ଋଭୁଗୀତା ୫ ॥ ଶିଵେନ କୁମାରୋପଦେଶ ଵର୍ଣନମ୍ ॥

ନିଦାଘଃ -

• ଏଵଂ ସ୍ଥିତେ ଋଭୋ କୋ ଵୈ ବ୍ରହ୍ମଭାଵାଯ କଲ୍ପତେ ।
• ତନ୍ମେ ଵଦ ଵିଶେଷେଣ ଜ୍ଞାନଂ ଶଙ୍କରଵାକ୍ଯଜମ୍ ॥ ୧॥

ଋଭୁଃ -

• ତ୍ଵମେଵ ବ୍ରହ୍ମ ଏଵାସି ତ୍ଵମେଵ ପରମୋ ଗୁରୁଃ ।
• ତ୍ଵମେଵାକାଶରୂପୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨॥
• ତ୍ଵମେଵ ସର୍ଵଭାଵୋଽସି ତ୍ଵମେଵାର୍ଥସ୍ତ୍ଵମଵ୍ଯଯଃ ।
• ତ୍ଵଂ ସର୍ଵହୀନସ୍ତ୍ଵଂ ସାକ୍ଷୀ ସାକ୍ଷିହୀନୋଽସି ସର୍ଵଦା ॥ ୩॥
• କାଲସ୍ତ୍ଵଂ ସର୍ଵହୀନସ୍ତ୍ଵଂ ସାକ୍ଷିହୀନୋଽସି ସର୍ଵଦା ।
• କାଲହୀନୋଽସି କାଲୋଽସି ସଦା ବ୍ରହ୍ମାସି ଚିଦ୍ଘନଃ ।
• ସର୍ଵତତ୍ତ୍ଵସ୍ଵରୂପୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୪॥
• ସତ୍ଯୋଽସି ସିଦ୍ଧୋଽସି ସନାତନୋଽସି
• ମୁକ୍ତୋଽସି ମୋକ୍ଷୋଽସି ସଦାଽମୃତୋଽସି ।
• ଦେଵୋଽସି ଶାନ୍ତୋଽସି ନିରାମଯୋଽସି
• ବ୍ରହ୍ମାସି ପୂର୍ଣୋଽସି ପରାଵରୋଽସି ॥ ୫॥
• ସମୋଽସି ସଚ୍ଚାସି ସନାତନୋଽସି
• ସତ୍ଯାଦିଵାକ୍ଯୈଃ ପ୍ରତିପାଦିତୋଽସି ।
• ସର୍ଵାଙ୍ଗହୀନୋଽସି ସଦାସ୍ଥିତୋଽସି
• ବ୍ରହ୍ମାସି ପୂର୍ଣୋଽସି ପରାଵରୋଽସି ॥ ୬॥var was ପରାପରୋଽସି
• ସର୍ଵପ୍ରପଞ୍ଚଭ୍ରମଵର୍ଜିତୋଽସି ସର୍ଵେଷୁ ଭୂତେଷୁ ସଦୋଦିତୋଽସି ।
• ସର୍ଵତ୍ର ସଂକଲ୍ପଵିଵର୍ଜିତୋଽସି ବ୍ରହ୍ମାସି ପୂର୍ଣୋଽସି ପରାଵରୋଽସି ॥ ୭॥
• ସର୍ଵତ୍ର ସନ୍ତୋଷସୁଖାସନୋଽସି ସର୍ଵତ୍ର ଵିଦ୍ଵେଷଵିଵର୍ଜିତୋଽସି ।
• ସର୍ଵତ୍ର କାର୍ଯାଦିଵିଵର୍ଜିତୋଽସି ବ୍ରହ୍ମାସି ପୂର୍ଣୋଽସି ପରାଵରୋଽସି ॥ ୮॥
• ଚିଦାକାରସ୍ଵରୂପୋଽସି ଚିନ୍ମାତ୍ରୋଽସି ନିରଙ୍କୁଶଃ ।
• ଆତ୍ମନ୍ଯେଵାଵସ୍ଥିତୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୯॥
• ଆନନ୍ଦୋଽସି ପରୋଽସି ତ୍ଵଂ ସର୍ଵଶୂନ୍ଯୋଽସି ନିର୍ଗୁଣଃ ।
• ଏକ ଏଵାଦ୍ଵିତୀଯୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୦॥
• ଚିଦ୍ଘନାନନ୍ଦରୂପୋଽସି ଚିଦାନନ୍ଦୋଽସି ସର୍ଵଦା ।
• ପରିପୂର୍ଣସ୍ଵରୂପୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୧॥
• ତଦସି ତ୍ଵମସି ଜ୍ଞୋଽସି ସୋଽସି ଜାନାସି ଵୀକ୍ଷ୍ଯସି ।
• ଚିଦସି ବ୍ରହ୍ମଭୂତୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୨॥
• ଅମୃତୋଽସି ଵିଭୁଶ୍ଚାସି ଦେଵୋଽସି ତ୍ଵଂ ମହାନସି ।
