ഋഭുഗീതാ ൫൦ ॥ സുദര്ശനസ്യ മുക്തിലാഭ വര്ണനം ച ॥

സ്കന്ദഃ -

• വിഷ്ണുസ്തവാന്തേ വിപ്രോഽസൌ സുദര്ശനസമാഹ്വയഃ ।
• സ്നാത്വാഽഥ മണികര്ണ്യാം സ ഭസ്മരുദ്രാക്ഷഭൂഷണഃ ॥ ൧॥
• സഞ്ജപന് ശതരുദ്രീയം പഞ്ചാക്ഷരപരായണഃ ।
• സംപാദ്യ ബില്വപത്രാണി കമലാന്യമലാന്യപി ॥ ൨॥
• ഗന്ധാക്ഷതൈര്ധൂപദീപൈര്നൈവേദ്യൈര്വിവിധൈരപി ।
• വിഷ്ണൂപദിഷ്ടമാര്ഗേണ നിത്യമന്തര്ഗൃഹസ്യ ഹി ॥ ൩॥
• പ്രദക്ഷിണം ചകാരാസൌ ലിങ്ഗാന്യഭ്യര്ചയംസ്തഥാ ।
• വിശ്വേശ്വരാവിമുക്തേശൌ വീരേശം ച ത്രിലോചനമ് ॥ ൪॥
• കൃത്തിവാസം വൃദ്ധകാലേ കേദാരം ശൂലടങ്കകമ് ।
• രത്നേശം ഭാരഭൂതേശം ചന്ദ്രേശം സിദ്ധകേശ്വരമ് ॥ ൫॥
• ഘണ്ടാകര്ണേശ്വരം ചൈവ നാരദേശം യമേശ്വരമ് ।
• പുലസ്തിപുലഹേശം ച വികര്ണേശം ഫലേശ്വരമ് ॥ ൬॥
• കദ്രുദ്രേശമഖണ്ഡേശം കേതുമാലിം ഗഭസ്തികമ് ।
• യമുനേശം വര്ണകേശം ഭദ്രേശം ജ്യേഷ്ഠശങ്കരമ് ॥ ൭॥
• നന്ദികേശം ച രാമേശം കരമര്ദേശ്വരം തഥാ ।
• ആവര്ദേശം മതങ്ഗേശം വാസുകീശം ദ്രുതീശ്വരമ് ॥ ൮॥
• സൂര്യേശമര്യമേശം ച തൂണീശം ഗാലവേശ്വരമ് ।
• കണ്വകാത്യായനേശം ച ചന്ദ്രചൂഡേശ്വരം തഥാ ॥ ൯॥
• ഉദാവര്തേശ്വരം ചൈവ തൃണജ്യോതീശ്വരം സദാ ।
• കങ്കണേശം തങ്കണേശം സ്കന്ദേശം താരകേശ്വരമ് ॥ ൧൦॥
• ജമ്ബുകേശം ച ജ്ഞാനേശം നന്ദീശം ഗണപേശ്വരമ് ।
• ഏതാന്യന്തര്ഗൃഹേ വിപ്രഃ പൂജയന് പരയാ മുദാ ॥ ൧൧॥
• ഢുണ്ഢ്യാദിഗണപാംശ്ചൈവ ഭൈരവം ചാപി നിത്യശഃ ।
• അന്നപൂര്ണാമന്നദാത്രീം സാക്ഷാല്ലോകൈകമാതരമ് ॥ ൧൨॥
• ദണ്ഡപാണിം ക്ഷേത്രപാലം സമ്യഗഭ്യര്ച്യ തസ്ഥിവാന് ।
• തീര്ഥാന്യന്യാന്യപി മുനിര്മണികര്ണ്യാദി സത്തമ ॥ ൧൩॥
• ജ്ഞാനോദം സിദ്ധകൂപം ച വൃദ്ധകൂപം പിശാചകമ് ।
• ഋണമോചനതീര്ഥം ച ഗര്ഗതീര്ഥം മഹത്തരമ് ॥ ൧൪॥
• സ്നാത്വാ സനിയമം വിപ്രോ നിത്യം പഞ്ചനദേ ഹൃദേ ।
• കിരണാം ധൂതപാപാം ച പഞ്ചഗങ്ഗാമപി ദ്വിജഃ ॥ ൧൫॥
• ഗങ്ഗാം മനോരമാം തുങ്ഗാം സര്വപാപപ്രണാശിനീമ് ।
• മുക്തിമണ്ടപമാസ്ഥായ സ ജപന് ശതരുദ്രിയമ് ॥ ൧൬॥
• അഷ്ടോത്തരസഹസ്രം വൈ ജപന് പഞ്ചാക്ഷരം ദ്വിജഃ ।
• പക്ഷേ പക്ഷേ തഥാ കുര്വന് പഞ്ചക്രോശപ്രദക്ഷിണമ് ॥ ൧൭॥
• അന്തര്ഗൃഹാദ്ബഹിര്ദേശേ ചകാരാവസഥം തദാ ।
• ഏവം സംവസതസ്തസ്യ കാലോ ഭൂയാനവര്തത ॥ ൧൮॥
• തത്ര ദൃഷ്ട്വാ തപോനിഷ്ഠം സുദര്ശനസമാഹ്വയമ് ।
• വിഷ്ണുസ്തദാ വൈ തം വിപ്രം സമാഹൂയ ശിവാര്ചകമ് ॥ ൧൯॥
• പുനഃ പ്രാഹ പ്രസന്നേന ചേതസാ മുനിസത്തമമ് ।

