Ribhu Gita - Siva Rahasya Purana Amsha 6

ଋଭୁଗୀତା ୩୯ ॥ ସର୍ଵ-ଲଯ ପ୍ରକରଣମ୍ ॥

ଋଭୁଃ -

ପରଂ ବ୍ରହ୍ମ ପ୍ରଵକ୍ଷ୍ଯାମି ନିର୍ଵିକଲ୍ପଂ ନିରାମଯମ୍ ।
ତଦେଵାହଂ ନ ସନ୍ଦେହଃ ସର୍ଵଂ ବ୍ରହ୍ମୈଵ କେଵଲମ୍ ॥ ୧॥
ଚିନ୍ମାତ୍ରମମଲଂ ଶାନ୍ତଂ ସଚ୍ଚିଦାନନ୍ଦଵିଗ୍ରହମ୍ ।
ଆନନ୍ଦଂ ପରମାନନ୍ଦଂ ନିର୍ଵିକଲ୍ପଂ ନିରଞ୍ଜନମ୍ ॥ ୨॥
ଗୁଣାତୀତଂ ଜନାତୀତମଵସ୍ଥାତୀତମଵ୍ଯଯମ୍ ।
ଏଵଂ ଭାଵଯ ଚୈତନ୍ଯମହଂ ବ୍ରହ୍ମାସ୍ମି ସୋଽସ୍ମ୍ଯହମ୍ ॥ ୩॥
ସର୍ଵାତୀତସ୍ଵରୂପୋଽସ୍ମି ସର୍ଵଶବ୍ଦାର୍ଥଵର୍ଜିତଃ ।
ସତ୍ଯୋଽହଂ ସର୍ଵହନ୍ତାହଂ ଶୁଦ୍ଧୋଽହଂ ପରମୋଽସ୍ମ୍ଯହମ୍ ॥ ୪॥
ଅଜୋଽହଂ ଶାନ୍ତରୂପୋଽହଂ ଅଶରୀରୋଽହମାନ୍ତରଃ ।
ସର୍ଵହୀନୋଽହମେଵାହଂ ସ୍ଵଯମେଵ ସ୍ଵଯଂ ମହଃ ॥ ୫॥
ଆତ୍ମୈଵାହଂ ପରାତ୍ମାହଂ ବ୍ରହ୍ମୈଵାହଂ ଶିଵୋଽସ୍ମ୍ଯହମ୍ ।
ଚିତ୍ତହୀନସ୍ଵରୂପୋଽହଂ ବୁଦ୍ଧିହୀନୋଽହମସ୍ମ୍ଯହମ୍ ॥ ୬॥
ଵ୍ଯାପକୋଽହମହଂ ସାକ୍ଷୀ ବ୍ରହ୍ମାହମିତି ନିଶ୍ଚଯଃ ।
ନିଷ୍ପ୍ରପଞ୍ଚଗଜାରୂଢୋ ନିଷ୍ପ୍ରପଞ୍ଚାଶ୍ଵଵାହନଃ ॥ ୭॥
ନିଷ୍ପ୍ରପଞ୍ଚମହାରାଜ୍ଯୋ ନିଷ୍ପ୍ରପଞ୍ଚାଯୁଧାଦିମାନ୍ ।
ନିଷ୍ପ୍ରପଞ୍ଚମହାଵେଦୋ ନିଷ୍ପ୍ରପଞ୍ଚାତ୍ମଭାଵନଃ ॥ ୮॥
ନିଷ୍ପ୍ରପଞ୍ଚମହାନିଦ୍ରୋ ନିଷ୍ପ୍ରପଞ୍ଚସ୍ଵଭାଵକଃ ।
ନିଷ୍ପ୍ରପଞ୍ଚସ୍ତୁ ଜୀଵାତ୍ମା ନିଷ୍ପ୍ରପଞ୍ଚକଲେଵରଃ ॥ ୯॥
ନିଷ୍ପ୍ରପଞ୍ଚପରୀଵାରୋ ନିଷ୍ପ୍ରପଞ୍ଚୋତ୍ସଵୋ ଭଵଃ ।
ନିଷ୍ପ୍ରପଞ୍ଚସ୍ତୁ କଲ୍ଯାଣୋ ନିଷ୍ପ୍ରପଞ୍ଚସ୍ତୁ ଦର୍ପଣଃ ॥ ୧୦॥
ନିଷ୍ପ୍ରପଞ୍ଚରଥାରୂଢୋ ନିଷ୍ପ୍ରପଞ୍ଚଵିଚାରଣମ୍ ।
ନିଷ୍ପ୍ରପଞ୍ଚଗୁହାନ୍ତସ୍ଥୋ ନିଷ୍ପ୍ରପଞ୍ଚପ୍ରଦୀପକମ୍ ॥ ୧୧॥
