ଋଭୁଗୀତା ୧୨ ॥ ଵିଦେହମୁକ୍ତି ପ୍ରକରଣ ଵର୍ଣନମ୍ ॥

ଋଭୁଃ -

• ଦେହମୁକ୍ତିପ୍ରକରଣଂ ନିଦାଘ ଶୃଣୁ ଦୁର୍ଲଭମ୍ ।
• ତ୍ଯକ୍ତାତ୍ଯକ୍ତଂ ନ ସ୍ମରତି ଵିଦେହାନ୍ମୁକ୍ତ ଏଵ ସଃ ॥ ୧॥
• ବ୍ରହ୍ମରୂପଃ ପ୍ରଶାନ୍ତାତ୍ମା ନାନ୍ଯରୂପଃ ସଦା ସୁଖୀ ।
• ସ୍ଵସ୍ଥରୂପୋ ମହାମୌନୀ ଵିଦେହାନ୍ମୁକ୍ତ ଏଵ ସଃ ॥ ୨॥
• ସର୍ଵାତ୍ମା ସର୍ଵଭୂତାତ୍ମା ଶାନ୍ତାତ୍ମା ମୁକ୍ତିଵର୍ଜିତଃ ।
• ଏକାତ୍ମଵର୍ଜିତଃ ସାକ୍ଷୀ ଵିଦେହାନ୍ମୁକ୍ତ ଏଵ ସଃ ॥ ୩॥
• ଲକ୍ଷ୍ଯାତ୍ମା ଲାଲିତାତ୍ମାହଂ ଲୀଲାତ୍ମା ସ୍ଵାତ୍ମମାତ୍ରକଃ ।
• ତୂଷ୍ଣୀମାତ୍ମା ସ୍ଵଭାଵାତ୍ମା ଵିଦେହାନ୍ମୁକ୍ତ ଏଵ ସଃ ॥ ୪॥
• ଶୁଭ୍ରାତ୍ମା ସ୍ଵଯମାତ୍ମାହଂ ସର୍ଵାତ୍ମା ସ୍ଵାତ୍ମମାତ୍ରକଃ ।
• ଅଜାତ୍ମା ଚାମୃତାତ୍ମା ହି ଵିଦେହାନ୍ମୁକ୍ତ ଏଵ ସଃ ॥ ୫॥
• ଆନନ୍ଦାତ୍ମା ପ୍ରିଯଃ ସ୍ଵାତ୍ମା ମୋକ୍ଷାତ୍ମା କୋଽପି ନିର୍ଣଯଃ ।
• ଇତ୍ଯେଵମିତି ନିଧ୍ଯାଯୀ ଵିଦେହାନ୍ମୁକ୍ତ ଏଵ ସଃ ॥ ୬॥
• ବ୍ରହ୍ମୈଵାହଂ ଚିଦେଵାହଂ ଏକଂ ଵାପି ନ ଚିନ୍ତ୍ଯତେ ।
• ଚିନ୍ମାତ୍ରେଣୈଵ ଯସ୍ତିଷ୍ଠେଦ୍ଵିଦେହାନ୍ମୁକ୍ତ ଏଵ ସଃ ॥ ୭॥
• ନିଶ୍ଚଯଂ ଚ ପରିତ୍ଯଜ୍ଯ ଅହଂ ବ୍ରହ୍ମେତି ନିଶ୍ଚଯଃ ।
• ଆନନ୍ଦଭୂରିଦେହସ୍ତୁ ଵିଦେହାନ୍ମୁକ୍ତ ଏଵ ସଃ ॥ ୮॥
• ସର୍ଵମସ୍ତୀତି ନାସ୍ତୀତି ନିଶ୍ଚଯଂ ତ୍ଯଜ୍ଯ ତିଷ୍ଠତି ।
• ଅହଂ ବ୍ରହ୍ମାସ୍ମି ନାନ୍ଯୋଽସ୍ମି ଵିଦେହାନ୍ମୁକ୍ତ ଏଵ ସଃ ॥ ୯॥
• କିଞ୍ଚିତ୍ କ୍ଵଚିତ୍ କଦାଚିଚ୍ଚ ଆତ୍ମାନଂ ନ ସ୍ମରତ୍ଯସୌ ।
• ସ୍ଵସ୍ଵଭାଵେନ ଯସ୍ତିଷ୍ଠେତ୍ ଵିଦେହାନ୍ମୁକ୍ତ ଏଵ ସଃ ॥ ୧୦॥
• ଅହମାତ୍ମା ପରୋ ହ୍ଯାତ୍ମା ଚିଦାତ୍ମାହଂ ନ ଚିନ୍ତ୍ଯତେ ।
