ഋഭുഗീതാ ൪൩ ॥ നിദാധാനുഭവ വര്ണന പ്രകരണമ് ॥
നിദാഘഃ -
- ന പശ്യാമി ശരീരം വാ ലിങ്ഗം കരണമേവ വാ ।
- ന പശ്യാമി മനോ വാപി ന പശ്യാമി ജഡം തതഃ ॥ ൧॥
- ന പശ്യാമി ചിദാകാശം ന പശ്യാമി ജഗത് ക്വചിത് ।
- ന പശ്യാമി ഹരിം വാപി ന പശ്യാമി ശിവം ച വാ ॥ ൨॥
- ആനന്ദസ്യാന്തരേ ലഗ്നം തന്മയത്വാന്ന ചോത്ഥിതഃ ।
- ന പശ്യാമി സദാ ഭേദം ന ജഡം ന ജഗത് ക്വചിത് ॥ ൩॥
- ന ദ്വൈതം ന സുഖം ദുഃഖം ന ഗുരുര്ന പരാപരമ് ।
- ന ഗുണം വാ ന തുര്യം വാ ന ബുദ്ധിര്ന ച സംശയഃ ॥ ൪॥
- ന ച കാലം ന ച ഭയം ന ച ശോകം ശുഭാശുഭമ് ।
- ന പശ്യാമി സന്ദീനം ന ബന്ധം ന ച സംഭവമ് ॥ ൫॥
- ന ദേഹേന്ദ്രിയസദ്ഭാവോ ന ച സദ്വസ്തു സന്മനഃ ।
- ന പശ്യാമി സദാ സ്ഥൂലം ന കൃശം ന ച കുബ്ജകമ് ॥ ൬॥
- ന ഭൂമിര്ന ജലം നാഗ്നിര്ന മോഹോ ന ച മന്ത്രകമ് ।
- ന ഗുരുര്ന ച വാക്യം വാ ന ദൃഢം ന ച സര്വകമ് ॥ ൭॥
- ന ജഗച്ഛ്രവണം ചൈവ നിദിധ്യാസം ന ചാപരഃ ।
- ആനന്ദസാഗരേ മഗ്നസ്തന്മയത്വാന്ന ചോത്ഥിതഃ ॥ ൮॥
- ആനന്ദോഽഹമശേഷോഽഹമജോഽഹമമൃതോസ്മ്യഹമ് ।
- നിത്യോഽഹമിതി നിശ്ചിത്യ സദാ പൂര്ണോഽസ്മി നിത്യധീഃ ॥ ൯॥
- പൂര്ണോഽഹം പൂര്ണചിത്തോഽഹം പുണ്യോഽഹം ജ്ഞാനവാനഹമ് ।
- ശുദ്ധോഽഹം സര്വമുക്തോഽഹം സര്വാകാരോഽഹമവ്യയഃ ॥ ൧൦॥
- ചിന്മാത്രോഽഹം സ്വയം സോഽഹം തത്ത്വരൂപോഽഹമീശ്വരഃ ।
- പരാപരോഽഹം തുര്യോഽഹം പ്രസന്നോഽഹം രസോഽസ്മ്യഹമ് ॥ ൧൧॥
- ബ്രഹ്മാഽഹം സര്വലക്ഷ്യോഽഹം സദാ പൂര്ണോഽഹമക്ഷരഃ ।
- മമാനുഭവരൂപം യത് സര്വമുക്തം ച സദ്ഗുരോ ॥ ൧൨॥
- നമസ്കരോമി തേ നാഹം സര്വം ച ഗുരുദക്ഷിണാ ।
- മദ്ദേഹം ത്വത്പദേ ദത്തം ത്വയാ ഭസ്മീകൃതം ക്ഷണാത് ॥ ൧൩॥
- മമാത്മാ ച മയാ ദത്തഃ സ്വയമാത്മനി പൂരിതഃ ।
- ത്വമേവാഹമഹം ച ത്വമഹമേവ ത്വമേവ ഹി ॥ ൧൪॥
- ഐക്യാര്ണവനിമഗ്നോഽസ്മി ഐക്യജ്ഞാനം ത്വമേവ ഹി ।
- ഏകം ചൈതന്യമേവാഹം ത്വയാ ഗന്തും ന ശക്യതേ ॥ ൧൫॥
- ഗന്തവ്യദേശോ നാസ്ത്യേവ ഏകാകാരം ന ചാന്യതഃ ।
