Ribhu Gita - Siva Rahasya Purana Amsha 6

ഋഭുഗീതാ ൧൬ ॥ ചിദേവ-ത്വം പ്രകരണ നിരൂപണമ് ॥

ഋഭുഃ -

അത്യന്തം ദുര്ലഭം വക്ഷ്യേ വേദശാസ്ത്രാഗമാദിഷു ।
ശൃണ്വന്തു സാവധാനേന അസദേവ ഹി കേവലമ് ॥ ൧॥
യത്കിഞ്ചിദ് ദൃശ്യതേ ലോകേ യത്കിഞ്ചിദ്ഭാഷതേ സദാ ।
യത്കിഞ്ചിദ് ഭുജ്യതേ ക്വാപി തത്സര്വമസദേവ ഹി ॥ ൨॥
യദ്യത് കിഞ്ചിജ്ജപം വാപി സ്നാനം വാ ജലമേവ വാ ।
ആത്മനോഽന്യത് പരം യദ്യത് അസത് സര്വം ന സംശയഃ ॥ ൩॥
ചിത്തകാര്യം ബുദ്ധികാര്യം മായാകാര്യം തഥൈവ ഹി ।
ആത്മനോഽന്യത് പരം കിഞ്ചിത് തത്സര്വമസദേവ ഹി ॥ ൪॥
അഹന്തായാഃ പരം രൂപം ഇദംത്വം സത്യമിത്യപി ।
ആത്മനോഽന്യത് പരം കിഞ്ചിത് തത്സര്വമസദേവ ഹി ॥ ൫॥
നാനാത്വമേവ രൂപത്വം വ്യവഹാരഃ ക്വചിത് ക്വചിത് ।
ആത്മീയ ഏവ സര്വത്ര തത്സര്വമസദേവ ഹി ॥ ൬॥
തത്ത്വഭേദം ജഗദ്ഭേദം സര്വഭേദമസത്യകമ് ।
ഇച്ഛാഭേദം ജഗദ്ഭേദം തത്സര്വമസദേവ ഹി ॥ ൭॥
ദ്വൈതഭേദം ചിത്രഭേദം ജാഗ്രദ്ഭേദം മനോമയമ് ।
അഹംഭേദമിദംഭേദമസദേവ ഹി കേവലമ് ॥ ൮॥
സ്വപ്നഭേദം സുപ്തിഭേദം തുര്യഭേദമഭേദകമ് ।
കര്തൃഭേദം കാര്യഭേദം ഗുണഭേദം രസാത്മകമ് ।
ലിങ്ഗഭേദമിദംഭേദമസദേവ ഹി കേവലമ് ॥ ൯॥
ആത്മഭേദമസദ്ഭേദം സദ്ഭേദമസദണ്വപി ।
അത്യന്താഭാവസദ്ഭേദമ് അസദേവ ഹി കേവലമ് ॥ ൧൦॥
അസ്തിഭേദം നാസ്തിഭേദമഭേദം ഭേദവിഭ്രമഃ ।
ഭ്രാന്തിഭേദം ഭൂതിഭേദമസദേവ ഹി കേവലമ് ॥ ൧൧॥
പുനരന്യത്ര സദ്ഭേദമിദമന്യത്ര വാ ഭയമ് ।
പുണ്യഭേദം പാപഭേദം അസദേവ ഹി കേവലമ് ॥ ൧൨॥
സങ്കല്പഭേദം തദ്ഭേദം സദാ സര്വത്ര ഭേദകമ് ।
ജ്ഞാനാജ്ഞാനമയം സര്വം അസദേവ ഹി കേവലമ് ॥ ൧൩॥
ബ്രഹ്മഭേദം ക്ഷത്രഭേദം ഭൂതഭൌതികഭേദകമ് ।
ഇദംഭേദമഹംഭേദം അസദേവ ഹി കേവലമ് ॥ ൧൪॥
വേദഭേദം ദേവഭേദം ലോകാനാം ഭേദമീദൃശമ് ।
പഞ്ചാക്ഷരമസന്നിത്യമ് അസദേവ ഹി കേവലമ് ॥ ൧൫॥
ജ്ഞാനേന്ദ്രിയമസന്നിത്യം കര്മേന്ദ്രിയമസത്സദാ ।
അസദേവ ച ശബ്ദാഖ്യം അസത്യം തത്ഫലം തഥാ ॥ ൧൬॥
അസത്യം പഞ്ചഭൂതാഖ്യമസത്യം പഞ്ചദേവതാഃ ।
