Ribhu Gita - Siva Rahasya Purana Amsha 6

ଋଭୁଗୀତା ୧୭ ॥ ସର୍ଵ ସିଦ୍ଧାନ୍ତ ସଂଗ୍ରହ ପ୍ରକରଣମ୍ ॥

ଋଭୁଃ -

ନିଦାଘ ଶୃଣୁ ଗୁହ୍ଯଂ ମେ ସର୍ଵସିଦ୍ଧାନ୍ତସଙ୍ଗ୍ରହମ୍ ।
ଦ୍ଵୈତାଦ୍ଵୈତମିଦଂ ଶୂନ୍ଯଂ ଶାନ୍ତଂ ବ୍ରହ୍ମୈଵ ସର୍ଵଦା ॥ ୧॥
ଅହମେଵ ପରଂ ବ୍ରହ୍ମ ଅହମେଵ ପରାତ୍ ପରମ୍ ।
ଦ୍ଵୈତାଦ୍ଵୈତମିଦଂ ଶୂନ୍ଯଂ ଶାନ୍ତଂ ବ୍ରହ୍ମୈଵ କେଵଲମ୍ ॥ ୨॥
ଅହମେଵ ହି ଶାନ୍ତାତ୍ମା ଅହମେଵ ହି ସର୍ଵଗଃ ।
ଅହମେଵ ହି ଶୁଦ୍ଧାତ୍ମା ଅହମେଵ ହି ନିତ୍ଯଶଃ ॥ ୩॥
ଅହମେଵ ହି ନାନାତ୍ମା ଅହମେଵ ହି ନିର୍ଗୁଣଃ ।
ଅହମେଵ ହି ନିତ୍ଯାତ୍ମା ଅହମେଵ ହି କାରଣମ୍ ॥ ୪॥
ଅହମେଵ ହି ଜଗତ୍ ସର୍ଵଂ ଇଦଂ ଚୈଵାହମେଵ ହି ।
ଅହମେଵ ହି ମୋଦାତ୍ମା ଅହମେଵ ହି ମୁକ୍ତିଦଃ ॥ ୫॥
ଅହମେଵ ହି ଚୈତନ୍ଯଂ ଅହମେଵ ହି ଚିନ୍ମଯଃ ।
ଅହମେଵ ହି ଚୈତନ୍ଯମହଂ ସର୍ଵାନ୍ତରଃ ସଦା ॥ ୬॥
ଅହମେଵ ହି ଭୂତାତ୍ମା ଭୌତିକଂ ତ୍ଵହମେଵ ହି ।
ଅହମେଵ ତ୍ଵମେଵାହମହମେଵାହମେଵ ହି ॥ ୭॥
ଜୀଵାତ୍ମା ତ୍ଵହମେଵାହମହମେଵ ପରେଶ୍ଵରଃ ।
ଅହମେଵ ଵିଭୁର୍ନିତ୍ଯମହମେଵ ସ୍ଵଯଂ ସଦା ॥ ୮॥
ଅହମେଵାକ୍ଷରଂ ସାକ୍ଷାତ୍ ଅହମେଵ ହି ମେ ପ୍ରିଯମ୍ ।
ଅହମେଵ ସଦା ବ୍ରହ୍ମ ଅହମେଵ ସଦାଽଵ୍ଯଯଃ ॥ ୯॥
ଅହମେଵାହମେଵାଗ୍ରେ ଅହମେଵାନ୍ତରାନ୍ତରଃ ।
ଅହମେଵ ଚିଦାକାଶମହମେଵାଵଭାସକଃ ॥ ୧୦॥
ଅହମେଵ ସଦା ସ୍ରଷ୍ଟା ଅହମେଵ ହି ରକ୍ଷକଃ ।
ଅହମେଵ ହି ଲୀଲାତ୍ମା ଅହମେଵ ହି ନିଶ୍ଚଯଃ ॥ ୧୧॥
ଅହମେଵ ସଦା ସାକ୍ଷୀ ତ୍ଵମେଵ ତ୍ଵଂ ପୁରାତନଃ ।
ତ୍ଵମେଵ ହି ପରଂ ବ୍ରହ୍ମ ତ୍ଵମେଵ ହି ନିରନ୍ତରମ୍ ॥ ୧୨॥
