Ribhu Gita - Siva Rahasya Purana Amsha 6

ഋഭുഗീതാ ൩൭ ॥ സര്വ-സിദ്ധാന്ത പ്രകരണമ് ॥

ഋഭുഃ -

നിദാഘ ശൃണു വക്ഷ്യാമി രഹസ്യം പരമദ്ഭുതമ് ।
ശ്ലോകൈകശ്രവണേനൈവ സദ്യോ മോക്ഷമവാപ്നുയാത് ॥ ൧॥
ഇദം ദൃഷ്ടം പരം ബ്രഹ്മ ദൃശ്യവദ്ഭാതി ചിത്തതഃ ।
സര്വം ചൈതന്യമാത്രത്വാത് നാന്യത് കിഞ്ചിന്ന വിദ്യതേ ॥ ൨॥
ഇദമേവ ഹി നാസ്ത്യേവ അയമിത്യപി നാസ്തി ഹി ।
ഏക ഏവാപ്യണുര്വാപി നാസ്തി നാസ്തി ന സംശയഃ ॥ ൩॥
വ്യവഹാരമിദം ക്വാപി വാര്താമാത്രമപി ക്വ വാ ।
ബന്ധരൂപം ബന്ധവാര്താ ബന്ധകാര്യം പരം ച വാ ॥ ൪॥
സന്മാത്രകാര്യം സന്മാത്രമഹം ബ്രഹ്മേതി നിശ്ചയമ് ।
ദുഃഖം സുഖം വാ ബോധോ വാ സാധകം സാധ്യനിര്ണയഃ ॥ ൫॥
ആത്മേതി പരമാത്മേതി ജീവാത്മേതി പൃഥങ് ന ഹി ।
ദേഹോഽഹമിതി മൂര്തോഽഹം ജ്ഞാനവിജ്ഞാനവാനഹമ് ॥ ൬॥
കാര്യകാരണരൂപോഽഹമന്തഃകരണകാര്യകമ് ।
ഏകമിത്യേകമാത്രം വാ നാസ്തി നാസ്തീതി ഭാവയ ॥ ൭॥
സര്വസങ്കല്പമാത്രേതി സര്വം ബ്രഹ്മേതി വാ ജഗത് ।
തത്ത്വജ്ഞാനം പരം ബ്രഹ്മ ഓങ്കാരാര്ഥം സുഖം ജപമ് ॥ ൮॥
ദ്വൈതാദ്വൈതം സദാദ്വൈതം തഥാ മാനാവമാനകമ് ।
സര്വം ചൈതന്യമാത്രത്വാത് നാന്യത് കിഞ്ചിന്ന വിദ്യതേ ॥ ൯॥
ആത്മാനന്ദമഹം ബ്രഹ്മ പ്രജ്ഞാനം ബ്രഹ്മ ഏവ ഹി ।
ഇദം രൂപമഹം രൂപം പ്രിയാപ്രിയവിചാരണമ് ॥ ൧൦॥
യദ്യത് സംഭാവ്യതേ ലോകേ യദ്യത് സാധനകല്പനമ് ।
യദ്യന്തരഹിതം ബ്രഹ്മഭാവനം ചിത്തനിര്മിതമ് ॥ ൧൧॥
സ്ഥൂലദേഹോഽഹമേവാത്ര സൂക്ഷ്മദേഹോഽഹമേവ ഹി ।
ബുദ്ധേര്ഭേദം മനോഭേദം അഹംകാരം ജഡം ച തത് ॥ ൧൨॥
സര്വം ചൈതന്യമാത്രത്വാത് നാന്യത് കിഞ്ചിന്ന വിദ്യതേ ।
ശ്രവണം മനനം ചൈവ സാക്ഷാത്കാരവിചാരണമ് ॥ ൧൩॥
ആത്മൈവാഹം പരം ചൈവ നാഹം മോഹമയം സ്വയമ് ।
ബ്രഹ്മൈവ സര്വമേവേദം ബ്രഹ്മൈവ പരമം പദമ് ॥ ൧൪॥
