Ribhu Gita - Siva Rahasya Purana Amsha 6

ଋଭୁଗୀତା ୧୩ ॥ ସର୍ଵମ୍-ଆତ୍ମ-ପ୍ରକରଣମ୍ ॥

ଋଭୁଃ -

ଶୃଣୁଷ୍ଵ ଦୁର୍ଲଭଂ ଲୋକେ ସାରାତ୍ ସାରତରଂ ପରମ୍ ।
ଆତ୍ମରୂପମିଦଂ ସର୍ଵମାତ୍ମନୋଽନ୍ଯନ୍ନ କିଞ୍ଚନ ॥ ୧॥
ସର୍ଵମାତ୍ମାସ୍ତି ପରମା ପରମାତ୍ମା ପରାତ୍ମକଃ ।
ନିତ୍ଯାନନ୍ଦସ୍ଵରୂପାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨॥
ପୂର୍ଣରୂପୋ ମହାନାତ୍ମା ପୂତାତ୍ମା ଶାଶ୍ଵତାତ୍ମକଃ ।
ନିର୍ଵିକାରସ୍ଵରୂପାତ୍ମା ନିର୍ମଲାତ୍ମା ନିରାତ୍ମକଃ ॥ ୩॥
ଶାନ୍ତାଶାନ୍ତସ୍ଵରୂପାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ।
ଜୀଵାତ୍ମା ପରମାତ୍ମା ହି ଚିତ୍ତାଚିତ୍ତାତ୍ମଚିନ୍ମଯଃ ।
ଏକାତ୍ମା ଏକରୂପାତ୍ମା ନୈକାତ୍ମାତ୍ମଵିଵର୍ଜିତଃ ॥ ୪॥
ମୁକ୍ତାମୁକ୍ତସ୍ଵରୂପାତ୍ମା ମୁକ୍ତାମୁକ୍ତଵିଵର୍ଜିତଃ ।
ମୋକ୍ଷରୂପସ୍ଵରୂପାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୫॥
ଦ୍ଵୈତାଦ୍ଵୈତସ୍ଵରୂପାତ୍ମା ଦ୍ଵୈତାଦ୍ଵୈତଵିଵର୍ଜିତଃ ।
ସର୍ଵଵର୍ଜିତସର୍ଵାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୬॥
ମୁଦାମୁଦସ୍ଵରୂପାତ୍ମା ମୋକ୍ଷାତ୍ମା ଦେଵତାତ୍ମକଃ ।
ସଙ୍କଲ୍ପହୀନସାରାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୭॥
ନିଷ୍କଲାତ୍ମା ନିର୍ମଲାତ୍ମା ବୁଦ୍ଧ୍ଯାତ୍ମା ପୁରୁଷାତ୍ମକଃ ।
ଆନନ୍ଦାତ୍ମା ହ୍ଯଜାତ୍ମା ଚ ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୮॥
ଅଗଣ୍ଯାତ୍ମା ଗଣାତ୍ମା ଚ ଅମୃତାତ୍ମାମୃତାନ୍ତରଃ ।
ଭୂତଭଵ୍ଯଭଵିଷ୍ଯାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୯॥
ଅଖିଲାତ୍ମାଽନୁମନ୍ଯାତ୍ମା ମାନାତ୍ମା ଭାଵଭାଵନଃ ।
ତୁର୍ଯରୂପପ୍ରସନ୍ନାତ୍ମା ଆତ୍ମନୋଽନ୍ଯନ୍ନ କିଞ୍ଚନ ॥ ୧୦॥
ନିତ୍ଯଂ ପ୍ରତ୍ଯକ୍ଷରୂପାତ୍ମା ନିତ୍ଯପ୍ରତ୍ଯକ୍ଷନିର୍ଣଯଃ ।
ଅନ୍ଯହୀନସ୍ଵଭାଵାତ୍ମା ଆତ୍ମନୋଽନ୍ଯନ୍ନ କିଞ୍ଚନ ॥ ୧୧॥