- ത്വയാ ഗന്തവ്യദേശോ ന മയാ ഗന്തവ്യമസ്തി ന ॥ ൧൬॥
- ഏകം കാരണമേകം ച ഏകമേവ ദ്വയം ന ഹി ।
- ത്വയാ വക്തവ്യകം നാസ്തി മയാ ശ്രോതവ്യമപ്യലമ് ॥ ൧൭॥
- ത്വമേവ സദ്ഗുരുര്നാസി അഹം നാസ്മി സശിഷ്യകഃ ।
- ബ്രഹ്മമാത്രമിദം സര്വമസ്മിന്മാനോഽസ്മി തന്മയഃ ॥ ൧൮॥
- ഭേദാഭേദം ന പശ്യാമി കാര്യാകാര്യം ന കിഞ്ചന ।
- മമൈവ ചേന്നമസ്കാരോ നിഷ്പ്രയോജന ഏവ ഹി ॥ ൧൯॥
- തവൈവ ചേന്നമസ്കാരോ ഭിന്നത്വാന്ന ഫലം ഭവേത് ।
- തവ ചേന്മമ ചേദ്ഭേദഃ ഫലാഭാവോ ന സംശയഃ ॥ ൨൦॥
- നമസ്കൃതോഽഹം യുഷ്മാകം ഭവാനജ്ഞീതി വക്ഷ്യതി ।
- മമൈവാപകരിഷ്യാമി പരിച്ഛിന്നോ ഭവാമ്യഹമ് ॥ ൨൧॥
- മമൈവ ചേന്നമസ്കാരഃ ഫലം നാസ്തി സ്വതഃ സ്ഥിതേ ।
- കസ്യാപി ച നമസ്കാരഃ കദാചിദപി നാസ്തി ഹി ॥ ൨൨॥
- സദാ ചൈതന്യമാത്രത്വാത് നാഹം ന ത്വം ന ഹി ദ്വയമ് ।
- ന ബന്ധം ന പരോ നാന്യേ നാഹം നേദം ന കിഞ്ചന ॥ ൨൩॥
- ന ദ്വയം നൈകമദ്വൈതം നിശ്ചിതം ന മനോ ന തത് ।
- ന ബീജം ന സുഖം ദുഃഖം നാശം നിഷ്ഠാ ന സത്സദാ ॥ ൨൪॥
- നാസ്തി നാസ്തി ന സന്ദേഹഃ കേവലാത് പരമാത്മനി ।
- ന ജീവോ നേശ്വരോ നൈകോ ന ചന്ദ്രോ നാഗ്നിലക്ഷണഃ ॥ ൨൫॥
- ന വാര്താ നേന്ദ്രിയോ നാഹം ന മഹത്ത്വം ഗുണാന്തരമ് ।
- ന കാലോ ന ജഗന്നാന്യോ ന വാ കാരണമദ്വയമ് ॥ ൨൬॥
- നോന്നതോഽത്യന്തഹീനോഽഹം ന മുക്തസ്ത്വത്പ്രസാദതഃ ।
- സര്വം നാസ്ത്യേവ നാസ്ത്യേവ സര്വം ബ്രഹ്മൈവ കേവലമ് ॥ ൨൭॥
- അഹം ബ്രഹ്മ ഇദം ബ്രഹ്മ ആത്മ ബ്രഹ്മാഹമേവ ഹി ।
- സര്വം ബ്രഹ്മ ന സന്ദേഹസ്ത്വത്പ്രസാദാന്മഹേശ്വരഃ ॥ ൨൮॥
- ത്വമേവ സദ്ഗുരുര്ബ്രഹ്മ ന ഹി സദ്ഗുരുരന്യതഃ ।
- ആത്മൈവ സദ്ഗുരുര്ബ്രഹ്മ ശിഷ്യോ ഹ്യാത്മൈവ സദ്ഗുരുഃ ॥ ൨൯॥
- ഗുരുഃ പ്രകല്പതേ ശിഷ്യോ ഗുരുഹീനോ ന ശിഷ്യകഃ ।
- ശിഷ്യേ സതി ഗുരുഃ കല്പ്യഃ ശിഷ്യാഭാവേ ഗുരുര്ന ഹി ॥ ൩൦॥
- ഗുരുശിഷ്യവിഹീനാത്മാ സര്വത്ര സ്വയമേവ ഹി ।
- ചിന്മാത്രാത്മനി കല്പ്യോഽഹം ചിന്മാത്രാത്മാ ന ചാപരഃ ॥ ൩൧॥
