Ribhu Gita - Siva Rahasya Purana Amsha 6

ଋଭୁଗୀତା ୪୭ ॥ ଋଭୁ-କୃତ ସଂଗ୍ରହୋପଦେଶ ଵର୍ଣନମ୍ ॥

ଋଭୁଃ -

ନିଦାଘ ଶୃଣୁ ଵକ୍ଷ୍ଯାମି ଦୃଢୀକରଣମସ୍ତୁ ତେ ।
ଶିଵପ୍ରସାଦପର୍ଯନ୍ତମେଵଂ ଭାଵଯ ନିତ୍ଯଶଃ ॥ ୧॥
ଅହମେଵ ପରଂ ବ୍ରହ୍ମ ଅହମେଵ ସଦାଶିଵଃ ।
ଅହମେଵ ହି ଚିନ୍ମାତ୍ରମହମେଵ ହି ନିର୍ଗୁଣଃ ॥ ୨॥
ଅହମେଵ ହି ଚୈତନ୍ଯମହମେଵ ହି ନିଷ୍କଲଃ ।
ଅହମେଵ ହି ଶୂନ୍ଯାତ୍ମା ଅହମେଵ ହି ଶାଶ୍ଵତଃ ॥ ୩॥
ଅହମେଵ ହି ସର୍ଵାତ୍ମା ଅହମେଵ ହି ଚିନ୍ମଯଃ ।
ଅହମେଵ ପରଂ ବ୍ରହ୍ମ ଅହମେଵ ମହେଶ୍ଵରଃ ॥ ୪॥
ଅହମେଵ ଜଗତ୍ସାକ୍ଷୀ ଅହମେଵ ହି ସଦ୍ଗୁରୁଃ ।
ଅହମେଵ ହି ମୁକ୍ତାତ୍ମା ଅହମେଵ ହି ନିର୍ମଲଃ ॥ ୫॥
ଅହମେଵାହମେଵୋକ୍ତଃ ଅହମେଵ ହି ଶଙ୍କରଃ ।
ଅହମେଵ ହି ମହାଵିଷ୍ଣୁରହମେଵ ଚତୁର୍ମୁଖଃ ॥ ୬॥
ଅହମେଵ ହି ଶୁଦ୍ଧାତ୍ମା ହ୍ଯହମେଵ ହ୍ଯହଂ ସଦା ।
ଅହମେଵ ହି ନିତ୍ଯାତ୍ମା ଅହମେଵ ହି ମତ୍ପରଃ ॥ ୭॥
ଅହମେଵ ମନୋରୂପଂ ଅହମେଵ ହି ଶୀତଲଃ ।
ଅହମେଵାନ୍ତର୍ଯାମୀ ଚ ଅହମେଵ ପରେଶ୍ଵରଃ ॥ ୮॥
ଏଵମୁକ୍ତପ୍ରକାରେଣ ଭାଵଯିତ୍ଵା ସଦା ସ୍ଵଯମ୍ ।
ଦ୍ରଵ୍ଯୋଽସ୍ତି ଚେନ୍ନ କୁର୍ଯାତ୍ତୁ ଵଂଚକେନ ଗୁରୁଂ ପରମ୍ ॥ ୯॥
କୁମ୍ଭୀପାକେ ସୁଘୋରେ ତୁ ତିଷ୍ଠତ୍ଯେଵ ହି କଲ୍ପକାନ୍ ।
ଶ୍ରୁତ୍ଵା ନିଦାଘଶ୍ଚୋଥାଯ ପୁତ୍ରଦାରାନ୍ ପ୍ରଦତ୍ତଵାନ୍ ॥ ୧୦॥
ସ୍ଵଶରୀରଂ ଚ ପୁତ୍ରତ୍ଵେ ଦତ୍ଵା ସାଦରପୂର୍ଵକମ୍ ।
ଧନଧାନ୍ଯଂ ଚ ଵସ୍ତ୍ରାଦୀନ୍ ଦତ୍ଵାଽତିଷ୍ଠତ୍ ସମୀପତଃ ॥ ୧୧॥
ଗୁରୋସ୍ତୁ ଦକ୍ଷିଣାଂ ଦତ୍ଵା ନିଦାଘସ୍ତୁଷ୍ଟଵାନୃଭୁମ୍ ।
ସନ୍ତୁଷ୍ଟୋଽସ୍ମି ମହାଭାଗ ତଵ ଶୁଶ୍ରୂଷଯା ସଦା ॥ ୧୨॥
