ଋଭୁଗୀତା ୧ ॥ ଋଭୁ ସ୍ତୁତି ॥
- ହେମାଦ୍ରିଂ କିଲ ମାତୁଲୁଙ୍ଗଫଲମିତ୍ଯାଦାଯ ମୋଦାଧିକୋ
- ମୌଢ୍ଯାନ୍ନାକନିଵାସିନାଂ ଭଯପରୈର୍ଵାକ୍ଯୈରିଵ ପ୍ରାର୍ଥିତଃ ।
- ନୀଲୀଶାମ୍ବରନୀଲମମ୍ବରତଲଂ ଜମ୍ବୂଫଲଂ ଭାଵଯନ୍
- ତଂ ମୁଞ୍ଚନ୍ ଗିରିମମ୍ବରଂ ପରିମୃଶନ୍ ଲମ୍ବୋଦରଃ ପାତୁ ମାମ୍ ॥ ୧॥
- ଵାମଂ ଯସ୍ଯ ଵପୁଃ ସମସ୍ତଜଗତାଂ ମାତା ପିତା ଚେତରତ୍
- ଯତ୍ପାଦାମ୍ବୁଜନୂପୁରୋଦ୍ଭଵରଵଃ ଶବ୍ଦାର୍ଥଵାକ୍ଯାସ୍ପଦମ୍ ।
- ଯନ୍ନେତ୍ରତ୍ରିତଯଂ ସମସ୍ତଜଗତାମାଲୋକହେତୁଃ ସଦା
- ପାଯାଦ୍ଦୈଵତସାର୍ଵଭୌମଗିରିଜାଲଙ୍କାରମୂର୍ତିଃ ଶିଵଃ ॥ ୨॥
ସୂତଃ -
- ଜୈଗୀଷଵ୍ଯଃ ପୁନର୍ନତ୍ଵା ଷଣ୍ମୁଖଂ ଶିଵସଂଭଵମ୍ ।
- ପପ୍ରଚ୍ଛ ହୃଷ୍ଟସ୍ତଂ ତତ୍ର ମୁନିଭିର୍ଗଣପୁଙ୍ଗଵୈଃ ॥ ୩॥
ଜୈଗୀଷଵ୍ଯଃ -
- କରୁଣାକର ସର୍ଵଜ୍ଞ ଶରଣାଗତପାଲକ ।
- ଅରୁଣାଧିପନେତ୍ରାବ୍ଜ ଚରଣସ୍ମରଣୋନ୍ମୁଖ ॥ ୪॥
- କରୁଣାଵରୁଣାମ୍ଭୋଧେ ତରଣିଦ୍ଯୁତିଭାସ୍କର ।
- ଦିଵ୍ଯଦ୍ଵାଦଶଲିଙ୍ଗାନାଂ ମହିମା ସଂଶ୍ରୁତୋ ମଯା ॥ ୫॥
- ତ୍ଵତ୍ତୋଽନ୍ଯତ୍ ଶ୍ରୋତୁମିଚ୍ଛାମି ଶିଵାଖ୍ଯାନମନୁତ୍ତମମ୍ ।
- ତ୍ଵଦ୍ଵାକ୍ଯକଞ୍ଜପୀଯୂଷଧାରାଭିଃ ପାଵଯାଶୁ ମାମ୍ ॥ ୬॥
ସୂତଃ -
- ଇତି ତସ୍ଯ ଗିରା ତୁଷ୍ଟଃ ଷଣ୍ମୁଖଃ ପ୍ରାହ ତଂ ମୁନିମ୍ ॥ ୭॥
ଶ୍ରୀଷଣ୍ମୁଖଃ -
- ଶୃଣୁ ତ୍ଵମଗଜାକାନ୍ତେନୋକ୍ତଂ ଜ୍ଞାନମହାର୍ଣଵମ୍ ।
- ଋଭଵେ ଯତ୍ପୁରା ପ୍ରାହ କୈଲାସେ ଶଙ୍କରଃ ସ୍ଵଯମ୍ ॥ ୮॥
