ഋഭുഗീതാ ൧൯ ॥ ബ്രഹ്മാനന്ദ പ്രകരണമ് ॥

ഋഭുഃ -

• ബ്രഹ്മാനന്ദം പ്രവക്ഷ്യാമി ത്രിഷു ലോകേഷു ദുര്ലഭമ് ।
• യസ്യ ശ്രവണമാത്രേണ സദാ മുക്തിമവാപ്നുയാത് ॥ ൧॥var was യുക്തിമാപ്നുയാത്
• പരമാനന്ദോഽഹമേവാത്മാ സര്വദാനന്ദമേവ ഹി ।
• പൂര്ണാനന്ദസ്വരൂപോഽഹം ചിദാനന്ദമയം ജഗത് ॥ ൨॥
• സദാനന്തമനന്തോഽഹം ബോധാനന്ദമിദം ജഗത് ।
• ബുദ്ധാനന്ദസ്വരൂപോഽഹം നിത്യാനന്ദമിദം മനഃ ॥ ൩॥
• കേവലാനന്ദമാത്രോഽഹം കേവലജ്ഞാനവാനഹമ് ।
• ഇതി ഭാവയ യത്നേന പ്രപഞ്ചോപശമായ വൈ ॥ ൪॥
• സദാ സത്യം പരം ജ്യോതിഃ സദാ സത്യാദിലക്ഷണഃ ।
• സദാ സത്യാദിഹീനാത്മാ സദാ ജ്യോതിഃ പ്രിയോ ഹ്യഹമ് ॥ ൫॥
• നാസ്തി മിഥ്യാപ്രപഞ്ചാത്മാ നാസ്തി മിഥ്യാ മനോമയഃ ।
• നാസ്തി മിഥ്യാഭിധാനാത്മാ നാസ്തി ചിത്തം ദുരാത്മവാന് ॥ ൬॥
• നാസ്തി മൂഢതരോ ലോകേ നാസ്തി മൂഢതമോ നരഃ ।
• അഹമേവ പരം ബ്രഹ്മ അഹമേവ സ്വയം സദാ ॥ ൭॥
• ഇദം പരം ച നാസ്ത്യേവ അഹമേവ ഹി കേവലമ് ।
• അഹം ബ്രഹ്മാസ്മി ശുദ്ധോഽസ്മി സര്വം ബ്രഹ്മൈവ കേവലമ് ॥ ൮॥
• ജഗത്സര്വം സദാ നാസ്തി ചിത്തമേവ ജഗന്മയമ് ।
• ചിത്തമേവ പ്രപഞ്ചാഖ്യം ചിത്തമേവ ശരീരകമ് ॥ ൯॥
• ചിത്തമേവ മഹാദോഷം ചിത്തമേവ ഹി ബാലകഃ ।
• ചിത്തമേവ മഹാത്മാഽയം ചിത്തമേവ മഹാനസത് ॥ ൧൦॥
• ചിത്തമേവ ഹി മിഥ്യാത്മാ ചിത്തം ശശവിഷാണവത് ।
• ചിത്തം നാസ്തി സദാ സത്യം ചിത്തം വന്ധ്യാകുമാരവത് ॥ ൧൧॥
• ചിത്തം ശൂന്യം ന സന്ദേഹോ ബ്രഹ്മൈവ സകലം ജഗത് ।
• അഹമേവ ഹി ചൈതന്യം അഹമേവ ഹി നിര്ഗുണമ് ॥ ൧൨॥
• മന ഏവ ഹി സംസാരം മന ഏവ ഹി മണ്ഡലമ് ।
• മന ഏവ ഹി ബന്ധത്വം മന ഏവ ഹി പാതകമ് ॥ ൧൩॥
• മന ഏവ മഹദ്ദുഃഖം മന ഏവ ശരീരകമ് ।
• മന ഏവ പ്രപഞ്ചാഖ്യം മന ഏവ കലേവരമ് ॥ ൧൪॥
• മന ഏവ മഹാസത്ത്വം മന ഏവ ചതുര്മുഖഃ ।
• മന ഏവ ഹരിഃ സാക്ഷാത് മന ഏവ ശിവഃ സ്മൃതഃ ॥ ൧൫॥
• മന ഏവേന്ദ്രജാലാഖ്യം മനഃ സങ്കല്പമാത്രകമ് ।
• മന ഏവ മഹാപാപം മന ഏവ ദുരാത്മവാന് ॥ ൧൬॥
• മന ഏവ ഹി സര്വാഖ്യം മന ഏവ മഹദ്ഭയമ് ।
• മന ഏവ പരം ബ്രഹ്മ മന ഏവ ഹി കേവലമ് ॥ ൧൭॥
• മന ഏവ ചിദാകാരം മന ഏവ മനായതേ ।
• ചിദേവ ഹി പരം രൂപം ചിദേവ ഹി പരം പദമ് ॥ ൧൮॥