ବ୍ରହ୍ମଵିଜ୍ଞାନମାପ୍ତୋଽସି ସୁକୃତାର୍ଥୋ ନ ସଂଶଯଃ ।
ବ୍ରହ୍ମରୂପମିଦଂ ଚେତି ନିଶ୍ଚଯଂ କୁରୁ ସର୍ଵଦା ॥ ୧୩॥
ନିଶ୍ଚଯାଦପରୋ ମୋକ୍ଷୋ ନାସ୍ତି ନାସ୍ତୀତି ନିଶ୍ଚିନୁ ।
ନିଶ୍ଚଯଂ କାରଣଂ ମୋକ୍ଷୋ ନାନ୍ଯତ୍ କାରଣମସ୍ତି ଵୈ ॥ ୧୪॥
ସକଲଭୁଵନସାରଂ ସର୍ଵଵେଦାନ୍ତସାରଂ
ସମରସଗୁରୁସାରଂ ସର୍ଵଵେଦାର୍ଥସାରମ୍ ।
ସକଲଭୁଵନସାରଂ ସଚ୍ଚିଦାନନ୍ଦସାରଂ
ସମରସଜଯସାରଂ ସର୍ଵଦା ମୋକ୍ଷସାରମ୍ ॥ ୧୫॥
ସକଲଜନନମୋକ୍ଷଂ ସର୍ଵଦା ତୁର୍ଯମୋକ୍ଷଂ
ସକଲସୁଲଭମୋକ୍ଷଂ ସର୍ଵସାମ୍ରାଜ୍ଯମୋକ୍ଷମ୍ ।
ଵିଷଯରହିତମୋକ୍ଷଂ ଵିତ୍ତସଂଶୋଷମୋକ୍ଷଂ
ଶ୍ରଵଣମନନମାତ୍ରାଦେତଦତ୍ଯନ୍ତମୋକ୍ଷମ୍ ॥ ୧୬॥
ତଚ୍ଛୁଶ୍ରୂଷା ଚ ଭଵତଃ ତଚ୍ଛ୍ରୁତ୍ଵା ଚ ପ୍ରପେଦିରେ ।
ଏଵଂ ସର୍ଵଵଚଃ ଶ୍ରୁତ୍ଵା ନିଦାଘଋଷିଦର୍ଶିତମ୍ ।
ଶୁକାଦଯୋ ମହାନ୍ତସ୍ତେ ପରଂ ବ୍ରହ୍ମମଵାପ୍ନୁଵନ୍ ॥ ୧୭॥
ଶ୍ରୁତ୍ଵା ଶିଵଜ୍ଞାନମିଦଂ ଋଭୁସ୍ତଦା
ନିଦାଘମାହେତ୍ଥଂ ମୁନୀନ୍ଦ୍ରମଧ୍ଯେ ।
ମୁଦା ହି ତେଽପି ଶ୍ରୁତିଶବ୍ଦସାରଂ
ଶ୍ରୁତ୍ଵା ପ୍ରଣମ୍ଯାହୁରତୀଵ ହର୍ଷାତ୍ ॥ ୧୮॥

ମୁନଯଃ -

ପିତା ମାତା ଭ୍ରାତା ଗୁରୁରସି ଵଯସ୍ଯୋଽଥ ହିତକୃତ୍
ଅଵିଦ୍ଯାବ୍ଧେଃ ପାରଂ ଗମଯସି ଭଵାନେଵ ଶରଣମ୍ ।
ବଲେନାସ୍ମାନ୍ ନୀତ୍ଵା ମମ ଵଚନବଲେନୈଵ ସୁଗମଂ
ପଥଂ ପ୍ରାପ୍ତ୍ଯୈଵାର୍ଥୈଃ ଶିଵଵଚନତୋଽସ୍ମାନ୍ ସୁଖଯସି ॥ ୧୯॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ଋଭୁକୃତସଂଗ୍ରହୋପଦେଶଵର୍ଣନଂ ନାମ ସପ୍ତଚତ୍ଵାରିଂଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com