• ସ୍ଥାସ୍ଯାମୀତ୍ଯପି ଯୋ ଯୁକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୧୧॥
• ତୂଷ୍ଣୀମେଵ ସ୍ଥିତସ୍ତୂଷ୍ଣୀଂ ସର୍ଵଂ ତୂଷ୍ଣୀଂ ନ କିଞ୍ଚନ ।
• ଅହମର୍ଥପରିତ୍ଯକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୧୨॥
• ପରମାତ୍ମା ଗୁଣାତୀତଃ ସର୍ଵାତ୍ମାପି ନ ସଂମତଃ ।
• ସର୍ଵଭାଵାନ୍ମହାତ୍ମା ଯୋ ଵିଦେହାନ୍ମୁକ୍ତ ଏଵ ସଃ ॥ ୧୩॥
• କାଲଭେଦଂ ଦେଶଭେଦଂ ଵସ୍ତୁଭେଦଂ ସ୍ଵଭେଦକମ୍ ।
• କିଞ୍ଚିଦ୍ଭେଦଂ ନ ଯସ୍ଯାସ୍ତି ଵିଦେହାନ୍ମୁକ୍ତ ଏଵ ସଃ ॥ ୧୪॥
• ଅହଂ ତ୍ଵଂ ତଦିଦଂ ସୋଽଯଂ କିଞ୍ଚିଦ୍ଵାପି ନ ଵିଦ୍ଯତେ ।
• ଅତ୍ଯନ୍ତସୁଖମାତ୍ରୋଽହଂ ଵିଦେହାନ୍ମୁକ୍ତ ଏଵ ସଃ ॥ ୧୫॥
• ନିର୍ଗୁଣାତ୍ମା ନିରାତ୍ମା ହି ନିତ୍ଯାତ୍ମା ନିତ୍ଯନିର୍ଣଯଃ ।
• ଶୂନ୍ଯାତ୍ମା ସୂକ୍ଷ୍ମରୂପୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୧୬॥
• ଵିଶ୍ଵାତ୍ମା ଵିଶ୍ଵହୀନାତ୍ମା କାଲାତ୍ମା କାଲହେତୁକଃ ।
• ଦେଵାତ୍ମା ଦେଵହୀନୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୧୭॥
• ମାତ୍ରାତ୍ମା ମେଯହୀନାତ୍ମା ମୂଢାତ୍ମାଽନାତ୍ମଵର୍ଜିତଃ ।
• କେଵଲାତ୍ମା ପରାତ୍ମା ଚ ଵିଦେହାନ୍ମୁକ୍ତ ଏଵ ସଃ ॥ ୧୮॥
• ସର୍ଵତ୍ର ଜଡହୀନାତ୍ମା ସର୍ଵେଷାମନ୍ତରାତ୍ମକଃ ।
• ସର୍ଵେଷାମିତି ଯସ୍ତୂକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୧୯॥
• ସର୍ଵସଙ୍କଲ୍ପହୀନେତି ସଚ୍ଚିଦାନନ୍ଦମାତ୍ରକଃ ।
• ସ୍ଥାସ୍ଯାମୀତି ନ ଯସ୍ଯାନ୍ତୋ ଵିଦେହାନ୍ମୁକ୍ତ ଏଵ ସଃ ॥ ୨୦॥
• ସର୍ଵଂ ନାସ୍ତି ତଦସ୍ତୀତି ଚିନ୍ମାତ୍ରୋଽସ୍ତୀତି ସର୍ଵଦା ।
• ପ୍ରବୁଦ୍ଧୋ ନାସ୍ତି ଯସ୍ଯାନ୍ତୋ ଵିଦେହାନ୍ମୁକ୍ତ ଏଵ ସଃ ॥ ୨୧॥
