Ribhu Gita - Siva Rahasya Purana Amsha 6

ഋഭുഗീതാ ൧൦ ॥ ബ്രഹ്മ-തര്പണ ആത്മ-ഹോമാഖ്യ-പ്രകരണ-ദ്വയ-വര്ണനമ് ॥

ഋഭുഃ -

നിത്യതര്പണമാചക്ഷ്യേ നിദാഘ ശൃണു മേ വചഃ ।
വേദശാസ്ത്രേഷു സര്വേഷു അത്യന്തം ദുര്ലഭം നൃണാമ് ॥ ൧॥
സദാ പ്രപഞ്ചം നാസ്ത്യേവ ഇദമിത്യപി നാസ്തി ഹി ।
ബ്രഹ്മമാത്രം സദാപൂര്ണം ഇത്യേവം ബ്രഹ്മതര്പണമ് ॥ ൨॥
സരൂപമാത്രം ബ്രഹ്മൈവ സച്ചിദാനന്ദമപ്യഹമ് ।
ആനന്ദഘന ഏവാഹം ഇത്യേവം ബ്രഹ്മതര്പണമ് ॥ ൩॥
സര്വദാ സര്വശൂന്യോഽഹം സദാത്മാനന്ദവാനഹമ് ।
നിത്യാനിത്യസ്വരൂപോഽഹം ഇത്യേവം ബ്രഹ്മതര്പണമ് ॥ ൪॥
അഹമേവ ചിദാകാശ ആത്മാകാശോഽസ്മി നിത്യദാ ।
ആത്മനാഽഽത്മനി തൃപ്തോഽഹം ഇത്യേവം ബ്രഹ്മതര്പണമ് ॥ ൫॥
ഏകത്വസംഖ്യാഹീനോഽസ്മി അരൂപോഽസ്മ്യഹമദ്വയഃ ।
നിത്യശുദ്ധസ്വരൂപോഽഹം ഇത്യേവം ബ്രഹ്മതര്പണമ് ॥ ൬॥
ആകാശാദപി സൂക്ഷ്മോഽഹം അത്യന്താഭാവകോഽസ്മ്യഹമ് ।
സര്വപ്രകാശരൂപോഽഹം ഇത്യേവം ബ്രഹ്മതര്പണമ് ॥ ൭॥
പരബ്രഹ്മസ്വരൂപോഽഹം പരാവരസുഖോഽസ്മ്യഹമ് ।
സത്രാമാത്രസ്വരൂപോഽഹം ദൃഗ്ദൃശ്യാദിവിവര്ജിതഃ ॥ ൮॥
യത് കിഞ്ചിദപ്യഹം നാസ്തി തൂഷ്ണീം തൂഷ്ണീമിഹാസ്മ്യഹമ് ।
ശുദ്ധമോക്ഷസ്വരൂപോഽഹമ് ഇത്യേവം ബ്രഹ്മതര്പണമ് ॥ ൯॥
സര്വാനന്ദസ്വരൂപോഽഹം ജ്ഞാനാനന്ദമഹം സദാ ।
വിജ്ഞാനമാത്രരൂപോഽഹമ് ഇത്യേവം ബ്രഹ്മതര്പണമ് ॥ ൧൦॥
ബ്രഹ്മമാത്രമിദം സര്വം നാസ്തി നാന്യത്ര തേ ശപേ ।
തദേവാഹം ന സന്ദേഹഃ ഇത്യേവം ബ്രഹ്മതര്പണമ് ॥ ൧൧॥
ത്വമിത്യേതത് തദിത്യേതന്നാസ്തി നാസ്തീഹ കിഞ്ചന ।
ശുദ്ധചൈതന്യമാത്രോഽഹം ഇത്യേവം ബ്രഹ്മതര്പണമ് ॥ ൧൨॥
അത്യന്താഭാവരൂപോഽഹമഹമേവ പരാത്പരഃ ।
അഹമേവ സുഖം നാന്യത് ഇത്യേവം ബ്രഹ്മതര്പണമ് ॥ ൧൩॥
ഇദം ഹേമമയം കിഞ്ചിന്നാസ്തി നാസ്ത്യേവ തേ ശപേ ।
നിര്ഗുണാനന്ദരൂപോഽഹം ഇത്യേവം ബ്രഹ്മതര്പണമ് ॥ ൧൪॥