ബ്രഹ്മൈവ കാരണം കാര്യം ബ്രഹ്മൈവ ജഗതാം ജയഃ ।
ബ്രഹ്മൈവ സര്വം ചൈതന്യം ബ്രഹ്മൈവ മനസായതേ ॥ ൧൫॥
ബ്രഹ്മൈവ ജീവവദ്ഭാതി ബ്രഹ്മൈവ ച ഹരീയതേ ।
ബ്രഹ്മൈവ ശിവവദ്ഭാതി ബ്രഹ്മൈവ പ്രിയമാത്മനഃ ॥ ൧൬॥
ബ്രഹ്മൈവ ശാന്തിവദ്ഭാതി ബ്രഹ്മണോഽന്യന്ന കിഞ്ചന ।
നാഹം ന ചായം നൈവാന്യന്നോത്പന്നം ന പരാത് പരമ് ॥ ൧൭॥
ന ചേദം ന ച ശാസ്ത്രാര്ഥം ന മീമാംസം ന ചോദ്ഭവമ് ।
ന ലക്ഷണം ന വേദാദി നാപി ചിത്തം ന മേ മനഃ ॥ ൧൮॥
ന മേ നായം നേദമിദം ന ബുദ്ധിനിശ്ചയം സദാ ।
കദാചിദപി നാസ്ത്യേവ സത്യം സത്യം ന കിഞ്ചന ॥ ൧൯॥
നൈകമാത്രം ന ചായം വാ നാന്തരം ന ബഹിര്ന ഹി ।
ഈഷണ്മാത്രം ച ന ദ്വൈതം ന ജന്യം ന ച ദൃശ്യകമ് ॥ ൨൦॥
ന ഭാവനം ന സ്മരണം ന വിസ്മരണമണ്വപി ।
ന കാലദേശകലനം ന സങ്കല്പം ന വേദനമ് ॥ ൨൧॥
ന വിജ്ഞാനം ന ദേഹാന്യം ന വേദോഽഹം ന സംസൃതിഃ ।
ന മേ ദുഃഖം ന മേ മോക്ഷം ന ഗതിര്ന ച ദുര്ഗതിഃ ॥ ൨൨॥
നാത്മാ നാഹം ന ജീവോഽഹം ന കൂടസ്ഥോ ന ജായതേ ।
ന ദേഹോഽഹം ന ച ശ്രോത്രം ന ത്വഗിന്ദ്രിയദേവതാ ॥ ൨൩॥
സര്വം ചൈതന്യമാത്രത്വാത് സര്വം നാസ്ത്യേവ സര്വദാ ।
അഖണ്ഡാകാരരൂപത്വാത് സര്വം നാസ്ത്യേവ സര്വദാ ॥ ൨൪॥
ഹുംകാരസ്യാവകാശോ വാ ഹുംകാരജനനം ച വാ ।
നാസ്ത്യേവ നാസ്തി നാസ്ത്യേവ നാസ്തി നാസ്തി കദാചന ॥ ൨൫॥
അന്യത് പദാര്ഥമല്പം വാ അന്യദേവാന്യഭാഷണമ് ।
ആത്മനോഽന്യദസത്യം വാ സത്യം വാ ഭ്രാന്തിരേവ ച ॥ ൨൬॥
നാസ്ത്യേവ നാസ്തി നാസ്ത്യേവ നാസ്തി ശബ്ദോഽപി നാസ്തി ഹി ।
സര്വം ചൈതന്യമാത്രത്വാത് സര്വം നാസ്ത്യേവ സര്വദാ ॥ ൨൭॥
സര്വം ബ്രഹ്മ ന സന്ദേഹോ ബ്രഹ്മൈവാഹം ന സംശയഃ ।
വാക്യം ച വാചകം സര്വം വക്താ ച ത്രിപുടീദ്വയമ് ॥ ൨൮॥
ജ്ഞാതാ ജ്ഞാനം ജ്ഞേയഭേദം മാതൃമാനമിതി പ്രിയമ് ।
യദ്യച്ഛാസ്ത്രേഷു നിര്ണീതം യദ്യദ്വേദേഷു നിശ്ചിതമ് ॥ ൨൯॥