• କେଵଲଂ ପରମାତ୍ମା ଯଃ କେଵଲଂ ଜ୍ଞାନଵିଗ୍ରହଃ ।
• ସତ୍ତାମାତ୍ରସ୍ଵରୂପୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୨୨॥
• ଜୀଵେଶ୍ଵରେତି ଚୈତ୍ଯେତି ଵେଦଶାସ୍ତ୍ରେ ତ୍ଵହଂ ତ୍ଵିତି ।
• ବ୍ରହ୍ମୈଵେତି ନ ଯସ୍ଯାନ୍ତୋ ଵିଦେହାନ୍ମୁକ୍ତ ଏଵ ସଃ ॥ ୨୩॥
• ବ୍ରହ୍ମୈଵ ସର୍ଵମେଵାହଂ ନାନ୍ଯତ୍ କିଞ୍ଚିଜ୍ଜଗଦ୍ଭଵେତ୍ ।
• ଇତ୍ଯେଵଂ ନିଶ୍ଚଯୋ ଭାଵଃ ଵିଦେହାନ୍ମୁକ୍ତ ଏଵ ସଃ ॥ ୨୪॥
• ଇଦଂ ଚୈତନ୍ଯମେଵେତି ଅହଂ ଚୈତନ୍ଯମେଵ ହି ।
• ଇତି ନିଶ୍ଚଯଶୂନ୍ଯୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୨୫॥
• ଚୈତନ୍ଯମାତ୍ରଃ ସଂସିଦ୍ଧଃ ସ୍ଵାତ୍ମାରାମଃ ସୁଖାସନଃ ।
• ସୁଖମାତ୍ରାନ୍ତରଙ୍ଗୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୨୬॥
• ଅପରିଚ୍ଛିନ୍ନରୂପାତ୍ମା ଅଣୋରଣୁଵିନିର୍ମଲଃ ।
• ତୁର୍ଯାତୀତଃ ପରାନନ୍ଦୋ ଵିଦେହାନ୍ମୁକ୍ତ ଏଵ ସଃ ॥ ୨୭॥
• ନାମାପି ନାସ୍ତି ସର୍ଵାତ୍ମା ନ ରୂପୋ ନ ଚ ନାସ୍ତିକଃ ।
• ପରବ୍ରହ୍ମସ୍ଵରୂପାତ୍ମା ଵିଦେହାନ୍ମୁକ୍ତ ଏଵ ସଃ ॥ ୨୮॥
• ତୁର୍ଯାତୀତଃ ସ୍ଵତୋଽତୀତଃ ଅତୋଽତୀତଃ ସ ସନ୍ମଯଃ ।
• ଅଶୁଭାଶୁଭଶାନ୍ତାତ୍ମା ଵିଦେହାନ୍ମୁକ୍ତ ଏଵ ସଃ ॥ ୨୯॥
• ବନ୍ଧମୁକ୍ତିପ୍ରଶାନ୍ତାତ୍ମା ସର୍ଵାତ୍ମା ଚାନ୍ତରାତ୍ମକଃ ।
• ପ୍ରପଞ୍ଚାତ୍ମା ପରୋ ହ୍ଯାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୦॥
• ସର୍ଵତ୍ର ପରିପୂର୍ଣାତ୍ମା ସର୍ଵଦା ଚ ପରାତ୍ପରଃ ।
• ଅନ୍ତରାତ୍ମା ହ୍ଯନନ୍ତାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୧॥
• ଅବୋଧବୋଧହୀନାତ୍ମା ଅଜଡୋ ଜଡଵର୍ଜିତଃ ।