സാക്ഷിവസ്തുവിഹീനത്വാത് സാക്ഷിത്വം നാസ്തി മേ സദാ ।
കേവലം ബ്രഹ്മഭാവത്വാത് ഇത്യേവം ബ്രഹ്മതര്പണമ് ॥ ൧൫॥
അഹമേവാവിശേഷോഽഹമഹമേവ ഹി നാമകമ് ।
അഹമേവ വിമോഹം വൈ ഇത്യേവം ബ്രഹ്മതര്പണമ് ॥ ൧൬॥
ഇന്ദ്രിയാഭാവരൂപോഽഹം സര്വാഭാവസ്വരൂപകമ് ।
ബന്ധമുക്തിവിഹീനോഽസ്മി ഇത്യേവം ബ്രഹ്മതര്പണമ് ॥ ൧൭॥
സര്വാനന്ദസ്വരൂപോഽഹം സര്വാനന്ദഘനോഽസ്മ്യഹമ് ।
നിത്യചൈതന്യമാത്രോഽഹം ഇത്യേവം ബ്രഹ്മതര്പണമ് ॥ ൧൮॥
വാചാമഗോചരശ്ചാഹം വാങ്മനോ നാസ്തി കിഞ്ചന ।
ചിദാനന്ദമയശ്ചാഹം ഇത്യേവം ബ്രഹ്മതര്പണമ് ॥ ൧൯॥
സര്വത്ര പൂര്ണരൂപോഽഹം സര്വത്ര സുഖമസ്മ്യഹമ് ।
സര്വത്രാചിന്ത്യരൂപോഽഹമ് ഇത്യേവം ബ്രഹ്മതര്പണമ് ॥ ൨൦॥
സര്വത്ര തൃപ്തിരൂപോഽഹം സര്വാനന്ദമയോഽസ്മ്യഹമ് ।
സര്വശൂന്യസ്വരൂപോഽഹമ് ഇത്യേവം ബ്രഹ്മതര്പണമ് ॥ ൨൧॥
സര്വദാ മത്സ്വരൂപോഽഹം പരമാനന്ദവാനഹമ് ।
ഏക ഏവാഹമേവാഹം ഇത്യേവം ബ്രഹ്മതര്പണമ് ॥ ൨൨॥
മുക്തോഽഹം മോക്ഷരൂപോഽഹം സര്വമൌനപരോഽസ്മ്യഹമ് ।
സര്വനിര്വാണരൂപോഽഹം ഇത്യേവം ബ്രഹ്മതര്പണമ് ॥ ൨൩॥
സര്വദാ സത്സ്വരൂപോഽഹം സര്വദാ തുര്യവാനഹമ് ।
തുര്യാതീതസ്വരൂപോഽഹം ഇത്യേവം ബ്രഹ്മതര്പണമ് ॥ ൨൪॥
സത്യവിജ്ഞാനമാത്രോഽഹം സന്മാത്രാനന്ദവാനഹമ് ।
നിര്വികല്പസ്വരൂപോഽഹമ് ഇത്യേവം ബ്രഹ്മതര്പണമ് ॥ ൨൫॥
സര്വദാ ഹ്യജരൂപോഽഹം നിരീഹോഽഹം നിരഞ്ജനഃ ।
ബ്രഹ്മവിജ്ഞാനരൂപോഽഹം ഇത്യേവം ബ്രഹ്മതര്പണമ് ॥ ൨൬॥
ബ്രഹ്മതര്പണമേവോക്തം ഏതത്പ്രകരണം മയാ ।
യഃ ശൃണോതി സകൃദ്വാപി ബ്രഹ്മൈവ ഭവതി സ്വയമ് ॥ ൨൭॥
നിത്യഹോമം പ്രവക്ഷ്യാമി സര്വവേദേഷു ദുര്ലഭമ് ।
സര്വശാസ്ത്രാര്ഥമദ്വൈതം സാവധാനമനാഃ ശൃണു ॥ ൨൮॥
അഹം ബ്രഹ്മാസ്മി ശുദ്ധോഽസ്മി നിത്യോഽസ്മി പ്രഭുരസ്മ്യഹമ് ।
ഓംകാരാര്ഥസ്വരൂപോഽസ്മി ഏവം ഹോമം സുദുര്ലഭമ് ॥ ൨൯॥