വിഷ്ണുഃ -

• ഭോഃ സുദര്ശനവിപ്രേന്ദ്ര ശിവാര്ചനപരായണ ।
• ജ്ഞാനപാത്രം ഭവാനേവ വിശ്വേശകൃപയാഽധുനാ ॥ ൨൦॥
• ത്വയാ തപാംസി തപ്താനി ഇഷ്ടാ യജ്ഞാസ്ത്വയൈവ ഹി ।
• അധീതാശ്ച ത്വയാ വേദാഃ കാശ്യാം വാസോ യതസ്തവ ॥ ൨൧॥
• ബഹുഭിര്ജന്മഭിര്യേന കൃതം ക്ഷേത്രേ മഹത്തപഃ ।
• തസ്യൈവ സിദ്ധ്യത്യമലാ കാശീയം മുക്തികാശികാ ॥ ൨൨॥
• തവ ഭാഗ്യസ്യ നാന്തോഽസ്തി മുനേ ത്വം ഭാഗ്യവാനസി ।
• കിഞ്ചൈകം തവ വക്ഷ്യാമി ഹിതമാത്യന്തികം ശൃണു ॥ ൨൩॥
• വിശ്വേശകൃപയാ തേഽദ്യ മുക്തിരന്തേ ഭവിഷ്യതി ।
• രുദ്രാക്ഷനാമപുണ്യം യത് നാമ്നാം സാഹസ്രമുത്തമമ് ॥ ൨൪॥
• ഉപദേക്ഷ്യാമി തേ വിപ്ര നാമസാഹസ്രമീശിതുഃ ।
• തേനാര്ചയേശം വിശ്വേശം ബില്വപത്രൈര്മനോഹരൈഃ ॥ ൨൫॥
• വര്ഷമേകം നിരാഹാരോ വിശ്വേശം പൂജയന് സദാ ।
• സംവത്സരാന്തേ മുക്തസ്ത്വം ഭവിഷ്യതി ന സംശയഃ ॥ ൨൬॥
• ത്വദ്ദേഹാപഗമേ മന്ത്രം പഞ്ചാക്ഷരമനുത്തമമ് ।
• ദദാതി ദേവോ വിശ്വേശസ്തേന മുക്തോ ഭവിഷ്യതി ॥ ൨൭॥
• ശൈവേഭ്യഃ സന്നജീവേഭ്യോ ദദാതീമം മഹാമനുമ് ।