• ଚଞ୍ଚଲୋଷ୍ଠକଲଙ୍କୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୩॥
• ସର୍ଵୋଽସି ସର୍ଵହୀନୋଽସି ଶାନ୍ତୋଽସି ପରମୋ ହ୍ଯସି ।
• କାରଣଂ ତ୍ଵଂ ପ୍ରଶାନ୍ତୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୪॥
• ସତ୍ତାମାତ୍ରସ୍ଵରୂପୋଽସି ସତ୍ତାସାମାନ୍ଯକୋ ହ୍ଯସି ।
• ନିତ୍ଯଶୁଦ୍ଧସ୍ଵରୂପୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୫॥
• ଈଷଣ୍ମାତ୍ରଵିହୀନୋଽସି ଅଣୁମାତ୍ରଵିଵର୍ଜିତଃ ।
• ଅସ୍ତିତ୍ଵଵର୍ଜିତୋଽସି ତ୍ଵଂ ନାସ୍ତିତ୍ଵାଦିଵିଵର୍ଜିତଃ ॥ ୧୬॥
• ଯୋଽସି ସୋଽସି ମହାନ୍ତୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୭॥
• ଲକ୍ଷ୍ଯଲକ୍ଷଣହୀନୋଽସି ଚିନ୍ମାତ୍ରୋଽସି ନିରାମଯଃ ।
• ଅଖଣ୍ଡୈକରସୋ ନିତ୍ଯଂ ତ୍ଵଂ ବ୍ରହ୍ମାସି ନ ସଂଶଯଃ ॥ ୧୮॥
• ସର୍ଵାଧାରସ୍ଵରୂପୋଽସି ସର୍ଵତେଜଃ ସ୍ଵରୂପକଃ ।
• ସର୍ଵାର୍ଥଭେଦହୀନୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୧୯॥
• ବ୍ରହ୍ମୈଵ ଭେଦଶୂନ୍ଯୋଽସି ଵିପ୍ଲୁତ୍ଯାଦିଵିଵର୍ଜିତଃ ।
• ଶିଵୋଽସି ଭେଦହୀନୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨୦॥
• ପ୍ରଜ୍ଞାନଵାକ୍ଯହୀନୋଽସି ସ୍ଵସ୍ଵରୂପଂ ପ୍ରପଶ୍ଯସି ।
• ସ୍ଵସ୍ଵରୂପସ୍ଥିତୋଽସି ତ୍ଵଂ ତ୍ଵଂ ବ୍ରହ୍ମାସି ନ ସଂଶଯଃ ॥ ୨୧॥
• ସ୍ଵସ୍ଵରୂପାଵଶେଷୋଽସି ସ୍ଵସ୍ଵରୂପୋ ମତୋ ହ୍ଯସି ।
• ସ୍ଵାନନ୍ଦସିନ୍ଧୁମଗ୍ନୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨୨॥
• ସ୍ଵାତ୍ମରାଜ୍ଯେ ତ୍ଵମେଵାସି ସ୍ଵଯମାତ୍ମାନମୋ ହ୍ଯସି ।
• ସ୍ଵଯଂ ପୂର୍ଣସ୍ଵରୂପୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨୩॥
• ସ୍ଵସ୍ମିନ୍ ସୁଖେ ସ୍ଵଯଂ ଚାସି ସ୍ଵସ୍ମାତ୍ କିଞ୍ଚିନ୍ନ ପଶ୍ଯସି ।
• ସ୍ଵାତ୍ମନ୍ଯାକାଶଵଦ୍ଭାସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨୪॥
• ସ୍ଵସ୍ଵରୂପାନ୍ନ ଚଲସି ସ୍ଵସ୍ଵରୂପାନ୍ନ ପଶ୍ଯସି ।
• ସ୍ଵସ୍ଵରୂପାମୃତୋଽସି ତ୍ଵଂ ତ୍ଵଂ ବ୍ରହ୍ମାସି ନ ସଂଶଯଃ ॥ ୨୫॥
• ସ୍ଵସ୍ଵରୂପେଣ ଭାସି ତ୍ଵଂ ସ୍ଵସ୍ଵରୂପେଣ ଜୃଂଭସି ।
• ସ୍ଵସ୍ଵରୂପାଦନନ୍ଯୋଽସି ତ୍ଵଂ ବ୍ରହ୍ମାସି ନ ସଂଶଯଃ ॥ ୨୬॥
• ସ୍ଵଯଂ ସ୍ଵଯଂ ସଦାଽସି ତ୍ଵଂ ସ୍ଵଯଂ ସର୍ଵତ୍ର ପଶ୍ଯସି ।
• ସ୍ଵସ୍ମିନ୍ ସ୍ଵଯଂ ସ୍ଵଯଂ ଭୁଙ୍କ୍ଷେ ତ୍ଵଂ ବ୍ରହ୍ମାସି ନ ସଂଶଯଃ ॥ ୨୭॥