ନିଷ୍ପ୍ରପଞ୍ଚପ୍ରପୂର୍ଣାତ୍ମା ନିଷ୍ପ୍ରପଞ୍ଚୋଽରିମର୍ଦନଃ ।
ଚିତ୍ତମେଵ ପ୍ରପଞ୍ଚୋ ହି ଚିତ୍ତମେଵ ଜଗତ୍ତ୍ରଯମ୍ ॥ ୧୨॥
ଚିତ୍ତମେଵ ମହାମୋହଶ୍ଚିତ୍ତମେଵ ହି ସଂସୃତିଃ ।
ଚିତ୍ତମେଵ ମହାପାପଂ ଚିତ୍ତମେଵ ହି ପୁଣ୍ଯକମ୍ ॥ ୧୩॥
ଚିତ୍ତମେଵ ମହାବନ୍ଧଶ୍ଚିତ୍ତମେଵ ଵିମୋକ୍ଷଦମ୍ ।
ବ୍ରହ୍ମଭାଵନଯା ଚିତ୍ତଂ ନାଶମେତି ନ ସଂଶଯଃ ॥ ୧୪॥
ବ୍ରହ୍ମଭାଵନଯା ଦୁଃଖଂ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ଦ୍ଵୈତଂ ନାଶମେତି ନ ସଂଶଯଃ ॥ ୧୫॥
ବ୍ରହ୍ମଭାଵନଯା କାମଃ ନାଶମେତି ନ ସଂଶଯଃ ।
ବ୍ରହ୍ମଭାଵନଯା କ୍ରୋଧଃ ନାଶମେତି ନ ସଂଶଯଃ ॥ ୧୬॥
ବ୍ରହ୍ମଭାଵନଯା ଲୋଭଃ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ଗ୍ରନ୍ଥିଃ ନାଶମେତି ନ ସଂଶଯଃ ॥ ୧୭॥
ବ୍ରହ୍ମଭାଵନଯା ସର୍ଵଂ ବ୍ରହ୍ମଭାଵନଯା ମଦଃ ।
ବ୍ରହ୍ମଭାଵନଯା ପୂଜା ନାଶମେତି ନ ସଂଶଯଃ ॥ ୧୮॥
ବ୍ରହ୍ମଭାଵନଯା ଧ୍ଯାନଂ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ସ୍ନାନଂ ନାଶମେତି ନ ସଂଶଯଃ ॥ ୧୯॥
ବ୍ରହ୍ମଭାଵନଯା ମନ୍ତ୍ରୋ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ପାପଂ ନାଶମେତି ନ ସଂଶଯଃ ॥ ୨୦॥
ବ୍ରହ୍ମଭାଵନଯା ପୁଣ୍ଯଂ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ଦୋଷୋ ନାଶମେତି ନ ସଂଶଯଃ ॥ ୨୧॥
ବ୍ରହ୍ମଭାଵନଯା ଭ୍ରାନ୍ତିଃ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ଦୃଶ୍ଯଂ ନାଶମେତି ନ ସଂଶଯଃ ॥ ୨୨॥