- ବ୍ରହ୍ମସୂନୁଃ ପୁରା ଵିପ୍ରୋ ଗତ୍ଵା ନତ୍ଵା ମହେଶ୍ଵରମ୍ ।
- ଋଭୁର୍ଵିଭୁଂ ତଦା ଶଂଭୁଂ ତୁଷ୍ଟାଵ ପ୍ରଣତୋ ମୁଦା ॥ ୯॥
ଋଭୁଃ -
- ଦିଵାମଣିନିଶାପତିସ୍ଫୁଟକୃପୀଟଯୋନିସ୍ଫୁର-
- ଲ୍ଲଲାଟଭସିତୋଲ୍ଲସଦ୍ଵରତ୍ରିପୁଣ୍ଡ୍ରଭାଗୋଜ୍ଵଲମ୍ ।var was ତ୍ରିପୁଣ୍ଟ୍ର
- ଭଜାମି ଭୁଜଗାଙ୍ଗଦଂ ଵିଧୃତସାମିସୋମପ୍ରଭା-
- ଵିରାଜିତକପର୍ଦକଂ କରଟିକୃତ୍ତିଭୂଷ୍ଯତ୍କଟିମ୍ ॥ ୧୦॥
- ଫାଲାକ୍ଷାଧ୍ଵରଦକ୍ଷଶିକ୍ଷକଵଲକ୍ଷୋକ୍ଷେଶଵାହୋତ୍ତମ-
- ତ୍ର୍ଯକ୍ଷାକ୍ଷଯ୍ଯ ଫଲପ୍ରଦାଵଭସିତାଲଙ୍କାରରୁଦ୍ରାକ୍ଷଧୃକ୍ ।
- ଚକ୍ଷୁଃଶ୍ରୋତ୍ରଵରାଙ୍ଗହାରସୁମହାଵକ୍ଷଃସ୍ଥଲାଧ୍ଯକ୍ଷ ମାଂ
- ଭକ୍ଷ୍ଯୀଭୂତଗରପ୍ରଭକ୍ଷ ଭଗଵନ୍ ଭିକ୍ଷ୍ଵର୍ଚ୍ଯପାଦାମ୍ବୁଜ ॥ ୧୧॥
- ଗଙ୍ଗାଚନ୍ଦ୍ରକଲାଲଲାମ ଭଗଵନ୍ ଭୂଭୃତ୍କୁମାରୀସଖ
- ସ୍ଵାମିଂସ୍ତେ ପଦପଦ୍ମଭାଵମତୁଲଂ କଷ୍ଟାପହଂ ଦେହି ମେ ।
- ତୁଷ୍ଟୋଽହଂ ଶିପିଵିଷ୍ଟହୃଷ୍ଟମନସା ଭ୍ରଷ୍ଟାନ୍ନ ମନ୍ଯେ ହରି-
- ବ୍ରହ୍ମେନ୍ଦ୍ରାନମରାନ୍ ତ୍ରିଵିଷ୍ଟପଗତାନ୍ ନିଷ୍ଠା ହି ମେ ତାଦୃଶୀ ॥ ୧୨॥
- ନୃତ୍ତାଡଂବରସଜ୍ଜଟାପଟଲିକାଭ୍ରାମ୍ଯନ୍ମହୋଡୁଚ୍ଛଟା
- ତ୍ରୁଟ୍ଯତ୍ସୋମକଲାଲଲାମକଲିକା ଶମ୍ଯାକମୌଲୀନତମ୍ ।
- ଉଗ୍ରାନୁଗ୍ରଭଵୋଗ୍ରଦୁର୍ଗଜଗଦୁଦ୍ଧାରାଗ୍ରପାଦାମ୍ବୁଜଂ
- ରକ୍ଷୋଵକ୍ଷକୁଠାରଭୂତମୁମଯା ଵୀକ୍ଷେ ସୁକାମପ୍ରଦମ୍ ॥ ୧୩॥
- ଫାଲଂ ମେ ଭସିତତ୍ରିପୁଣ୍ଡ୍ରରଚିତଂ ତ୍ଵତ୍ପାଦପଦ୍ମାନତଂ ??
