Ribhu Gita - Siva Rahasya Purana Amsha 6

ଋଭୁଗୀତା ୩୩ ॥ ସଚ୍ଚିଦାନନ୍ଦ ରୂପତା ପ୍ରକରଣମ୍ ॥

ଋଭୁଃ -

ଵକ୍ଷ୍ଯେ ପରଂ ବ୍ରହ୍ମମାତ୍ରମନୁତ୍ପନ୍ନମିଦଂ ଜଗତ୍ ।
ସତ୍ପଦାନନ୍ଦମାତ୍ରୋଽହମନୁତ୍ପନ୍ନମିଦଂ ଜଗତ୍ ॥ ୧॥
ଆତ୍ମୈଵାହଂ ପରଂ ବ୍ରହ୍ମ ନାନ୍ଯତ୍ ସଂସାରଦୃଷ୍ଟଯଃ ।
ସତ୍ପଦାନନ୍ଦମାତ୍ରୋଽହମନୁତ୍ପନ୍ନମିଦଂ ଜଗତ୍ ॥ ୨॥
ସତ୍ପଦାନନ୍ଦମାତ୍ରୋଽହଂ ଚିତ୍ପଦାନନ୍ଦଵିଗ୍ରହମ୍ ।
ଅହମେଵାହମେଵୈକମହମେଵ ପରାତ୍ ପରଃ ॥ ୩॥
ସଚ୍ଚିଦାନଦମେଵୈକମହଂ ବ୍ରହ୍ମୈଵ କେଵଲମ୍ ।
ଅହମସ୍ମି ସଦା ଭାମି ଏଵଂ ରୂପଂ କୁତୋଽପ୍ଯସତ୍ ॥ ୪॥
ତ୍ଵମିତ୍ଯେଵଂ ପରଂ ବ୍ରହ୍ମ ଚିନ୍ମଯାନନ୍ଦରୂପଵାନ୍ ।
ଚିଦାକାରଂ ଚିଦାକାଶଂ ଚିଦେଵ ପରମଂ ସୁଖମ୍ ॥ ୫॥
ଆତ୍ମୈଵାହମସନ୍ନାହଂ କୂଟସ୍ଥୋଽହଂ ଗୁରୁଃ ପରଃ ।
କାଲଂ ନାସ୍ତି ଜଗନ୍ନାସ୍ତି କଲ୍ମଷତ୍ଵାନୁଭାଵନମ୍ ॥ ୬॥
ଅହମେଵ ପରଂ ବ୍ରହ୍ମ ଅହମେଵ ସଦା ଶିଵଃ ।
ଶୁଦ୍ଧଚୈତନ୍ଯ ଏଵାହଂ ଶୁଦ୍ଧସତ୍ଵାନୁଭାଵନଃ ॥ ୭॥
ଅଦ୍ଵଯାନନ୍ଦମାତ୍ରୋଽହମଵ୍ଯଯୋଽହଂ ମହାନହମ୍ ।
ସର୍ଵଂ ବ୍ରହ୍ମୈଵ ସତତଂ ସର୍ଵଂ ବ୍ରହ୍ମୈଵ ନିର୍ମଲଃ ॥ ୮॥
ସର୍ଵଂ ବ୍ରହ୍ମୈଵ ନାନ୍ଯୋଽସ୍ତି ସର୍ଵଂ ବ୍ରହ୍ମୈଵ ଚେତନଃ ।
ସର୍ଵପ୍ରକାଶରୂପୋଽହଂ ସର୍ଵପ୍ରିଯମନୋ ହ୍ଯହମ୍ ॥ ୯॥
ଏକାନ୍ତୈକପ୍ରକାଶୋଽହଂ ସିଦ୍ଧାସିଦ୍ଧଵିଵର୍ଜିତଃ ।
ସର୍ଵାନ୍ତର୍ଯାମିରୂପୋଽହଂ ସର୍ଵସାକ୍ଷିତ୍ଵଲକ୍ଷଣମ୍ ॥ ୧୦॥
ଶମୋ ଵିଚାରସନ୍ତୋଷରୂପୋଽହମିତି ନିଶ୍ଚଯଃ ।
ପରମାତ୍ମା ପରଂ ଜ୍ଯୋତିଃ ପରଂ ପରଵିଵର୍ଜିତଃ ॥ ୧୧॥