പരാപരമതീതം ച അതീതോഽഹമവേദനമ് ।
ഗുരുര്ഗുരൂപദേശശ്ച ഗുരും വക്ഷ്യേ ന കസ്യചിത് ॥ ൩൦॥
ഗുരുരൂപാ ഗുരുശ്രദ്ധാ സദാ നാസ്തി ഗുരുഃ സ്വയമ് ।
ആത്മൈവ ഗുരുരാത്മൈവ അന്യാഭാവാന്ന സംശയഃ ॥ ൩൧॥
ആത്മനഃ ശുഭമാത്മൈവ അന്യാഭാവാന്ന സംശയഃ ।
ആത്മനോ മോഹമാത്മൈവ ആത്മനോഽസ്തി ന കിഞ്ചന ॥ ൩൨॥
ആത്മനഃ സുഖമാത്മൈവ അന്യന്നാസ്തി ന സംശയഃ ।
ആത്മന്യേവാത്മനഃ ശക്തിഃ ആത്മന്യേവാത്മനഃ പ്രിയമ് ॥ ൩൩॥
ആത്മന്യേവാത്മനഃ സ്നാനം ആത്മന്യേവാത്മനോ രതിഃ ।
ആത്മജ്ഞാനം പരം ശ്രേയഃ ആത്മജ്ഞാനം സുദുര്ലഭമ് ॥ ൩൪॥
ആത്മജ്ഞാനം പരം ബ്രഹ്മ ആത്മജ്ഞാനം സുഖാത് സുഖമ് ।
ആത്മജ്ഞാനാത് പരം നാസ്തി ആത്മജ്ഞാനാത് സ്മൃതിര്ന ഹി ॥ ൩൫॥
ബ്രഹ്മൈവാത്മാ ന സന്ദേഹ ആത്മൈവ ബ്രഹ്മണഃ സ്വയമ് ।
സ്വയമേവ ഹി സര്വത്ര സ്വയമേവ ഹി ചിന്മയഃ ॥ ൩൬॥
സ്വയമേവ ചിദാകാശഃ സ്വയമേവ നിരന്തരമ് ।
സ്വയമേവ ച നാനാത്മാ സ്വയമേവ ച നാപരഃ ॥ ൩൭॥
സ്വയമേവ ഗുണാതീതഃ സ്വയമേവ മഹത് സുഖമ് ।
സ്വയമേവ ഹി ശാന്താത്മാ സ്വയമേവ ഹി നിഷ്കലഃ ॥ ൩൮॥
സ്വയമേവ ചിദാനന്ദഃ സ്വയമേവ മഹത്പ്രഭുഃ ।
സ്വയമേവ സദാ സാക്ഷീ സ്വയമേവ സദാശിവഃ ॥ ൩൯॥
സ്വയമേവ ഹരിഃ സാക്ഷാത് സ്വയമേവ പ്രജാപതിഃ ।
സ്വയമേവ പരം ബ്രഹ്മ ബ്രഹ്മ ഏവ സ്വയം സദാ ॥ ൪൦॥
സര്വം ബ്രഹ്മ സ്വയം ബ്രഹ്മ സ്വയം ബ്രഹ്മ ന സംശയഃ ।
ദൃഢനിശ്ചയമേവ ത്വം സര്വഥാ കുരു സര്വദാ ॥ ൪൧॥
വിചാരയന് സ്വയം ബ്രഹ്മ ബ്രഹ്മമാത്രം സ്വയം ഭവേത് ।
ഏതദേവ പരം ബ്രഹ്മ അഹം ബ്രഹ്മേതി നിശ്ചയഃ ॥ ൪൨॥
ഏഷ ഏവ പരോ മോക്ഷ അഹം ബ്രഹ്മേതി നിശ്ചയഃ ।
ഏഷ ഏവ കൃതാര്ഥോ ഹി ഏഷ ഏവ സുഖം സദാ ॥ ൪൩॥
ഏതദേവ സദാ ജ്ഞാനം സ്വയം ബ്രഹ്മ സ്വയം മഹത് ।
അഹം ബ്രഹ്മ ഏതദേവ സദാ ജ്ഞാനം സ്വയം മഹത് ॥ ൪൪॥
അഹം ബ്രഹ്മ ഏതദേവ സ്വഭാവം സതതം നിജമ് ।
