ഋഭുഗീതാ ൪൪ ॥ നിദാധാനുഭവ വര്ണന പ്രകരണമ് ॥
നിദാഘഃ -
- ശൃണുശ്വ സദ്ഗുരോ ബ്രഹ്മന് ത്വത്പ്രസാദാന്വിനിശ്ചിതമ് ।
- അഹമേവ ഹി തദ്ബ്രഹ്മ അഹമേവ ഹി കേവലമ് ॥ ൧॥
- അഹമേവ ഹി നിത്യാത്മാ അഹമേവ സദാഽജരഃ ।
- അഹമേവ ഹി ശാന്താത്മാ അഹമേവ ഹി നിഷ്കലഃ ॥ ൨॥
- അഹമേവ ഹി നിശ്ചിന്തഃ അഹമേവ സുഖാത്മകഃ ।
- അഹമേവ ഗുരുസ്ത്വം ഹി അഹം ശിഷ്യോഽസ്മി കേവലമ് ॥ ൩॥
- അഹമാനന്ദ ഏവാത്മാ അഹമേവ നിരഞ്ജനഃ ।
- അഹം തുര്യാതിഗോ ഹ്യാത്മാ അഹമേവ ഗുണോജ്ഝിതഃ ॥ ൪॥
- അഹം വിദേഹ ഏവാത്മാ അഹമേവ ഹി ശങ്കരഃ ।
- അഹം വൈ പരിപൂര്ണാത്മാ അഹമേവേശ്വരഃ പരഃ ॥ ൫॥
- അഹമേവ ഹി ലക്ഷ്യാത്മാ അഹമേവ മനോമയഃ ।
- അഹമേവ ഹി സര്വാത്മാ അഹമേവ സദാശിവഃ ॥ ൬॥
- അഹം വിഷ്ണുരഹം ബ്രഹ്മാ അഹമിന്ദ്രസ്ത്വഹം സുരാഃ ।
- അഹം വൈ യക്ഷരക്ഷാംസി പിശാചാ ഗുഹ്യകാസ്തഥാ ॥ ൭॥
- അഹം സമുദ്രാഃ സരിത അഹമേവ ഹി പര്വതാഃ ।
- അഹം വനാനി ഭുവനം അഹമേവേദമേവ ഹി ॥ ൮॥
- നിത്യതൃപ്തോ ഹ്യഹം ശുദ്ധബുദ്ധോഽഹം പ്രകൃതേഃ പരഃ ।
- അഹമേവ ഹി സര്വത്ര അഹമേവ ഹി സര്വഗഃ ॥ ൯॥
- അഹമേവ മഹാനാത്മാ സര്വമങ്ഗലവിഗ്രഹഃ ।
- അഹമേവ ഹി മുക്തോഽസ്മി ശുദ്ധോഽസ്മി പരമഃ ശിവഃ ॥ ൧൦॥
- അഹം ഭൂമിരഹം വായുരഹം തേജോ ഹ്യഹം നഭഃ ।
- അഹം ജലമഹം സൂര്യശ്ചന്ദ്രമാ ഭഗണാ ഹ്യഹമ് ॥ ൧൧॥
- അഹം ലോകാ അലോകാശ്ച അഹം ലോക്യാ അഹം സദാ ।
- അഹമാത്മാ പാരദൃശ്യ അഹം പ്രജ്ഞാനവിഗ്രഹഃ ॥ ൧൨॥
- അഹം ശൂന്യോ അശൂന്യോഽഹം സര്വാനന്ദമയോഽസ്മ്യഹമ് ।
- ശുഭാശുഭഫലാതീതോ ഹ്യഹമേവ ഹി കേവലമ് ॥ ൧൩॥
- അഹമേവ ഋതം സത്യമഹം സച്ചിത്സുഖാത്മകഃ ।
- അഹമാനന്ദ ഏവാത്മാ ബഹുധാ ചൈകധാ സ്ഥിതഃ ॥ ൧൪॥
- അഹം ഭൂതഭവിഷ്യം ച വര്തമാനമഹം സദാ ।
- അഹമേകോ ദ്വിധാഹം ച ബഹുധാ ചാഹമേവ ഹി ॥ ൧൫॥
- അഹമേവ പരം ബ്രഹ്മ അഹമേവ പ്രജാപതിഃ ।
- സ്വരാട് സമ്രാഡ് ജഗദ്യോനിരഹമേവ ഹി സര്വദാ ॥ ൧൬॥
- അഹം വിശ്വസ്തൈജസശ്ച പ്രാജ്ഞോഽഹം തുര്യ ഏവ ഹി ।
- അഹം പ്രാണോ മനശ്ചാഹമഹമിദ്രിയവര്ഗകഃ ॥ ൧൭॥
- അഹം വിശ്വം ഹി ഭുവനം ഗഗനാത്മാഹമേവ ഹി ।
- അനുപാധി ഉപാധ്യം യത്തത്സര്വമഹമേവ ഹി ॥ ൧൮॥
- ഉപാധിരഹിതശ്ചാഹം നിത്യാനന്ദോഽഹമേവ ഹി ।
- ഏവം നിശ്ചയവാനന്തഃ സര്വദാ സുഖമശ്നുതേ ।
- ഏവം യഃ ശൃണുയാന്നിത്യം സര്വപാപൈഃ പ്രമുച്യതേ ॥ ൧൯॥
- നിത്യോഽഹം നിര്വികല്പോ ജനവനഭുവനേ പാവനോഽഹം മനീഷീ
- വിശ്വോ വിശ്വാതിഗോഽഹം പ്രകൃതിവിനികൃതോ ഏകധാ സംസ്ഥിതോഽഹമ് ।
- നാനാകാരവിനാശജന്മരഹിതസ്വജ്ഞാനകാര്യോജ്ഝിതൈഃ
- ഭൂമാനന്ദഘനോഽസ്മ്യഹം പരശിവഃ സത്യസ്വരൂപോഽസ്മ്യഹമ് ॥ ൨൦॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ നിദാഘാനുഭവവര്ണനം നാമ ചതുശ്ചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com