RbhugItA 1 || Rbhu stuti ||
- hemAdriM kila mAtuluGgaphalamityAdAya modAdhiko
- mauDhyAnnAkanivAsinAM bhayaparairvAkyairiva prArthitaH |
- nIlIzAmbaranIlamambaratalaM jambUphalaM bhAvayan
- taM muJcan girimambaraM parimRzan lambodaraH pAtu mAm || 1||
- vAmaM yasya vapuH samastajagatAM mAtA pitA cetarat
- yatpAdAmbujanUpurodbhavaravaH zabdArthavAkyAspadam |
- yannetratritayaM samastajagatAmAlokahetuH sadA
- pAyAddaivatasArvabhaumagirijAlaGkAramUrtiH zivaH || 2||
sUtaH -
- jaigISavyaH punarnatvA SaNmukhaM zivasaMbhavam |
- papraccha hRSTastaM tatra munibhirgaNapuGgavaiH || 3||
jaigISavyaH -
- karuNAkara sarvajJa zaraNAgatapAlaka |
- aruNAdhipanetrAbja caraNasmaraNonmukha || 4||
- karuNAvaruNAmbhodhe taraNidyutibhAskara |
- divyadvAdazaliGgAnAM mahimA saMzruto mayA || 5||
- tvatto'nyat zrotumicchAmi zivAkhyAnamanuttamam |
- tvadvAkyakaJjapIyUSadhArAbhiH pAvayAzu mAm || 6||
sUtaH -
- iti tasya girA tuSTaH SaNmukhaH prAha taM munim || 7||
zrISaNmukhaH -
- zRNu tvamagajAkAntenoktaM jJAnamahArNavam |
- Rbhave yatpurA prAha kailAse zaGkaraH svayam || 8||
- brahmasUnuH purA vipro gatvA natvA mahezvaram |
- RbhurvibhuM tadA zaMbhuM tuSTAva praNato mudA || 9||
RbhuH -
- divAmaNinizApatisphuTakRpITayonisphura-
- llalATabhasitollasadvaratripuNDrabhAgojvalam |var was tripuNTra
- bhajAmi bhujagAGgadaM vidhRtasAmisomaprabhA-
- virAjitakapardakaM karaTikRttibhUSyatkaTim || 10||
- phAlAkSAdhvaradakSazikSakavalakSokSezavAhottama-
- tryakSAkSayya phalapradAvabhasitAlaGkArarudrAkSadhRk |
- cakSuHzrotravarAGgahArasumahAvakSaHsthalAdhyakSa mAM
- bhakSyIbhUtagaraprabhakSa bhagavan bhikSvarcyapAdAmbuja || 11||
- gaGgAcandrakalAlalAma bhagavan bhUbhRtkumArIsakha
- svAmiMste padapadmabhAvamatulaM kaSTApahaM dehi me |
- tuSTo'haM zipiviSTahRSTamanasA bhraSTAnna manye hari-
- brahmendrAnamarAn triviSTapagatAn niSThA hi me tAdRzI || 12||
- nRttADaMbarasajjaTApaTalikAbhrAmyanmahoDucchaTA
- truTyatsomakalAlalAmakalikA zamyAkamaulInatam |
- ugrAnugrabhavogradurgajagaduddhArAgrapAdAmbujaM
- rakSovakSakuThArabhUtamumayA vIkSe sukAmapradam || 13||
- phAlaM me bhasitatripuNDraracitaM tvatpAdapadmAnataM ??