• പരം ബ്രഹ്മാഹമേവാദ്യ പരം ബ്രഹ്മാഹമേവ ഹി ।
• അഹമേവ ഹി തൃപ്താത്മാ അഹമാനന്ദവിഗ്രഹഃ ॥ ൧൯॥
• അഹം ബുദ്ധിഃ പ്രവൃദ്ധാത്മാ നിത്യം നിശ്ചലനിര്മലഃ ।
• അഹമേവ ഹി ശാന്താത്മാ അഹമാദ്യന്തവര്ജിതഃ ॥ ൨൦॥
• അഹമേവ പ്രകാശാത്മാ അഹം ബ്രഹ്മൈവ കേവലമ് ।
• അഹം നിത്യോ ന സന്ദേഹ അഹം ബുദ്ധിഃ പ്രിയഃ സദാ ॥ ൨൧॥var was ബുദ്ധിപ്രിയഃ സദാ
• അഹമേവാഹമേവൈകഃ അഹമേവാഖിലാമൃതഃ ।
• അഹമേവ സ്വയം സിദ്ധഃ അഹമേവാനുമോദകഃ ॥ ൨൨॥
• അഹമേവ ത്വമേവാഹം സര്വാത്മാ സര്വവര്ജിതഃ ।
• അഹമേവ പരം ബ്രഹ്മ അഹമേവ പരാത്പരഃ ॥ ൨൩॥
• അഹങ്കാരം ന മേ ദുഃഖം ന മേ ദോഷം ന മേ സുഖമ് ।
• ന മേ ബുദ്ധിര്ന മേ ചിത്തം ന മേ ദേഹോ ന മേന്ദ്രിയമ് ॥ ൨൪॥
• ന മേ ഗോത്രം ന മേ നേത്രം ന മേ പാത്രം ന മേ തൃണമ് ।
• ന മേ ജപോ ന മേ മന്ത്രോ ന മേ ലോകോ ന മേ സുഹൃത് ॥ ൨൫॥
• ന മേ ബന്ധുര്ന മേ ശത്രുര്ന മേ മാതാ ന മേ പിതാ ।
• ന മേ ഭോജ്യം ന മേ ഭോക്താ ന മേ വൃത്തിര്ന മേ കുലമ് ॥ ൨൬॥
• ന മേ ജാതിര്ന മേ വര്ണഃ ന മേ ശ്രോത്രം ന മേ ക്വചിത് ।
• ന മേ ബാഹ്യം ന മേ ബുദ്ധിഃ സ്ഥാനം വാപി ന മേ വയഃ ॥ ൨൭॥
• ന മേ തത്ത്വം ന മേ ലോകോ ന മേ ശാന്തിര്ന മേ കുലമ് ।
• ന മേ കോപോ ന മേ കാമഃ കേവലം ബ്രഹ്മമാത്രതഃ ॥ ൨൮॥
• കേവലം ബ്രഹ്മമാത്രത്വാത് കേവലം സ്വയമേവ ഹി ।
• ന മേ രാഗോ ന മേ ലോഭോ ന മേ സ്തോത്രം ന മേ സ്മൃതിഃ ॥ ൨൯॥
• ന മേ മോഹോ ന മേ തൃഷ്ണാ ന മേ സ്നേഹോ ന മേ ഗുണഃ ।
• ന മേ കോശം ന മേ ബാല്യം ന മേ യൌവനവാര്ധകമ് ॥ ൩൦॥
• സര്വം ബ്രഹ്മൈകരൂപത്വാദേകം ബ്രഹ്മേതി നിശ്ചിതമ് ।
• ബ്രഹ്മണോഽന്യത് പരം നാസ്തി ബ്രഹ്മണോഽന്യന്ന കിഞ്ചന ॥ ൩൧॥
• ബ്രഹ്മണോഽന്യദിദം നാസ്തി ബ്രഹ്മണോഽന്യദിദം ന ഹി ।
• ആത്മനോഽന്യത് സദാ നാസ്തി ആത്മൈവാഹം ന സംശയഃ ॥ ൩൨॥
• ആത്മനോഽന്യത് സുഖം നാസ്തി ആത്മനോഽന്യദഹം ന ച ।
• ഗ്രാഹ്യഗ്രാഹകഹീനോഽഹം ത്യാഗത്യാജ്യവിവര്ജിതഃ ॥ ൩൩॥
• ന ത്യാജ്യം ന ച മേ ഗ്രാഹ്യം ന ബന്ധോ ന ച ഭുക്തിദമ് ।var was മുക്തിദമ്
• ന മേ ലോകം ന മേ ഹീനം ന ശ്രേഷ്ഠം നാപി ദൂഷണമ് ॥ ൩൪॥
• ന മേ ബലം ന ചണ്ഡാലോ ന മേ വിപ്രാദിവര്ണകമ് ।
• ന മേ പാനം ന മേ ഹ്രസ്വം ന മേ ക്ഷീണം ന മേ ബലമ് ॥ ൩൫॥
