ഋഭുഗീതാ ൩൪ ॥ ദൃഷ്ടാന്തൈര്-ബ്രഹ്മ-സാധന പ്രകരണമ് ॥
ഋഭുഃ -
- ശൃണുഷ്വ ബ്രഹ്മ വിജ്ഞാനമദ്ഭുതം ത്വതിദുര്ലഭമ് ।
- ഏകൈകശ്രവണേനൈവ കൈവല്യം പരമശ്നുതേ ॥ ൧॥
- സത്യം സത്യം ജഗന്നാസ്തി സംകല്പകലനാദികമ് ।
- നിത്യാനന്ദമയം ബ്രഹ്മവിജ്ഞാനം സര്വദാ സ്വയമ് ॥ ൨॥
- ആനന്ദമവ്യയം ശാന്തമേകരൂപമനാമയമ് ।
- ചിത്തപ്രപഞ്ചം നൈവാസ്തി നാസ്തി കാര്യം ച തത്ത്വതഃ ॥ ൩॥
- പ്രപഞ്ചഭാവനാ നാസ്തി ദൃശ്യരൂപം ന കിഞ്ചന ।
- അസത്യരൂപം സങ്കല്പം തത്കാര്യം ച ജഗന്ന ഹി ॥ ൪॥
- സര്വമിത്യേവ നാസ്ത്യേവ കാലമിത്യേവമീശ്വരഃ ।
- വന്ധ്യാകുമാരേ ഭീതിശ്ച തദധീനമിദം ജഗത് ॥ ൫॥
- ഗന്ധര്വനഗരേ ശൃങ്ഗേ മദഗ്രേ ദൃശ്യതേ ജഗത് ।
- മൃഗതൃഷ്ണാജലം പീത്വാ തൃപ്തിശ്ചേദസ്ത്വിദം ജഗത് ॥ ൬॥
- നഗേ ശൃങ്ഗേ ന ബാണേന നഷ്ടം പുരുഷമസ്ത്വിദമ് ।
- ഗന്ധര്വനഗരേ സത്യേ ജഗദ്ഭവതു സര്വദാ ॥ ൭॥
- ഗഗനേ നീലമാസിന്ധൌ ജഗത് സത്യം ഭവിഷ്യതി ।
- ശുക്തികാരജതം സത്യം ഭൂഷണം ചിജ്ജഗദ്ഭവേത് ॥ ൮॥
- രജ്ജുസര്പേണ നഷ്ടശ്ചേത് നരോ ഭവതി സംസൃതിഃ ।
- ജാതിരൂപേണ ബാണേന ജ്വാലാഗ്നൌ നാശിതേ സതി ॥ ൯॥
- രംഭാസ്തമ്ഭേന കാഷ്ഠേന പാകസിദ്ധിര്ജഗദ്ഭവേത് ।
- നിത്യാനന്ദമയം ബ്രഹ്മ കേവലം സര്വദാ സ്വയമ് ॥ ൧൦॥
- സദ്യഃ കുമാരികാരൂപൈഃ പാകേ സിദ്ധേ ജഗദ്ഭവേത് ।
- നിത്യാനന്ദമയം ബ്രഹ്മ കേവലം സര്വദാ സ്വയമ് ॥ ൧൧॥
- മിത്യാടവ്യാം വായസാന്നം അസ്തി ചേജ്ജഗദുദ്ഭവമ് ।
- മൂലാരോപണമന്ത്രസ്യ പ്രീതിശ്ചേദ്ഭാഷണം ജഗത് ॥ ൧൨॥
- മാസാത് പൂര്വം മൃതോ മര്ത്യ ആഗതശ്ചേജ്ജഗദ് ഭവേത് ।
- തക്രം ക്ഷീരസ്വരൂപം ചേത് കിഞ്ചിത് കിഞ്ചിജ്ജഗദ്ഭവേത് ॥ ൧൩॥
- ഗോസ്തനാദുദ്ഭവം ക്ഷീരം പുനരാരോഹണം ജഗത് ।
- ഭൂരജസ്യാഅബ്ദമുത്പന്നം ജഗദ്ഭവതു സര്വദാ ॥ ൧൪॥
- കൂര്മരോമ്ണാ ഗജേ ബദ്ധേ ജഗദസ്തു മദോത്കടേ ।
- മൃണാലതന്തുനാ മേരുശ്ചലിതശ്ചേജ്ജഗദ് ഭവേത് ॥ ൧൫॥
- തരങ്ഗമാലയാ സിന്ധുഃ ബദ്ധശ്ചേദസ്ത്വിദം ജഗത് ।
- ജ്വാലാഗ്നിമണ്ഡലേ പദ്മം വൃദ്ധം ചേത് തജ്ജഗദ്ഭവേത് ॥ ൧൬॥
- മഹച്ഛൈലേന്ദ്രനിലയം സംഭവശ്ചേദിദം ഭവേത് ।
- നിത്യാനന്ദമയം ബ്രഹ്മ കേവലം സര്വദാ സ്വയമ് ॥ ൧൭॥
- മീന ആഗത്യ പദ്മാക്ഷേ സ്ഥിതശ്ചേദസ്ത്വിദം ജഗത് ।