- pAhIzAna dayAnidhAna bhagavan phAlAnalAkSa prabho |
- kaNTho me zitikaNThanAma bhavato rudrAkSadhRk pAhi mAM
- karNau me bhujagAdhiporusumahAkarNa prabho pAhi mAm || 14||
- nityaM zaGkaranAmabodhitakathAsArAdaraM zaGkaraM
- vAcaM rudrajapAdarAM sumahatIM paJcAkSarImindudhRk |
- bAhU me zazibhUSaNottama mahAliGgArcanAyodyatau
- pAhi premarasArdrayA'dya sudRzA zambho hiraNyaprabha || 15||
- bhAsvadbAhucatuSTayojjvala sadA netre trinetre prabho
- tvalliGgottamadarzanena sutarAM tRptaiH sadA pAhi me |
- pAdau me harinetrapUjitapadadvandvAva nityaM prabho
- tvalliGgAlayaprakramapraNatibhirmAnyau ca dhanyau vibho || 16||
- dhanyastvalliGgasaGgepyanudinagalitAnaGgasaGgAntaraGgaH
- puMsAmarthaikazaktyA yamaniyamavarairvizvavandya prabho yaH |
- datvA bilvadalaM sadambujavaraM kiJcijjalaM vA muhuH
- prApnotIzvarapAdapaGkajamumAnAthAdya muktipradam || 17||
- umAramaNa zaGkara tridazavandya vedeDya hRt
- tvadIyaparabhAvato mama sadaiva nirvANakRt |
- bhavArNavanivAsinAM kimu bhavatpadAmbhoruha-
- prabhAvabhajanAdaraM bhavati mAnasaM muktidam || 18||
- saMsArArgalapAdabaddhajanatAsaMmocanaM bharga te
- pAdadvandvamumAsanAtha bhajatAM saMsArasaMbharjakam |
- tvannAmottamagarjanAdaghakulaM santarjitaM vai bhaved
- duHkhAnAM parimArjakaM tavakRpAvIkSAvatAM jAyate || 19||
- vidhimuNDakarottamorumerukodaNDakhaNDitapurANDajavAhabANa
- pAhi kSamArathavikarSasuvedavAjiheSAntaharSitapadAmbuja vizvanAtha || 20||
- vibhUtInAmanto na hi khalu bhavAnIramaNa te
- bhave bhAvaM kazcit tvayi bhavaha bhAgyena labhate |
- abhAvaM cAjJAnaM bhavati jananAdyaizca rahitaH
- umAkAnta svAnte bhavadabhayapAdaM kalayataH || 21||
- varaM zaMbho bhAvairbhavabhajanabhAvena nitarAM
- bhavAmbhodhirnityaM bhavati vitataH pAMsubahulaH |
- vimuktiM bhuktiM ca zrutikathitabhasmAkSavaradhRk
- bhave bhartuH sarvo bhavati ca sadAnandamadhuraH || 22||
- somasAmajasukRttimaulidhRk sAmasImazirasi stutapAda |
- sAmikAyagirijezvara zambho pAhi mAmakhiladuHkhasamUhAt || 23||
- bhasmAGgarAga bhujagAGga mahokSasaGga
- gaGgAmbusaGga sujaTA niTila sphuliGga |
- liGgAGga bhaGgitamanaGga vihaGgavAha-
- sampUjyapAda sadasaGga janAntaraGga || 24||
- vAtsalyaM mayi tAdRzaM tavanaceccandrArdha cUDAmaNe
- dhikkRtyApi vimucya vA tvayi yato dhanyo dharaNyAmaham |
- sakSAraM lavaNArNavasya salilaM dhArA dhareNa kSaNAt
- AdAyojjhitamAkSitau hi jagatAM AsvAdanIyAM dRzAm || 25||
- tvat kailAsavare vizokahRdayAH krodhojjhitAccANDajAH
- tasmAnmAmapi bhedabuddhirahitaM kurvIza te'nugrahAt |
- tvadvaktrAmala nirjarojjhita mahAsaMsAra saMtApahaM
- vijJAnaM karuNA'dizAdya bhagavan lokAvanAya prabho || 26||
- sAraGgI siMhazAbaM spRzati sutadhiyA nandinI vyAghrapotaM
- mArjArI haMsabAlaM praNayaparavazA kekikAntA bhujaGgam |
- vairANyAjanmajAtAnyapi galitamadA jantavo'nye tyajanti
- bhaktAstvatpAdapadme kimu bhajanavataH sarvasiddhiM labhante || 27||
skandaH -
- itthaM RbhustutimumAvarajAnirIzaH
- zrutvA tamAha gaNanAthavaro mahezaH |
- jJAnaM bhavAmayavinAzakaraM tadeva
- tasmai tadeva kathaye zRNu pAzamuktyai || 28||
- || iti zrIzivarahasye zaMkarAkhye SaSThAMze RbhustutirnAma prathamo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com