Ribhu Gita - Siva Rahasya Purana Amsha 6

ଋଭୁଗୀତା ୪୫ ॥ ନିଦାଧ-କୃତ-ଗୁରୁ-ସ୍ତୁତି ଵର୍ଣନମ୍ ॥

ନିଦାଘଃ -

ପୁଣ୍ଯେ ଶିଵରହସ୍ଯେଽସ୍ମିନ୍ନିତିହାସେ ଶିଵୋଦିତେ ।
ଦେଵ୍ଯୈ ଶିଵେନ କଥିତେ ଦେଵ୍ଯା ସ୍କନ୍ଦାଯ ମୋଦତଃ ॥ ୧॥
ତଦେତସ୍ମିନ୍ ହି ଷଷ୍ଠାଂଶେ ଷଡାସ୍ଯକମଲୋଦିତେ ।
ପାରମେଶ୍ଵରଵିଜ୍ଞାନଂ ଶ୍ରୁତମେତନ୍ମହାଘଭିତ୍ ॥ ୨॥
ମହାମାଯାତମସ୍ତୋମଵିନିଵାରଣଭାସ୍କରମ୍ ।
ଅସ୍ଯାଧ୍ଯାଯୈକକଥନାଦ୍ ଵିଜ୍ଞାନଂ ମହଦଶ୍ନୁତେ ॥ ୩॥
ଶ୍ଲୋକସ୍ଯ ଶ୍ରଵଣେନାପି ଜୀଵନ୍ମୁକ୍ତୋ ନ ସଂଶଯଃ ।
ଏତଦ୍ଗ୍ରନ୍ଥପ୍ରଵକ୍ତା ହି ଷଣ୍ମୁଖଃ ଶିଵ ଏଵ ହି ॥ ୪॥
ଜୈଗୀଷଵ୍ଯୋ ମହାଯୋଗୀ ସ ଏଵ ଶ୍ରଵଣେଽର୍ହତି ।
ଭସ୍ମରୁଦ୍ରାକ୍ଷଧୃଙ୍ ନିତ୍ଯଂ ସଦା ହ୍ଯତ୍ଯାଶ୍ରମୀ ମୁନିଃ ॥ ୫॥
ଏତଦ୍ଗ୍ରନ୍ଥପ୍ରଵକ୍ତା ହି ସ ଗୁରୁର୍ନାତ୍ର ସଂଶଯଃ ।
ଏତଦ୍ଗ୍ରନ୍ଥପ୍ରଵକ୍ତା ହି ପରଂ ବ୍ରହ୍ମ ନ ସଂଶଯଃ ॥ ୬॥
ଏତଦ୍ଗ୍ରନ୍ଥପ୍ରଵକ୍ତା ହି ଶିଵ ଏଵ ନ ଚାପରଃ ।
ଏତଦ୍ଗ୍ରନ୍ଥପ୍ରଵକ୍ତା ହି ସାକ୍ଷାଦ୍ଦେଵୀ ନ ସଂଶଯଃ ॥ ୭॥
ଏତଦ୍ଗ୍ରନ୍ଥପ୍ରଵକ୍ତା ହି ଗଣେଶୋ ନାତ୍ର ସଂଶଯଃ ।
ଏତଦ୍ଗ୍ରନ୍ଥପ୍ରଵକ୍ତା ହି ସ୍କନ୍ଦଃ ସ୍କନ୍ଦିତତାରକଃ ॥ ୮॥
ଏତଦ୍ଗ୍ରନ୍ଥପ୍ରଵକ୍ତା ହି ନନ୍ଦିକେଶୋ ନ ସଂଶଯଃ ।
ଏତଦ୍ଗ୍ରନ୍ଥପ୍ରଵକ୍ତା ହି ଦତ୍ତାତ୍ରେଯୋ ମୁନିଃ ସ୍ଵଯମ୍ ॥ ୯॥
ଏତଦ୍ଗ୍ରନ୍ଥପ୍ରଵକ୍ତା ହି ଦକ୍ଷିଣାମୂର୍ତିରେଵ ହି ।
ଏତଦ୍ଗ୍ରନ୍ଥାର୍ଥକଥନେ ଭାଵନେ ମୁନଯଃ ସୁରାଃ ॥ ୧୦॥