പരമാത്മസ്വരൂപോഽസ്മി പരാനന്ദപരോഽസ്മ്യഹമ് ।
ചിദാനന്ദസ്വരൂപോഽസ്മി ഏവം ഹോമം സുദുര്ലഭമ് ॥ ൩൦॥
നിത്യാനന്ദസ്വരൂപോഽസ്മി നിഷ്കലങ്കമയോ ഹ്യഹമ് ।
ചിദാകാരസ്വരൂപോഽഹം ഏവം ഹോമം സുദുര്ലഭമ് ॥ ൩൧॥
ന ഹി കിഞ്ചിത് സ്വരൂപോഽസ്മി നാഹമസ്മി ന സോഽസ്മ്യഹമ് ।
നിര്വ്യാപാരസ്വരൂപോഽസ്മി ഏവം ഹോമം സുദുര്ലഭമ് ॥ ൩൨॥
നിരംശോഽസ്മി നിരാഭാസോ ന മനോ നേന്ദ്രിയോഽസ്മ്യഹമ് ।
ന ബുദ്ധിര്ന വികല്പോഽഹം ഏവം ഹോമം സുദുര്ലഭമ് ॥ ൩൩॥
ന ദേഹാദിസ്വാരൂപോഽസ്മി ത്രയാദിപരിവര്ജിതഃ ।
ന ജാഗ്രത്സ്വപ്നരൂപോഽസ്മി ഏവം ഹോമം സുദുര്ലഭമ് ॥ ൩൪॥
ശ്രവണം മനനം നാസ്തി നിദിധ്യാസനമേവ ഹി ।
സ്വഗതം ച ന മേ കിഞ്ചിദ് ഏവം ഹോമം സുദുര്ലഭമ് ॥ ൩൫॥
അസത്യം ഹി മനഃസത്താ അസത്യം ബുദ്ധിരൂപകമ് ।
അഹങ്കാരമസദ്വിദ്ധി കാലത്രയമസത് സദാ ॥ ൩൬॥
ഗുണത്രയമസദ്വിദ്ധി ഏവം ഹോമം സുദുര്ലഭമ് ॥ ൩൭॥
ശ്രുതം സര്വമസദ്വിദ്ധി വേദം സര്വമസത് സദാ ।
സര്വതത്ത്വമസദ്വിദ്ധി ഏവം ഹോമം സുദുര്ലഭമ് ॥ ൩൮॥
നാനാരൂപമസദ്വിദ്ധി നാനാവര്ണമസത് സദാ ।
നാനാജാതിമസദ്വിദ്ധി ഏവം ഹോമം സുദുര്ലഭമ് ॥ ൩൯॥
ശാസ്ത്രജ്ഞാനമസദ്വിദ്ധി വേദജ്ഞാനം തപോഽപ്യസത് ।
സര്വതീര്ഥമസദ്വിദ്ധി ഏവം ഹോമം സുദുര്ലഭമ് ॥ ൪൦॥
ഗുരുശിഷ്യമസദ്വിദ്ധി ഗുരോര്മന്ത്രമസത് തതഃ ।
യദ് ദൃശ്യം തദസദ്വിദ്ധി ഏവം ഹോമം സുദുര്ലഭമ് ॥ ൪൧॥
സര്വാന് ഭോഗാനസദ്വിദ്ധി യച്ചിന്ത്യം തദസത് സദാ ।
യദ് ദൃശ്യം തദസദ്വിദ്ധി ഏവം ഹോമം സുദുര്ലഭമ് ॥ ൪൨॥
സര്വേന്ദ്രിയമസദ്വിദ്ധി സര്വമന്ത്രമസത് ത്വിതി ।
സര്വപ്രാണാനസദ്വിദ്ധി ഏവം ഹോമം സുദുര്ലഭമ് ॥ ൪൩॥
ജീവം ദേഹമസദ്വിദ്ധി പരേ ബ്രഹ്മണി നൈവ ഹി ।
മയി സര്വമസദ്വിദ്ധി ഏവം ഹോമം സുദുര്ലഭമ് ॥ ൪൪॥
ദൃഷ്ടം ശ്രുതമസദ്വിദ്ധി ഓതം പ്രോതമസന്മയി ।
കാര്യാകാര്യമസദ്വിദ്ധി ഏവം ഹോമം സുദുര്ലഭമ് ॥ ൪൫॥