ପରିପୂର୍ଣସ୍ଵରୂପୋଽହଂ ପରମାତ୍ମାଽହମଚ୍ଯୁତଃ ।
ସର୍ଵଵେଦସ୍ଵରୂପୋଽହଂ ସର୍ଵଶାସ୍ତ୍ରସ୍ଯ ନିର୍ଣଯଃ ॥ ୧୨॥
ଲୋକାନନ୍ଦସ୍ଵରୂପୋଽହଂ ମୁଖ୍ଯାନନ୍ଦସ୍ଯ ନିର୍ଣଯଃ ।
ସର୍ଵଂ ବ୍ରହ୍ମୈଵ ଭୂର୍ନାସ୍ତି ସର୍ଵଂ ବ୍ରହ୍ମୈଵ କାରଣମ୍ ॥ ୧୩॥
ସର୍ଵଂ ବ୍ରହ୍ମୈଵ ନାକାର୍ଯଂ ସର୍ଵଂ ବ୍ରହ୍ମ ସ୍ଵଯଂ ଵରଃ ।
ନିତ୍ଯାକ୍ଷରୋଽହଂ ନିତ୍ଯୋଽହଂ ସର୍ଵକଲ୍ଯାଣକାରକମ୍ ॥ ୧୪॥
ସତ୍ଯଜ୍ଞାନପ୍ରକାଶୋଽହଂ ମୁଖ୍ଯଵିଜ୍ଞାନଵିଗ୍ରହଃ ।
ତୁର୍ଯାତୁର୍ଯପ୍ରକାଶୋଽହଂ ସିଦ୍ଧାସିଦ୍ଧାଦିଵର୍ଜିତଃ ॥ ୧୫॥
ସର୍ଵଂ ବ୍ରହ୍ମୈଵ ସତତଂ ସର୍ଵଂ ବ୍ରହ୍ମ ନିରନ୍ତରମ୍ ।
ସର୍ଵଂ ବ୍ରହ୍ମ ଚିଦାକାଶଂ ନିତ୍ଯବ୍ରହ୍ମ ନିରଞ୍ଜନମ୍ ॥ ୧୬॥
ସର୍ଵଂ ବ୍ରହ୍ମ ଗୁଣାତୀତଂ ସର୍ଵଂ ବ୍ରହ୍ମୈଵ କେଵଲମ୍ ।
ସର୍ଵଂ ବ୍ରହ୍ମୈଵ ଇତ୍ଯେଵଂ ନିଶ୍ଚଯଂ କୁରୁ ସର୍ଵଦା ॥ ୧୭॥
ବ୍ରହ୍ମୈଵ ସର୍ଵମିତ୍ଯେଵଂ ସର୍ଵଦା ଦୃଢନିଶ୍ଚଯଃ ।
ସର୍ଵଂ ବ୍ରହ୍ମୈଵ ଇତ୍ଯେଵଂ ନିଶ୍ଚଯିତ୍ଵା ସୁଖୀ ଭଵ ॥ ୧୮॥
ସର୍ଵଂ ବ୍ରହ୍ମୈଵ ସତତଂ ଭାଵାଭାଵୌ ଚିଦେଵ ହି ।
ଦ୍ଵୈତାଦ୍ଵୈତଵିଵାଦୋଽଯଂ ନାସ୍ତି ନାସ୍ତି ନ ସଂଶଯଃ ॥ ୧୯॥
ସର୍ଵଵିଜ୍ଞାନମାତ୍ରୋଽହଂ ସର୍ଵଂ ବ୍ରହ୍ମେତି ନିଶ୍ଚଯଃ ।
ଗୁହ୍ଯାଦ୍ଗୁହ୍ଯତରଂ ସୋଽହଂ ଗୁଣାତୀତୋଽହମଦ୍ଵଯଃ ॥ ୨୦॥
ଅନ୍ଵଯଵ୍ଯତିରେକଂ ଚ କାର୍ଯାକାର୍ଯଂ ଵିଶୋଧଯ ।
ସଚ୍ଚିଦାନନ୍ଦରୂପୋଽହମନୁତ୍ପନ୍ନମିଦଂ ଜଗତ୍ ॥ ୨୧॥
ବ୍ରହ୍ମୈଵ ସର୍ଵମେଵେଦଂ ଚିଦାକାଶମିଦଂ ଜଗତ୍ ।
ବ୍ରହ୍ମୈଵ ପରମାନନ୍ଦଂ ଆକାଶସଦୃଶଂ ଵିଭୁ ॥ ୨୨॥
ବ୍ରହ୍ମୈଵ ସଚ୍ଚିଦାନନ୍ଦଂ ସଦା ଵାଚାମଗୋଚରମ୍ ।