ଅହମେଵାହମେଵାହମହମେଵ ତ୍ଵମେଵ ହି ।
ଅହମେଵାଦ୍ଵଯାକାରଃ ଅହମେଵ ଵିଦେହକଃ ॥ ୧୩॥
ଅହମେଵ ମମାଧାରଃ ଅହମେଵ ସଦାତ୍ମକଃ ।
ଅହମେଵୋପଶାନ୍ତାତ୍ମା ଅହମେଵ ତିତିକ୍ଷକଃ ॥ ୧୪॥
ଅହମେଵ ସମାଧାନଂ ଶ୍ରଦ୍ଧା ଚାପ୍ଯହମେଵ ହି ।
ଅହମେଵ ମହାଵ୍ଯୋମ ଅହମେଵ କଲାତ୍ମକଃ ॥ ୧୫॥
ଅହମେଵ ହି କାମାନ୍ତଃ ଅହମେଵ ସଦାନ୍ତରଃ ।
ଅହମେଵ ପୁରସ୍ତାଚ୍ଚ ଅହଂ ପଶ୍ଚାଦହଂ ସଦା ॥ ୧୬॥
ଅହମେଵ ହି ଵିଶ୍ଵାତ୍ମା ଅହମେଵ ହି କେଵଲମ୍ ।
ଅହମେଵ ପରଂ ବ୍ରହ୍ମ ଅହମେଵ ପରାତ୍ପରଃ ॥ ୧୭॥
ଅହମେଵ ଚିଦାନନ୍ଦଃ ଅହମେଵ ସୁଖାସୁଖମ୍ ।
ଅହମେଵ ଗୁରୁତ୍ଵଂ ଚ ଅହମେଵାଚ୍ଯୁତଃ ସଦା ॥ ୧୮॥
ଅହମେଵ ହି ଵେଦାନ୍ତଃ ଅହମେଵ ହି ଚିନ୍ତନଃ ।
ଦେହୋଽହଂ ଶୁଦ୍ଧଚୈତନ୍ଯଃ ଅହଂ ସଂଶଯଵର୍ଜିତଃ ॥ ୧୯॥
ଅହମେଵ ପରଂ ଜ୍ଯୋତିରହମେଵ ପରଂ ପଦମ୍ ।
ଅହମେଵାଵିନାଶ୍ଯାତ୍ମା ଅହମେଵ ପୁରାତନଃ ॥ ୨୦॥
ଅହଂ ବ୍ରହ୍ମ ନ ସନ୍ଦେହଃ ଅହମେଵ ହି ନିଷ୍କଲଃ ।
ଅହଂ ତୁର୍ଯୋ ନ ସନ୍ଦେହଃ ଅହମାତ୍ମା ନ ସଂଶଯଃ ॥ ୨୧॥
ଅହମିତ୍ଯପି ହୀନୋଽହମହଂ ଭାଵନଵର୍ଜିତଃ ।
ଅହମେଵ ହି ଭାଵାନ୍ତା ଅହମେଵ ହି ଶୋଭନମ୍ ॥ ୨୨॥
ଅହମେଵ କ୍ଷଣାତୀତଃ ଅହମେଵ ହି ମଙ୍ଗଲମ୍ ।
ଅହମେଵାଚ୍ଯୁତାନନ୍ଦଃ ଅହମେଵ ନିରନ୍ତରମ୍ ॥ ୨୩॥
ଅହମେଵାପ୍ରମେଯାତ୍ମା ଅହଂ ସଂକଲ୍ପଵର୍ଜିତଃ ।
ଅହଂ ବୁଦ୍ଧଃ ପରଂଧାମ ଅହଂ ବୁଦ୍ଧିଵିଵର୍ଜିତଃ ॥ ୨୪॥
ଅହମେଵ ସଦା ସତ୍ଯଂ ଅହମେଵ ସଦାସୁଖମ୍ ।
ଅହମେଵ ସଦା ଲଭ୍ଯଂ ଅହଂ ସୁଲଭକାରଣମ୍ ॥ ୨୫॥
ଅହଂ ସୁଲଭଵିଜ୍ଞାନଂ ଦୁର୍ଲଭୋ ଜ୍ଞାନିନାଂ ସଦା ।