അസത്യം പഞ്ചകോശാഖ്യമ് അസദേവ ഹി കേവലമ് ॥ ൧൭॥
അസത്യം ഷഡ്വികാരാദി അസത്യം ഷട്കമൂര്മിണാമ് ।
അസത്യമരിഷഡ്വര്ഗമസത്യം ഷഡൃതുസ്തദാ ॥ ൧൮॥var was തഥാ
അസത്യം ദ്വാദശമാസാഃ അസത്യം വത്സരസ്തഥാ ।
അസത്യം ഷഡവസ്ഥാഖ്യം ഷട്കാലമസദേവ ഹി ॥ ൧൯॥
അസത്യമേവ ഷട്ശാസ്ത്രം അസദേവ ഹി കേവലമ് ।
അസദേവ സദാ ജ്ഞാനം അസദേവ ഹി കേവലമ് ॥ ൨൦॥
അനുക്തമുക്തം നോക്തം ച അസദേവ ഹി കേവലമ് ।
അസത്പ്രകരണം പ്രോക്തം സര്വവേദേഷു ദുര്ലഭമ് ॥ ൨൧॥
ഭൂയഃ ശൃണു ത്വം യോഗീന്ദ്ര സാക്ഷാന്മോക്ഷം ബ്രവീമ്യഹമ് ।
സന്മാത്രമഹമേവാത്മാ സച്ചിദാനന്ദ കേവലമ് ॥ ൨൨॥
സന്മയാനന്ദഭൂതാത്മാ ചിന്മയാനന്ദസദ്ഘനഃ ।
ചിന്മയാനന്ദസന്ദോഹചിദാനന്ദോ ഹി കേവലമ് ॥ ൨൩॥
ചിന്മാത്രജ്യോതിരാന്ദശ്ചിന്മാത്രജ്യോതിവിഗ്രഹഃ ।
ചിന്മാത്രജ്യോതിരീശാനഃ സര്വദാനന്ദകേവലമ് ॥ ൨൪॥
ചിന്മാത്രജ്യോതിരഖിലം ചിന്മാത്രജ്യോതിരസ്മ്യഹമ് ।
ചിന്മാത്രം സര്വമേവാഹം സര്വം ചിന്മാത്രമേവ ഹി ॥ ൨൫॥
ചിന്മാത്രമേവ ചിത്തം ച ചിന്മാത്രം മോക്ഷ ഏവ ച ।
ചിന്മാത്രമേവ മനനം ചിന്മാത്രം ശ്രവണം തഥാ ॥ ൨൬॥
ചിന്മാത്രമഹമേവാസ്മി സര്വം ചിന്മാത്രമേവ ഹി ।
ചിന്മാത്രം നിര്ഗുണം ബ്രഹ്മ ചിന്മാത്രം സഗുണം പരമ് ॥ ൨൭॥
ചിന്മാത്രമഹമേവ ത്വം സര്വം ചിന്മാത്രമേവ ഹി ।
ചിന്മാത്രമേവ ഹൃദയം ചിന്മാത്രം ചിന്മയം സദാ ॥ ൨൮॥
ചിദേവ ത്വം ചിദേവാഹം സര്വം ചിന്മാത്രമേവ ഹി ।
ചിന്മാത്രമേവ ശാന്തത്വം ചിന്മാത്രം ശാന്തിലക്ഷണമ് ॥ ൨൯॥
ചിന്മാത്രമേവ വിജ്ഞാനം ചിന്മാത്രം ബ്രഹ്മ കേവലമ് ।
ചിന്മാത്രമേവ സംകല്പം ചിന്മാത്രം ഭുവനത്രയമ് ॥ ൩൦॥
ചിന്മാത്രമേവ സര്വത്ര ചിന്മാത്രം വ്യാപകോ ഗുരുഃ ।
ചിന്മാത്രമേവ ശുദ്ധത്വം ചിന്മാത്രം ബ്രഹ്മ കേവലമ് ॥ ൩൧॥
ചിന്മാത്രമേവ ചൈതന്യം ചിന്മാത്രം ഭാസ്കരാദികമ് ।
ചിന്മാത്രമേവ സന്മാത്രം ചിന്മാത്രം ജഗദേവ ഹി ॥ ൩൨॥
ചിന്മാത്രമേവ സത്കര്മ ചിന്മാത്രം നിത്യമങ്ഗലമ് ।
