RbhugItA 25 || brahmaNaH sarva-rUpatva nirUpaNa prakaraNam ||

RbhuH -

• vakSye prasiddhamAtmAnaM sarvalokaprakAzakam |
• sarvAkAraM sadA siddhaM sarvatra nibiDaM mahat || 1||
• tadbrahmAhaM na sandeha iti nizcitya tiSTha bhoH |
• cidevAhaM cidevAhaM citraM cedahameva hi || 2||
• vAcAvadhizca devo'haM cideva manasaH paraH |
• cidevAhaM paraM brahma cideva sakalaM padam || 3||
• sthUladehaM cidevedaM sUkSmadehaM cideva hi |
• cideva karaNaM so'haM kAyameva cideva hi || 4||
• akhaNDAkAravRttizca uttamAdhamamadhyamAH |
• dehahInazcidevAhaM sUkSmadehazcideva hi || 5||
• cideva kAraNaM so'haM buddhihInazcideva hi |
• bhAvahInazcidevAhaM doSahInazcideva hi || 6||
• astitvaM brahma nAstyeva nAsti brahmeti nAsti hi |
• asti nAstIti nAstyeva ahameva cideva hi || 7||
• sarvaM nAstyeva nAstyeva sAkAraM nAsti nAsti hi |
• yatkiJcidapi nAstyeva ahameva cideva hi || 8||
• anvayavyatirekaM ca AdimadhyAntadUSaNam |
• sarvaM cinmAtrarUpatvAdahameva cideva hi || 9||
• sarvAparaM ca sadasat kAryakAraNakartRkam |
• sarvaM nAstyeva nAstyeva ahameva hi kevalam || 10||
• azuddhaM zuddhamadvaitaM dvaitamekamanekakam |
• sarvaM nAstyeva nAstyeva ahameva hi kevalam || 11||
• asatyasatyamadvandvaM dvandvaM ca parataH param |
• sarvaM nAstyeva nAstyeva ahameva hi kevalam || 12||
• bhUtaM bhaviSyaM vartaM ca mohAmohau samAsamau |
• sarvaM nAstyeva nAstyeva ahameva hi kevalam || 13||
• kSaNaM lavaM truTirbrahma tvaMpadaM tatpadaM tathA |
• sarvaM nAstyeva nAstyeva ahameva hi kevalam || 14||
• tvaMpadaM tatpadaM vApi aikyaM ca hyahameva hi |
• sarvaM nAstyeva nAstyeva ahameva hi kevalam || 15||
• AnandaM paramAnandaM sarvAnandaM nijaM mahat |
• sarvaM nAstyeva nAstyeva ahameva hi kevalam || 16||
• ahaM brahma idaM brahma kaM brahma hyakSaraM param |
• sarvaM nAstyeva nAstyeva ahameva hi kevalam || 17||
• viSNureva paraM brahma zivo brahmAhameva hi |
• sarvaM nAstyeva nAstyeva ahameva hi kevalam || 18||
• zrotraM brahma paraM brahma zabdaM brahma padaM zubham |
• sarvaM nAstyeva nAstyeva ahameva hi kevalam || 19||
• sparzo brahma padaM tvakca tvakca brahma parasparam |
• sarvaM nAstyeva nAstyeva ahameva hi kevalam || 20||
• paraM rUpaM cakSubhiH eva tatraiva yojyatAm |
• sarvaM nAstyeva nAstyeva ahameva hi kevalam || 21||
• brahmaiva sarvaM satataM saccidAnandamAtrakam |
• sarvaM nAstyeva nAstyeva ahameva hi kevalam || 22||
• cinmayAnandamAtro'haM idaM vizvamidaM sadA |
• sarvaM nAstyeva nAstyeva ahameva hi kevalam || 23||
• brahmaiva sarvaM yatkiJcit tadbrahmAhaM na saMzayaH |
• sarvaM nAstyeva nAstyeva ahameva hi kevalam || 24||
• vAcA yat procyate nAma manasA manute tu yat |
• sarvaM nAstyeva nAstyeva ahameva hi kevalam || 25||
• kAraNe kalpite yadyat tUSNIM vA sthIyate sadA |
• zarIreNa tu yad bhuGkte indriyairyattu bhAvyate |
• sarvaM nAstyeva nAstyeva ahameva hi kevalam || 26||
• vede yat karma vedoktaM zAstraM zAstroktanirNayam |
• gurUpadezasiddhAntaM zuddhAzuddhavibhAsakam || 27||
• kAmAdikalanaM brahma devAdi kalanaM pRthak |