ନ ଶକ୍ତା ମୁନିଶାର୍ଦୂଲ ତ୍ଵଦୃତେଽହଂ ଶିଵଂ ଶପେ ।
ଏତଦ୍ଗ୍ରନ୍ଥାର୍ଥଵକ୍ତାରଂ ଗୁରୁଂ ସର୍ଵାତ୍ମନା ଯଜେତ୍ ॥ ୧୧॥
ଏତଦ୍ଗ୍ରନ୍ଥପ୍ରଵକ୍ତା ତୁ ଶିଵୋ ଵିଘ୍ନେଶ୍ଵରଃ ସ୍ଵଯମ୍ ।
ପିତା ହି ଜନ୍ମଦୋ ଦାତା ଗୁରୁର୍ଜନ୍ମଵିନାଶକଃ ॥ ୧୨॥
ଏତଦ୍ଗ୍ରନ୍ଥଂ ସମଭ୍ଯସ୍ଯ ଗୁରୋର୍ଵାକ୍ଯାଦ୍ଵିଶେଷତଃ ।
ନ ଦୁହ୍ଯେତ ଗୁରୁଂ ଶିଷ୍ଯୋ ମନସା କିଞ୍ଚ କାଯତଃ ॥ ୧୩॥
ଗୁରୁରେଵ ଶିଵଃ ସାକ୍ଷାତ୍ ଗୁରୁରେଵ ଶିଵଃ ସ୍ଵଯମ୍ ।
ଶିଵେ ରୁଷ୍ଟେ ଗୁରୁସ୍ତ୍ରାତା ଗୁରୌ ରୁଷ୍ଟେ ନ କଶ୍ଚନ ॥ ୧୪॥
ଏତଦ୍ଗ୍ରନ୍ଥପଦାଭ୍ଯାସେ ଶ୍ରଦ୍ଧା ଵୈ କାରଣଂ ପରମ୍ ।
ଅଶ୍ରଦ୍ଧଧାନଃ ପୁରୁଷୋ ନୈତଲ୍ଲେଶମିହାର୍ହତି ॥ ୧୫॥
ଶ୍ରଦ୍ଧୈଵ ପରମଂ ଶ୍ରେଯୋ ଜୀଵବ୍ରହ୍ମୈକ୍ଯକାରଣମ୍ ।
ଅସ୍ତି ବ୍ରହ୍ମେତି ଚ ଶ୍ରୁତ୍ଵା ଭାଵଯନ୍ ସନ୍ତ ଏଵ ହି ॥ ୧୬॥
ଶିଵପ୍ରସାଦହୀନୋ ଯୋ ନୈତଦ୍ଗ୍ରନ୍ଥାର୍ଥଵିଦ୍ଭଵେତ୍ ।
ଭାଵଗ୍ରାହ୍ଯୋଽଯମାତ୍ମାଯଂ ପର ଏକଃ ଶିଵୋ ଧ୍ରୁଵଃ ॥ ୧୭॥
ସର୍ଵମନ୍ଯତ୍ ପରିତ୍ଯଜ୍ଯ ଧ୍ଯାଯୀତେଶାନମଵ୍ଯଯମ୍ ।
ଶିଵଜ୍ଞାନମିଦଂ ଶୁଦ୍ଧଂ ଦ୍ଵୈତାଦ୍ଵୈତଵିନାଶନମ୍ ॥ ୧୮॥
ଅନ୍ଯେଷୁ ଚ ପୁରାଣେଷୁ ଇତିହାସେଷୁ ନ କ୍ଵଚିତ୍ ।
ଏତାଦୃଶଂ ଶିଵଜ୍ଞାନଂ ଶ୍ରୁତିସାରମହୋଦଯମ୍ ॥ ୧୯॥
ଉକ୍ତଂ ସାକ୍ଷାଚ୍ଛିଵେନୈତଦ୍ ଯୋଗସାଂଖ୍ଯଵିଵର୍ଜିତମ୍ ।
ଭାଵନାମାତ୍ରସୁଲଭଂ ଭକ୍ତିଗମ୍ଯମନାମଯମ୍ ॥ ୨୦॥
ମହାନନ୍ଦପ୍ରଦଂ ସାକ୍ଷାତ୍ ପ୍ରସାଦେନୈଵ ଲଭ୍ଯତେ ।