ଅସଦ୍ଧୀନସ୍ଵଭାଵାତ୍ମା ଅନ୍ଯହୀନଃ ସ୍ଵଯଂ ପ୍ରଭୁଃ ।
ଵିଦ୍ଯାଵିଦ୍ଯାନ୍ଯଶୁଦ୍ଧାତ୍ମା ମାନାମାନଵିହୀନକଃ ॥ ୧୨॥
ନିତ୍ଯାନିତ୍ଯଵିହୀନାତ୍ମା ଇହାମୁତ୍ରଫଲାନ୍ତରଃ ।
ଶମାଦିଷଟ୍କଶୂନ୍ଯାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୩॥
ମୁମୁକ୍ଷୁତ୍ଵଂ ଚ ହୀନାତ୍ମା ଶବ୍ଦାତ୍ମା ଦମନାତ୍ମକଃ ।
ନିତ୍ଯୋପରତରୂପାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୪॥
ସର୍ଵକାଲତିତିକ୍ଷାତ୍ମା ସମାଧାନାତ୍ମନି ସ୍ଥିତଃ ।
ଶୁଦ୍ଧାତ୍ମା ସ୍ଵାତ୍ମନି ସ୍ଵାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୫॥
ଅନ୍ନକୋଶଵିହୀନାତ୍ମା ପ୍ରାଣକୋଶଵିଵର୍ଜିତଃ ।
ମନଃକୋଶଵିହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୬॥
ଵିଜ୍ଞାନକୋଶହୀନାତ୍ମା ଆନନ୍ଦାଦିଵିଵର୍ଜିତଃ ।
ପଞ୍ଚକୋଶଵିହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୭॥
ନିର୍ଵିକଲ୍ପସ୍ଵରୂପାତ୍ମା ସଵିକଲ୍ପଵିଵର୍ଜିତଃ ।
ଶବ୍ଦାନୁଵିଦ୍ଧହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୮॥var was ଶବ୍ଦାନୁଵିଧ୍ଯହୀନାତ୍ମା
ସ୍ଥୂଲଦେହଵିହୀନାତ୍ମା ସୂକ୍ଷ୍ମଦେହଵିଵର୍ଜିତଃ ।
କାରଣାଦିଵିହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୧୯॥
ଦୃଶ୍ଯାନୁଵିଦ୍ଧଶୂନ୍ଯାତ୍ମା ହ୍ଯାଦିମଧ୍ଯାନ୍ତଵର୍ଜିତଃ ।
ଶାନ୍ତା ସମାଧିଶୂନ୍ଯାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୦॥
ପ୍ରଜ୍ଞାନଵାକ୍ଯହୀନାତ୍ମା ଅହଂ ବ୍ରହ୍ମାସ୍ମିଵର୍ଜିତଃ ।
ତତ୍ତ୍ଵମସ୍ଯାଦିଵାକ୍ଯାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୧॥
ଅଯମାତ୍ମେତ୍ଯଭାଵାତ୍ମା ସର୍ଵାତ୍ମା ଵାକ୍ଯଵର୍ଜିତଃ ।
ଓଂକାରାତ୍ମା ଗୁଣାତ୍ମା ଚ ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୨॥
ଜାଗ୍ରଦ୍ଧୀନସ୍ଵରୂପାତ୍ମା ସ୍ଵପ୍ନାଵସ୍ଥାଵିଵର୍ଜିତଃ ।
