ഋഭുഗീതാ ൪൮ ॥ സ്കന്ദ-കൃത ശിവവ്രതോപദേശ വര്ണനമ് ॥
സ്കന്ദഃ -
- ജ്ഞാനാങ്ഗസാധനം വക്ഷ്യേ ശൃണു വക്ഷ്യാമി തേ ഹിതമ് ।
- യത് കൃത്വാ ജ്ഞാനമാപ്നോതി തത് പ്രാദാത് പരമേഷ്ഠിനഃ ॥ ൧॥
- ജൈഗീഷവ്യ ശൃണുഷ്വൈതത് സാവധാനേന ചേതസാ ।
- പ്രഥമം വേദസംപ്രോക്തം കര്മാചരണമിഷ്യതേ ॥ ൨॥
- ഉപനീതോ ദ്വിജോ വാപി വൈശ്യഃ ക്ഷത്രിയ ഏവ വാ ।
- അഗ്നിരിത്യാദിഭിര്മന്ത്രൈര്ഭസ്മധൃക് പൂയതേ ത്വഘൈഃ ॥ ൩॥
- ത്രിയായുഷൈസ്ത്ര്യമ്ബകൈശ്ച ത്രിപുണ്ഡ്രം ഭസ്മനാഽഽചരേത് ।
- ലിങ്ഗാര്ചനപരോ നിത്യം രുദ്രാക്ഷാന് ധാരയന് ക്രമൈഃ ॥ ൪॥
- കണ്ഠേ ബാഹ്വോര്വക്ഷസീ ച മാലാഭിഃ ശിരസാ തഥാ ।
- ത്രിപുണ്ഡ്രവദ്ധാരയേത രുദ്രാക്ഷാന് ക്രമശോ മുനേ ॥ ൫॥
- ഏകാനനം ദ്വിവക്ത്രം വാ ത്രിവക്ത്രം ചതുരാസ്യകമ് ।
- പഞ്ചവക്ത്രം ച ഷട് സപ്ത തഥാഷ്ടദശകം നവ ॥ ൬॥
- ഏകാദശം ദ്വാദശം വാ തഥോര്ധ്വം ധാരയേത് ക്രമാത് ।
- ഭസ്മധാരണമാത്രേണ പ്രസീദതി മഹേശ്വരഃ ॥ ൭॥
- രുദ്രാക്ഷധാരണാദേവ നരോ രുദ്രത്വമാപ്നുയാത് ।
- ഭസ്മരുദ്രാക്ഷധൃങ്മര്ത്യോ ജ്ഞാനാങ്ഗീ ഭവതി പ്രിയഃ ॥ ൮॥
- രുദ്രാധ്യായീ ഭസ്മനിഷ്ഠഃ പഞ്ചാക്ഷരജപാധരഃ ।
- ഭസ്മോദ്ധൂലിതദേഹോഽയം ശ്രീരുദ്രം പ്രജപന് ദ്വിജഃ ॥ ൯॥
- സര്വപാപൈര്വിമുക്തശ്ച ജ്ഞാനനിഷ്ഠോ ഭവേന്മുനേ ।
- ഭസ്മസംഛന്നസര്വാങ്ഗോ ഭസ്മഫാലത്രിപുണ്ഡ്രകഃ ॥ ൧൦॥
- വേദമൌലിജവാക്യേഷു വിചാരാധികൃതോ ഭവേത് ।
- നാന്യപുണ്ഡ്രധരോ വിപ്രോ യതിര്വാ വിപ്രസത്തമ ॥ ൧൧॥
- ശമാദിനിയമോപേതഃ ക്ഷമായുക്തോഽപ്യസംസ്കൃതഃ ।
- ശിരോവ്രതമിദം പ്രോക്തം ഭസ്മധാരണമേവ ഹി ॥ ൧൨॥
- ശിരോവ്രതം ച വിധിവദ്യൈശ്ചീര്ണം മുനിസത്തമ ।
- തേഷാമേവ ബ്രഹ്മവിദ്യാം വദേത ഗുരുരാസ്തികഃ ॥ ൧൩॥
- ശാംഭവാ ഏവ വേദേഷു നിഷ്ഠാ നഷ്ടാശുഭാഃ പരമ് ।
- ശിവപ്രസാദസംപന്നോ ഭസ്മരുദ്രാക്ഷധാരകഃ ॥ ൧൪॥
- രുദ്രാധ്യായജപാസക്തഃ പഞ്ചാക്ഷരപരായണഃ ।
- സ ഏവ വേദവേദാന്തശ്രവണേഽധികൃതോ ഭവേത് ॥ ൧൫॥
- നാന്യപുണ്ഡ്രധരോ വിപ്രഃ കൃത്വാപി ശ്രവണം ബഹു ।
- നൈവ ലഭ്യേത തദ്ജ്ഞാനം പ്രസാദേന വിനേശിതുഃ ॥ ൧൬॥
- പ്രസാദജനകം ശമ്ഭോര്ഭസ്മധാരണമേവ ഹി ।
- ശിവപ്രസാദഹീനാനാം ജ്ഞാനം നൈവോപജായതേ ॥ ൧൭॥