• ଅତତ୍ତ୍ଵାତତ୍ତ୍ଵସର୍ଵାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୨॥
• ଅସମାଧିସମାଧ୍ଯନ୍ତଃ ଅଲକ୍ଷ୍ଯାଲକ୍ଷ୍ଯଵର୍ଜିତଃ ।
• ଅଭୂତୋ ଭୂତ ଏଵାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୩॥
• ଚିନ୍ମଯାତ୍ମା ଚିଦାକାଶଶ୍ଚିଦାନନ୍ଦଶ୍ଚିଦଂବରଃ ।
• ଚିନ୍ମାତ୍ରରୂପ ଏଵାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୪॥
• ସଚ୍ଚିଦାନନ୍ଦରୂପାତ୍ମା ସଚ୍ଚିଦାନନ୍ଦଵିଗ୍ରହଃ ।
• ସଚ୍ଚିଦାନନ୍ଦପୂର୍ଣାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୫॥
• ସଦା ବ୍ରହ୍ମମଯୋ ନିତ୍ଯଂ ସଦା ସ୍ଵାତ୍ମନି ନିଷ୍ଠିତଃ ।
• ସଦାଽଖଣ୍ଡୈକରୂପାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୬॥
• ପ୍ରଜ୍ଞାନଘନ ଏଵାତ୍ମା ପ୍ରଜ୍ଞାନଘନଵିଗ୍ରହଃ ।
• ନିତ୍ଯଜ୍ଞାନପରାନନ୍ଦୋ ଵିଦେହାନ୍ମୁକ୍ତ ଏଵ ସଃ ॥ ୩୭॥
• ଯସ୍ଯ ଦେହଃ କ୍ଵଚିନ୍ନାସ୍ତି ଯସ୍ଯ କିଞ୍ଚିତ୍ ସ୍ମୃତିଶ୍ଚ ନ ।
• ସଦାତ୍ମା ହ୍ଯାତ୍ମନି ସ୍ଵସ୍ଥୋ ଵିଦେହାନ୍ମୁକ୍ତ ଏଵ ସଃ ॥ ୩୮॥
• ଯସ୍ଯ ନିର୍ଵାସନଂ ଚିତ୍ତଂ ଯସ୍ଯ ବ୍ରହ୍ମାତ୍ମନା ସ୍ଥିତିଃ ।
• ଯୋଗାତ୍ମା ଯୋଗଯୁକ୍ତାତ୍ମା ଵିଦେହାନ୍ମୁକ୍ତ ଏଵ ସଃ ॥ ୩୯॥
• ଚୈତନ୍ଯମାତ୍ର ଏଵେତି ତ୍ଯକ୍ତଂ ସର୍ଵମତିର୍ନ ହି ।
• ଗୁଣାଗୁଣଵିକାରାନ୍ତୋ ଵିଦେହାନ୍ମୁକ୍ତ ଏଵ ସଃ ॥ ୪୦॥
• କାଲଦେଶାଦି ନାସ୍ତ୍ଯନ୍ତୋ ନ ଗ୍ରାହ୍ଯୋ ନାସ୍ମୃତିଃ ପରଃ ।
• ନିଶ୍ଚଯଂ ଚ ପରିତ୍ଯକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୪୧॥
• ଭୂମାନନ୍ଦାପରାନନ୍ଦୋ ଭୋଗାନନ୍ଦଵିଵର୍ଜିତଃ ।