ചിന്മാത്രമേവ ഹി ബ്രഹ്മ ചിന്മാത്രം ഹരിരേവ ഹി ॥ ൩൩॥
ചിന്മാത്രമേവ മൌനാത്മാ ചിന്മാത്രം സിദ്ധിരേവ ഹി ।
ചിന്മാത്രമേവ ജനിതം ചിന്മാത്രം സുഖമേവ ഹി ॥ ൩൪॥
ചിന്മാത്രമേവ ഗഗനം ചിന്മാത്രം പര്വതം ജലമ് ।
ചിന്മാത്രമേവ നക്ഷത്രം ചിന്മാത്രം മേഘമേവ ഹി ॥ ൩൫॥
ചിദേവ ദേവതാകാരം ചിദേവ ശിവപൂജനമ് ।
ചിന്മാത്രമേവ കാഠിന്യം ചിന്മാത്രം ശീതലം ജലമ് ॥ ൩൬॥
ചിന്മാത്രമേവ മന്തവ്യം ചിന്മാത്രം ദൃശ്യഭാവനമ് ।
ചിന്മാത്രമേവ സകലം ചിന്മാത്രം ഭുവനം പിതാ ॥ ൩൭॥
ചിന്മാത്രമേവ ജനനീ ചിന്മാത്രാന്നാസ്തി കിഞ്ചന ।
ചിന്മാത്രമേവ നയനം ചിന്മാത്രം ശ്രവണം സുഖമ് ॥ ൩൮॥
ചിന്മാത്രമേവ കരണം ചിന്മാത്രം കാര്യമീശ്വരമ് ।
ചിന്മാത്രം ചിന്മയം സത്യം ചിന്മാത്രം നാസ്തി നാസ്തി ഹി ॥ ൩൯॥
ചിന്മാത്രമേവ വേദാന്തം ചിന്മാത്രം ബ്രഹ്മ നിശ്ചയമ് ।
ചിന്മാത്രമേവ സദ്ഭാവി ചിന്മാത്രം ഭാതി നിത്യശഃ ॥ ൪൦॥
ചിദേവ ജഗദാകാരം ചിദേവ പരമം പദമ് ।
ചിദേവ ഹി ചിദാകാരം ചിദേവ ഹി ചിദവ്യയഃ ॥ ൪൧॥
ചിദേവ ഹി ശിവാകാരം ചിദേവ ഹി ശിവവിഗ്രഹഃ ।
ചിദാകാരമിദം സര്വം ചിദാകാരം സുഖാസുഖമ് ॥ ൪൨॥
ചിദേവ ഹി ജഡാകാരം ചിദേവ ഹി നിരന്തരമ് ।
ചിദേവകലനാകാരം ജീവാകാരം ചിദേവ ഹി ॥ ൪൩॥
ചിദേവ ദേവതാകാരം ചിദേവ ശിവപൂജനമ് ।
ചിദേവ ത്വം ചിദേവാഹം സര്വം ചിന്മാത്രമേവ ഹി ॥ ൪൪॥
ചിദേവ പരമാകാരം ചിദേവ ഹി നിരാമയമ് ।
ചിന്മാത്രമേവ സതതം ചിന്മാത്രം ഹി പരായണമ് ॥ ൪൫॥
ചിന്മാത്രമേവ വൈരാഗ്യം ചിന്മാത്രം നിര്ഗുണം സദാ ।
ചിന്മാത്രമേവ സഞ്ചാരം ചിന്മാത്രം മന്ത്രതന്ത്രകമ് ॥ ൪൬॥
ചിദാകാരമിദം വിശ്വം ചിദാകാരം ജഗത്ത്രയമ് ।
ചിദാകാരമഹങ്കാരം ചിദാകാരം പരാത് പരമ് ॥ ൪൭॥
ചിദാകാരമിദം ഭേദം ചിദാകാരം തൃണാദികമ് ।
ചിദാകാരം ചിദാകാശം ചിദാകാരമരൂപകമ് ॥ ൪൮॥
ചിദാകാരം മഹാനന്ദം ചിദാകാരം സുഖാത് സുഖമ് ।
ചിദാകാരം സുഖം ഭോജ്യം ചിദാകാരം പരം ഗുരുമ് ॥ ൪൯॥
ചിദാകാരമിദം വിശ്വം ചിദാകാരമിദം പുമാന് ।
ചിദാകാരമജം ശാന്തം ചിദാകാരമനാമയമ് ॥ ൫൦॥
