RbhugItA 20 || Atma-vaibhava prakaraNam ||

RbhuH -

• zRNu kevalamatyantaM rahasyaM paramAdbhutam |
• iti guhyataraM sadyo mokSapradamidaM sadA || 1||
• sulabhaM brahmavijJAnaM sulabhaM zubhamuttamam |
• sulabhaM brahmaniSThAnAM sulabhaM sarvabodhakam || 2||
• sulabhaM kRtakRtyAnAM sulabhaM svayamAtmanaH |
• sulabhaM kAraNAbhAvaM sulabhaM brahmaNi sthitam || 3||
• sulabhaM cittahInAnAM svayaM tacca svayaM svayam |
• svayaM saMsArahInAnAM cittaM saMsAramucyate || 4||
• sRSTvaidaM na saMsAraH brahmaivedaM mano na ca |
• brahmaivedaM bhayaM nAsti brahmaivedaM na kiJcana || 5||
• brahmaivedamasat sarvaM brahmaivedaM parAyaNam |
• brahmaivedaM zarIrANAM brahmaivedaM tRNaM na ca || 6||
• brahmaivAsmi na cAnyo'smi brahmaivedaM jaganna ca |
• brahmaivedaM viyannAsti brahmaivedaM kriyA na ca || 7||
• brahmaivedaM mahAtmAnaM brahmaivedaM priyaM sadA |
• brahmaivedaM jagannAnto brahmaivAhaM bhayaM na hi || 8||
• brahmaivAhaM sadAcittaM brahmaivAhamidaM na hi |
• brahmaivAhaM tu yanmithyA brahmaivAhamiyaM bhramA || 9||
• brahmaiva sarvasiddhAnto brahmaiva manasAspadam |
• brahmaiva sarvabhavanaM brahmaiva munimaNDalam || 10||
• brahmaivAhaM tu nAstyanyad brahmaiva gurupUjanam |
• brahmaiva nAnyat kiJcittu brahmaiva sakalaM sadA || 11||
• brahmaiva triguNAkAraM brahmaiva harirUpakam |
• brahmaNo'nyat padaM nAsti brahmaNo'nyat kSaNaM na me || 12||
• brahmaivAhaM nAnyavArtA brahmaivAhaM na ca zrutam |
• brahmaivAhaM samaM nAsti sarvaM brahmaiva kevalam || 13||
• brahmaivAhaM na me bhogo brahmaivAhaM na me pRthak |
• brahmaivAhaM sataM nAsti brahmaiva brahmarUpakaH || 14||
• brahmaiva sarvadA bhAti brahmaiva sukhamuttamam |
• brahmaiva nAnAkAratvAt brahmaivAhaM priyaM mahat || 15||
• brahmaiva brahmaNaH pUjyaM brahmaiva brahmaNo guruH |
• brahmaiva brahmamAtA tu brahmaivAhaM pitA sutaH || 16||
• brahmaiva brahma devaM ca brahmaiva brahma tajjayaH |
• brahmaiva dhyAnarUpAtmA brahmaiva brahmaNo guNaH || 17||
• Atmaiva sarvanityAtmA Atmano'nyanna kiJcana |
• Atmaiva satataM hyAtmA Atmaiva gururAtmanaH || 18||
• AtmajyotirahaMbhUtamAtmaivAsti sadA svayam |
• svayaM tattvamasi brahma svayaM bhAmi prakAzakaH || 19||
• svayaM jIvatvasaMzAntiH svayamIzvararUpavAn |
• svayaM brahma paraM brahma svayaM kevalamavyayam || 20||
• svayaM nAzaM ca siddhAntaM svayamAtmA prakAzakaH |
• svayaM prakAzarUpAtmA svayamatyantanirmalaH || 21||
• svayameva hi nityAtmA svayaM zuddhaH priyApriyaH |
• svayameva svayaM chandaH svayaM dehAdivarjitaH || 22||
• svayaM doSavihInAtmA svayamAkAzavat sthitaH |
• ayaM cedaM ca nAstyeva ayaM bhedavivarjitaH || 23||
• brahmaiva cittavadbhAti brahmaiva zivavat sadA |
• brahmaiva buddhivadbhAti brahmaiva zivavat sadA || 24||
• brahmaiva zazavadbhAti brahmaiva sthUlavat svayam |
• brahmaiva satataM nAnyat brahmaiva gururAtmanaH || 25||
• AtmajyotirahaM bhUtamahaM nAsti sadA svayam |
• svayameva paraM brahma svayameva cidavyayaH || 26||
• svayameva svayaM jyotiH svayaM sarvatra bhAsate |
• svayaM brahma svayaM dehaH svayaM pUrNaH paraH pumAn || 27||
• svayaM tattvamasi brahma svayaM bhAti prakAzakaH |
• svayaM jIvatvasaMzAntaH svayamIzvararUpavAn || 28||
• svayameva paraM brahma svayaM kevalamavyayaH |
• svayaM rAddhAntasiddhAntaH svayamAtmA prakAzakaH || 29||