സ്കന്ദഃ -

• ഇതി വിഷ്ണുവചഃ ശ്രുത്വാ പ്രണമ്യാഹ ഹരിം തദാ ।
• സുദര്ശനോ യയാചേത്ഥം നാമ്നാം സാഹസ്രമുത്തമമ് ॥ ൨൮॥
• ഭഗവന് ദൈത്യവൃന്ദഘ്ന വിഷ്ണോ ജിഷ്ണോ നമോഽസ്തു തേ ।
• സഹസ്രനാമ്നാം യദ്ദിവ്യം വിശ്വേശസ്യാശു തദ്വദ ॥ ൨൯॥
• യേന ജപ്തേന ദേവേശഃ പൂജിതോ ബില്വപത്രകൈഃ ।
• ദദാതി മോക്ഷസാമ്രാജ്യം ദേഹാന്തേ തദ്വദാശു മേ ॥ ൩൦॥
• തദാ വിപ്രവചഃ ശ്രുത്വാ തസ്മൈ ചോപാദിശത് സ്വയമ് ।
• സഹസ്രനാമ്നാം ദേവസ്യ ഹിരണ്യസ്യേത്യാദി സത്തമ ॥ ൩൧॥
• തേന സംപൂജ്യ വിശ്വേശം വര്ഷമേകമതന്ദ്രിതഃ ।
• കോമലാരക്തബില്വൈശ്ച സ്തോത്രേണാനേന തുഷ്ടുവേ ॥ ൩൨॥

സുദര്ശനഃ -

• ആശീവിഷാങ്ഗപരിമണ്ഡലകണ്ഠഭാഗ-
• രാജത്സുസാഗരഭവോഗ്രവിഷോരുശോഭ ।
• ഫാലസ്ഫുരജ്ജ്വലനദീപ്തിവിദീപിതാശാ-
• ശോകാവകാശ തപനാക്ഷ മൃഗാങ്കമൌലേ ॥ ൩൩॥
• ക്രുദ്ധോഡുജായാപതിധൃതാര്ധശരീരശോഭ
• പാഹ്യാശു ശാസിതമഖാന്ധകദക്ഷശത്രോ ।
• സുത്രാമവജ്രകരദണ്ഡവിഖണ്ഡിതോരു-
• പക്ഷാദ്യഘക്ഷിതിധരോര്ധ്വശയാവ ശംഭോ ॥ ൩൪॥
• ഉത്ഫുല്ലഹല്ലകലസത്കരവീരമാലാ-
• ഭ്രാജത്സുകന്ധരശരീര പിനാകപാണേ ।
• ചഞ്ചത്സുചന്ദ്രകലികോത്തമചാരുമൌലിം
• ലിങ്ഗേ കുലുഞ്ചപതിമമ്ബികയാ സമേതമ് ॥ ൩൫॥
• ഛായാധവാനുജലസച്ഛദനൈഃ പരിപൂജ്യ ഭക്ത്യാ
• മുക്തേന സ്വസ്യ ച വിരാജിതവംശകോട്യാ ।
• സായം സങ്ഗവപുങ്ഗവോരുവഹനം ശ്രീതുങ്ഗലിങ്ഗാര്ചകഃ
• ശാങ്ഗഃ പാതകസങ്ഗഭങ്ഗചതുരശ്ചാസങ്ഗനിത്യാന്തരഃ ॥ ൩൬॥
• ഫാലാക്ഷസ്ഫുരദക്ഷിജസ്ഫുരദുരുസ്ഫൂലിങ്ഗദഗ്ധാങ്ഗകാ-
• നങ്ഗോത്തുങ്ഗമതങ്ഗകൃത്തിവസനം ലിങ്ഗം ഭജേ ശാങ്കരമ് ।
• അച്ഛാച്ഛാഗവഹാം സുരതാമീക്ഷാശിനാന്തേ വിഭോ
• വൃഷ്യം ശാങ്കരവാഹനാമനിരതാഃ സോമം തഥാ വാജിനമ് ॥ ൩൭॥
• ത്യക്ത്വാ ജന്മവിനാശനം ത്വിതി മുഹുസ്തേ ജിഹ്വയാ സത്തമാഃ
• യേ ശംഭോഃ സകൃദേവ നാമനിരതാഃ ശാങ്ഗാഃ സ്വതഃ പാവനാഃ ॥ ൩൮॥
• മൃഗാങ്ക മൌലിമീശ്വരം മൃഗേന്ദ്രശത്രുജത്വചമ് ।
• വസാനമിന്ദുസപ്രഭം മൃഗാദ്യബാലസത്കരമ് ।
• ഭജേ മൃഗേന്ദ്രസപ്രഭം ..??... ॥ ൩൯॥