ବ୍ରହ୍ମଭାଵନଯା ସଙ୍ଗୋ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ତେଜୋ ନାଶମେତି ନ ସଂଶଯଃ ॥ ୨୩॥
ବ୍ରହ୍ମଭାଵନଯା ପ୍ରଜ୍ଞା ନାଶମେତି ନ ସଂଶଯଃ ।
ବ୍ରହ୍ମଭାଵନଯା ସତ୍ତା ନାଶମେତି ନ ସଂଶଯଃ ॥ ୨୪॥
ବ୍ରହ୍ମଭାଵନଯା ଭୀତିଃ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ଵେଦଃ ନାଶମେତି ନ ସଂଶଯଃ ॥ ୨୫॥
ବ୍ରହ୍ମଭାଵନଯା ଶାସ୍ତ୍ରଂ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ନିଦ୍ରା ନାଶମେତି ନ ସଂଶଯଃ ॥ ୨୬॥
ବ୍ରହ୍ମଭାଵନଯା କର୍ମ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ତୁର୍ଯଂ ନାଶମେତି ନ ସଂଶଯଃ ॥ ୨୭॥
ବ୍ରହ୍ମଭାଵନଯା ଦ୍ଵନ୍ଦ୍ଵଂ ନାଶମେତି ନ ସଂଶଯଃ ।
ବ୍ରହ୍ମଭାଵନଯା ପୃଚ୍ଛେଦହଂ ବ୍ରହ୍ମେତି ନିଶ୍ଚଯମ୍ ॥ ୨୮॥
ନିଶ୍ଚଯଂ ଚାପି ସନ୍ତ୍ଯଜ୍ଯ ସ୍ଵସ୍ଵରୂପାନ୍ତରାସନମ୍ ।
ଅହଂ ବ୍ରହ୍ମ ପରଂ ବ୍ରହ୍ମ ଚିଦ୍ବ୍ରହ୍ମ ବ୍ରହ୍ମମାତ୍ରକମ୍ ॥ ୨୯॥
ଜ୍ଞାନମେଵ ପରଂ ବ୍ରହ୍ମ ଜ୍ଞାନମେଵ ପରଂ ପଦମ୍ ।
ଦିଵି ବ୍ରହ୍ମ ଦିଶୋ ବ୍ରହ୍ମ ମନୋ ବ୍ରହ୍ମ ଅହଂ ସ୍ଵଯମ୍ ॥ ୩୦॥
କିଞ୍ଚିଦ୍ବ୍ରହ୍ମ ବ୍ରହ୍ମ ତତ୍ତ୍ଵଂ ତତ୍ତ୍ଵଂ ବ୍ରହ୍ମ ତଦେଵ ହି ।
ଅଜୋ ବ୍ରହ୍ମ ଶୁଭଂ ବ୍ରହ୍ମ ଆଦିବ୍ରହ୍ମ ବ୍ରଵୀମି ତମ୍ ॥ ୩୧॥
ଅହଂ ବ୍ରହ୍ମ ହଵିର୍ବ୍ରହ୍ମ କାର୍ଯବ୍ରହ୍ମ ତ୍ଵହଂ ସଦା ।
ନାଦୋ ବ୍ରହ୍ମ ନଦଂ ବ୍ରହ୍ମ ତତ୍ତ୍ଵଂ ବ୍ରହ୍ମ ଚ ନିତ୍ଯଶଃ ॥ ୩୨॥
ଏତଦ୍ବ୍ରହ୍ମ ଶିଖା ବ୍ରହ୍ମ ତଦ୍ବ୍ରହ୍ମ ବ୍ରହ୍ମ ଶାଶ୍ଵତମ୍ ।
ନିଜଂ ବ୍ରହ୍ମ ସ୍ଵତୋ ବ୍ରହ୍ମ ନିତ୍ଯଂ ବ୍ରହ୍ମ ତ୍ଵମେଵ ହି ॥ ୩୩॥