- ପାହୀଶାନ ଦଯାନିଧାନ ଭଗଵନ୍ ଫାଲାନଲାକ୍ଷ ପ୍ରଭୋ ।
- କଣ୍ଠୋ ମେ ଶିତିକଣ୍ଠନାମ ଭଵତୋ ରୁଦ୍ରାକ୍ଷଧୃକ୍ ପାହି ମାଂ
- କର୍ଣୌ ମେ ଭୁଜଗାଧିପୋରୁସୁମହାକର୍ଣ ପ୍ରଭୋ ପାହି ମାମ୍ ॥ ୧୪॥
- ନିତ୍ଯଂ ଶଙ୍କରନାମବୋଧିତକଥାସାରାଦରଂ ଶଙ୍କରଂ
- ଵାଚଂ ରୁଦ୍ରଜପାଦରାଂ ସୁମହତୀଂ ପଞ୍ଚାକ୍ଷରୀମିନ୍ଦୁଧୃକ୍ ।
- ବାହୂ ମେ ଶଶିଭୂଷଣୋତ୍ତମ ମହାଲିଙ୍ଗାର୍ଚନାଯୋଦ୍ଯତୌ
- ପାହି ପ୍ରେମରସାର୍ଦ୍ରଯାଽଦ୍ଯ ସୁଦୃଶା ଶମ୍ଭୋ ହିରଣ୍ଯପ୍ରଭ ॥ ୧୫॥
- ଭାସ୍ଵଦ୍ବାହୁଚତୁଷ୍ଟଯୋଜ୍ଜ୍ଵଲ ସଦା ନେତ୍ରେ ତ୍ରିନେତ୍ରେ ପ୍ରଭୋ
- ତ୍ଵଲ୍ଲିଙ୍ଗୋତ୍ତମଦର୍ଶନେନ ସୁତରାଂ ତୃପ୍ତୈଃ ସଦା ପାହି ମେ ।
- ପାଦୌ ମେ ହରିନେତ୍ରପୂଜିତପଦଦ୍ଵନ୍ଦ୍ଵାଵ ନିତ୍ଯଂ ପ୍ରଭୋ
- ତ୍ଵଲ୍ଲିଙ୍ଗାଲଯପ୍ରକ୍ରମପ୍ରଣତିଭିର୍ମାନ୍ଯୌ ଚ ଧନ୍ଯୌ ଵିଭୋ ॥ ୧୬॥
- ଧନ୍ଯସ୍ତ୍ଵଲ୍ଲିଙ୍ଗସଙ୍ଗେପ୍ଯନୁଦିନଗଲିତାନଙ୍ଗସଙ୍ଗାନ୍ତରଙ୍ଗଃ
- ପୁଂସାମର୍ଥୈକଶକ୍ତ୍ଯା ଯମନିଯମଵରୈର୍ଵିଶ୍ଵଵନ୍ଦ୍ଯ ପ୍ରଭୋ ଯଃ ।
- ଦତ୍ଵା ବିଲ୍ଵଦଲଂ ସଦମ୍ବୁଜଵରଂ କିଞ୍ଚିଜ୍ଜଲଂ ଵା ମୁହୁଃ
- ପ୍ରାପ୍ନୋତୀଶ୍ଵରପାଦପଙ୍କଜମୁମାନାଥାଦ୍ଯ ମୁକ୍ତିପ୍ରଦମ୍ ॥ ୧୭॥
- ଉମାରମଣ ଶଙ୍କର ତ୍ରିଦଶଵନ୍ଦ୍ଯ ଵେଦେଡ୍ଯ ହୃତ୍
- ତ୍ଵଦୀଯପରଭାଵତୋ ମମ ସଦୈଵ ନିର୍ଵାଣକୃତ୍ ।
- ଭଵାର୍ଣଵନିଵାସିନାଂ କିମୁ ଭଵତ୍ପଦାମ୍ଭୋରୁହ-