സ്കന്ദഃ -

• ഏവം സ്തുവന്തം വിശ്വേശം സുദര്ശനമതന്ദ്രിതമ് ।
• പ്രാഹേത്ഥം ശൌരിമാഭാഷ്യ ശംഭോര്ഭക്തിവിവര്ധനമ് ॥ ൪൦॥

വിഷ്ണുഃ -

• അത്രൈവാമരണം വിപ്ര വസ ത്വം നിയതാശനഃ ।
• നാമ്നാം സഹസ്രം പ്രജപന് ശതരുദ്രീയമേവ ച ॥ ൪൧॥
• അന്തര്ഗൃഹാത് ബഹിഃ സ്ഥിത്വാ പൂജയാശു മഹേശ്വരമ് ।
• തവാന്തേ ഭൂരികരുണോ മോക്ഷം ദാസ്യത്യസംശയമ് ॥ ൪൨॥
• സ പ്രണമ്യാഹ വിശ്വേശം ദൃഷ്ട്വാ പ്രാഹ സുദര്ശനമ് ।
• ധന്യസ്ത്വം ലിങ്ഗേഽപ്യനുദിനഗലിതസ്വാന്തരങ്ഗാഘസങ്ഘഃ
• പുംസാം വര്യാദ്യഭക്ത്യാ യമനിയമവരൈര്വിശ്വവന്ദ്യം പ്രഭാതേ ।
• ദത്വാ ബില്വവരം സദംബുജദലം കിഞ്ചിജ്ജലം വാ മുഹുഃ
• പ്രാപ്നോതീശ്വരപാദപങ്കജമുമാനാഥാദ്യ മുക്തിപ്രദമ് ॥ ൪൩॥
• കോ വാ ത്വത്സദൃശോ ഭവേദഗപതിപ്രേമൈകലിങ്ഗാര്ചകോ
• മുക്താനാം പ്രവരോര്ധ്വകേശവിലസച്ഛ്രീഭക്തിബീജാങ്കുരൈഃ ।
• ദേവാ വാപ്യസുരാഃ സുരാ മുനിവരാ ഭാരാ ഭുവഃ കേവലം
• വീരാ വാ കരവീരപുഷ്പവിലസന്മാലാപ്രദേ നോ സമഃ ॥ ൪൪॥
• വനേ വാ രാജ്യേ വാപ്യഗപതിസുതാനായകമഹോ
• സ്ഫുരല്ലിങ്ഗാര്ചായാം നിയമമതഭാവേന മനസാ ।
• ഹരം ഭക്ത്യാ സാധ്യ ത്രിഭുവനതൃണാഡമ്ബരവര-
• പ്രരൂഢൈര്ഭാഗ്യൈര്വാ ന ഹി ഖലു സ സജ്ജേത ഭുവനേ ॥ ൪൫॥
• ന ദാനൈര്യോഗൈര്വാ വിധിവിഹിതവര്ണാശ്രമഭരൈഃ
• അപാരൈര്വേദാന്തപ്രതിവചനവാക്യാനുസരണൈഃ ।
• ന മന്യേഽഹം സ്വാന്തേ ഭവഭജനഭാവേന മനസാ
• മുഹുര്ലിങ്ഗം ശാങ്ഗം ഭജതി പരമാനന്ദകുഹരഃ ॥ ൪൬॥
• ശര്വം പരവതനന്ദിനീപതിമഹാനന്ദാമ്ബുധേഃ പാരഗാ
• രാഗത്യാഗഹൃദാ വിരാഗപരമാ ഭസ്മാങ്ഗരാഗാദരാഃ ।
• മാരാപാരശരാഭിഘാതരഹിതാ ധീരോരുധാരാരസൈഃ
• പാരാവാരമഹാഘസംസൃതിഭരം തീര്ണാഃ ശിവാഭ്യര്ചനാത് ॥ ൪൭॥
• മാര്കണ്ഡേയസുതം പുരാഽന്തകഭയാദ്യോഽരക്ഷദീശോ ഹരഃ
• തത്പാദാമ്ബുജരാഗരഞ്ജിതമനാ നാപ്നോതി കിം വാ ഫലമ് ।