ତସ୍ଯୈତେ କଥିତା ହ୍ଯର୍ଥାଃ ପ୍ରକାଶନ୍ତେ ମହାତ୍ମନଃ ॥ ୨୧॥
ଏତଦ୍ଗ୍ରନ୍ଥଂ ଗୁରୋଃ ଶ୍ରୁତ୍ଵା ନ ପୂଜାଂ କୁରୁତେ ଯଦି ।
ଶ୍ଵାନଯୋନିଶତଂ ପ୍ରାପ୍ଯ ଚଣ୍ଡାଲଃ କୋଟିଜନ୍ମସୁ ॥ ୨୨॥
ଏତଦ୍ଗ୍ରନ୍ଥସ୍ଯ ମାହାତ୍ମ୍ଯଂ ନ ଯଜନ୍ତୀଶ୍ଵରଂ ହୃଦା ।
ସ ସୂକରୋ ଭଵତ୍ଯେଵ ସହସ୍ରପରିଵତ୍ସରାନ୍ ॥ ୨୩॥
ଏତଦ୍ଗ୍ରନ୍ଥାର୍ଥଵକ୍ତାରମଭ୍ଯସୂଯେତ ଯୋ ଦ୍ଵିଜଃ ।
ଅନେକବ୍ରହ୍ମକଲ୍ପଂ ଚ ଵିଷ୍ଠାଯାଂ ଜାଯତେ କ୍ରିମିଃ ॥ ୨୪॥
ଏତଦ୍ଗ୍ରନ୍ଥାର୍ଥଵିଦ୍ବ୍ରହ୍ମା ସ ବ୍ରହ୍ମ ଭଵତି ସ୍ଵଯମ୍ ।
କିଂ ପୁନର୍ବହୁନୋକ୍ତେନ ଜ୍ଞାନମେତଦ୍ଵିମୁକ୍ତିଦମ୍ ॥ ୨୫॥
ଯସ୍ତ୍ଵେତଚ୍ଛୃଣୁଯାଚ୍ଛିଵୋଦିମହାଵେଦାନ୍ତାଂବୁଧି (?)
ଵୀଚିଜାତପୁଣ୍ଯଂ ନାପେକ୍ଷତ୍ଯନିଶଂ ନ ଚାବ୍ଦକଲ୍ପୈଃ ।
ଶବ୍ଦାନାଂ ନିଖିଲୋ ରସୋ ହି ସ ଶିଵଃ କିଂ ଵା ତୁଷାଦ୍ରି
ପରିଖଂଡନତୋ ଭଵେତ୍ ସ୍ଯାତ୍ ତଣ୍ଡୁଲୋଽପି ସ ମୃଷା ଭଵମୋହଜାଲମ୍ ॥ ୨୬॥
ତଦ୍ଵତ୍ ସର୍ଵମଶାସ୍ତ୍ରମିତ୍ଯେଵ ହି ସତ୍ଯଂ
ଦ୍ଵୈତୋତ୍ଥଂ ପରିହାଯ ଵାକ୍ଯଜାଲମ୍ ।
ଏଵଂ ତ୍ଵଂ ତ୍ଵନିଶଂ ଭଜସ୍ଵ ନିତ୍ଯଂ
ଶାନ୍ତୋଦ୍ଯଖିଲଵାକ୍ ସମୂହଭାଵନା ॥ ୨୭॥
ସତ୍ଯତ୍ଵାଭାଵଭାଵିତୋଽନୁରୂପଶୀଲଃ ।
ସଂପଶ୍ଯନ୍ ଜଗଦିଦମାସମଞ୍ଜସଂ ସଦା ହି ॥ ୨୮॥

॥ ଇତି ଶ୍ରୀଶିଵରହସ୍ଯେ ଶଙ୍କରାଖ୍ଯେ ଷଷ୍ଠାଂଶେ ଋଭୁନିଦାଘସଂଵାଦେ ନିଦାଘକୃତଗୁରୁସ୍ତୁତିଵର୍ଣନଂ ନାମ ପଞ୍ଚଚତ୍ଵାରିଂଶୋଽଧ୍ଯାଯଃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com