ସୁଖଂ ବ୍ରହ୍ମ ପ୍ରିଯଂ ବ୍ରହ୍ମ ମିତ୍ରଂ ବ୍ରହ୍ମ ସଦାମୃତମ୍ ।
ଗୁହ୍ଯଂ ବ୍ରହ୍ମ ଗୁରୁର୍ବ୍ରହ୍ମ ଋତଂ ବ୍ରହ୍ମ ପ୍ରକାଶକମ୍ ॥ ୩୪॥
ସତ୍ଯଂ ବ୍ରହ୍ମ ସମଂ ବ୍ରହ୍ମ ସାରଂ ବ୍ରହ୍ମ ନିରଞ୍ଜନମ୍ ।
ଏକଂ ବ୍ରହ୍ମ ହରିର୍ବ୍ରହ୍ମ ଶିଵୋ ବ୍ରହ୍ମ ନ ସଂଶଯଃ ॥ ୩୫॥
ଇଦଂ ବ୍ରହ୍ମ ସ୍ଵଯଂ ବ୍ରହ୍ମ ଲୋକଂ ବ୍ରହ୍ମ ସଦା ପରଃ ।
ଆତ୍ମବ୍ରହ୍ମ ପରଂ ବ୍ରହ୍ମ ଆତ୍ମବ୍ରହ୍ମ ନିରନ୍ତରଃ ॥ ୩୬॥
ଏକଂ ବ୍ରହ୍ମ ଚିରଂ ବ୍ରହ୍ମ ସର୍ଵଂ ବ୍ରହ୍ମାତ୍ମକଂ ଜଗତ୍ ।
ବ୍ରହ୍ମୈଵ ବ୍ରହ୍ମ ସଦ୍ବ୍ରହ୍ମ ତତ୍ପରଂ ବ୍ରହ୍ମ ଏଵ ହି ॥ ୩୭॥
ଚିଦ୍ବ୍ରହ୍ମ ଶାଶ୍ଵତଂ ବ୍ରହ୍ମ ଜ୍ଞେଯଂ ବ୍ରହ୍ମ ନ ଚାପରଃ ।
ଅହମେଵ ହି ସଦ୍ବ୍ରହ୍ମ ଅହମେଵ ହି ନିର୍ଗୁଣମ୍ ॥ ୩୮॥
ଅହମେଵ ହି ନିତ୍ଯାତ୍ମା ଏଵଂ ଭାଵଯ ସୁଵ୍ରତ ।
ଅହମେଵ ହି ଶାସ୍ତ୍ରାର୍ଥ ଇତି ନିଶ୍ଚିତ୍ଯ ସର୍ଵଦା ॥ ୩୯॥
ଆତ୍ମୈଵ ନାନ୍ଯଦ୍ଭେଦୋଽସ୍ତି ସର୍ଵଂ ମିଥ୍ଯେତି ନିଶ୍ଚିନୁ ।
ଆତ୍ମୈଵାହମହଂ ଚାତ୍ମା ଅନାତ୍ମା ନାସ୍ତି ନାସ୍ତି ହି ॥ ୪୦॥
ଵିଶ୍ଵଂ ଵସ୍ତୁତଯା ଵିଭାତି ହୃଦଯେ ମୂଢାତ୍ମନାଂ ବୋଧତୋ-
ଽପ୍ଯଜ୍ଞାନଂ ନ ନିଵର୍ତତେ ଶ୍ରୁତିଶିରୋଵାର୍ତାନୁଵୃତ୍ତ୍ଯାଽପି ଚ ।
ଵିଶ୍ଵେଶସ୍ଯ ସମର୍ଚନେନ ସୁମହାଲିଙ୍ଗାର୍ଚନାଦ୍ଭସ୍ମଧୃକ୍
ରୁଦ୍ରାକ୍ଷାମଲଧାରଣେନ ଭଗଵଦ୍ଧ୍ଯାନେନ ଭାତ୍ଯାତ୍ମଵତ୍ ॥ ୪୧॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ସର୍ଵଲଯପ୍ରକରଣଂ ନାମ ଏକୋନଚତ୍ଵାରିଂଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html