ଅହଂ ଚିନ୍ମାତ୍ର ଏଵାତ୍ମା ଅହମେଵ ହି ଚିଦ୍ଘନଃ ॥ ୨୬॥
ଅହମେଵ ତ୍ଵମେଵାହଂ ବ୍ରହ୍ମୈଵାହଂ ନ ସଂଶଯଃ ।
ଅହମାତ୍ମା ନ ସନ୍ଦେହଃ ସର୍ଵଵ୍ଯାପୀ ନ ସଂଶଯଃ ॥ ୨୭॥
ଅହମାତ୍ମା ପ୍ରିଯଂ ସତ୍ଯଂ ସତ୍ଯଂ ସତ୍ଯଂ ପୁନଃ ପୁନଃ ।
ଅହମାତ୍ମାଽଜରୋ ଵ୍ଯାପୀ ଅହମେଵାତ୍ମନୋ ଗୁରୁଃ ॥ ୨୮॥
ଅହମେଵାମୃତୋ ମୋକ୍ଷୋ ଅହମେଵ ହି ନିଶ୍ଚଲଃ ।
ଅହମେଵ ହି ନିତ୍ଯାତ୍ମା ଅହଂ ମୁକ୍ତୋ ନ ସଂଶଯଃ ॥ ୨୯॥
ଅହମେଵ ସଦା ଶୁଦ୍ଧଃ ଅହମେଵ ହି ନିର୍ଗୁଣଃ ।
ଅହଂ ପ୍ରପଞ୍ଚହୀନୋଽହଂ ଅହଂ ଦେହଵିଵର୍ଜିତଃ ॥ ୩୦॥
ଅହଂ କାମଵିହୀନାତ୍ମା ଅହଂ ମାଯାଵିଵର୍ଜିତଃ ।
ଅହଂ ଦୋଷପ୍ରଵୃତ୍ତାତ୍ମା ଅହଂ ସଂସାରଵର୍ଜିତଃ ॥ ୩୧॥
ଅହଂ ସଙ୍କଲ୍ପରହିତୋ ଵିକଲ୍ପରହିତଃ ଶିଵଃ ।
ଅହମେଵ ହି ତୁର୍ଯାତ୍ମା ଅହମେଵ ହି ନିର୍ମଲଃ ॥ ୩୨॥
ଅହମେଵ ସଦା ଜ୍ଯୋତିରହମେଵ ସଦା ପ୍ରଭୁଃ ।
ଅହମେଵ ସଦା ବ୍ରହ୍ମ ଅହମେଵ ସଦା ପରଃ ॥ ୩୩॥
ଅହମେଵ ସଦା ଜ୍ଞାନମହମେଵ ସଦା ମୃଦୁଃ ।
ଅହମେଵ ହି ଚିତ୍ତଂ ଚ ଅହଂ ମାନଵିଵର୍ଜିତଃ ॥ ୩୪॥
ଅହଂକାରଶ୍ଚ ସଂସାରମହଙ୍କାରମସତ୍ସଦା ।
ଅହମେଵ ହି ଚିନ୍ମାତ୍ରଂ ମତ୍ତୋଽନ୍ଯନ୍ନାସ୍ତି ନାସ୍ତି ହି ॥ ୩୫॥
ଅହମେଵ ହି ମେ ସତ୍ଯଂ ମତ୍ତୋଽନ୍ଯନ୍ନାସ୍ତି କିଞ୍ଚନ ।
ମତ୍ତୋଽନ୍ଯତ୍ତତ୍ପଦଂ ନାସ୍ତି ମତ୍ତୋଽନ୍ଯତ୍ ତ୍ଵତ୍ପଦଂ ନହି ॥ ୩୬॥
ପୁଣ୍ଯମିତ୍ଯପି ନ କ୍ଵାପି ପାପମିତ୍ଯପି ନାସ୍ତି ହି ।
ଇଦଂ ଭେଦମଯଂ ଭେଦଂ ସଦସଦ୍ଭେଦମିତ୍ଯପି ॥ ୩୭॥
ନାସ୍ତି ନାସ୍ତି ତ୍ଵଯା ସତ୍ଯଂ ସତ୍ଯଂ ସତ୍ଯଂ ପୁନଃ ପୁନଃ ।
ନାସ୍ତି ନାସ୍ତି ସଦା ନାସ୍ତି ସର୍ଵଂ ନାସ୍ତୀତି ନିଶ୍ଚଯଃ ॥ ୩୮॥