ଆନନ୍ଦରୂପପୂର୍ଣାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୩॥
ଭୂତାତ୍ମା ଚ ଭଵିଷ୍ଯାତ୍ମା ହ୍ଯକ୍ଷରାତ୍ମା ଚିଦାତ୍ମକଃ ।
ଅନାଦିମଧ୍ଯରୂପାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୪॥
ସର୍ଵସଙ୍କଲ୍ପହୀନାତ୍ମା ସ୍ଵଚ୍ଛଚିନ୍ମାତ୍ରମକ୍ଷଯଃ ।
ଜ୍ଞାତୃଜ୍ଞେଯାଦିହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୫॥
ଏକାତ୍ମା ଏକହୀନାତ୍ମା ଦ୍ଵୈତାଦ୍ଵୈତଵିଵର୍ଜିତଃ ।
ସ୍ଵଯମାତ୍ମା ସ୍ଵଭାଵାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୬॥
ତୁର୍ଯାତ୍ମା ନିତ୍ଯମାତ୍ମା ଚ ଯତ୍କିଞ୍ଚିଦିଦମାତ୍ମକଃ ।
ଭାନାତ୍ମା ମାନହୀନାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୭॥var was ମାନାତ୍ମା
ଵାଚାଵଧିରନେକାତ୍ମା ଵାଚ୍ଯାନନ୍ଦାତ୍ମନନ୍ଦକଃ ।
ସର୍ଵହୀନାତ୍ମସର୍ଵାତ୍ମା ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୮॥
ଆତ୍ମାନମେଵ ଵୀକ୍ଷସ୍ଵ ଆତ୍ମାନଂ ଭାଵଯ ସ୍ଵକମ୍ ।
ସ୍ଵସ୍ଵାତ୍ମାନଂ ସ୍ଵଯଂ ଭୁଂକ୍ଷ୍ଵ ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୨୯॥
ସ୍ଵାତ୍ମାନମେଵ ସନ୍ତୁଷ୍ଯ ଆତ୍ମାନଂ ସ୍ଵଯମେଵ ହି ।
ସ୍ଵସ୍ଵାତ୍ମାନଂ ସ୍ଵଯଂ ପଶ୍ଯେତ୍ ସ୍ଵମାତ୍ମାନଂ ସ୍ଵଯଂ ଶ୍ରୁତମ୍ ॥ ୩୦॥
ସ୍ଵମାତ୍ମନି ସ୍ଵଯଂ ତୃପ୍ତଃ ସ୍ଵମାତ୍ମାନଂ ସ୍ଵଯଂଭରଃ ।
ସ୍ଵମାତ୍ମାନଂ ସ୍ଵଯଂ ଭସ୍ମ ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୩୧॥
ସ୍ଵମାତ୍ମାନଂ ସ୍ଵଯଂ ମୋଦଂ ସ୍ଵମାତ୍ମାନଂ ସ୍ଵଯଂ ପ୍ରିଯମ୍ ।
ସ୍ଵମାତ୍ମାନମେଵ ମନ୍ତଵ୍ଯଂ ହ୍ଯାତ୍ମନୋଽନ୍ଯନ୍ନ କିଞ୍ଚନ ॥ ୩୨॥
ଆତ୍ମାନମେଵ ଶ୍ରୋତଵ୍ଯଂ ଆତ୍ମାନଂ ଶ୍ରଵଣଂ ଭଵ ।
ଆତ୍ମାନଂ କାମଯେନ୍ନିତ୍ଯମ୍ ଆତ୍ମାନଂ ନିତ୍ଯମର୍ଚଯ ॥ ୩୩॥
ଆତ୍ମାନଂ ଶ୍ଲାଘଯେନ୍ନିତ୍ଯମାତ୍ମାନଂ ପରିପାଲଯ ।
ଆତ୍ମାନଂ କାମଯେନ୍ନିତ୍ଯମ୍ ଆତ୍ମନୋଽନ୍ଯନ୍ନ କିଞ୍ଚନ ॥ ୩୪॥