- ପ୍ରଭାଵଭଜନାଦରଂ ଭଵତି ମାନସଂ ମୁକ୍ତିଦମ୍ ॥ ୧୮॥
- ସଂସାରାର୍ଗଲପାଦବଦ୍ଧଜନତାସଂମୋଚନଂ ଭର୍ଗ ତେ
- ପାଦଦ୍ଵନ୍ଦ୍ଵମୁମାସନାଥ ଭଜତାଂ ସଂସାରସଂଭର୍ଜକମ୍ ।
- ତ୍ଵନ୍ନାମୋତ୍ତମଗର୍ଜନାଦଘକୁଲଂ ସନ୍ତର୍ଜିତଂ ଵୈ ଭଵେଦ୍
- ଦୁଃଖାନାଂ ପରିମାର୍ଜକଂ ତଵକୃପାଵୀକ୍ଷାଵତାଂ ଜାଯତେ ॥ ୧୯॥
- ଵିଧିମୁଣ୍ଡକରୋତ୍ତମୋରୁମେରୁକୋଦଣ୍ଡଖଣ୍ଡିତପୁରାଣ୍ଡଜଵାହବାଣ
- ପାହି କ୍ଷମାରଥଵିକର୍ଷସୁଵେଦଵାଜିହେଷାନ୍ତହର୍ଷିତପଦାମ୍ବୁଜ ଵିଶ୍ଵନାଥ ॥ ୨୦॥
- ଵିଭୂତୀନାମନ୍ତୋ ନ ହି ଖଲୁ ଭଵାନୀରମଣ ତେ
- ଭଵେ ଭାଵଂ କଶ୍ଚିତ୍ ତ୍ଵଯି ଭଵହ ଭାଗ୍ଯେନ ଲଭତେ ।
- ଅଭାଵଂ ଚାଜ୍ଞାନଂ ଭଵତି ଜନନାଦ୍ଯୈଶ୍ଚ ରହିତଃ
- ଉମାକାନ୍ତ ସ୍ଵାନ୍ତେ ଭଵଦଭଯପାଦଂ କଲଯତଃ ॥ ୨୧॥
- ଵରଂ ଶଂଭୋ ଭାଵୈର୍ଭଵଭଜନଭାଵେନ ନିତରାଂ
- ଭଵାମ୍ଭୋଧିର୍ନିତ୍ଯଂ ଭଵତି ଵିତତଃ ପାଂସୁବହୁଲଃ ।
- ଵିମୁକ୍ତିଂ ଭୁକ୍ତିଂ ଚ ଶ୍ରୁତିକଥିତଭସ୍ମାକ୍ଷଵରଧୃକ୍
- ଭଵେ ଭର୍ତୁଃ ସର୍ଵୋ ଭଵତି ଚ ସଦାନନ୍ଦମଧୁରଃ ॥ ୨୨॥
- ସୋମସାମଜସୁକୃତ୍ତିମୌଲିଧୃକ୍ ସାମସୀମଶିରସି ସ୍ତୁତପାଦ ।
- ସାମିକାଯଗିରିଜେଶ୍ଵର ଶମ୍ଭୋ ପାହି ମାମଖିଲଦୁଃଖସମୂହାତ୍ ॥ ୨୩॥
- ଭସ୍ମାଙ୍ଗରାଗ ଭୁଜଗାଙ୍ଗ ମହୋକ୍ଷସଙ୍ଗ
- ଗଙ୍ଗାମ୍ବୁସଙ୍ଗ ସୁଜଟା ନିଟିଲ ସ୍ଫୁଲିଙ୍ଗ ।
- ଲିଙ୍ଗାଙ୍ଗ ଭଙ୍ଗିତମନଙ୍ଗ ଵିହଙ୍ଗଵାହ-
- ସମ୍ପୂଜ୍ଯପାଦ ସଦସଙ୍ଗ ଜନାନ୍ତରଙ୍ଗ ॥ ୨୪॥