• ന മേ ശക്തിര്ന മേ ഭുക്തിര്ന മേ ദൈവം ന മേ പൃഥക് ।
• അഹം ബ്രഹ്മൈകമാത്രത്വാത് നിത്യത്വാന്യന്ന കിഞ്ചന ॥ ൩൬॥
• ന മതം ന ച മേ മിഥ്യാ ന മേ സത്യം വപുഃ ക്വചിത് ।
• അഹമിത്യപി നാസ്ത്യേവ ബ്രഹ്മ ഇത്യപി നാമ വാ ॥ ൩൭॥
• യദ്യദ്യദ്യത്പ്രപഞ്ചോഽസ്തി യദ്യദ്യദ്യദ്ഗുരോര്വചഃ ।
• തത്സര്വം ബ്രഹ്മ ഏവാഹം തത്സര്വം ചിന്മയം മതമ് ॥ ൩൮॥
• ചിന്മയം ചിന്മയം ബ്രഹ്മ സന്മയം സന്മയം സദാ ।
• സ്വയമേവ സ്വയം ബ്രഹ്മ സ്വയമേവ സ്വയം പരഃ ॥ ൩൯॥
• സ്വയമേവ സ്വയം മോക്ഷഃ സ്വയമേവ നിരന്തരഃ ।
• സ്വയമേവ ഹി വിജ്ഞാനം സ്വയമേവ ഹി നാസ്ത്യകമ് ॥ ൪൦॥
• സ്വയമേവ സദാസാരഃ സ്വയമേവ സ്വയം പരഃ ।
• സ്വയമേവ ഹി ശൂന്യാത്മാ സ്വയമേവ മനോഹരഃ ॥ ൪൧॥
• തൂഷ്ണീമേവാസനം സ്നാനം തൂഷ്ണീമേവാസനം ജപഃ ।
• തൂഷ്ണീമേവാസനം പൂജാ തൂഷ്ണീമേവാസനം പരഃ ॥ ൪൨॥
• വിചാര്യ മനസാ നിത്യമഹം ബ്രഹ്മേതി നിശ്ചിനു ।
• അഹം ബ്രഹ്മ ന സന്ദേഹഃ ഏവം തൂഷ്ണീംസ്ഥിതിര്ജപഃ ॥ ൪൩॥
• സര്വം ബ്രഹ്മൈവ നാസ്ത്യന്യത് സര്വം ജ്ഞാനമയം തപഃ ।
• സ്വയമേവ ഹി നാസ്ത്യേവ സര്വാതീതസ്വരൂപവാന് ॥ ൪൪॥
• വാചാതീതസ്വരൂപോഽഹം വാചാ ജപ്യമനര്ഥകമ് ।
• മാനസഃ പരമാര്ഥോഽയം ഏതദ്ഭേദമഹം ന മേ ॥ ൪൫॥
• കുണപം സര്വഭൂതാദി കുണപം സര്വസങ്ഗ്രഹമ് ।
• അസത്യം സര്വദാ ലോകമസത്യം സകലം ജഗത് ॥ ൪൬॥
• അസത്യമന്യദസ്തിത്വമസത്യം നാസ്തി ഭാഷണമ് ।
• അസത്യാകാരമസ്തിത്വം ബ്രഹ്മമാത്രം സദാ സ്വയമ് ॥ ൪൭॥
• അസത്യം വേദവേദാങ്ഗം അസത്യം ശാസ്ത്രനിശ്ചയഃ ।
• അസത്യം ശ്രവണം ഹ്യേതദസത്യം മനനം ച തത് ॥ ൪൮॥
• അസത്യം ച നിദിധ്യാസഃ സജാതീയമസത്യകമ് ।
• വിജാതീയമസത് പ്രോക്തം സത്യം സത്യം ന സംശയഃ ।
• സര്വം ബ്രഹ്മ സദാ ബ്രഹ്മ ഏകം ബ്രഹ്മ ചിദവ്യയമ് ॥ ൪൯॥
• ചേതോവിലാസജനിതം കില വിശ്വമേത-
• ദ്വിശ്വാധികസ്യ കൃപയാ പരിപൂര്ണഭാസ്യാത് ।
• നാസ്ത്യന്യതഃ ശ്രുതിശിരോത്ഥിതവാക്യമോഘ-
• ശാസ്ത്രാനുസാരികരണൈര്ഭവതേ വിമുക്ത്യൈ ॥ ൫൦॥

• ॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ബ്രഹ്മാനന്ദപ്രകരണം നാമ ഏകോനവിംശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com