ସୂତଃ -

• ତଦା ନିଧାଘଵଚସା ତୁଷ୍ଟୋ ଋଭୁରୁଵାଚ ତମ୍ ।
• ଶିଵପ୍ରେମରସେ ପାତ୍ରଂ ତଂ ଵୀକ୍ଷ୍ଯାବ୍ଜଜନନ୍ଦନଃ ॥ ୨୮॥

ଋଭୁଃ -

• କୈଲାସେ ଶଙ୍କରଃ ପୁତ୍ରଂ କଦାଚିଦୁପଦିଷ୍ଟଵାନ୍ ।
• ତଦେଵ ତେ ପ୍ରଵକ୍ଷ୍ଯାମି ସାଵଧାନମନାଃ ଶୃଣୁ ॥ ୨୯॥
• ଅଯଂ ପ୍ରପଞ୍ଚୋ ନାସ୍ତ୍ଯେଵ ନୋତ୍ପନ୍ନୋ ନ ସ୍ଵତଃ କ୍ଵଚିତ୍ ।
• ଚିତ୍ରପ୍ରପଞ୍ଚ ଇତ୍ଯାହୁର୍ନାସ୍ତି ନାସ୍ତ୍ଯେଵ ସର୍ଵଦା ॥ ୩୦॥
• ନ ପ୍ରପଞ୍ଚୋ ନ ଚିତ୍ତାଦି ନାହଂକାରୋ ନ ଜୀଵକଃ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୧॥
• ମାଯକାର୍ଯାଦିକଂ ନାସ୍ତି ମାଯାକାର୍ଯଭଯଂ ନହି ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୨॥
• କର୍ତା ନାସ୍ତି କ୍ରିଯା ନାସ୍ତି କରଣଂ ନାସ୍ତି ପୁତ୍ରକ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୩॥
• ଏକଂ ନାସ୍ତି ଦ୍ଵଯଂ ନାସ୍ତି ମନ୍ତ୍ରତନ୍ତ୍ରାଦିକଂ ଚ ନ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୪॥
• ଶ୍ରଵଣଂ ମନନଂ ନାସ୍ତି ନିଦିଧ୍ଯାସନଵିଭ୍ରମଃ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୫॥
• ସମାଧିଦ୍ଵିଵିଧଂ ନାସ୍ତି ମାତୃମାନାଦି ନାସ୍ତି ହି ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୬॥
• ଅଜ୍ଞାନଂ ଚାପି ନାସ୍ତ୍ଯେଵ ଅଵିଵେକକଥା ନ ଚ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୭॥
• ଅନୁବନ୍ଧଚତୁଷ୍କଂ ଚ ସଂବନ୍ଧତ୍ରଯମେଵ ନ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୮॥
• ଭୂତଂ ଭଵିଷ୍ଯନ୍ନ କ୍ଵାପି ଵର୍ତମାନଂ ନ ଵୈ କ୍ଵଚିତ୍ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୩୯॥
• ଗଙ୍ଗା ଗଯା ତଥା ସେତୁଵ୍ରତଂ ଵା ନାନ୍ଯଦସ୍ତି ହି ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୪୦॥
• ନ ଭୂମିର୍ନ ଜଲଂ ଵହ୍ନିର୍ନ ଵାଯୁର୍ନ ଚ ଖଂ କ୍ଵଚିତ୍ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୪୧॥