• ସାକ୍ଷୀ ଚ ସାକ୍ଷିହୀନଶ୍ଚ ଵିଦେହାନ୍ମୁକ୍ତ ଏଵ ସଃ ॥ ୪୨॥
• ସୋଽପି କୋଽପି ନ ସୋ କୋଽପି କିଞ୍ଚିତ୍ କିଞ୍ଚିନ୍ନ କିଞ୍ଚନ ।
• ଆତ୍ମାନାତ୍ମା ଚିଦାତ୍ମା ଚ ଚିଦଚିଚ୍ଚାହମେଵ ଚ ॥ ୪୩॥
• ଯସ୍ଯ ପ୍ରପଞ୍ଚଶ୍ଚାନାତ୍ମା ବ୍ରହ୍ମାକାରମପୀହ ନ ।
• ସ୍ଵସ୍ଵରୂପଃ ସ୍ଵଯଂଜ୍ଯୋତିର୍ଵିଦେହାନ୍ମୁକ୍ତ ଏଵ ସଃ ॥ ୪୪॥
• ଵାଚାମଗୋଚରାନନ୍ଦଃ ସର୍ଵେନ୍ଦ୍ରିଯଵିଵର୍ଜିତଃ ।
• ଅତୀତାତୀତଭାଵୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୪୫॥
• ଚିତ୍ତଵୃତ୍ତେରତୀତୋ ଯଶ୍ଚିତ୍ତଵୃତ୍ତିର୍ନ ଭାସକଃ ।
• ସର୍ଵଵୃତ୍ତିଵିହୀନୋ ଯୋ ଵିଦେହାନ୍ମୁକ୍ତ ଏଵ ସଃ ॥ ୪୬॥
• ତସ୍ମିନ୍ କାଲେ ଵିଦେହୋ ଯୋ ଦେହସ୍ମରଣଵର୍ଜିତଃ ।
• ନ ସ୍ଥୂଲୋ ନ କୃଶୋ ଵାପି ଵିଦେହାନ୍ମୁକ୍ତ ଏଵ ସଃ ॥ ୪୭॥
• ଈଷଣ୍ମାତ୍ରସ୍ଥିତୋ ଯୋ ଵୈ ସଦା ସର୍ଵଵିଵର୍ଜିତଃ ।
• ବ୍ରହ୍ମମାତ୍ରେଣ ଯସ୍ତିଷ୍ଠେତ୍ ଵିଦେହାନ୍ମୁକ୍ତ ଏଵ ସଃ ॥ ୪୮॥
• ପରଂ ବ୍ରହ୍ମ ପରାନନ୍ଦଃ ପରମାତ୍ମା ପରାତ୍ପରଃ ।
• ପରୈରଦୃଷ୍ଟବାହ୍ଯାନ୍ତୋ ଵିଦେହାନ୍ମୁକ୍ତ ଏଵ ସଃ ॥ ୪୯॥
• ଶୁଦ୍ଧଵେଦାନ୍ତସାରୋଽଯଂ ଶୁଦ୍ଧସତ୍ତ୍ଵାତ୍ମନି ସ୍ଥିତଃ ।
• ତଦ୍ଭେଦମପି ଯସ୍ତ୍ଯକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୫୦॥
• ବ୍ରହ୍ମାମୃତରସାସ୍ଵାଦୋ ବ୍ରହ୍ମାମୃତରସାଯନମ୍ ।
• ବ୍ରହ୍ମାମୃତରସେ ମଗ୍ନୋ ଵିଦେହାନ୍ମୁକ୍ତ ଏଵ ସଃ ॥ ୫୧॥
• ବ୍ରହ୍ମାମୃତରସାଧାରୋ ବ୍ରହ୍ମାମୃତରସଃ ସ୍ଵଯମ୍ ।
• ବ୍ରହ୍ମାମୃତରସେ ତୃପ୍ତୋ ଵିଦେହାନ୍ମୁକ୍ତ ଏଵ ସଃ ॥ ୫୨॥
• ବ୍ରହ୍ମାନନ୍ଦପରାନନ୍ଦୋ ବ୍ରହ୍ମାନନ୍ଦରସପ୍ରଭଃ ।
• ବ୍ରହ୍ମାନନ୍ଦପରଂଜ୍ଯୋତିର୍ଵିଦେହାନ୍ମୁକ୍ତ ଏଵ ସଃ ॥ ୫୩॥