ଇଦମେଵ ପରଂ ବ୍ରହ୍ମ ଅହଂ ବ୍ରହ୍ମ ତ୍ଵମେଵ ହି ।
କାଲୋ ବ୍ରହ୍ମ କଲା ବ୍ରହ୍ମ କାର୍ଯଂ ବ୍ରହ୍ମ କ୍ଷଣଂ ତଦା ॥ ୩୯॥
ସର୍ଵଂ ବ୍ରହ୍ମାପ୍ଯହଂ ବ୍ରହ୍ମ ବ୍ରହ୍ମାସ୍ମୀତି ନ ସଂଶଯଃ ।
ଚିତ୍ତଂ ବ୍ରହ୍ମ ମନୋ ବ୍ରହ୍ମ ସତ୍ଯଂ ବ୍ରହ୍ମ ସଦାଽସ୍ମ୍ଯହମ୍ ॥ ୪୦॥
ନିର୍ଗୁଣଂ ବ୍ରହ୍ମ ନିତ୍ଯଂ ଚ ନିରନ୍ତରମହଂ ପରଃ ।
ଆଦ୍ଯନ୍ତଂ ବ୍ରହ୍ମ ଏଵାହଂ ଆଦ୍ଯନ୍ତଂ ଚ ନହି କ୍ଵଚିତ୍ ॥ ୪୧॥
ଅହମିତ୍ଯପି ଵାର୍ତାଽପି ସ୍ମରଣଂ ଭାଷଣଂ ନ ଚ ।
ସର୍ଵଂ ବ୍ରହ୍ମୈଵ ସନ୍ଦେହସ୍ତ୍ଵମିତ୍ଯପି ନ ହି କ୍ଵଚିତ୍ ॥ ୪୨॥
ଵକ୍ତା ନାସ୍ତି ନ ସନ୍ଦେହଃ ଏଷା ଗୀତା ସୁଦୁର୍ଲଭଃ ।
ସଦ୍ଯୋ ମୋକ୍ଷପ୍ରଦଂ ହ୍ଯେତତ୍ ସଦ୍ଯୋ ମୁକ୍ତିଂ ପ୍ରଯଚ୍ଛତି ॥ ୪୩॥
ସଦ୍ଯ ଏଵ ପରଂ ବ୍ରହ୍ମ ପଦଂ ପ୍ରାପ୍ନୋତି ନିଶ୍ଚଯଃ ।
ସକୃଚ୍ଛ୍ରଵଣମାତ୍ରେଣ ସଦ୍ଯୋ ମୁକ୍ତିଂ ପ୍ରଯଚ୍ଛତି ॥ ୪୪॥
ଏତତ୍ତୁ ଦୁର୍ଲଭଂ ଲୋକେ ତ୍ରୈଲୋକ୍ଯେଽପି ଚ ଦୁର୍ଲଭମ୍ ।
ଅହଂ ବ୍ରହ୍ମ ନ ସନ୍ଦେହ ଇତ୍ଯେଵଂ ଭାଵଯେତ୍ ଦୃଢମ୍ ।
ତତଃ ସର୍ଵଂ ପରିତ୍ଯଜ୍ଯ ତୂଷ୍ଣୀଂ ତିଷ୍ଠ ଯଥା ସୁଖମ୍ ॥ ୪୫॥

ସୂତଃ -

ଭୁଵନଗଗନମଧ୍ଯଧ୍ଯାନଯୋଗାଙ୍ଗସଙ୍ଗେ
ଯମନିଯମଵିଶେଷୈର୍ଭସ୍ମରାଗାଙ୍ଗସଙ୍ଗୈଃ ।
ସୁଖମୁଖଭରିତାଶାଃ କୋଶପାଶାଦ୍ଵିହୀନା
ହୃଦି ମୁଦିତପରାଶାଃ ଶାଂଭଵାଃ ଶଂଭୁଵଚ୍ଚ ॥ ୪୬॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ସର୍ଵସିଦ୍ଧାନ୍ତସଂଗ୍ରହପ୍ରକରଣଂ ନାମ ସପ୍ତଦଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com