ഋഭുഗീതാ ൨൭ ॥ ആനന്ദ-രൂപത്വ നിരൂപണ പ്രകരണമ് ॥
ഋഭുഃ -
- വക്ഷ്യേ പ്രകരണം സത്യം ബ്രഹ്മാനന്ദമനോമയമ് ।
- കാര്യകാരണനിര്മുക്തം നിത്യാനന്ദമയം ത്വിദമ് ॥ ൧॥
- അക്ഷയാനന്ദ ഏവാഹമാത്മാനന്ദപ്രകാശകമ് ।
- ജ്ഞാനാനന്ദസ്വരൂപോഽഹം ലക്ഷ്യാനന്ദമയം സദാ ॥ ൨॥
- വിഷയാനന്ദശൂന്യോഽഹം മിഥ്യാനന്ദപ്രകാശകഃ ।
- വൃത്തിശൂന്യസുഖാത്മാഹം വൃത്തിശൂന്യസുഖാത്പരമ് ॥ ൩॥
- ജഡാനന്ദപ്രകാശാത്മാ ആത്മാനന്ദരസോഽസ്മ്യഹമ് ।
- ആത്മാനന്ദവിഹീനോഽഹം നാസ്ത്യാനന്ദാത്മവിഗ്രഹഃ ॥ ൪॥
- കാര്യാനന്ദവിഹീനോഽഹം കാര്യാനന്ദകലാത്മകഃ ।
- ഗുണാനന്ദവിഹീനോഽഹം ഗുഹ്യാനന്ദസ്വരൂപവാന് ॥ ൫॥
- ഗുപ്താനന്ദസ്വരൂപോഽഹം കൃത്യാനന്ദമഹാനഹമ് ।
- ജ്ഞേയാനന്ദവിഹീനോഽഹം ഗോപ്യാനന്ദവിവര്ജിതഃ ॥ ൬॥
- സദാനന്ദസ്വരൂപോഽഹം മുദാനന്ദനിജാത്മകഃ ।
- ലോകാനന്ദോ മഹാനന്ദോ ലോകാതീതമഹാനയമ് ॥ ൭॥
- ഭേദാനന്ദശ്ചിദാനന്ദഃ സുഖാനന്ദോഽഹമദ്വയഃ ।
- ക്രിയാനന്ദോഽക്ഷയാനന്ദോ വൃത്ത്യാനന്ദവിവര്ജിതഃ ॥ ൮॥
- സര്വാനന്ദോഽക്ഷയാനന്ദശ്ചിദാനന്ദോഽഹമവ്യയഃ ।
- സത്യാനന്ദഃ പരാനന്ദഃ സദ്യോനന്ദഃ പരാത്പരഃ ॥ ൯॥
- വാക്യാനന്ദമഹാനന്ദഃ ശിവാനന്ദോഽഹമദ്വയഃ ।
- ശിവാനന്ദോത്തരാനന്ദ ആദ്യാനന്ദവിവര്ജിതഃ ॥ ൧൦॥
- അമലാത്മാ പരാനന്ദശ്ചിദാനന്ദോഽഹമദ്വയഃ ।
- വൃത്ത്യാനന്ദപരാനന്ദോ വിദ്യാതീതോ ഹി നിര്മലഃ ॥ ൧൧॥
- കാരണാതീത ആനന്ദശ്ചിദാനന്ദോഽഹമദ്വയഃ ।
- സര്വാനന്ദഃ പരാനന്ദോ ബ്രഹ്മാനന്ദാത്മഭാവനഃ ॥ ൧൨॥
- ജീവാനന്ദോ ലയാനന്ദശ്ചിദാനന്ദസ്വരൂപവാന് ।
- ശുദ്ധാനന്ദസ്വരൂപാത്മാ ബുദ്ധ്യാനന്ദോ മനോമയഃ ॥ ൧൩॥
- ശബ്ദാനന്ദോ മഹാനന്ദശ്ചിദാനന്ദോഽഹമദ്വയഃ ।
- ആനന്ദാനന്ദശൂന്യാത്മാ ഭേദാനന്ദവിശൂന്യകഃ ॥ ൧൪॥
- ദ്വൈതാനന്ദപ്രഭാവാത്മാ ചിദാനന്ദോഽഹമദ്വയഃ ।
- ഏവമാദിമഹാനന്ദ അഹമേവേതി ഭാവയ ॥ ൧൫॥