• ବ୍ରହ୍ମାନନ୍ଦରସାନନ୍ଦୋ ବ୍ରହ୍ମାମୃତନିରନ୍ତରମ୍ ।
• ବ୍ରହ୍ମାନନ୍ଦଃ ସଦାନନ୍ଦୋ ଵିଦେହାନ୍ମୁକ୍ତ ଏଵ ସଃ ॥ ୫୪॥
• ବ୍ରହ୍ମାନନ୍ଦାନୁଭାଵୋ ଯୋ ବ୍ରହ୍ମାମୃତଶିଵାର୍ଚନମ୍ ।
• ବ୍ରହ୍ମାନନ୍ଦରସପ୍ରୀତୋ ଵିଦେହାନ୍ମୁକ୍ତ ଏଵ ସଃ ॥ ୫୫॥
• ବ୍ରହ୍ମାନନ୍ଦରସୋଦ୍ଵାହୋ ବ୍ରହ୍ମାମୃତକୁଟୁମ୍ବକଃ ।
• ବ୍ରହ୍ମାନନ୍ଦଜନୈର୍ଯୁକ୍ତୋ ଵିଦେହାନ୍ମୁକ୍ତ ଏଵ ସଃ ॥ ୫୬॥
• ବ୍ରହ୍ମାମୃତଵରେ ଵାସୋ ବ୍ରହ୍ମାନନ୍ଦାଲଯେ ସ୍ଥିତଃ ।
• ବ୍ରହ୍ମାମୃତଜପୋ ଯସ୍ଯ ଵିଦେହାନ୍ମୁକ୍ତ ଏଵ ସଃ ॥ ୫୭॥
• ବ୍ରହ୍ମାନନ୍ଦଶରୀରାନ୍ତୋ ବ୍ରହ୍ମାନନ୍ଦେନ୍ଦ୍ରିଯଃ କ୍ଵଚିତ୍ ।
• ବ୍ରହ୍ମାମୃତମଯୀ ଵିଦ୍ଯା ଵିଦେହାନ୍ମୁକ୍ତ ଏଵ ସଃ ॥ ୫୮॥
• ବ୍ରହ୍ମାନଦମଦୋନ୍ମତ୍ତୋ ବ୍ରହ୍ମାମୃତରସଂଭରଃ ।
• ବ୍ରହ୍ମାତ୍ମନି ସଦା ସ୍ଵସ୍ଥୋ ଵିଦେହାନ୍ମୁକ୍ତ ଏଵ ସଃ ॥ ୫୯॥
• ଦେହମୁକ୍ତିପ୍ରକରଣଂ ସର୍ଵଵେଦେଷୁ ଦୁର୍ଲଭମ୍ ।
• ମଯୋକ୍ତଂ ତେ ମହାଯୋଗିନ୍ ଵିଦେହଃ ଶ୍ରଵଣାଦ୍ଭଵେତ୍ ॥ ୬୦॥

ସ୍କନ୍ଦଃ -

• ଅନାଥ ନାଥ ତେ ପଦଂ ଭଜାମ୍ଯୁମାସନାଥ ସ-
• ନ୍ନିଶୀଥନାଥମୌଲିସଂସ୍ଫୁଟଲ୍ଲଲାଟସଙ୍ଗଜ-
• ସ୍ଫୁଲିଙ୍ଗଦଗ୍ଧମନ୍ମଥଂ ପ୍ରମାଥନାଥ ପାହି ମାମ୍ ॥ ୬୧॥
• ଵିଭୂତିଭୂଷଗାତ୍ର ତେ ତ୍ରିନେତ୍ରମିତ୍ରତାମିଯାତ୍
• ମନଃସରୋରୁହଂ କ୍ଷଣଂ ତଥେକ୍ଷଣେନ ମେ ସଦା ।
• ପ୍ରବନ୍ଧସଂସୃତିଭ୍ରମଦ୍ଭ୍ରମଜ୍ଜନୌଘସନ୍ତତୌ
• ନ ଵେଦ ଵେଦମୌଲିରପ୍ଯପାସ୍ତଦୁଃଖସନ୍ତତିମ୍ ॥ ୬୨॥

• ॥ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ଦେହମୁକ୍ତିପ୍ରକରଣଵର୍ଣନଂ ନାମ ଦ୍ଵାଦଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html