ചിദാകാരം പരാതീതം ചിദാകാരം ചിദേവ ഹി ।
ചിദാകാരം ചിദാകാശം ചിദാകാശം ശിവായതേ ॥ ൫൧॥
ചിദാകാരം സദാ ചിത്തം ചിദാകാരം സദാഽമൃതമ് ।
ചിദാകാരം ചിദാകാശം തദാ സര്വാന്തരാന്തരമ് ॥ ൫൨॥
ചിദാകാരമിദം പൂര്ണം ചിദാകാരമിദം പ്രിയമ് ।
ചിദാകാരമിദം സര്വം ചിദാകാരമഹം സദാ ॥ ൫൩॥
ചിദാകാരമിദം സ്ഥാനം ചിദാകാരം ഹൃദമ്ബരമ് ।
ചിദാബോധം ചിദാകാരം ചിദാകാശം തതം സദാ ॥ ൫൪॥
ചിദാകാരം സദാ പൂര്ണം ചിദാകാരം മഹത്ഫലമ് ।
ചിദാകാരം പരം തത്ത്വം ചിദാകാരം പരം ഭവാന് ॥ ൫൫॥
ചിദാകാരം സദാമോദം ചിദാകാരം സദാ മൃതമ് ।
ചിദാകാരം പരം ബ്രഹ്മ ചിദഹം ചിദഹം സദാ ॥ ൫൬॥
ചിദഹം ചിദഹം ചിത്തം ചിത്തം സ്വസ്യ ന സംശയഃ ।
ചിദേവ ജഗദാകാരം ചിദേവ ശിവശങ്കരഃ ॥ ൫൭॥
ചിദേവ ഗഗനാകാരം ചിദേവ ഗണനായകമ് ।
ചിദേവ ഭുവനാകാരം ചിദേവ ഭവഭാവനമ് ॥ ൫൮॥
ചിദേവ ഹൃദയാകാരം ചിദേവ ഹൃദയേശ്വരഃ ।
ചിദേവ അമൃതാകാരം ചിദേവ ചലനാസ്പദമ് ॥ ൫൯॥
ചിദേവാഹം ചിദേവാഹം ചിന്മയം ചിന്മയം സദാ ।
ചിദേവ സത്യവിശ്വാസം ചിദേവ ബ്രഹ്മഭാവനമ് ॥ ൬൦॥
ചിദേവ പരമം ദേവം ചിദേവ ഹൃദയാലയമ് ।
ചിദേവ സകലാകാരം ചിദേവ ജനമണ്ഡലമ് ॥ ൬൧॥
ചിദേവ സര്വമാനന്ദം ചിദേവ പ്രിയഭാഷണമ് ।
ചിദേവ ത്വം ചിദേവാഹം സര്വം ചിന്മാത്രമേവ ഹി ॥ ൬൨॥
ചിദേവ പരമം ധ്യാനം ചിദേവ പരമര്ഹണമ് ।
ചിദേവ ത്വം ചിദേവാഹം സര്വം ചിന്മയമേവ ഹി ॥ ൬൩॥
ചിദേവ ത്വം പ്രകരണം സര്വവേദേഷു ദുര്ലഭമ് ।
സകൃച്ഛ്രവണമാത്രേണ ബ്രഹ്മൈവ ഭവതി ധ്രുവമ് ॥ ൬൪॥
യസ്യാഭിധ്യാനയോഗാജ്ജനിമൃതിവിവശാഃ ശാശ്വതം വൃത്തിഭിര്യേ
മായാമോഹൈര്വിഹീനാ ഹൃദുദരഭയജം ഛിദ്യതേ ഗ്രന്ഥിജാതമ് ।
വിശ്വം വിശ്വാധികരസം ഭവതി ഭവതോ ദര്ശനാദാപ്തകാമഃ
സോ നിത്യോ നിര്വികല്പോ ഭവതി ഭുവി സദാ ബ്രഹ്മഭൂതോഽന്തരാത്മാ ॥ ൬൫॥

॥ ഇതി ശ്രീശിവരഹസ്യേ ശങ്കരാഖ്യേ ഷഷ്ഠാംശേ ഋഭുനിദാഘസംവാദേ ചിദേവത്വംപ്രകരണവര്ണനം നാമ ഷോഡശോഽധ്യായഃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com