ് ।
• അഹം ബ്രഹ്മ ഇദം ബ്രഹ്മ സര്വം ബ്രഹ്മേതി ശബ്ദതഃ ॥ ൪൨॥
• സത്യരൂപം ക്വചിന്നാസ്തി സത്യം നാമ കദാ നഹി ।
• സംശയം ച വിപര്യാസം സങ്കല്പഃ കാരണം ഭ്രമഃ ॥ ൪൩॥
• ആത്മനോഽന്യത് ക്വചിന്നാസ്തി സര്വം മിഥ്യാ ന സംശയഃ ।
• മഹതാം ഹ്യദ്യതേ മന്ത്രീ മേധാശുദ്ധിശുഭാശുഭമ് ॥ ൪൪॥
• ദേശഭേദം വസ്തുഭേദം ന ച ചൈതന്യഭേദകമ് ।
• ആത്മനോഽന്യത് പൃഥഗ്ഭാവമാത്മനോഽന്യന്നിരൂപണമ് ॥ ൪൫॥
• ആത്മനോഽന്യന്നാമരൂപമാത്മനോഽന്യച്ഛുഭാശുഭമ് ।
• ആത്മനോഽന്യദ്വസ്തുസത്താ ആത്മനോഽന്യജ്ജഗത്ത്രയമ് ॥ ൪൬॥
• ആത്മനോഽന്യത് സുഃഖം ദുഃഖമാത്മനോഽന്യദ്വിചിന്തനമ് ।
• ആത്മനോഽന്യത്പ്രപഞ്ചം വാ ആത്മനോഽന്യജ്ജയാജയൌ ॥ ൪൭॥
• ആത്മനോഽന്യദ്ദേവപൂജാ ആത്മനോഽന്യച്ഛിവാര്ചനമ് ।
• ആത്മനോഽന്യന്മഹാധ്യാനമാത്മനോഽന്യത് കലാക്രമമ് ॥ ൪൮॥
• സര്വം മിഥ്യാ ന സന്ദേഹോ ബ്രഹ്മ സര്വം ന സംശയഃ ।
• സര്വമുക്തം ഭഗവതാ നിദിധ്യാസസ്തു സര്വദാ ॥ ൪൯॥
• സകൃച്ഛ്രവണമാത്രേണ ഹൃദയഗ്രന്ഥിരന്തിമമ് ।
• കര്മനാശം ച മൂഢാനാം മഹതാം മുക്തിരേവ ഹി ॥ ൫൦॥
• അനേകകോടിജനനപാതകം ഭസ്മസാദ്ഭവേത് ।
• സത്യം സത്യം പുനഃ സത്യം സത്യം സര്വം വിനശ്യതി ।
• സദ്യോ മുക്തിര്ന സന്ദേഹോ നാസ്തി മങ്ഗലമങ്ഗലമ് ॥ ൫൧॥
• ക്വ ഭേദഭാവദര്ശനം ന ചൈവ ശോകമോഹഹൃത്
• പ്രപശ്യതാം ശ്രുതേ ശിഖാവിശേഷമൈക്യഭാവനാത് ।
• യതോ ഭവേജ്ജഗാദ തം മഹേശ യേന ജീവിതം
• യദന്തരാഽവിശത് സദാ യഥോര്ണനാഭതന്തുവത് ॥ ൫൨॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സര്വമിഥ്യാത്വനിരൂപണപ്രകരണം നാമ ദ്വാത്രിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com