- ശാന്താനന്ദോഽഹമേവേതി ചിദാനന്ദപ്രഭാസ്വരഃ ।
- ഏകാനന്ദപരാനന്ദ ഏക ഏവ ചിദവ്യയഃ ॥ ൧൬॥
- ഏക ഏവ മഹാനാത്മാ ഏകസംഖ്യാവിവര്ജിതഃ ।
- ഏകതത്ത്വമഹാനന്ദസ്തത്ത്വഭേദവിവര്ജിതഃ ॥ ൧൭॥
- വിജിതാനന്ദഹീനോഽഹം നിര്ജിതാനന്ദഹീനകഃ ।
- ഹീനാനന്ദപ്രശാന്തോഽഹം ശാന്തോഽഹമിതി ശാന്തകഃ ॥ ൧൮॥
- മമതാനന്ദശാന്തോഽഹമഹമാദിപ്രകാശകമ് ।
- സര്വദാ ദേഹശാന്തോഽഹം ശാന്തോഽഹമിതി വര്ജിതഃ ॥ ൧൯॥
- ബ്രഹ്മൈവാഹം ന സംസാരീ ഇത്യേവമിതി ശാന്തകഃ ।
- അന്തരാദന്തരോഽഹം വൈ അന്തരാദന്തരാന്തരഃ ॥ ൨൦॥
- ഏക ഏവ മഹാനന്ദ ഏക ഏവാഹമക്ഷരഃ ।
- ഏക ഏവാക്ഷരം ബ്രഹ്മ ഏക ഏവാക്ഷരോഽക്ഷരഃ ॥ ൨൧॥
- ഏക ഏവ മഹാനാത്മാ ഏക ഏവ മനോഹരഃ ।
- ഏക ഏവാദ്വയോഽഹം വൈ ഏക ഏവ ന ചാപരഃ ॥ ൨൨॥
- ഏക ഏവ ന ഭൂരാദി ഏക ഏവ ന ബുദ്ധയഃ ।
- ഏക ഏവ പ്രശാന്തോഽഹം ഏക ഏവ സുഖാത്മകഃ ॥ ൨൩॥
- ഏക ഏവ ന കാമാത്മാ ഏക ഏവ ന കോപകമ് ।
- ഏക ഏവ ന ലോഭാത്മാ ഏക ഏവ ന മോഹകഃ ॥ ൨൪॥
- ഏക ഏവ മദോ നാഹം ഏക ഏവ ന മേ രസഃ ।
- ഏക ഏവ ന ചിത്താത്മാ ഏക ഏവ ന ചാന്യകഃ ॥ ൨൫॥
- ഏക ഏവ ന സത്താത്മാ ഏക ഏവ ജരാമരഃ ।
- ഏക ഏവ ഹി പൂര്ണാത്മാ ഏക ഏവ ഹി നിശ്ചലഃ ॥ ൨൬॥
- ഏക ഏവ മഹാനന്ദ ഏക ഏവാഹമേകവാന് ।
- ദേഹോഽഹമിതി ഹീനോഽഹം ശാന്തോഽഹമിതി ശാശ്വതഃ ॥ ൨൭॥
- ശിവോഽഹമിതി ശാന്തോഽഹം ആത്മൈവാഹമിതി ക്രമഃ ।
- ജീവോഽഹമിതി ശാന്തോഽഹം നിത്യശുദ്ധഹൃദന്തരഃ ॥ ൨൮॥
- ഏവം ഭാവയ നിഃശങ്കം സദ്യോ മുക്തസ്ത്വമദ്വയേ ।
- ഏവമാദി സുശബ്ദം വാ നിത്യം പഠതു നിശ്ചലഃ ॥ ൨൯॥
- കാലസ്വഭാവോ നിയതൈശ്ച ഭൂതൈഃ
- ജഗദ്വിജായേത ഇതി ശ്രുതീരിതമ് ।
- തദ്വൈ മൃഷാ സ്യാജ്ജഗതോ ജഡത്വതഃ
- ഇച്ഛാഭവം ചൈതദഥേസ്വരസ്യ ॥ ൩൦॥
- ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ആനന്ദരൂപത്വനിരൂപണപ്രകരണം നാമ സപ്തവിംശോഽധ്യായഃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com