- പ്രസാദേ സതി ദേവസ്യ വിജ്ഞാനസ്ഫുരണം ഭവേത് ।
- രുദ്രാധ്യായജാപിനാം തു ഭസ്മധാരണപൂര്വകമ് ॥ ൧൮॥
- പ്രസാദോ ജായതേ ശമ്ഭോഃ പുനരാവൃത്തിവര്ജിതഃ ।
- പ്രസാദേ സതി ദേവസ്യ വേദാന്തസ്ഫുരണം ഭവേത് ॥ ൧൯॥
- തസ്യൈവാകഥിതാ ഹ്യര്ഥാഃ പ്രകാശന്തേ മഹാത്മനഃ ।
- പഞ്ചാക്ഷരജപാദേവ പഞ്ചാസ്യധ്യാനപൂര്വകമ് ॥ ൨൦॥
- തസ്യൈവ ഭവതി ജ്ഞാനം ശിവപ്രോക്തമിദം ധ്രുവമ് ।
- സര്വം ശിവാത്മകം ഭാതി ജഗദേതത് ചരാചരമ് ॥ ൨൧॥
- സ പ്രസാദോ മഹേശസ്യ വിജ്ഞേയഃ ശാംഭവോത്തമൈഃ ।
- ശിവലിങ്ഗാര്ചനാദേവ പ്രസാദഃ ശാംഭവോത്തമേ ॥ ൨൨॥
- നിയമാദ്ബില്വപത്രൈശ്ച ഭസ്മധാരണപൂര്വകമ് ।
- പ്രസാദോ ജായതേ ശമ്ഭോഃ സാക്ഷാദ്ജ്ഞാനപ്രകാശകഃ ॥ ൨൩॥
- ശിവക്ഷേത്രനിവാസേന ജ്ഞാനം സമ്യക് ദൃഢം ഭവേത് ।
- ശിവക്ഷേത്രനിവാസേ തു ഭസ്മധാര്യധികാരവാന് ॥ ൨൪॥
- നക്താശനാര്ചനാദേവ പ്രീയേത ഭഗവാന് ഭവഃ ।
- പ്രദോഷപൂജനം ശംഭോഃ പ്രസാദജനകം പരമ് ॥ ൨൫॥
- സോമവാരേ നിശീഥേഷു പൂജനം പ്രിയമീശിതുഃ ।
- ഭൂതായാം ഭൂതനാഥസ്യ പൂജനം പരമം പ്രിയമ് ॥ ൨൬॥
- ശിവശബ്ദോച്ചാരണം ച പ്രസാദജനകം മഹത് ।
- ജ്ഞാനാങ്ഗസാധനേഷ്വേവം ശിവഭക്താര്ചനം മഹത് ॥ ൨൭॥
- ഭക്താനാമര്ചനാദേവ ശിവഃ പ്രീതോ ഭവിഷ്യതി ।
- ഇത്യേതത്തം സമാസേന ജ്ഞാനാങ്ഗം കഥിതം മയാ ।
- അകൈതവേന ഭാവേന ശ്രവണീയോ മഹേശ്വരഃ ॥ ൨൮॥
സൂതഃ -
- യഃ കോഽപി പ്രസഭം പ്രദോഷസമയേ ബില്വീദലാലങ്കൃതം
- ലിങ്ഗം തുങ്ഗമപാരപുണ്യവിഭവൈഃ പശ്യേദഥാര്ചേത വാ ।
- പ്രാപ്തം രാജ്യമവാപ്യ കാമഹൃദയസ്തുഷ്യേദകാമോ യദി
- മുക്തിദ്വാരമപാവൃതം സ തു ലഭേത് ശമ്ഭോഃ കടാക്ഷാങ്കുരൈഃ ॥ ൨൯॥
- അചലാതുലരാജകന്യകാകുചലീലാമലബാഹുജാലമീശമ് ।
- ഭജതാമനലാക്ഷിപാദപദ്മം ഭവലീലം ന ഭവേത ചിത്തബാലമ് ॥ ൩൦॥
- ഭസ്മത്രിപുണ്ഡ്രരചിതാങ്ഗകബാഹുഫാല-
- രുദ്രാക്ഷജാലകവചാഃ ശ്രുതിസൂക്തിമാലാഃ ।
- വേദോരുരത്നപദകാങ്കിതശമ്ഭുനാമ-
- ലോലാ ഹി ശാംഭവവരാഃ പരിശീലയന്തി ॥ ൩൧॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സ്കന്ദകൃതശിവവ്രതോപദേശവര്ണനം നാമ അഷ്ടചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com