ବ୍ରହ୍ମୈଵ ସର୍ଵମେଵେଦମସ୍ତି ନାସ୍ତୀତି କେଚନ ॥ ୨୩॥
ଆନନ୍ଦଭାଵନା କିଞ୍ଚିତ୍ ସଦସନ୍ମାତ୍ର ଏଵ ହି ।
ବ୍ରହ୍ମୈଵ ସର୍ଵମେଵେଦଂ ସଦା ସନ୍ମାତ୍ରମେଵ ହି ॥ ୨୪॥
ବ୍ରହ୍ମୈଵ ସର୍ଵମେଵଦଂ ଚିଦ୍ଘନାନନ୍ଦଵିଗ୍ରହମ୍ ।
ବ୍ରହ୍ମୈଵ ସଚ୍ଚ ସତ୍ଯଂ ଚ ସନାତନମହଂ ମହତ୍ ॥ ୨୫॥
ବ୍ରହ୍ମୈଵ ସଚ୍ଚିଦାନନ୍ଦଂ ଓତପ୍ରୋତେଵ ତିଷ୍ଠତି ।
ବ୍ରହ୍ମୈଵ ସଚ୍ଚିଦାନନ୍ଦଂ ସର୍ଵାକାରଂ ସନାତନମ୍ ॥ ୨୬॥
ବ୍ରହ୍ମୈଵ ସଚ୍ଚିଦାନନ୍ଦଂ ପରମାନଦମଵ୍ଯଯମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ମାଯାତୀତଂ ନିରଞ୍ଜନମ୍ ॥ ୨୭॥
ବ୍ରହ୍ମୈଵ ସଚ୍ଚିଦାନନ୍ଦଂ ସତ୍ତାମାତ୍ରଂ ସୁଖାତ୍ ସୁଖମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ଚିନ୍ମାତ୍ରୈକସ୍ଵରୂପକମ୍ ॥ ୨୮॥
ବ୍ରହ୍ମୈଵ ସଚ୍ଚିଦାନନ୍ଦଂ ସର୍ଵଭେଦଵିଵର୍ଜିତମ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ନାନାକାରମିଵ ସ୍ଥିତମ୍ ॥ ୨୯॥
ବ୍ରହ୍ମୈଵ ସଚ୍ଚିଦାନନ୍ଦଂ କର୍ତା ଚାଵସରୋଽସ୍ତି ହି ।
ସଚ୍ଚିଦାନଦଂ ବ୍ରହ୍ମୈଵ ପରଂ ଜ୍ଯୋତିଃ ସ୍ଵରୂପକମ୍ ॥ ୩୦॥
ବ୍ରହ୍ମୈଵ ସଚ୍ଚିଦାନନ୍ଦଂ ନିତ୍ଯନିଶ୍ଚଲମଵ୍ଯଯମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ଵାଚାଵଧିରସାଵଯମ୍ ॥ ୩୧॥
ବ୍ରହ୍ମୈଵ ସଚ୍ଚିଦାନନ୍ଦଂ ସ୍ଵଯମେଵ ସ୍ଵଯଂ ସଦା ।
ବ୍ରହ୍ମୈଵ ସଚ୍ଚିଦାନନ୍ଦଂ ନ କରୋତି ନ ତିଷ୍ଠତି ॥ ୩୨॥
ବ୍ରହ୍ମୈଵ ସଚ୍ଚିଦାନନ୍ଦଂ ନ ଗଚ୍ଛତି ନ ତିଷ୍ଠତି ।
ବ୍ରହ୍ମୈଵ ସଚ୍ଚିଦାନନ୍ଦଂ ବ୍ରହ୍ମଣୋଽନ୍ଯନ୍ନ କିଞ୍ଚନ ॥ ୩୩॥