• svayaM prakAzarUpAtmA svayamatyantanirmalaH |
• svayameva hi nityAtmA svayaM zuddhaH priyApriyaH || 30||
• svayameva svayaM svasthaH svayaM dehavivarjitaH |
• svayaM doSavihInAtmA svayamAkAzavat sthitaH || 31||
• akhaNDaH paripUrNo'hamakhaNDarasapUraNaH |
• akhaNDAnanda evAhamaparicchinnavigrahaH || 32||
• iti nizcitya pUrNAtmA brahmaiva na pRthak svayam |
• ahameva hi nityAtmA ahameva hi zAzvataH || 33||
• ahameva hi tadbrahma brahmaivAhaM jagatprabhuH |
• brahmaivAhaM nirAbhAso brahmaivAhaM nirAmayaH || 34||
• brahmaivAhaM cidAkAzo brahmaivAhaM nirantaraH |
• brahmaivAhaM mahAnando brahmaivAhaM sadAtmavAn || 35||
• brahmaivAhamanantAtmA brahmaivAhaM sukhaM param |
• brahmaivAhaM mahAmaunI sarvavRttAntavarjitaH || 36||
• brahmaivAhamidaM mithyA brahmaivAhaM jaganna hi |
• brahmaivAhaM na deho'smi brahmaivAhaM mahAdvayaH || 37||
• brahmaiva cittavadbhAti brahmaiva zivavat sadA |
• brahmaiva buddhivadbhAti brahmaiva phalavat svayam || 38||
• brahmaiva mUrtivadbhAti tadbrahmAsi na saMzayaH |
• brahmaiva kAlavadbhAti brahmaiva sakalAdivat || 39||
• brahmaiva bhUtivadbhAti brahmaiva jaDavat svayam |
• brahmaivauMkAravat sarvaM brahmaivauMkArarUpavat || 40||
• brahmaiva nAdavadbrahma nAsti bhedo na cAdvayam |
• satyaM satyaM punaH satyaM brahmaNo'nyanna kiJcana || 41||
• brahmaiva sarvamAtmaiva brahmaNo'nyanna kiJcana |
• sarvaM mithyA jaganmithyA dRzyatvAdghaTavat sadA || 42||
• brahmaivAhaM na sandehazcinmAtratvAdahaM sadA |
• brahmaiva zuddharUpatvAt dRgrUpatvAt svayaM mahat || 43||
• ahameva paraM brahma ahameva parAt paraH |
• ahameva manotIta ahameva jagatparaH || 44||
• ahameva hi nityAtmA ahaM mithyA svabhAvataH |
• Anando'haM nirAdhAro brahmaiva na ca kiJcana || 45||
• nAnyat kiJcidahaM brahma nAnyat kiJciccidavyayaH |
• Atmano'nyat paraM tucchamAtmano'nyadahaM nahi || 46||
• Atmano'nyanna me dehaH AtmaivAhaM na me malam |
• AtmanyevAtmanA cittamAtmaivAhaM na tat pRthak || 47||
• AtmaivAhamahaM zUnyamAtmaivAhaM sadA na me |
• AtmaivAhaM guNo nAsti Atmaiva na pRthak kvacit || 48||
• atyantAbhAva eva tvaM atyantAbhAvamIdRzam |
• atyantAbhAva evedamatyantAbhAvamaNvapi || 49||
• AtmaivAhaM paraM brahma sarvaM mithyA jagattrayam |
• ahameva paraM brahma ahameva paro guruH || 50||
• jIvabhAvaM sadAsatyaM zivasadbhAvamIdRzam |
• viSNuvadbhAvanAbhrAntiH sarvaM zazaviSANavat || 51||
• ahameva sadA pUrNaM ahameva nirantaram |
• nityatRpto nirAkAro brahmaivAhaM na saMzayaH || 52||
• ahameva parAnanda ahameva kSaNAntikaH |
• ahameva tvamevAhaM tvaM cAhaM nAsti nAsti hi || 53||
• vAcAmagocaro'haM vai vAGmano nAsti kalpitam |
• ahaM brahmaiva sarvAtmA ahaM brahmaiva nirmalaH || 54||
• ahaM brahmaiva cinmAtraM ahaM brahmaiva nityazaH |
• idaM ca sarvadA nAsti ahameva sadA sthiraH || 55||
• idaM sukhamahaM brahma idaM sukhamahaM jaDam |
• idaM brahma na sandehaH satyaM satyaM punaH punaH || 56||
• ityAtmavaibhavaM proktaM sarvalokeSu durlabham |
• sakRcchravaNamAtreNa brahmaiva bhavati svayam || 57||
• zAntidAntiparamA bhavatAntAH
• svAntabhAntamanizaM zazikAntam |
• antakAntakamaho kalayantaH
• vedamaulivacanaiH kila zAntAH || 58||

• || iti zrIzivarahasye zaGkarAkhye SaSThAMze RbhunidAghasaMvAde AtmavaibhavaprakaraNaM nAma viMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com