ദൃഷ്ടപ്രാപ്തിമസദ്വിദ്ധി സന്തോഷമസദേവ ഹി ।
സര്വകര്മാണ്യസദ്വിദ്ധി ഏവം ഹോമം സുദുര്ലഭമ് ॥ ൪൬॥
സര്വാസര്വമസദ്വിദ്ധി പൂര്ണാപൂര്ണമസത് പരേ ।
സുഖം ദുഃഖമസദ്വിദ്ധി ഏവം ഹോമം സുദുര്ലഭമ് ॥ ൪൭॥
യഥാധര്മമസദ്വിദ്ധി പുണ്യാപുണ്യമസത് സദാ ।
ലാഭാലാഭമസദ്വിദ്ധി സദാ ദേഹമസത് സദാ ॥ ൪൮॥
സദാ ജയമസദ്വിദ്ധി സദാ ഗര്വമസത് സദാ ।
മനോമയമസദ്വിദ്ധി സംശയം നിശ്ചയം തഥാ ॥ ൪൯॥
ശബ്ദം സര്വമസദ്വിദ്ധി സ്പര്ശം സര്വമസത് സദാ ।
രൂപം സര്വമസദ്വിദ്ധി രസം സര്വമസത് സദാ ॥ ൫൦॥
ഗന്ധം സര്വമസദ്വിദ്ധി ജ്ഞാനം സര്വമസത് സദാ ।
ഭൂതം ഭവ്യമസദ്വിദ്ധി അസത് പ്രകൃതിരുച്യതേ ॥ ൫൧॥
അസദേവ സദാ സര്വമസദേവ ഭവോദ്ഭവമ് ।
അസദേവ ഗുണം സര്വം ഏവം ഹോമം സുദുര്ലഭമ് ॥ ൫൨॥
ശശശൃങ്ഗവദേവ ത്വം ശശശൃങ്ഗവദസ്മ്യഹമ് ।
ശശശൃങ്ഗവദേവേദം ശശശൃങ്ഗവദന്തരമ് ॥ ൫൩॥
ഇത്യേവമാത്മഹോമാഖ്യമുക്തം പ്രകരണം മയാ ।
യഃ ശൃണോതി സകൃദ്വാപി ബ്രഹ്മൈവ ഭവതി സ്വയമ് ॥ ൫൪॥

സ്കന്ദഃ -

യസ്മിന് സംച വിചൈതി വിശ്വമഖിലം ദ്യോതന്തി സൂര്യേന്ദവോ
വിദ്യുദ്വഹ്നിമരുദ്ഗണാഃ സവരുണാ ഭീതാ ഭജന്തീശ്വരമ് ।
ഭൂതം ചാപി ഭവത്യദൃശ്യമഖിലം ശമ്ഭോഃ സുഖാംശം ജഗത്
ജാതം ചാപി ജനിഷ്യതി പ്രതിഭവം ദേവാസുരൈര്നിര്യപി ।
തന്നേഹാസ്തി ന കിഞ്ചിദത്ര ഭഗവദ്ധ്യാനാന്ന കിഞ്ചിത് പ്രിയമ് ॥ ൫൫॥
യഃ പ്രാണാപാനഭേദൈര്മനനധിയാ ധാരണാപഞ്ചകാദ്യൈഃ
മധ്യേ വിശ്വജനസ്യ സന്നപി ശിവോ നോ ദൃശ്യതേ സൂക്ഷ്മയാ ।
ബുദ്ധയാദധ്യാതയാപി ശ്രുതിവചനശതൈര്ദേശികോക്ത്യൈകസൂക്ത്യാ
യോഗൈര്ഭക്തിസമന്വിതൈഃ ശിവതരോ ദൃശ്യോ ന ചാന്യത് തഥാ ॥ ൫൬॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മതര്പണാത്മഹോമാഖ്യ പ്രകരണദ്വയവര്ണനം നാമ ദശമോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com