ବ୍ରହ୍ମୈଵ ସଚ୍ଚିଦାନନ୍ଦଂ ନ ଶୁକ୍ଲଂ ନ ଚ କୃଷ୍ଣକମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ସର୍ଵାଧିଷ୍ଠାନମଵ୍ଯଯମ୍ ॥ ୩୪॥
ବ୍ରହ୍ମୈଵ ସଚ୍ଚିଦାନନ୍ଦଂ ନ ତୂଷ୍ଣୀଂ ନ ଵିଭାଷଣମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ସତ୍ତ୍ଵଂ ନାହଂ ନ କିଞ୍ଚନ ॥ ୩୫॥
ବ୍ରହ୍ମୈଵ ସଚ୍ଚିଦାନନ୍ଦଂ ପରାତ୍ପରମନୁଦ୍ଭଵମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ତତ୍ତ୍ଵାତୀତଂ ମହୋତ୍ସଵମ୍ ॥ ୩୬॥
ବ୍ରହ୍ମୈଵ ସଚ୍ଚିଦାନନ୍ଦଂ ପରମାକାଶମାତତମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ସର୍ଵଦା ଗୁରୁରୂପକମ୍ ॥ ୩୭॥
ବ୍ରହ୍ମୈଵ ସଚ୍ଚିଦାନନ୍ଦଂ ସଦା ନିର୍ମଲଵିଗ୍ରହମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ଶୁଦ୍ଧଚୈତନ୍ଯମାତତମ୍ ॥ ୩୮॥
ବ୍ରହ୍ମୈଵ ସଚ୍ଚିଦାନନ୍ଦଂ ସ୍ଵପ୍ରକାଶାତ୍ମରୂପକମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ନିଶ୍ଚଯଂ ଚାତ୍ମକାରଣମ୍ ॥ ୩୯॥
ବ୍ରହ୍ମୈଵ ସଚ୍ଚିଦାନନ୍ଦଂ ସ୍ଵଯମେଵ ପ୍ରକାଶତେ ।
ବ୍ରହ୍ମୈଵ ସଚ୍ଚିଦାନନ୍ଦଂ ନାନାକାର ଇତି ସ୍ଥିତମ୍ ॥ ୪୦॥
ବ୍ରହ୍ମୈଵ ସଚ୍ଚିଦାକାରଂ ଭ୍ରାନ୍ତାଧିଷ୍ଠାନରୂପକମ୍ ।
ବ୍ରହ୍ମୈଵ ସଚ୍ଚିଦାନନ୍ଦଂ ସର୍ଵଂ ନାସ୍ତି ନ ମେ ସ୍ଥିତମ୍ ॥ ୪୧॥
ଵାଚାମଗୋଚରଂ ବ୍ରହ୍ମ ସଚ୍ଚିଦାନଦଵିଗ୍ରହମ୍ ।
ସଚ୍ଚିଦାନନ୍ଦରୂପୋଽହମନୁତ୍ପନ୍ନମିଦମ୍ ଜଗତ୍ ॥ ୪୨॥
ବ୍ରହ୍ମୈଵେଦଂ ସଦା ସତ୍ଯଂ ନିତ୍ଯମୁକ୍ତଂ ନିରଞ୍ଜନମ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ଏକମେଵ ସଦା ସୁଖମ୍ ॥ ୪୩॥