• ନୈଵ ଦେଵା ନ ଦିକ୍ପାଲା ନ ପିତା ନ ଗୁରୁଃ କ୍ଵଚିତ୍ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଦା ॥ ୪୨॥
• ନ ଦୂରଂ ନାନ୍ତିକଂ ନାନ୍ତଂ ନ ମଧ୍ଯଂ ନ କ୍ଵଚିତ୍ ସ୍ଥିତିଃ ।
• ନାଦ୍ଵୈତଦ୍ଵୈତସତ୍ଯତ୍ଵମସତ୍ଯଂ ଵା ଇଦଂ ନ ଚ ॥ ୪୩॥
• ନ ମୋକ୍ଷୋଽସ୍ତି ନ ବନ୍ଧୋଽସ୍ତି ନ ଵାର୍ତାଵସରୋଽସ୍ତି ହି ।
• କ୍ଵଚିଦ୍ଵା କିଞ୍ଚିଦେଵଂ ଵା ସଦସଦ୍ଵା ସୁଖାନି ଚ ॥ ୪୪॥
• ଦ୍ଵନ୍ଦ୍ଵଂ ଵା ତୀର୍ଥଧର୍ମାଦି ଆତ୍ମାନାତ୍ମେତି ନ କ୍ଵଚିତ୍ ।
• ନ ଵୃଦ୍ଧିର୍ନୋଦଯୋ ମୃନ୍ଯୁର୍ନ ଗମାଗମଵିଭ୍ରମଃ ॥ ୪୫॥
• ଇହ ନାସ୍ତି ପରଂ ନାସ୍ତି ନ ଗୁରୁର୍ନ ଚ ଶିଷ୍ଯକଃ ।
• ସଦସନ୍ନାସ୍ତି ଭୂର୍ନାସ୍ତି କାର୍ଯଂ ନାସ୍ତି କୃତଂ ଚ ନ ॥ ୪୬॥
• ଜାତିର୍ନାସ୍ତି ଗତିର୍ନାସ୍ତି ଵର୍ଣୋ ନାସ୍ତି ନ ଲୌକିକମ୍ ।
• ଶମାଦିଷଟ୍କଂ ନାସ୍ତ୍ଯେଵ ନିଯମୋ ଵା ଯମୋଽପି ଵା ॥ ୪୭॥
• ସର୍ଵଂ ମିଥ୍ଯେତି ନାସ୍ତ୍ଯେଵ ବ୍ରହ୍ମ ଇତ୍ଯେଵ ନାସ୍ତି ହି ।
• ଚିଦିତ୍ଯେଵ ହି ନାସ୍ତ୍ଯେଵ ଚିଦହଂ ଭାଷଣଂ ନ ହି ॥ ୪୮॥
• ଅହମିତ୍ଯେଵ ନାସ୍ତ୍ଯେଵ ନିତ୍ଯୋଽସ୍ମୀତି ଚ ନ କ୍ଵଚିତ୍ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନାସ୍ତି ନାସ୍ତ୍ଯେଵ ସର୍ଵଥା ॥ ୪୯॥
• ଵାଚା ଯଦୁଚ୍ଯତେ କିଞ୍ଚିନ୍ମନସା ମନୁତେ ଚ ଯତ୍ ।
• ବୁଦ୍ଧ୍ଯା ନିଶ୍ଚୀଯତେ ଯଚ୍ଚ ଚିତ୍ତେନ ଜ୍ଞାଯତେ ହି ଯତ୍ ॥ ୫୦॥
• ଯୋଗେନ ଯୁଜ୍ଯତେ ଯଚ୍ଚ ଇନ୍ଦ୍ରିଯାଦ୍ଯୈଶ୍ଚ ଯତ୍ କୃତମ୍ ।
• ଜାଗ୍ରତ୍ସ୍ଵପ୍ନସୁଷୁପ୍ତିଂ ଚ ସ୍ଵପ୍ନଂ ଵା ନ ତୁରୀଯକମ୍ ॥ ୫୧॥
• ସର୍ଵଂ ନାସ୍ତୀତି ଵିଜ୍ଞେଯଂ ଯଦୁପାଧିଵିନିଶ୍ଚିତମ୍ ।
• ସ୍ନାନାଚ୍ଛୁଦ୍ଧିର୍ନ ହି କ୍ଵାପି ଧ୍ଯାନାତ୍ ଶୁଦ୍ଧିର୍ନ ହି କ୍ଵଚିତ୍ ॥ ୫୨॥
• ଗୁଣତ୍ରଯଂ ନାସ୍ତି କିଞ୍ଚିଦ୍ଗୁଣତ୍ରଯମଥାପି ଵା ।
• ଏକଦ୍ଵିତ୍ଵପଦଂ ନାସ୍ତି ନ ବହୁଭ୍ରମଵିଭ୍ରମଃ ॥ ୫୩॥
• ଭ୍ରାନ୍ତ୍ଯଭ୍ରାନ୍ତି ଚ ନାସ୍ତ୍ଯେଵ କିଞ୍ଚିନ୍ନାସ୍ତୀତି ନିଶ୍ଚିନୁ ।
• କେଵଲଂ ବ୍ରହ୍ମମାତ୍ରତ୍ଵାତ୍ ନ କିଞ୍ଚିଦଵଶିଷ୍ଯତେ ॥ ୫୪॥
• ଇଦଂ ଶୃଣୋତି ଯଃ ସମ୍ଯକ୍ ସ ବ୍ରହ୍ମ ଭଵତି ସ୍ଵଯମ୍ ॥ ୫୫॥