- ଵାତ୍ସଲ୍ଯଂ ମଯି ତାଦୃଶଂ ତଵନଚେଚ୍ଚନ୍ଦ୍ରାର୍ଧ ଚୂଡାମଣେ
- ଧିକ୍କୃତ୍ଯାପି ଵିମୁଚ୍ଯ ଵା ତ୍ଵଯି ଯତୋ ଧନ୍ଯୋ ଧରଣ୍ଯାମହମ୍ ।
- ସକ୍ଷାରଂ ଲଵଣାର୍ଣଵସ୍ଯ ସଲିଲଂ ଧାରା ଧରେଣ କ୍ଷଣାତ୍
- ଆଦାଯୋଜ୍ଝିତମାକ୍ଷିତୌ ହି ଜଗତାଂ ଆସ୍ଵାଦନୀଯାଂ ଦୃଶାମ୍ ॥ ୨୫॥
- ତ୍ଵତ୍ କୈଲାସଵରେ ଵିଶୋକହୃଦଯାଃ କ୍ରୋଧୋଜ୍ଝିତାଚ୍ଚାଣ୍ଡଜାଃ
- ତସ୍ମାନ୍ମାମପି ଭେଦବୁଦ୍ଧିରହିତଂ କୁର୍ଵୀଶ ତେଽନୁଗ୍ରହାତ୍ ।
- ତ୍ଵଦ୍ଵକ୍ତ୍ରାମଲ ନିର୍ଜରୋଜ୍ଝିତ ମହାସଂସାର ସଂତାପହଂ
- ଵିଜ୍ଞାନଂ କରୁଣାଽଦିଶାଦ୍ଯ ଭଗଵନ୍ ଲୋକାଵନାଯ ପ୍ରଭୋ ॥ ୨୬॥
- ସାରଙ୍ଗୀ ସିଂହଶାବଂ ସ୍ପୃଶତି ସୁତଧିଯା ନନ୍ଦିନୀ ଵ୍ଯାଘ୍ରପୋତଂ
- ମାର୍ଜାରୀ ହଂସବାଲଂ ପ୍ରଣଯପରଵଶା କେକିକାନ୍ତା ଭୁଜଙ୍ଗମ୍ ।
- ଵୈରାଣ୍ଯାଜନ୍ମଜାତାନ୍ଯପି ଗଲିତମଦା ଜନ୍ତଵୋଽନ୍ଯେ ତ୍ଯଜନ୍ତି
- ଭକ୍ତାସ୍ତ୍ଵତ୍ପାଦପଦ୍ମେ କିମୁ ଭଜନଵତଃ ସର୍ଵସିଦ୍ଧିଂ ଲଭନ୍ତେ ॥ ୨୭॥
ସ୍କନ୍ଦଃ -
- ଇତ୍ଥଂ ଋଭୁସ୍ତୁତିମୁମାଵରଜାନିରୀଶଃ
- ଶ୍ରୁତ୍ଵା ତମାହ ଗଣନାଥଵରୋ ମହେଶଃ ।
- ଜ୍ଞାନଂ ଭଵାମଯଵିନାଶକରଂ ତଦେଵ
- ତସ୍ମୈ ତଦେଵ କଥଯେ ଶୃଣୁ ପାଶମୁକ୍ତ୍ଯୈ ॥ ୨୮॥
- ॥ ଇତି ଶ୍ରୀଶିଵରହସ୍ଯେ ଶଂକରାଖ୍ଯେ ଷଷ୍ଠାଂଶେ ଋଭୁସ୍ତୁତିର୍ନାମ ପ୍ରଥମୋଽଧ୍ଯାଯଃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com