- ചിന്മാത്രാത്മാഹമേവൈകോ നാന്യത് കിഞ്ചിന്ന വിദ്യതേ ।
- സര്വസ്ഥിതോഽഹം സതതം നാന്യം പശ്യാമി സദ്ഗുരോഃ ॥ ൩൨॥
- നാന്യത് പശ്യാമി ചിത്തേന നാന്യത് പശ്യാമി കിഞ്ചന ।
- സര്വാഭാവാന്ന പശ്യാമി സര്വം ചേദ് ദൃശ്യതാം പൃഥക് ॥ ൩൩॥
- ഏവം ബ്രഹ്മ പ്രപശ്യാമി നാന്യദസ്തീതി സര്വദാ ।
- അഹോ ഭേദം പ്രകുപിതം അഹോ മായാ ന വിദ്യതേ ॥ ൩൪॥
- അഹോ സദ്ഗുരുമാഹാത്മ്യമഹോ ബ്രഹ്മസുഖം മഹത് ।
- അഹോ വിജ്ഞാനമാഹാത്മ്യമഹോ സജ്ജനവൈഭവഃ ॥ ൩൫॥
- അഹോ മോഹവിനാശശ്ച അഹോ പശ്യാമി സത്സുഖമ് ।
- അഹോ ചിത്തം ന പശ്യാമി അഹോ സര്വം ന കിഞ്ചന ॥ ൩൬॥
- അഹമേവ ഹി നാന്യത്ര അഹമാനന്ദ ഏവ ഹി ।
- മമാന്തഃകരണേ യദ്യന്നിശ്ചിതം ഭവദീരിതമ് ॥ ൩൭॥
- സര്വം ബ്രഹ്മ പരം ബ്രഹ്മ ന കിഞ്ചിദന്യദൈവതമ് ।
- ഏവം പശ്യാമി സതതം നാന്യത് പശ്യാമി സദ്ഗുരോ ॥ ൩൮॥
- ഏവം നിശ്ചിത്യ തിഷ്ഠാമി സ്വസ്വരൂപേ മമാത്മനി ॥ ൩൯॥
- അഗാധവേദവാക്യതോ ന ചാധിഭേഷജം ഭവേ-
- ദുമാധവാങ്ഘ്രിപങ്കജസ്മൃതിഃ പ്രബോധമോക്ഷദാ ।
- പ്രബുദ്ധഭേദവാസനാനിരുദ്ധഹൃത്തമോഭിദേ
- മഹാരുജാഘവൈദ്യമീശ്വരം ഹൃദമ്ബുജേ ഭജേ ॥ ൪൦॥
- ദ്യതത്പ്രദഗ്ധകാമദേഹ ദുഗ്ധസന്നിഭം പ്രമുഗ്ധസാമി ।
- സോമധാരിണം ശ്രുതീഡ്യഗദ്യസംസ്തുതം ത്വഭേദ്യമേകശങ്കരമ് ॥ ൪൧॥
- വരഃ കങ്കഃ കാകോ ഭവദുഭയജാതേഷു നിയതം
- മഹാശങ്കാതങ്കൈര്വിധിവിഹിതശാന്തേന മനസാ ।
- യദി സ്വൈരം ധ്യായന്നഗപതിസുതാനായകപദം
- സ ഏവായം ധുര്യോ ഭവതി മുനിജാതേഷു നിയതമ് ॥ ൪൨॥
- കഃ കാലാന്തകപാദപദ്മഭജനാദന്യദ്ധൃദാ കഷ്ടദാം
- ധര്മാഭാസപരംപരാം പ്രഥയതേ മൂര്ഖോ ഖരീം തൌരഗീമ് ।
- കര്തും യത്നശതൈരശക്യകരണൈര്വിന്ദേത ദുഃഖാദികംvar was ദുഃഖാധികമ്
- തദ്വത് സാംബപദാംബുജാര്ചനരതിം ത്യക്ത്വാ വൃഥാ ദുഃഖഭാക് ॥ ൪൩॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ നിദാഘാനുഭവവര്ണനപ്രകരണം നാമ ത്രിചത്വാരിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com