ଆତ୍ମୈଵେଯମିଯଂ ଭୂମିଃ ଆତ୍ମୈଵେଦମିଦଂ ଜଲମ୍ ।
ଆତ୍ମୈଵେଦମିଦଂ ଜ୍ଯୋତିରାତ୍ମନୋଽନ୍ଯନ୍ନ କିଞ୍ଚନ ॥ ୩୫॥
ଆତ୍ମୈଵାଯମଯଂ ଵାଯୁରାତ୍ମୈଵେଦମିଦମ୍ ଵିଯତ୍ ।
ଆତ୍ମୈଵାଯମହଙ୍କାରଃ ଆତ୍ମନୋଽନ୍ଯନ୍ନ କିଞ୍ଚନ ॥ ୩୬॥
ଆତ୍ମୈଵେଦମିଦଂ ଚିତ୍ତଂ ଆତ୍ମୈଵେଦମିଦଂ ମନଃ ।
ଆତ୍ମୈଵେଯମିଯଂ ବୁଦ୍ଧିରାତ୍ମନୋଽନ୍ଯନ୍ନ କିଞ୍ଚନ ॥ ୩୭॥
ଆତ୍ମୈଵାଯମଯଂ ଦେହଃ ଆତ୍ମୈଵାଯମଯଂ ଗୁଣଃ ।
ଆତ୍ମୈଵେଦମିଦଂ ତତ୍ତ୍ଵମ୍ ଆତ୍ମନୋଽନ୍ଯନ୍ନ କିଞ୍ଚନ ॥ ୩୮॥
ଆତ୍ମୈଵାଯମଯଂ ମନ୍ତ୍ରଃ ଆତ୍ମୈଵାଯମଯଂ ଜପଃ ।
ଆତ୍ମୈଵାଯମଯଂ ଲୋକଃ ଆତ୍ମନୋଽନ୍ଯନ୍ନ କିଞ୍ଚନ ॥ ୩୯॥
ଆତ୍ମୈଵାଯମଯଂ ଶବ୍ଦଃ ଆତ୍ମୈଵାଯମଯଂ ରସଃ ।
ଆତ୍ମୈଵାଯମଯଂ ସ୍ପର୍ଶଃ ଆତ୍ମନୋଽନ୍ଯନ୍ନ କିଞ୍ଚନ ॥ ୪୦॥
ଆତ୍ମୈଵାଯମଯଂ ଗନ୍ଧଃ ଆତ୍ମୈଵାଯମଯଂ ଶମଃ ।
ଆତ୍ମୈଵେଦମିଦଂ ଦୁଃଖଂ ଆତ୍ମୈଵେଦମିଦଂ ସୁଖମ୍ ॥ ୪୧॥
ଆତ୍ମୀଯମେଵେଦଂ ଜଗତ୍ ଆତ୍ମୀଯଃ ସ୍ଵପ୍ନ ଏଵ ହି ।
ସୁଷୁପ୍ତଂ ଚାପ୍ଯଥାତ୍ମୀଯଂ ଆତ୍ମନୋଽନ୍ଯନ୍ନ କିଞ୍ଚନ ॥ ୪୨॥
ଆତ୍ମୈଵ କାର୍ଯମାତ୍ମୈଵ ପ୍ରାଯୋ ହ୍ଯାତ୍ମୈଵମଦ୍ଵଯମ୍ ।
ଆତ୍ମୀଯମେଵମଦ୍ଵୈତଂ ଆତ୍ମନୋଽନ୍ଯନ୍ନ କିଞ୍ଚନ ॥ ୪୩॥
ଆତ୍ମୀଯମେଵାଯଂ କୋଽପି ଆତ୍ମୈଵେଦମିଦଂ କ୍ଵଚିତ୍ ।
ଆତ୍ମୈଵାଯମଯଂ ଲୋକଃ ଆତ୍ମନୋଽନ୍ଯନ୍ନ କିଞ୍ଚନ ॥ ୪୪॥
ଆତ୍ମୈଵେଦମିଦଂ ଦୃଶ୍ଯଂ ଆତ୍ମୈଵାଯମଯଂ ଜନଃ ।
ଆତ୍ମୈଵେଦମିଦଂ ସର୍ଵଂ ଆତ୍ମନୋଽନ୍ଯନ୍ନ କିଞ୍ଚନ ॥ ୪୫॥
ଆତ୍ମୈଵାଯମଯଂ ଶଂଭୁଃ ଆତ୍ମୈଵେଦମିଦଂ ଜଗତ୍ ।
ଆତ୍ମୈଵାଯମଯଂ ବ୍ରହ୍ମା ଆତ୍ମନୋଽନ୍ଯନ୍ନ କିଞ୍ଚନ ॥ ୪୬॥
ଆତ୍ମୈଵାଯମଯଂ ସୂର୍ଯ ଆତ୍ମୈଵେଦମିଦଂ ଜଡମ୍ ।
ଆତ୍ମୈଵେଦମିଦଂ ଧ୍ଯାନମ୍ ଆତ୍ମୈଵେଦମିଦମ୍ ଫଲମ୍ ॥ ୪୭॥
ଆତ୍ମୈଵାଯମଯଂ ଯୋଗଃ ସର୍ଵମାତ୍ମମଯଂ ଜଗତ୍ ।
ସର୍ଵମାତ୍ମମଯଂ ଭୂତଂ ଆତ୍ମନୋଽନ୍ଯନ୍ନ କିଞ୍ଚନ ॥ ୪୮॥
ସର୍ଵମାତ୍ମମଯଂ ଭାଵି ସର୍ଵମାତ୍ମମଯଂ ଗୁରୁଃ ।
ସର୍ଵମାତ୍ମମଯଂ ଶିଷ୍ଯ ଆତ୍ମନୋଽନ୍ଯନ୍ନ କିଞ୍ଚନ ॥ ୪୯॥
ସର୍ଵମାତ୍ମମଯଂ ଦେଵଃ ସର୍ଵମାତ୍ମମଯଂ ଫଲମ୍ ।