ସଚ୍ଚିଦାନନ୍ଦଂ ବ୍ରହ୍ମୈଵ ପୂର୍ଣାତ୍ ପୂର୍ଣତରଂ ମହତ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ସର୍ଵଵ୍ଯାପକମୀଶ୍ଵରମ୍ ॥ ୪୪॥
ସଚ୍ଚିଦାନନ୍ଦଂ ବ୍ରହ୍ମୈଵ ନାମରୂପପ୍ରଭାସ୍ଵରମ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ଅନନ୍ତାନନ୍ଦନିର୍ମଲମ୍ ॥ ୪୫॥
ସଚ୍ଚିଦାନନ୍ଦଂ ବ୍ରହ୍ମୈଵ ପରମାନନ୍ଦଦାଯକମ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ସନ୍ମାତ୍ରଂ ସଦସତ୍ପରମ୍ ॥ ୪୬॥
ସଚ୍ଚିଦାନନ୍ଦଂ ବ୍ରହ୍ମୈଵ ସର୍ଵେଷାଂ ପରମଵ୍ଯଯମ୍ ।
ସଚ୍ଚିଦାନନ୍ଦଂ ବ୍ରହ୍ମୈଵ ମୋକ୍ଷରୂପଂ ଶୁଭାଶୁଭମ୍ ॥ ୪୭॥
ସଚ୍ଚିଦାନନ୍ଦଂ ବ୍ରହ୍ମୈଵ ପରିଚ୍ଛିନ୍ନଂ ନ ହି କ୍ଵଚିତ୍ ।
ବ୍ରହ୍ମୈଵ ସର୍ଵମେଵେଦଂ ଶୁଦ୍ଧବୁଦ୍ଧମଲେପକମ୍ ॥ ୪୮॥
ସଚ୍ଚିଦାନନ୍ଦରୂପୋଽହମନୁତ୍ପନ୍ନମିଦଂ ଜଗତ୍ ।
ଏତତ୍ ପ୍ରକରଣଂ ସତ୍ଯଂ ସଦ୍ଯୋମୁକ୍ତିପ୍ରଦାଯକମ୍ ॥ ୪୯॥
ସର୍ଵଦୁଃଖକ୍ଷଯକରଂ ସର୍ଵଵିଜ୍ଞାନଦାଯକମ୍ ।
ନିତ୍ଯାନନ୍ଦକରଂ ସତ୍ଯଂ ଶାନ୍ତିଦାନ୍ତିପ୍ରଦାଯକମ୍ ॥ ୫୦॥
ଯସ୍ତ୍ଵନ୍ତକାନ୍ତକମହେଶ୍ଵରପାଦପଦ୍ମ-
ଲୋଲମ୍ବସପ୍ରଭହୃଦା ପରିଶୀଲକଶ୍ଚ ।
ଵୃନ୍ଦାରଵୃନ୍ଦଵିନତାମଲଦିଵ୍ଯପାଦୋ
ଭାଵୋ ଭଵୋଦ୍ଭଵକୃପାଵଶତୋ ଭଵେଚ୍ଚ ॥ ୫୧॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ସଚ୍ଚିଦାନନ୍ଦରୂପତାପ୍ରକରଣଂ ନାମ ତ୍ରଯସ୍ତ୍ରିଂଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com