• തം മൃത്യുഞ്ജയമഞ്ജസാ പ്രണമതാമോജോജിമധ്യേ ജയം
• ജേതാരോതപരാജയോ ജനിജരാരോഗൈര്വിമുക്തിം ലഭേത് ॥ ൪൮॥
• ഭൂതായാം ഭൂതനാഥം ത്വഘമതിതിലകാകാരഭില്ലോത്ഥശല്യൈഃ
• ധാവന് ഭല്ലൂകപൃഷ്ഠേ നിശി കില സുമഹദ്വ്യാഘ്രഭീത്യാഽരുരോഹ ।
• ബില്വം നല്വപ്രഭം തച്ഛദഘനമസകൃത് പാതയാമാസ മൂലേ
• നിദ്രാതന്ദ്രോജ്ഝിതോഽസൌ മൃഗഗണകലനേ മൂലലിങ്ഗേഽഥ ശാങ്ഗേ ॥ ൪൯॥
• തേനാഭൂദ്ഭഗവാന് ഗണോത്തമവരോ മുക്താഘസങ്ഘസ്തദാ
• ചണ്ഡാംശോസ്തനയേന പൂജിതപദഃ സാരൂപ്യമാപേശിതുഃ ।
• ഗങ്ഗാചന്ദ്രകലാകപര്ദവിലസത്ഫാലസ്ഫുലിങ്ഗോജ്ജ്വലദ്
• വാലന്യങ്കുകരാഗ്രസംഗതമഹാശൂലാഹി ടംകോദ്യതഃ ॥ ൫൦॥
• ചൈത്രേ ചിത്രൈഃ പാതകൈര്വിപ്രമുക്തോ വൈശാഖേ വൈ ദുഃഖശാഖാവിമുക്തഃ ।
• ജ്യേഷ്ഠേ ശ്രേഷ്ഠോ ഭവതേഷാഢമാസി പുത്രപ്രാപ്തിഃ ശ്രാവണേ ശ്രാന്തിനാശഃ ॥ ൫൧॥
• ഭാദ്രേ ഭദ്രോ ഭവതേ ചാശ്വിനേ വൈ അശ്വപ്രാപ്തിഃ കാര്തികേ കീര്തിലാഭഃ ।
• മാര്ഗേ മുക്തേര്മാര്ഗമേതല്ലഭേത പുഷ്യേ പുണ്യം മാഘകേ ചാഘനാശഃ ॥ ൫൨॥
• ഫല്ഗു ത്വംഹോ ഫാല്ഗുനേ മാസി
• നശ്യേദീശാര്ചാതോ ബില്വപത്രൈശ്ചലിങ്ഗേ ।
• ഏവം തത്തന്മാസി പൂജ്യേശലിങ്ഗം
• ചിത്രൈഃ പാപൈര്വിപ്രമുക്തോ ദ്വിജേന്ദ്രഃ ॥ ൫൩॥
• ദൂര്വാങ്കുരൈരഭിനവൈഃ ശശിധാമചൂഡ-
• ലിങ്ഗാര്ചനേന പരിശേഷയദങ്കുരാണി ।
• സംസാരഘോരതരരൂപകരാണി സദ്യഃ
• മുക്ത്യങ്കുരാണി പരിവര്ധയതീഹ ധന്യഃ ॥ ൫൪॥
• ഗോക്ഷീരേക്ഷുക്ഷൌദ്രഖണ്ഡാജ്യദധ്നാ
• സന്നാരേലൈഃ പാനസാമ്രാദിസാരൈഃ ।
• വിശ്വേശാനം സത്സിതാരത്നതോയൈഃ
• ഗന്ധോദൈര്വാ സിഞ്ച്യ ദോഷൈര്വിമുക്തഃ ॥ ൫൫॥
• ലിങ്ഗം ചന്ദനലേപസങ്ഗതമുമാകാന്തസ്യ പശ്യന്തി യേ
• തേ സംസാരഭുജങ്ഗഭങ്ഗപതനാനങ്ഗാങ്ഗസങ്ഗോജ്ഝിതാഃ ।
• വ്യങ്ഗം സര്വസമര്ചനം ഭഗവതഃ സാങ്ഗം ഭവേച്ഛാങ്കരം
• ശങ്ഗാപാങ്ഗകൃപാകടാക്ഷലഹരീ തസ്മിംശ്ചിരം തിഷ്ഠതി ॥ ൫൬॥