അഹം ബ്രഹ്മ ഏതദേവ സദാ നിത്യം സ്വയം സദാ ॥ ൪൫॥
അഹം ബ്രഹ്മ ഏതദേവ ബന്ധനാശം ന സംശയഃ ।
അഹം ബ്രഹ്മ ഏതദേവ സര്വസിദ്ധാന്തനിശ്ചയമ് ॥ ൪൬॥
ഏഷ വേദാന്തസിദ്ധാന്ത അഹം ബ്രഹ്മ ന സംശയഃ ।
സര്വോപനിഷദാമര്ഥഃ സര്വാനന്ദമയം ജഗത് ॥ ൪൭॥
മഹാവാക്യസ്യ സിദ്ധാന്ത അഹം ബ്രഹ്മേതി നിശ്ചയഃ ।
സാക്ഷാച്ഛിവസ്യ സിദ്ധാന്ത അഹം ബ്രഹ്മേതി നിശ്ചയഃ ॥ ൪൮॥
നാരായണസ്യ സിദ്ധാന്ത അഹം ബ്രഹ്മേതി നിശ്ചയഃ ।
ചതുര്മുഖസ്യ സിദ്ധാന്ത അഹം ബ്രഹ്മേതി നിശ്ചയഃ ॥ ൪൯॥
ഋഷീണാം ഹൃദയം ഹ്യേതത് ദേവാനാമുപദേശകമ് ।
സര്വദേശികസിദ്ധാന്ത അഹം ബ്രഹ്മേതി നിശ്ചയഃ ॥ ൫൦॥
യച്ച യാവച്ച ഭൂതാനാം മഹോപദേശ ഏവ തത് ।
അഹം ബ്രഹ്മ മഹാമോക്ഷം പരം ചൈതദഹം സ്വയമ് ॥ ൫൧॥
അഹം ചാനുഭവം ചൈതന്മഹാഗോപ്യമിദം ച തത് ।
അഹം ബ്രഹ്മ ഏതദേവ സദാ ജ്ഞാനം സ്വയം മഹത് ॥ ൫൨॥
മഹാപ്രകാശമേവൈതത് അഹം ബ്രഹ്മ ഏവ തത് ।
ഏതദേവ മഹാമന്ത്രം ഏതദേവ മഹാജപഃ ॥ ൫൩॥
ഏതദേവ മഹാസ്നാനമഹം ബ്രഹ്മേതി നിശ്ചയഃ ।
ഏതദേവ മഹാതീര്ഥമഹം ബ്രഹ്മേതി നിശ്ചയഃ ॥ ൫൪॥
ഏതദേവ മഹാഗങ്ഗാ അഹം ബ്രഹ്മേതി നിശ്ചയഃ ।
ഏഷ ഏവ പരോ ധര്മ അഹം ബ്രഹ്മേതി നിശ്ചയഃ ॥ ൫൫॥
ഏഷ ഏവ മഹാകാശ അഹം ബ്രഹ്മേതി നിശ്ചയഃ ।
ഏതദേവ ഹി വിജ്ഞാനമഹം ബ്രഹ്മാസ്മി കേവലമ് ।
സര്വസിദ്ധാന്തമേവൈതദഹം ബ്രഹ്മേതി നിശ്ചയഃ ॥ ൫൬॥
സവ്യാസവ്യതയാദ്യവജ്ഞഹൃദയാ ഗോപോദഹാര്യഃ സ്രിയഃ
പശ്യന്ത്യമ്ബുജമിത്രമണ്ഡലഗതം ശംഭും ഹിരണ്യാത്മകമ് ।
സര്വത്ര പ്രസൃതൈഃ കരൈര്ജഗദിദം പുഷ്ണാതി മുഷ്ണന് ധനൈഃ
ഘൃഷ്ടം ചൌഷധിജാലമമ്ബുനികരൈര്വിശ്വോത്ഥധൂതം ഹരഃ ॥ ൫൭॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ സര്വസിദ്ധാന്തപ്രകരണം നാമ സപ്തത്രിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com