• jIvayukteti kalanaM videho muktikalpanam || 28||
• brahma ityapi saGkalpaM brahmavidvarakalpanam |
• varIyAniti saGkalpaM variSTha iti kalpanam || 29||
• brahmAhamiti saGkalpaM cidahaM ceti kalpanam |
• mahAvidyeti saGkalpaM mahAmAyeti kalpanam || 30||
• mahAzUnyeti saGkalpaM mahAcinteti kalpanam |
• mahAloketi saGkalpaM mahAsatyeti kalpanam || 31||
• mahArUpeti saGkalpaM mahArUpaM ca kalpanam |
• sarvasaGkalpakaM cittaM sarvasaGkalpakaM manaH || 32||
• sarvaM nAstyeva nAstyeva sarvaM brahmaiva kevalam |
• sarvaM dvaitaM manorUpaM sarvaM duHkhaM manomayam || 33||
• cidevAhaM na sandehaH cidevedaM jagattrayam |
• yatkiJcidbhASaNaM vApi yatkiJcinmanaso japam |
• yatkiJcinmAnasaM karma sarvaM brahmaiva kevalam || 34||
• sarvaM nAstIti sanmantraM jIvabrahmasvarUpakam |
• brahmaiva sarvamityevaM mantraJcaivottamottamam || 35||
• anuktamantraM sanmantraM vRttizUnyaM paraM mahat |
• sarvaM brahmeti saGkalpaM tadeva paramaM padam || 36||
• sarvaM brahmeti saGkalpaM mahAdeveti kIrtanam |
• sarvaM brahmeti saGkalpaM zivapUjAsamaM mahat || 37||
• sarvaM brahmetyanubhavaH sarvAkAro na saMzayaH |
• sarvaM brahmeti saGkalpaM sarvatyAgamitIritam || 38||
• sarvaM brahmeti saGkalpaM bhAvAbhAvavinAzanam |
• sarvaM brahmeti saGkalpaM mahAdeveti nizcayaH || 39||
• sarvaM brahmeti saGkalpaM kAlasattAvinirmuktaH |
• sarvaM brahmeti saGkalpaH dehasattA vimuktikaH || 40||
• sarvaM brahmeti saGkalpaH saccidAnandarUpakaH |
• sarvo'haM brahmamAtraiva sarvaM brahmaiva kevalam || 41||
• idamityeva yatkiJcit tadbrahmaiva na saMzayaH |
• bhrAntizca narakaM duHkhaM svargabhrAntiritIritA || 42||
• brahmA viSNuriti bhrAntirbhrAntizca zivarUpakam |
• virAT svarAT tathA samrAT sUtrAtmA bhrAntireva ca || 43||
• devAzca devakAryANi sUryAcandramasorgatiH |
• munayo manavaH siddhA bhrAntireva na saMzayaH || 44||
• sarvadevAsurA bhrAntisteSAM yuddhAdi janma ca |
• viSNorjanmAvatArANi caritaM zAntireva hi || 45||
• brahmaNaH sRSTikRtyAni rudrasya caritAni ca |
• sarvabhrAntisamAyuktaM bhrAntyA lokAzcaturdaza || 46||
• varNAzramavibhAgazca bhrAntireva na saMzayaH |
• brahmaviSNvIzarudrANAmupAsA bhrAntireva ca || 47||
• tatrApi yantramantrAbhyAM bhrAntireva na saMzayaH |
• vAcAmagocaraM brahma sarvaM brahmamayaM ca hi || 48||
• sarvaM nAstyeva nAstyeva ahameva cideva hi |
• evaM vada tvaM tiSTha tvaM sadyo mukto bhaviSyasi || 49||
• etAvaduktaM yatkiJcit tannAstyeva na saMzayaH |
• evaM yadAntaraM kSipraM brahmaiva dRDhanizcayam || 50||
• dRDhanizcayamevAtra prathamaM kAraNaM bhavet |
• nizcayaH khalvayaM pazcAt svayameva bhaviSyati || 51||
• ArtaM yacchivapAdato'nyaditaraM tajjAdizabdAtmakaM
• cetovRttiparaM parApramuditaM SaDbhAvasiddhaM jagat |
• bhUtAkSAdimanovacobhiranaghe sAndre maheze ghane
• sindhau saindhavakhaNDavajjagadidaM lIyeta vRttyujjhitam || 52||

• || iti zrIzivarahasye zaGkarAkhye SaSThAMze RbhunidAghasaMvAde brahmaNassarvarUpatvanirUpaNaprakaraNaM nAma paJcaviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com