ଈଶ୍ଵରଃ -

• ଵାରାଶ୍ଯମ୍ବୁନି ବୁଦ୍ବୁଦା ଇଵ ଘନାନନ୍ଦାମ୍ବୁଧାଵପ୍ଯୁମା-
• କାନ୍ତେଽନନ୍ତଜଗଦ୍ଗତଂ ସୁରନରଂ ଜାତଂ ଚ ତିର୍ଯଙ୍ ମୁହୁଃ ।
• ଭୂତଂ ଚାପି ଭଵିଷ୍ଯତି ପ୍ରତିଭଵଂ ମାଯାମଯଂ ଚୋର୍ମିଜଂ
• ସମ୍ଯଙ୍ ମାମନୁପଶ୍ଯତାମନୁଭଵୈର୍ନାସ୍ତ୍ଯେଵ ତେଷାଂ ଭଵଃ ॥ ୫୬॥
• ହରଂ ଵିଜ୍ଞାତାରଂ ନିଖିଲତନୁକାର୍ଯେଷୁ କରଣଂ
• ନ ଜାନନ୍ତେ ମୋହାଦ୍ଯମିତକରଣା ଅପ୍ଯତିତରାମ୍ ।
• ଉମାନାଥାକାରଂ ହୃଦଯଦହରାନ୍ତର୍ଗତସରା
• ପଯୋଜାତେ ଭାସ୍ଵଦ୍ଭଵଭୁଜଗନାଶାଣ୍ଡଜଵରମ୍ ॥ ୫୭॥

• ॥ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ଶିଵେନ କୁମାରୋପଦେଶଵର୍ଣନଂ ନାମ ପଞ୍ଚମୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html