ഋഭുഗീതാ ൪൫ ॥ നിദാധ-കൃത-ഗുരു-സ്തുതി വര്ണനമ് ॥
നിദാഘഃ -
- പുണ്യേ ശിവരഹസ്യേഽസ്മിന്നിതിഹാസേ ശിവോദിതേ ।
- ദേവ്യൈ ശിവേന കഥിതേ ദേവ്യാ സ്കന്ദായ മോദതഃ ॥ ൧॥
- തദേതസ്മിന് ഹി ഷഷ്ഠാംശേ ഷഡാസ്യകമലോദിതേ ।
- പാരമേശ്വരവിജ്ഞാനം ശ്രുതമേതന്മഹാഘഭിത് ॥ ൨॥
- മഹാമായാതമസ്തോമവിനിവാരണഭാസ്കരമ് ।
- അസ്യാധ്യായൈകകഥനാദ് വിജ്ഞാനം മഹദശ്നുതേ ॥ ൩॥
- ശ്ലോകസ്യ ശ്രവണേനാപി ജീവന്മുക്തോ ന സംശയഃ ।
- ഏതദ്ഗ്രന്ഥപ്രവക്താ ഹി ഷണ്മുഖഃ ശിവ ഏവ ഹി ॥ ൪॥
- ജൈഗീഷവ്യോ മഹായോഗീ സ ഏവ ശ്രവണേഽര്ഹതി ।
- ഭസ്മരുദ്രാക്ഷധൃങ് നിത്യം സദാ ഹ്യത്യാശ്രമീ മുനിഃ ॥ ൫॥
- ഏതദ്ഗ്രന്ഥപ്രവക്താ ഹി സ ഗുരുര്നാത്ര സംശയഃ ।
- ഏതദ്ഗ്രന്ഥപ്രവക്താ ഹി പരം ബ്രഹ്മ ന സംശയഃ ॥ ൬॥
- ഏതദ്ഗ്രന്ഥപ്രവക്താ ഹി ശിവ ഏവ ന ചാപരഃ ।
- ഏതദ്ഗ്രന്ഥപ്രവക്താ ഹി സാക്ഷാദ്ദേവീ ന സംശയഃ ॥ ൭॥
- ഏതദ്ഗ്രന്ഥപ്രവക്താ ഹി ഗണേശോ നാത്ര സംശയഃ ।
- ഏതദ്ഗ്രന്ഥപ്രവക്താ ഹി സ്കന്ദഃ സ്കന്ദിതതാരകഃ ॥ ൮॥
- ഏതദ്ഗ്രന്ഥപ്രവക്താ ഹി നന്ദികേശോ ന സംശയഃ ।
- ഏതദ്ഗ്രന്ഥപ്രവക്താ ഹി ദത്താത്രേയോ മുനിഃ സ്വയമ് ॥ ൯॥
- ഏതദ്ഗ്രന്ഥപ്രവക്താ ഹി ദക്ഷിണാമൂര്തിരേവ ഹി ।
- ഏതദ്ഗ്രന്ഥാര്ഥകഥനേ ഭാവനേ മുനയഃ സുരാഃ ॥ ൧൦॥
- ന ശക്താ മുനിശാര്ദൂല ത്വദൃതേഽഹം ശിവം ശപേ ।
- ഏതദ്ഗ്രന്ഥാര്ഥവക്താരം ഗുരും സര്വാത്മനാ യജേത് ॥ ൧൧॥
- ഏതദ്ഗ്രന്ഥപ്രവക്താ തു ശിവോ വിഘ്നേശ്വരഃ സ്വയമ് ।
- പിതാ ഹി ജന്മദോ ദാതാ ഗുരുര്ജന്മവിനാശകഃ ॥ ൧൨॥
- ഏതദ്ഗ്രന്ഥം സമഭ്യസ്യ ഗുരോര്വാക്യാദ്വിശേഷതഃ ।
- ന ദുഹ്യേത ഗുരും ശിഷ്യോ മനസാ കിഞ്ച കായതഃ ॥ ൧൩॥
- ഗുരുരേവ ശിവഃ സാക്ഷാത് ഗുരുരേവ ശിവഃ സ്വയമ് ।
- ശിവേ രുഷ്ടേ ഗുരുസ്ത്രാതാ ഗുരൌ രുഷ്ടേ ന കശ്ചന ॥ ൧൪॥
- ഏതദ്ഗ്രന്ഥപദാഭ്യാസേ ശ്രദ്ധാ വൈ കാരണം പരമ് ।
- അശ്രദ്ധധാനഃ പുരുഷോ നൈതല്ലേശമിഹാര്ഹതി ॥ ൧൫॥