• മുരലിസരലിരാഗൈര്മര്ദലൈസ്താലശങ്ഖൈഃ
• പടുപടഹനിനാദധ്വാന്തസന്ധാനഘോഷൈഃ ।
• ദുന്ദുഭ്യാഘാതവാദൈര്വരയുവതിമഹാനൃത്തസംരംഭരങ്ഗൈഃ
• ദര്ശേഷ്വാദര്ശദര്ശോ ഭഗവതി ഗിരിജാനായകേ മുക്തിഹേതുഃ ॥ ൫൭॥
• സ്വച്ഛച്ഛത്രഛവീനാം വിവിധജിതമഹാച്ഛായയാ ഛന്നമൈശം
• ശീര്ഷം വിച്ഛിന്നപാപോ ഭവതി ഭവഹരഃ പൂജകഃ ശമ്ഭുഭക്ത്യാ ।
• ചഞ്ചച്ചന്ദ്രാഭകാണ്ഡപ്രവിലസദമലസ്വര്ണരത്നാഗ്രഭാഭി-
• ര്ദീപ്യച്ചാമരകോടിഭിഃ സ്ഫുടപടഘടിതൈശ്ചാകചക്യൈഃ പതാകൈഃ ॥ ൫൮॥
• സംപശ്യാരുണഭൂരുഹോത്തമശിഖാസംലേഢിതാരാഗണം
• താരാനാഥകലാധരോരുസുമഹാലിങ്ഗൌഘസംസേവിതമ് ।
• ബില്വാനാം കുലമേതദത്ര സുമഹാപാപൌഘസംഹാരകൃത്
• വാരാണാം നിഖിലപ്രമോദജനകം ശമ്ഭോഃ പ്രിയം കേവലമ് ॥ ൫൯॥
• അന്നം പോത്രിമലായതേ ധനരസം കൌലേയമൂത്രായതേ
• സംവേശോ നിഗലായതേ മമ സദാനന്ദോ കന്ദായതേ ।
• ശമ്ഭോ തേ സ്മരണാന്തരായഭരിത പ്രാണഃ കൃപാണായതേ ॥ ൬൦॥
• കഃ കല്പദ്രുമുപേക്ഷ്യ ചിത്തഫലദം തൂലാദിദാനക്ഷയം
• ബബ്ബൂലം പരിസേവതേ ക്ഷുദധികോ വാതൂലദാനക്ഷമമ് ।
• തദ്വച്ഛങ്കരകിങ്കരോ വിധിഹരിബ്രഹ്മേന്ദ്രചന്ദ്രാനലാന്
• സേവേദ്യോ വിധിവഞ്ചിതഃ കലിബലപ്രാചുര്യതോ മൂഢധീഃ ॥ ൬൧॥
• സുവര്ണാണ്ഡോദ്ഭൂതസ്തുതിഗതിസമര്ച്യാണ്ഡജവര-
• പ്രപാദം ത്വാം കശ്ചിദ് ഭജതി ഭുവനേ ഭക്തിപരമഃ ।
• മഹാചണ്ഡോദ്ദണ്ഡപ്രകടിതഭുവം താണ്ഡവപരം
• വിഭും സന്തം നിത്യം ഭജ ഭഗണനാഥാമലജടമ് ॥ ൬൨॥
• അജഗവകര വിഷ്ണുബാണ ശമ്ഭോ
• ദുരിതഹരാന്തകനാശ പാഹി മാമനാഥമ് ।
• ഭവദഭയപദാബ്ജവര്യമേത
• മമ ചിത്തസരസ്തടാന്നയാതു ചാദ്യ ॥ ൬൩॥
• ഇത്ഥം വിഷ്ണുശ്ച കാശ്യാം പ്രമഥപതിമഗാത് പൂജ്യ വിശ്വേശ്വരം തം
• ക്ഷിതിസുരവരവര്യം ചാനുശാസ്യേത്ഥമിഷ്ടമ് ।
• സ ച മുനിഗണമധ്യേ പ്രാപ്യ മുക്തിം തഥാന്തേ
• പ്രമഥപതിപദാബ്{}ജേ ലീനഹീനാങ്ഗസങ്ഗഃ ॥ ൬൪॥