- നിഗീര്ണശ്ചേദ്ഭങ്ഗസൂനുഃ മേരുപുച്ഛവദസ്ത്വിദമ് ॥ ൧൮॥
- മശകേനാശിതേ സിംഹേ ഹതേ ഭവതു കല്പനമ് ।
- അണുകോടരവിസ്തീര്ണേ ത്രൈലോക്യേ ചേജ്ജഗദ്ഭവേത് ॥ ൧൯॥
- സ്വപ്നേ തിഷ്ഠതി യദ്വസ്തു ജാഗരേ ചേജ്ജഗദ്ഭവേത് ।
- നദീവേഗോ നിശ്ചലശ്ചേത് ജഗദ്ഭവതു സര്വദാ ॥ ൨൦॥
- ജാത്യന്ധൈ രത്നവിഷയഃ സുജ്ഞാതശ്ചേജ്ജഗദ്ഭവേത് ।
- ചന്ദ്രസൂര്യാദികം ത്യക്ത്വാ രാഹുശ്ചേത് ദൃശ്യതേ ജഗത് ॥ ൨൧॥
- ഭ്രഷ്ടബീജേന ഉത്പന്നേ വൃദ്ധിശ്ചേച്ചിത്തസംഭവഃ ।
- മഹാദരിദ്രൈരാഢ്യാനാം സുഖേ ജ്ഞാതേ ജഗദ്ഭവേത് ॥ ൨൨॥
- ദുഗ്ധം ദുഗ്ധഗതക്ഷീരം പുനരാരോഹണം പുനഃ ।
- കേവലം ദര്പണേ നാസ്തി പ്രതിബിമ്ബം തദാ ജഗത് ॥ ൨൩॥
- യഥാ ശൂന്യഗതം വ്യോമ പ്രതിബിമ്ബേന വൈ ജഗത് ।
- അജകുക്ഷൌ ഗജോ നാസ്തി ആത്മകുക്ഷൌ ജഗന്ന ഹി ॥ ൨൪॥
- യഥാ താന്ത്രേ സമുത്പന്നേ തഥാ ബ്രഹ്മമയം ജഗത് ।
- കാര്പാസകേഽഗ്നിദഗ്ധേന ഭസ്മ നാസ്തി തഥാ ജഗത് ॥ ൨൫॥
- പരം ബ്രഹ്മ പരം ജ്യോതിഃ പരസ്താത് പരതഃ പരഃ ।
- സര്വദാ ഭേദകലനം ദ്വൈതാദ്വൈതം ന വിദ്യതേ ॥ ൨൬॥
- ചിത്തവൃത്തിര്ജഗദ്ദുഃഖം അസ്തി ചേത് കില നാശനമ് ।
- മനഃസംകല്പകം ബന്ധ അസ്തി ചേദ്ബ്രഹ്മഭാവനാ ॥ ൨൭॥
- അവിദ്യാ കാര്യദേഹാദി അസ്തി ചേദ്ദ്വൈതഭാവനമ് ।
- ചിത്തമേവ മഹാരോഗോ വ്യാപ്തശ്ചേദ്ബ്രഹ്മഭേഷജമ് ॥ ൨൮॥
- അഹം ശത്രുര്യദി ഭവേദഹം ബ്രഹ്മൈവ ഭാവനമ് ।
- ദേഹോഽഹമിതി ദുഖം ചേദ്ബ്രഹ്മാഹമിതി നിശ്ചിനു ॥ ൨൯॥
- സംശയശ്ച പിശാചശ്ചേദ്ബ്രഹ്മമാത്രേണ നാശയ ।
- ദ്വൈതഭൂതാവിഷ്ടരേണ അദ്വൈതം ഭസ്മ ആശ്രയ ॥ ൩൦॥
- അനാത്മത്വപിശാചശ്ചേദാത്മമന്ത്രേണ ബന്ധയ ।
- നിത്യാനന്ദമയം ബ്രഹ്മ കേവലം സര്വദാ സ്വയമ് ॥ ൩൧॥
- ചതുഃഷഷ്ടികദൃഷ്ടാന്തൈരേവം ബ്രഹ്മൈവ സാധിതമ് ।
- യഃ ശൃണോതി നരോ നിത്യം സ മുക്തോ നാത്ര സംശയഃ ॥ ൩൨॥
- കൃതാര്ഥ ഏവ സതതം നാത്ര കാര്യാ വിചാരണാ ॥ ൩൩॥
- മനോവചോവിദൂരഗം ത്വരൂപഗന്ധവര്ജിതം
- ഹൃദര്ഭകോകസന്തതം വിജാനതാം മുദേ സദാ ।
- സദാപ്രകാശദുജ്വലപ്രഭാവികാസസദ്യുതി
- പ്രകാശദം മഹേശ്വര ത്വദീയപാദപങ്കജമ് ॥ ൩൪॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ദൃഷ്ടാന്തൈര്ബ്രഹ്മസാധനപ്രകരണം നാമ ചതുസ്ത്രിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com