- ശ്രദ്ധൈവ പരമം ശ്രേയോ ജീവബ്രഹ്മൈക്യകാരണമ് ।
- അസ്തി ബ്രഹ്മേതി ച ശ്രുത്വാ ഭാവയന് സന്ത ഏവ ഹി ॥ ൧൬॥
- ശിവപ്രസാദഹീനോ യോ നൈതദ്ഗ്രന്ഥാര്ഥവിദ്ഭവേത് ।
- ഭാവഗ്രാഹ്യോഽയമാത്മായം പര ഏകഃ ശിവോ ധ്രുവഃ ॥ ൧൭॥
- സര്വമന്യത് പരിത്യജ്യ ധ്യായീതേശാനമവ്യയമ് ।
- ശിവജ്ഞാനമിദം ശുദ്ധം ദ്വൈതാദ്വൈതവിനാശനമ് ॥ ൧൮॥
- അന്യേഷു ച പുരാണേഷു ഇതിഹാസേഷു ന ക്വചിത് ।
- ഏതാദൃശം ശിവജ്ഞാനം ശ്രുതിസാരമഹോദയമ് ॥ ൧൯॥
- ഉക്തം സാക്ഷാച്ഛിവേനൈതദ് യോഗസാംഖ്യവിവര്ജിതമ് ।
- ഭാവനാമാത്രസുലഭം ഭക്തിഗമ്യമനാമയമ് ॥ ൨൦॥
- മഹാനന്ദപ്രദം സാക്ഷാത് പ്രസാദേനൈവ ലഭ്യതേ ।
- തസ്യൈതേ കഥിതാ ഹ്യര്ഥാഃ പ്രകാശന്തേ മഹാത്മനഃ ॥ ൨൧॥
- ഏതദ്ഗ്രന്ഥം ഗുരോഃ ശ്രുത്വാ ന പൂജാം കുരുതേ യദി ।
- ശ്വാനയോനിശതം പ്രാപ്യ ചണ്ഡാലഃ കോടിജന്മസു ॥ ൨൨॥
- ഏതദ്ഗ്രന്ഥസ്യ മാഹാത്മ്യം ന യജന്തീശ്വരം ഹൃദാ ।
- സ സൂകരോ ഭവത്യേവ സഹസ്രപരിവത്സരാന് ॥ ൨൩॥
- ഏതദ്ഗ്രന്ഥാര്ഥവക്താരമഭ്യസൂയേത യോ ദ്വിജഃ ।
- അനേകബ്രഹ്മകല്പം ച വിഷ്ഠായാം ജായതേ ക്രിമിഃ ॥ ൨൪॥
- ഏതദ്ഗ്രന്ഥാര്ഥവിദ്ബ്രഹ്മാ സ ബ്രഹ്മ ഭവതി സ്വയമ് ।
- കിം പുനര്ബഹുനോക്തേന ജ്ഞാനമേതദ്വിമുക്തിദമ് ॥ ൨൫॥
- യസ്ത്വേതച്ഛൃണുയാച്ഛിവോദിമഹാവേദാന്താംബുധി (?)
- വീചിജാതപുണ്യം നാപേക്ഷത്യനിശം ന ചാബ്ദകല്പൈഃ ।
- ശബ്ദാനാം നിഖിലോ രസോ ഹി സ ശിവഃ കിം വാ തുഷാദ്രി
- പരിഖംഡനതോ ഭവേത് സ്യാത് തണ്ഡുലോഽപി സ മൃഷാ ഭവമോഹജാലമ് ॥ ൨൬॥
- തദ്വത് സര്വമശാസ്ത്രമിത്യേവ ഹി സത്യം
- ദ്വൈതോത്ഥം പരിഹായ വാക്യജാലമ് ।
- ഏവം ത്വം ത്വനിശം ഭജസ്വ നിത്യം
- ശാന്തോദ്യഖിലവാക് സമൂഹഭാവനാ ॥ ൨൭॥
- സത്യത്വാഭാവഭാവിതോഽനുരൂപശീലഃ ।
- സംപശ്യന് ജഗദിദമാസമഞ്ജസം സദാ ഹി ॥ ൨൮॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ നിദാഘകൃതഗുരുസ്തുതിവര്ണനം നാമ പഞ്ചചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com