സൂതഃ -

• ഇത്ഥം ശ്രുത്വാ മുനീന്ദ്രോഽസൌ ജൈഗീഷവ്യോഽവദദ്വിഭുമ് ।
• പ്രണിപത്യ പ്രഹൃഷ്ടാത്മാ ഷഷ്ഠാംശം വൈ ഷഡാസ്യതഃ ॥ ൬൫॥

ജൈഗീഷവ്യഃ -

• മാരമാരകജാനന്ദവസതേര്മഹിമാ കഥമ് ।
• നാമ്നാം സഹസ്രമേതച്ച വദ മേ കരുണാനിധേ ॥ ൬൬॥
• ക്ഷേത്രാണാം ചാപ്യഥാന്യാനാം മഹിമാം വദ സദ്ഗുരോ ।
• ശൂരതാരകസംഹര്തസ്ത്വത്തോ നാന്യോ ഗുരുര്മമ ॥ ൬൭॥
• തച്ഛ്രുത്വാ തു മുനേര്വാക്യം സ്കന്ദഃ പ്രാഹാഥ തം മുനിമ് ।

സ്കന്ദഃ -

• ആഗാമിന്യംശകേഽസ്മിംസ്തവ ഹൃദയമഹാനന്ദസിന്ധൌ വിധൂത്ഥ-
• പ്രാചുര്യപ്രകടൈഃ കരോപമമഹാസപ്തമാംശേ വിശേഷേ ।
• നാമ്നാം ചാപി സഹസ്രകം ഭഗവതഃ ശമ്ഭോഃ പ്രിയം കേവലം
• അസ്യാനന്ദവനസ്യ ചൈവ മഹിമാ ത്വം വൈ ശൃണുഷ്വാദരാത് ॥ ൬൮॥
• ഉഗ്രോംഽശഃ ശശിശേഖരേണ കഥിതോ വേദാന്തസാരാത്മകഃ
• ഷഷ്ഠഃ ഷണ്മുഖസത്തമായ സ ദദൌ തദ്ബ്രഹ്മണേ സോഽപ്യദാത് ।
• പുത്രായാത്മഭവായ തദ്ഭവഹരം ശ്രുത്വാ ഭവേദ് ജ്ഞാനവിത്
• ചോക്ത്വാ ജന്മശതായുതാര്ജിതമഹാപാപൈര്വിമുക്തോ ഭവേത് ॥ ൬൯॥
• ശ്രുത്വാംശമേതദ് ഭവതാപപാപഹം ശിവാസ്പദജ്ഞാനദമുത്തമം മഹത് ।
• ധ്യാനേന വിജ്ഞാനദമാത്മദര്ശനം ദദാതി ശമ്ഭോഃ പദഭക്തിഭാവതഃ ॥ ൭൦॥

സൂതഃ -

• അധ്യായപാദാധ്യയനേഽപി വിദ്യാ ബുദ്ധ്യാ ഹൃദി ധ്യായതി ബന്ധമുക്ത്യൈ ।
• സ്വാധ്യായതാന്തായ ശമാന്വിതായ ദദ്യാദ്യദദ്യാന്ന വിഭേദ്യമേതത് ॥ ൭൧॥
• ഇത്ഥം സൂതവചോദ്യതമഹാനന്ദൈകമോദപ്രഭാ
• ഭാസ്വദ്ഭാസ്കരസപ്രഭാ മുനിവരാഃ സംതുഷ്ടുവുസ്തം തദാ ।
• വേദോദ്യദ്വചനാശിഷാ പ്രഹൃഷിതാഃ സൂതം ജയേത്യുച്ചരന്
• പ്യാഹോ ജഗ്മുരതീവ ഹര്ഷിതഹൃദാ വിശ്വേശ്വരം വീക്ഷിതുമ് ॥ ൭൨॥
• ॥ ശങ്കരാഖ്യഃ ഷഷ്ഠാംശഃ സമാപ്തഃ॥
• ॥ സര്വം ശ്രീരമണാര്പണമസ്തു ॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ സുദര്ശനസ്യ മുക്തിലാഭവര്ണനം അംശശ്രവണഫലനിരൂപണം ച നാമ പഞ്ചാശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com