ସର୍ଵମାତ୍ମମଯଂ ଲକ୍ଷ୍ଯଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୦॥
ସର୍ଵମାତ୍ମମଯଂ ତୀର୍ଥଂ ସର୍ଵମାତ୍ମମଯଂ ସ୍ଵଯମ୍ ।
ସର୍ଵମାତ୍ମମଯଂ ମୋକ୍ଷଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୧॥
ସର୍ଵମାତ୍ମମଯଂ କାମଂ ସର୍ଵମାତ୍ମମଯଂ କ୍ରିଯା ।
ସର୍ଵମାତ୍ମମଯଂ କ୍ରୋଧଃ ଆତ୍ମନୋଽନ୍ଯନ୍ନ କିଞ୍ଚନ ॥ ୫୨॥
ସର୍ଵମାତ୍ମମଯଂ ଵିଦ୍ଯା ସର୍ଵମାତ୍ମମଯଂ ଦିଶଃ ।
ସର୍ଵମାତ୍ମମଯଂ ଲୋଭଃ ଆତ୍ମନୋଽନ୍ଯନ୍ନ କିଞ୍ଚନ ॥ ୫୩॥
ସର୍ଵମାତ୍ମମଯଂ ମୋହଃ ସର୍ଵମାତ୍ମମଯଂ ଭଯମ୍ ।
ସର୍ଵମାତ୍ମମଯଂ ଚିନ୍ତା ଆତ୍ମନୋଽନ୍ଯନ୍ନ କିଞ୍ଚନ ॥ ୫୪॥
ସର୍ଵମାତ୍ମମଯଂ ଧୈର୍ଯଂ ସର୍ଵମାତ୍ମମଯଂ ଧ୍ରୁଵମ୍ ।
ସର୍ଵମାତ୍ମମଯଂ ସତ୍ଯଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୫॥
ସର୍ଵମାତ୍ମମଯଂ ବୋଧଂ ସର୍ଵମାତ୍ମମଯଂ ଦୃଢମ୍ ।
ସର୍ଵମାତ୍ମମଯଂ ମେଯଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୬॥
ସର୍ଵମାତ୍ମମଯଂ ଗୁହ୍ଯଂ ସର୍ଵମାତ୍ମମଯଂ ଶୁଭମ୍ ।
ସର୍ଵମାତ୍ମମଯଂ ଶୁଦ୍ଧଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୭॥
ସର୍ଵମାତ୍ମମଯଂ ସର୍ଵଂ ସତ୍ଯମାତ୍ମା ସଦାତ୍ମକଃ ।
ପୂର୍ଣମାତ୍ମା କ୍ଷଯଂ ଚାତ୍ମା ପରମାତ୍ମା ପରାତ୍ପରଃ ॥ ୫୮॥
ଇତୋଽପ୍ଯାତ୍ମା ତତୋଽପ୍ଯାତ୍ମା ହ୍ଯାତ୍ମୈଵାତ୍ମା ତତସ୍ତତଃ ।
ସର୍ଵମାତ୍ମମଯଂ ସତ୍ଯଂ ଆତ୍ମନୋଽନ୍ଯନ୍ନ କିଞ୍ଚନ ॥ ୫୯॥
ସର୍ଵମାତ୍ମସ୍ଵରୂପଂ ହି ଦୃଶ୍ଯାଦୃଶ୍ଯଂ ଚରାଚରମ୍ ।
ସର୍ଵମାତ୍ମମଯଂ ଶ୍ରୁତ୍ଵା ମୁକ୍ତିମାପ୍ନୋତି ମାନଵଃ ॥ ୬୦॥
ସ୍ଵତନ୍ତ୍ରଶକ୍ତିର୍ଭଗଵାନୁମାଧଵୋ
ଵିଚିତ୍ରକାଯାତ୍ମକଜାଗ୍ରତସ୍ଯ ।
ସୁକାରଣଂ କାର୍ଯପରଂପରାଭିଃ
ସ ଏଵ ମାଯାଵିତତୋଽଵ୍ଯଯାତ୍ମା ॥ ୬୧॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ସର୍ଵମାତ୍ମପ୍ରକରଣଂ ନାମ ତ୍ରଯୋଦଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com